قال عبدالله بن دهيمش بن عبار يسند على خلف بن نزال المهيدي : 137

يالله طـلبتـك يالـولي ترحـم الـحـال *** وتـفـكـنـا مـن سـؤ شـر الـهـوايـل
الوقـت شتـت شملـنـا يا ابـن نـزال *** ولا عـاد بقي لغيـر كتب الرسايـل
الـلـي مـع الـبـدوان نـازل ورحــّال *** يتـلي مـرام المـاشيـة بـالخـمـايـل
والـلي مع البـلـدان يـدور الأعمـال *** ابعـد وفـاخـت ناقـضـات الجـدايـل
لا يا خلـف يا مسندي وقـتـنـا مـال *** سـود الليـالي عـاضبـت بالحمايـل
مـتى نشـاهـد حينـا وتلـك الأطـلال *** اللابـة الـلي دوم عـنـهـم انـسـايـل
اللابـة الـلي شوفهـم يفـرح الـبـال *** حمايـة الخـلـفـات يـوم الـصـوايـل
من عقبهم عدي على جمر الأملال *** عـدي عـلى صلو اللهب والملايـل
لمحـلا المرقـاب في روس الأقـذال *** شـم الجبـال الـلي تـزيـل الـغـلايـل
مالي جدا الا آخذ مع القاف منـوال *** فيض الروابع من جـديـد المثـايـل

* وقال عبدالله بن دهيمش بن عبار يسند على باني بن الأفنش رحمه الله : 138

راكـب الـلـي نـاجـبـه شــد الجـمـيح *** مشترينه كـاش مـن وسـط البراحـه
صـنع حـبـر وعـابـدٍ ديـن الـمـسيـح *** من سلايل جـورج مشهود بنجاحـه
راهـبٍ مـأمـون فـي شـغـلـه نـصيح *** يشتغـل بالعلـم فـي عـقـل ورجـاحـه
مـا قضى وقتـه مثـل راعـي وضيح *** ولا فـقـد مستـقبـلـه لأجـل السيـاحـه
صمـم المطـلـوب بـالمـركـب مـريح *** كمـل التـركيـب وأعـلـن بـافـتـتـاحـه
أن مشى ما تـوحي لصـوتـه فحـيح *** لـو بـطـانيج الـثـرى مـثـل الـفـلاحـه
يطـوي البيـداء تقـل عاصوف ريح *** كنـه الـلي بـالـفـضـاء رف بجـنـاحـه
سـافـر الـمـنـدوب بـالـبـر الـفسـيح *** مـا يـهـم دريـولـه بـعـد الـمـسـاحـــه
ســبـرمـان وسـايـقــه وجـه فـلـيـح *** معـتـني للـسالـمـي وجـهـت مـراحـه
مـرسلينـه صـوب كسـاب الـمـديــح *** مـا تـوقـف دون بــانـي بـاستـراحـه
يـبـذل الـتـرحـيـب بـلـسـان فـصـيـح *** بـالـتـهـلـي والبشـاشـه والسمـاحـه
بـلغ الـمـنعـور بـالـعـلـم الـصـحـيـح *** وأخبـره يا القرم في قـول الصراحه

وقال عبدالله بن دهيمش بن عبار يسند على نحيطر بن مصيّح : 139

سجـلـت بالمكتـوب مـا خـط الأقـلام *** وعبـرت مافـي خاطري بالرسالـه
اكتـب جـواب وارسلـه لأ بـو دحـام *** حـيثـه فهيـم ومـن رجـال الشكـالـه
ودعـتـني بالـطـيـر والـنـاس صيّـام *** حـيـث الـوداعـه والأمـانـة كـفـالـه
من يوم رحت طيوركم عندنا حشام *** مشعـل حفلهن عـدهـن مـن حلالـه
الطير من خبرك عـلى عـز واكـرام *** يطـرب عـلى التغريـد والقـلب دالـه
لا شــك حـاشــنـه مـقـاديــر الأيــام *** جاه المصير وسامك العرش شالـه
أمـر مـقـدر والضـرورة لهـا احكـام *** الخـلـف عـنـد الـلـه والـمـال مـالـه
طيـرك رحـل بالعيـد والعمـر مـا دام *** واحـد تـوفـى وضـل واحـد لحـالـه
يسـهـر خـويـه دوم بالـلـيـل مـا نـام *** يـنعـى زمـيـلـه مخـلـص بالزمالـه
قلت العوض بك قال عجل لنا شمام *** رح للـنسـيـم وهـات واحـد بــدالــه
عجل ترى ماني على خيـر ما ايـرام *** جب لي ونيس وبي تسوي جماله
قـلت احضره لـو كـان يغـليـه سـوام *** ومن حين جبنا صاحبه طاب فالـه
ولا مقصـدي مـن جـيـبتـه لـوم لـّوام *** أيضـاً ولا قـصـدي طلايـب وقالـه
لا شـك امـانـه والـعـرب تـتبـع النـام *** وأنـت اتخبـر تـرك الأمانـة رزالـه
عـلى الأمـانـة والعـهـد حـث الإسـلام *** ولا كل من يقدرعلى الحمل شاله

* وقال عبد الله بن عبار يسند على عبدالله بن شظيفة الشراري رحمه الله : 140

يـا أبـن شـظـيـفـة يا بـعـيـد الـهـدافي *** أشكي عـليك الحال يا أبـن شظيفـة
أضحك وأغـني والـلي بـالقـلب كافـي *** وأصبر على الشدات لو هي كليفـة
إلى ضاق بالـي هـاض مكنـون قافـي *** وأمليت مـا يملأ سطـور الصحيفـة
وأبـديـت مكنـونٍ عـلى النـاس خافـي *** أمثـال من نـفحـات فكـري طـريفـة
أسـهـر طويـل الليـل يـا الـلـه اتـكافي *** أقـنب قنيب الذيب وأهـرف هريفـه
وجـدي عـلى السجات بـيـن الفـيافـي *** وجـدي عـلى رقـي الجبال المنيفـه
يـا زيـن مشي البـر لـو كـنـت حـافـي *** لا صار خطو الروض مثل القطيفة
بفـصل الربـيع الـلي بـه الـجـو دافـي *** بس القـطا بالـريـع تـوحـي رفـيفـه
تـلقـا الغـديـرالـلي بـه النـقـع صـافـي *** بـيـن الخـمايـل والفياض المريـفـه
مـنـازل الـبـدوان ريـف الـضـعـافـــي *** أهـل الحجـا كـلـن يـرحـب بـضيفـه
مـقـطـانهـم بالقيض وقـت أصطيـافي *** بـه تجتمع شـمـل القلـوب الـوليفـة
وأشوف الـلي شوفـه يزيـل الخلافـي *** وألحـق مـنات مـراد قـلبي وكيـفــه
وأحـظى بـلامى الـلي بـودي مصافي *** شفـي مـن الخـفـرات شما عـفيـفـة
هـي مطـلبي مـن لابسـات الـغـدافـي *** مـن ربعـي الأدنـيـن مـا هـي لفيـفـه
لـوهــني مـن لايــمــه بــالــزفــافـي *** بـربـيـع عـمـره قبـل يـأتـي خـريفـه
ولا أبـغـاه بـا الـلي للشريعـة أينافـي *** ودي بشـرع الـلـه ما هي خـطيـفـة
وش يجمع الـلي حـال دونـه مهـافي *** لـلـي سـكـن بـديـار وادي حـنـيـفــة

* وقال عبدالله بن دهيمش بن عبار يسند على إبراهيم الحداد : 141

كـتـبـت مـن بـدع الـقـوافـي مـشــده *** مهـديـه لإبراهيـم قـرم الـرجاجيـل
يـشكي عليـنا مـن الـهـوا بـاح سـده *** الـوجـد بـلـوا والـمحـبـة غـرابيـل
يـا مـن شكيـت مـن الـغـلا والـمـوده *** الحـب عـذب بـالـرجـال الحلاحيـل
مـن صـد يـا إبـراهـيـم خـلـه بـصـده *** كـبـه ولا تـكـثـر عـلـيـه الـولاويـل
وش عاد لو يضوي كما البـدر خـده *** ابعـد عنـه لـو كـان زينـه تهاويـل
وش عـاد لو شـقـر الجـدايــل تـكـده *** سبـيب شـقـرا لاكـده بأول الخـيـل
لـو كـان يـوقـف فـي طـريـقـك تعـده *** مـا دام حبـه لـك خـديعـة وتضليل
صاحبك وأن حـدك عـلى الجـال حده *** ومن باق بك سكر عليه المداخيل
وأن صـدت صيـدك يـالسنافـي تغـده *** صـد السمان ولا تصيـد المهازيـل
وأن جـيـت تلبس لـك قميـص تـقـده *** ولا تلبسه يالقرم من دون تفصيل

* وقال عبد الله بن عبار يسند عـلى عـواد بـن شقا الشمري : 142

يـا أبـو شقـا بالراس بانـت علامـات *** وضـح مثـل نبـت النـصي والثمامي
مـا حـان شيـبي كـان لـلشيب حـّزات *** شيبت قبل الشيب ما أدري علامـي
مـا هـو كبـر لكـن هضايـم وحسرات *** جـور الزمن شيّب رضيع الفطامـي
يا الضيغمي يـا نسـل زبـن الـونيـات *** يا أبو شقا يا أبـن الرجال الحشامي
وش يجـمع الـلي مـوطنـه بالقـريات *** لـلـي سـكـن نـجـران بـديـار يــامـي
أحـيـان مـا بـيـن الـيـمـن والإمـارات *** وأحيـان بـيـن العـان وأم الحمامـي
شـفـي شـمـال وبـيـن ربـع شـمـالات *** لا ما الرفاقـة هي شفـات المرامـي
لاشـك دون الـربـع حـالـت مسـافـات *** مـتـى أيـتجـمـع شمـلـنـا بالتـمـامي
قـمـت أتـسـلا عـقـبـهـم بـالـمـجــلات *** وقلبي عليهـم يا فتى الجـود ظامي
مـدري مـتى ناخـذ مع البـدو سجـات *** كي نستريـح من الوهـق والهيامي
عساي أشوف الزين سيـد الخوندات *** هي مطـلبي مـن ناقشـات الوشامي
هيهات أبي أنسى ناعم العود هيهات *** العـيـن عـقـبـه مـا تـذوق المنـامـي
أشكي عـلى رفـّاع سـبـع السـمـاوات *** الخالـق الـرزاق مـنشي الغـمـامـي
عسـاه يجـمع شملـنـا عـقـب غـيبـات *** وعسى بشرع الله يحـقـق حلامـي
حبـه سكـن وأستوطن القـلب بالـذات *** حـبـه تـوغــل باللـحـم والعـظـامـي
وجـدي عليهـا ولا تـفيـد الحسـافـات *** وجـد السجيـن الـلـي ولاه النظامـي
عـلـيـه بـالتحـقـيـق عـشـرة مـلـفـات *** يبي الخلاص ولا حصل له محامـي
حـالـوا عـليـه ولا تـفـيـد الـوساطـات *** ولا لـه جـدا لكـود عـض البهـامـي
أو وجد من صابه مع الجوف طعنات *** يـون من جرحـه طعـيـن الحسامي
رمــوه عـدوانــه بـصـلـو الـعـيـارات *** وصابـه مغـل من القوانيص رامـي
مـن لامـنـي يـبـلاه ربـي بـالآفـــــات *** ويحـل بـه داي البـرص والجذامـي
ولا عسى يـعـرض عـلى كـل شمـّات *** ويصبح كما اللي شايف الغبن كامي

* قال عبدالله بن دهيمش بن عبار هذه القصيدة مجاراة لقصيدة الشاعر
راشد بن كليب يثني على عبدالله بن محمد الزير : 143

جيـت بيـت الـلي يكـرم مـن يجـيـه *** ومـن يـزور الـزيـر يلقـاه بحـفـاوه
شوقـني راشـد وهـو يثـني عـلـيـه *** قـال كانـك ما صدقـت المدح خـاوه
مجـلسه تشفـق عـليـه وتشتـهـيـه *** فـيـه مـن سلم الحضـارة والـبـداوه
قـلـط الـفـنجـال والـشـاهـي يـلـيــه *** والبخور محضره من سوق جـاوه
والعشـاء بالـمـيـز دايـم محـتسـيـه *** أبيض القصدير من فوقـه غشـاوه
مـن وصف جوده بتوصيفـه يـتيـه *** عـايشه فـي نعـمتـه حـتى القطـاوه
قـال راشـد كـن حـاتـم لـه شـبـيــه *** بالـكـرم يـمـنـاه تـشـبـه شــط راوه
بــدد أمـوالـه ولا صـر الـجـنـيــــه *** سفـرتـه مـثـل الشـرايـع بالسمـاوه
لـو يـلـم الـمـال عــيـنـه تــزدريــه *** كـن مـالـه بــيـنـه وبـيـنــه عــداوه
لـو بخـل بالمـال مـا سـمي وجـيـه *** ومـن يـدور المرجلـه يصبح قـداوه
الـفـخـر مـن حـر مـالـه يـشـتـريـه *** والـده ربـاه واحـسـن بـالـغـــــذاوه
كـم مـعـسـر فـك ديـنـه يـحـتـريـــه *** عـقب شـرب الـمـر ذوقـه الحـلاوة
وكـم واحـد جـاه عـــده يــدعــيـــه *** جــاه كـنــه يـطـلـبـه بــاج وأتــاوه
سـخـره مـولاه لـلـخـيـر ايـهــديــه *** والـذهـب زايـل وتجـمـيعـه غـبـاوه
مـع خصـال الجـود فهمـان ونبـيـه *** بـه سجايا راسخـه فهـم وصحـاوه
عن طواريق الـردى عرضه نزيـه *** طـاهـر الـنـيـه وقـلـبـه بـه نـقــاوه
مـا تخـضـّع لـلـهـدانـي والـسـفـيـه *** فـيـه جـود وحلـم مع ليـن وقساوه
أمـدح الـطـيــّب ولانـي مـرتـجـيــه *** صنت عز النفس عن حكي الفلاوه
والـعـلـوم الـطـايـلـه كـلـن يــبـيـــه *** ومن يحوش الطايله يطلب عـلاوه
ومن يـدور الطيب حـقـه مـا نسيـه *** والفخـر والعـز له مـعـنـا وطـراوه