تابع
قال عبدالله بن عبار العنزي بمناسبة الحفل المقام على شرف الشيخ فهد الثنيان الشمري
شيخ الزميل عند الشيخ صالح بن الأمعط العواجي شيخ ولد سليمان وعبدالله بن مزعل
المطرفي من وجهاء المطارفة والشيخ تركي بن مناحي المجلاد من أهل الشعيبة والفاضل
محمد بن شويمان الجروان من وجهاء قبيلة السهول من الجعافرة والأفاضل لافي ومزعل
ورفادة أبناء عبدالله بن صنعاء من كبار ووجها السهول في مطلع شهر ذو القعدة لعام 1426هـ : 195
الـكـل رحـب فـي زيـارة كـحـيـــلان *** شيخ الزميل أهل العلوم المراميس
يـا مـرحبـابـك يـا خـلايــف ثـنـيـان *** عـم الـفـرح بـزيـارتـك والتوانـيس
حـلـيـت أهـلا بـيـن حـيـّك وحـيــان *** وطيـت سهـلا ولا بدربك تضاريس
فـرحوبك شيوخ القبيلـة والأعـيـان *** حيث الذي شرواك نـور المجاليس
ولابـه عـنـزي الا بـلقـيـاك فـرحـان *** فـي مجـلس مـابـه وجيـه معابيس
شرفت حفل المطرفي مفني الضان *** عبدالـلـه المـزعـل كعـام المناحيس
ومحمد شويمان مـن نسل جـروان *** يمينه أكـرم مـن هـبـوب النسانيس
وعيال عبدالله أهـل جـود واحسان *** والنعـم بالصنعـا ولا قـلـت توهيس
والشيخ صالح نسل قـواد الأضعان *** شيخ القبـيلـة مـن سلايـل قـرينيس
نعـم الـرجال اليـا تناخـوا بعـوجـان *** صافين مـن صفوة حمايل وفـريس
شيخ الشمـل مـقـدام لابـة سليمـان *** أخـو ذكـر حـّلال عـقـد الـلـوالـيــس
لابـة هـل الجدعا صواريـم عـقبـان *** من روس وايل بالفخرمابهم هيس
مـقـدامهـم صالح فـزع كـل بلشـان *** شيخ لربعه كـرس الجهـد تـكـريس
ومناحي وتركي من أحفـاد فـوزان *** مـن لابـة شجعـان مـاهـم هـلابـيس
أبـو ولـيـد الشيخ من عقب حمدان *** راع النعوس الليث حبس الملابيس
بالمحفـل الـلي ضـم شـمـر اويـلان *** يجلي عن نفوس الرجال التعاميس
على شرف شيخ من طوال الأيمان *** فهـد سليـل مـأسس المجـد تأسيس
شيخ الزميل اللي مثل طير حـوران *** فهد أبـو فيصل ولد مـرذي العـيس
شيخ مصيّت من صماصيم شيخـان *** شيـخ لكسب الطايله يـفـرع الكيس
وبرجس أبن عرعر خلايف ظبيـان *** تـرثـت بـواسل للعجـاجـه مـدابيس
منسوب ساسه من مجاذيب شجعان *** الـلي يقودون الجموع المطاويس
وأبـو فـهـد هـزاع للطـيـب عـنـوان *** دايـم يغـرس من الجمايل مغاريس
القرم من عقب المطوطح وروسان *** يفرح ضمير اللي شكاله حواسيس
ساهم بتطوير الـوطن والسعـد زان *** يـفـرا الجـبـال ونـابيات الطعاميس
ومحـمـد الحـمـاد مـن صلـب جـدان *** الخمعلي عـز الطروش العواسيس
من جودهم سموهم النـاس بـلجـان *** منـوة مـناكـيـف الغـزاه المراويس
والعفـو ما قصدي للأجواد حـقـران *** مـن لا ورد طاريـه ماهـم حماليس
قلته وقولي صدق والهـرج وكـدان *** ولا قـلـت منظـومي تملق وتـدليس
هاض الضمير ونظـم البـال قـيفـان *** تعبيـرمن فكري مشاعر وأحاسيس
أبي امتدح شمـر وسيعين الأطعـان *** يـوم الفـرنج ويـوم قـدح المقابيس
كبار الصحون ومشبعت كل جيعـان *** وقـت الظـلام يـولـعـون الفـوانيس
حتى اليـا جـوا تـالي الليـل ضيفـان *** متـلطميـن ويشعـبـون الحـراسيس
بـبـيـوت شمـر يبتهـج كـل عمسان *** برباعهـم تسمع صليـل المهـاريس
ينعشك فـوح الهيـل بـدلال رسـلان *** ويجذبك ريح البن وسط المحاميس
شمر يرومون الفخر جهـر واعلان *** هاموا وشاموا عن ملامه وتدنيس
غـلبـا الطنـايا من قـديـم لهـم شـان *** والنعم في زوبع وعـبـده سناعيس
وأهـل اللحيسه زادهم يملأ الأجفان *** تـقـليطهم جـزلات ما هي لحاويس
غير الكـرم بهم الشجاعة بالأكـوان *** أهـل الفعـايـل كاسبيـن النـوامـيس
شمر بهم عن ضيم الأضداد مزبان *** زبـن المجنى يـوم عصر المتاريس
وعـيـال وايـل بالفخـر عـلمهم بـان *** أفـعـالهـم مـا تـنحصي بالكـراريس
تمجيدهم مـا يـدركـه منطـق لسـان *** من وصفهم كـل القـلم والقـراطيس
واليوم من فضل الولي كلنا اخوان *** نمشي عـلى نهج الشريعـة بتقييس
فـي حكـم عبـداللـه ملكنا وسلطـان *** متـوارثـيـن المجـد مهنـة وتـدريس
سادوا بحكم الشرع والعدل ميـزان *** بحد الحسام الـلي يقص الفواعيس
تمسكوا بدين الهـدى خيـر الأديـان *** مـا بـدلـوا صـوت الأذان بنـواقـيس
عـن دينهم ما راعهم جور عـدوان *** الـلي تحـوك الكيـد خـلف الكواليس
عـدوانـهـم نالـوا مهـونـة وخـذلان *** وصدقانهم مـا يـوم عـادوا مفاليس
حكـامنـا نـدعـي لهـم كـل الأحـيـان *** عـنـا يـشيلـون الحـمـول المكاديس
والختم صلوا على من زال الأوثان *** المصطفى طاريه يجلي الهواجيس
ونعـوذ بالـمعبود مـن كـل شيطـان *** ونلـوذ بالرحمن مـن نـزغـة إبليس
قال عبدالله بن عبار بمناسبة شفاء الشيخ صالح بن الأمعط العواجي : 196
يـزول شـّرك يـا زعـيـم الـقـبـيـلــه *** والحمـد لـلـه يـوم طبـت وتعـافيـت
يـا عـل عـنـك البـاس ربـي يـزيلـه *** وياعل يحميك الولي حامي البـيـت
وعسى تـدوم أيـام عـمـرك طويلـه *** ويعـطيـك خـلاق الـمـلأ مـا تمنيـت
يا أبـو طـلال الـلي فعولك جـزيـلـه *** الكـل يفرح يـوم مـن غيبتـك جيـت
مـاجـور يـا نسل الشجـاع وسليلـه *** الذيب الأمعط طيّب الذكـّر والصيت
أبـوك شيخ ومـن تضايق يجـي لـه *** أخـو ذكـر علمه مثـل ساطع الليت
أخـو ذكـر يـوم الـزمـن مـال ميـلـه *** ما قـال من كثـر الهواشل تـوذيـت
ما غاض بيتـه من ضنا عبيـد ليلـه *** يمشي بلازمهم ويذبح لهـم عـيـت
اليـا وقـع حـمـل العـبـيـدي يشيـلـه *** جـمـّع نزايع لابـتـه عـقـب تشتيت
عـساه يـنـعـم بـالجـنـان الظـلـيـلـه *** وأنـت العوض بـه للقبيلـه تـولـيت
تحجون من قـلـت عـلـيـه الوسيلـه *** أبــوك وأنــت ولابـتـك مـا تـرديـت
حيثـك من اصحاب الأخلاق النبيله *** مـا يـوم عـن لازم عـوانيـك كـنيـت
تتعب على الطوله وعـلم الفضيلـه *** وتشوم لصروح العـلا مـا تخـفيـت
وتـشيل صعبـات الحمـول الثـقيلـه *** لـو ثقل حملك مـا ذكـر يوم جضيت
مقـدم هـل الجـدعـا حـمات الدبيلـه *** بالمرجله والطيب يا نعم ما طـريت
شجعـان بسروج المهـار الأصيـلـه *** واليا لفيت بيوتهم حـي مـا الفـيـت
عـاداتهـم كسـب الفـخـر والنفـيلـه *** صانوا شرفهم عن ملام الشواميت
يـوم المراجـل بالسيـوف الصقيلـه *** يـروون حـد المرهفـات المصاليـت
قـبـلي ابـو شـأيـم ذكـرهـم بـقـيـلـه *** يفخر بهم بالملحمه مثل ما اوحيت
الـمـجـد واسـع والـقـوافـي قـلـيلـه *** ومهما ذكرت افعالهم مـا تحاصيت
ويـوم دعـانـا الـطـوب مكرم نزيلـه *** جيت وعلى شوف الرفاقه تشفيت
قال عبدالله بن دهيمش بن عبار العنزي بمناسبة الحفل المقام على شرف مشايخ من قبيلة عنزة وشمر
من قبل الشيخ برجس بن عرعر بن ظبيان والشيخ محمد بن حماد البليجا الخمعلي في عرعر ورفحا : 197
بسـم الـولـي رب العـبـاد افـتـتـحـنـا *** مبـدأ القـوافي مـن صميم القـريحه
نظم القريض أعرض مجاله وبحنـا *** باشعار مـن فيض المشاعر نفيحـه
عـن سـر مكنون الضماير فـصحنـا *** وشـذا عـبيـر صدورنـا فـاح ريـحـه
للقـاف بـلسـان الفـصاحـه صدحـنـا *** والفـكـر عـبـّر بالهـروج الفـصيحـه
مهـمـا اسهبـنـا بـالكـلام وشـرحـنـا *** عـن مـا نريد القاف ينضب نضيحـه
مـن عاصمة نجـد العـذيـه سـرحـنـا *** نـطـوي سمـاهيـد الديـار الفسيـحـه
دعونا أهـل عـرعـر ورفحا ورحنـا *** كـي نـلتـقي بـأهـل العـلـوم المليحـه
الـلـي بـعـرفـتهـم كسـبـنـا وربـحـنـا *** أهـل المعـانـي والعـقـول الـرجيحـه
نشكـر جنـاب الـلي عطانـا ومنحـنـا *** ساعات مـن فرصة زمـانـه يـتيحـه
حيـث اجتماع الـربـع زاود فـرحـنـا *** يـومٍ جـمـع كـل الـوجـيـه الفـلـيـحـه
بحكم الملوك الـلي جلـو كـل شحنـا *** بالـعـدل وأنـوار الحقـايـق مضيـحـه
المصلحيـن الـلي بسبـبهـم صلحـنـا *** نسـل الزعيم الـليث منجي طـريحـه
ديـن الهدى على التعـاون نـصحنـا *** في نص أحاديث الرسول الصحيحه
واليـوم مـن فضل الكريـم أسترحنـا *** جـزنـا وعـقـلنـا الـركـاب المشيحـه
زالـت حـزازات القـلـوب وسمحـنـا *** والـلي اقـتـرف مـنـا خـطيـه نبـيحـه
للسلـّم مـن عـقـب التشاحن جنحنـا *** وقـلوبنا أنصع من بياض الصفيحـه
عـن السلـوم الطيـبـه مـا صـفـحـنـا *** وحـنـا وشمـر كـلـنـا مـن شـريـحـه
حـنـا وشـمـر للـمـراجـل شـبـحـنـــا *** السلـم واحـد والضـمـايـر نـصيـحـه
تـطــابــقـت عـاداتــنـا واقــتـرحــنـا *** نـبـقـا لـبـعـضنـا بالـلـوازم مـنـيحـه
وأن دار دالـوب الـزمـان ونـزحــنـا *** لـديـار شـمـر والـجـوايـح مجـيـحـه
أدنـاهـم الـلـي بـالـتـهـلـي نـطـحـنـا *** زيـن النـبـا يـقـريـك قـبـل الـذبـيحـه
مهـمـا لـشـمـر بـالقـصايـد مـدحـنـا *** غـلـبـا الطـنـايـا مـا نـوفـي مـديـحـه
شجعـان يـوم السيـف بالكـف يحـنـا *** وأهـل كـرم يـوم المكـايـل شحـيحـه
وحـنـا بـعـد فـي قـمـة المجـد لحـنـا *** نشـوم عـن فـعـل السلوم القـبـيحـه
وش عاد لو عصر العلوم اكتسحنـا *** ما ننجرف مع كـل موضه وصيحـه
المـرجلـه فـيهـا أخـتبـرنـا ونجحـنـا *** نـفــوز وقـلـوب الأعـادي جـريـحـه
ولا اقـول فـي كـل القـبايـل رجحـنـا *** ندرى البخت والحظ نخشى مطيحـه
نـمـدح صنـاديـد العـرب مـا قـدحـنـا *** بأهل النجور الـلي يشوقـك ضبيحه
قـلنـا الهـروج الصاملـه مـا مـزحنـا *** وهـرج بـلا برهـان عيـب وفضيحه
تـم الـجـواب ولا عـن الـحـق زحـنـا *** وصلوا على اللي بالمدينه ضريحه
قال عبدالله بن دهيمش بن عبار العنزي هذه القصيدة بمناسبة الحفل المقام
من قبل الشيخ برجس بن عـرعـر بن ظبيان الدهمشي في منطقة عـرعـر
على شرف عدد من مشائخ القبائل ورجال قبيلة عنزة وغيرهم : 198
الـلي يجـيـد القـاف واجـب يسـاهـم *** اعـرض مجـالـه ثـم سجـلت قـايـل
حـي الـرجـال الـلـي بـعـيـدٍ مـداهـم *** بـديـار لابـه مــن شـغـامـيـم وايــل
الـلابـه الـلي يـبتهـج مـن نصـاهـم *** افـعـالـهـم مـبـطـي عـلـيـهـا دلايــل
حـي الـرجـال الـلـي كـرام لـحـاهـم *** يـا مـرحـبـا بـعـداد نـبـت الخمـايـل
حـي الـرجـال الـلي فـرحنـا بلقاهـم *** جـمـع تجّـمـع مـن جـميـع القبـايـل
حـي الرجـال ويسعد الـلـه مساهـم *** نعـتـز فـي طـاري عـمـوم الحمايـل
الشيـخ بـرجـس للكـرامـه دعـاهـم *** مـن العـاصمه للجوف لحدود حايل
لبـولـه الدعـوه وجـوا مـن قـراهـم *** مـن ديـرة الشملي وبـيضـا نـثـايـل
فرحوا أهل عـرعـر ونـّور سماهـم *** والـدور يضوي نـورها لـه شعايـل
وتبـاشروا بقـدومهـم مـن غـلاهــم *** أهـل الشهـامـة والعـلـوم الجـزايل
وأهـدافـهـم يـدري بـهـا كـل فـاهـم *** غـيـر التعـارف مالهـم مـن وسايل
سـلايـل الأجـواد نـطـلـب عـسـاهـم *** دايـم بـعـز ويـدركـون الـنـفـايـــــل
الـلي عـلى العـادات ربـوا ضنـاهـم *** عبـر الـزمن ما سلم الأجواد زايـل
رب العـبـاد مـن الفـضيلـه عطاهـم *** عـاداتـهـم بالطـيـب فـعـل الجمايـل
أفـرادهـم وشخوصهم واوموراهـم *** الـكـل بـاعـه بـالـمـواجـيـب طـايـل
عـز الغريب اليـا نـزل فـي حمـاهـم *** ريـف الهواشـل مكـرمين النـزايـل
صانـوا شرف جيرانهـم وقصراهـم *** الجـار يـمـدحهـم الـيـا شـد شـايـل
زبـن الدخيـل وضيفهـم مـا شناهـم *** لـهـم بـجـزلات الـمـعـانـي عـمايـل
والـيـوم جـمـيـع الـقـبـايـل تـراهــم *** صـاروا قـرايـب كلهـم من فصايـل
شعـب الجزيـرة حقـق الـلـه مناهـم *** عـم الـرخا مـن عقب شح المكايـل
زال الجهـل والـلـه بـهديـه هـداهـم *** وزالت كوابيس الظروف الهوايـل
وأكـبـر دليـل أخـلاصهم لـزعماهـم *** أهل الصخى والجود بيض الفوايل
يـعـرف تـضامنهـم ويعـرف ولاهـم *** ويعـرف تفانيهم الـيـا عـال عـايـل
تـكـاتـفـوا والـلـه رفـع مـستـواهـم *** بـقـيـادة المـقـرن اعـراب السلايـل
فـي ضل الـلي شعبه يدوّر رضاهم *** العـاهـل المحـبـوب للحـمـل شـايـل
رب المـلأ عـن كـل عـايـق وقـاهـم *** مـن سؤ كيد أهـل الحسد والدغايل
قـول الـمـدايح والإشـادة زهــاهــم *** لهم الفخـر والمجد صدق وصمايل
عـديـت لمـحـه مـن مكـارم وفـاهـم *** وأرجـو السموحة بالبيوت القلايل
بمناسبة دعوة الشيخ برجس بن عرعر بن ظبيان الدهمشي لمشائخ وأعيان عدد من القبائل في مدينة عرعر
في التاسع عشر من شهر جماد الثاني عام 1433هـ قال عبدالله بن دهيمش بن عبار هذه القصيدة : 199
جينـا لحـفـل الـلي لعـلـم الفخـر شام *** يشفق على الطوله ويبعد عن اللـوم
الشيـخ برجس يـفعـل الـطيـب جـزّام *** عــوايـده طـبـع الـكـرم دايــم الــدوم
سـلايـل ظـبـيــان وافــيـن واحـشــام *** الـكـل مـنـهـم طـيّـب الذكّـر شغـمـوم
من ساس عزوة للفخر تحمـل وسام *** نالـوا عـلى العـليا شهادات واخـتـوم
عـزوة محـددت الجـمـل فعـلهـم هـام *** تاريخهم من ماضي العصـر مفهـوم
ريـف النكيف اللي عـلى الـزاد معتام *** يـوم الجفاء والجـوع والكيل معـدوم
قلته ومن يمدح هل الطيب مـا ايـلام *** والطيب مبطي بـيـن الأجواد مقسوم
ولـو أبـي أعـدد كـل فـارس ومـقـدام *** تمجيـدهـم مـا حـاط بـه كـل منـظـوم
ألـعـام يـأتـي فـيـه عـيـديـن بـالـعــام *** والثالـث من اعـيـادنـا عيـدنـا اليـوم
حـي الـرجـال الـلي مشاكيل وافـهـام *** حـي الـقـروم الـلي مجـانـيهـم قـروم
الـلـه يـحـيـيـكـم عـلـى عــز وأكــرام *** فـي محـفـل العـياش ذبـاحـت الـكـوم
ماريد أخص المدح في بعض الاقسام *** كـل القبـايـل بالفضـايـل لهـا سهـوم
يصعب على الشاعر ولو عنده المـام *** هيهات يحصى المجد لو كان معلوم
أنتـم شخوص ومـن مشاهير وأعلام *** صيـد الحـمايـل ملـتجـأ كـل مضيـوم
الكـفـوا يـزهـاكـم وعشـرات الأنـعـام *** يامـن لكـم بالطيـب عـادات واسلـوم
يوم الفخـر والمجد في رمح واحسام *** أنـتـم احـفـاد مـروّيـت كـل مسـمـوم
شـجـعـان كـانـه دق لـلـحـرب دمـــام *** وأبطـال بالميـدان يـوم الـعـرب قـوم
واليوم صرناأخوان واصهار وارحام *** ولا عـاد بـه هـازم ولا فـيـه مهـزوم
بجـهـود مـن طـبـق تـعـاليـم الإسـلام *** الـبـاسـل الـلـي للـرجـاجـيـل قـيـدوم
عبـدالعـزيـز الليـث مـجـنـاه ضرغـام *** الصيرمي منجوب من وكـر صيروم
بـه من كـرم مـعـن وبـه عـز بسطـام *** وبه من فخـر هوذه وفتك أبن كلثوم
صقـر الجزيـره سادهـا والسعـد قـام *** واصدر على توحيد الأوطان مرسوم
من غربي الساحل إلى مشرق الشام *** عـّذّا جـنـاب الـدار عـن كـل مـثـلــوم
رفـرف علمهـا فـوق رايـات وأعـلام *** وحكم بهدي اللي عن العيب معصوم
عـبـدالـعـزيـز الـلـي لـلأضـداد لـطّـام *** نطلـب عساه بجـنـة الخـلـد مـرحـوم
صنديـد مـا سـاوم عـلى الـدار سـوّام *** رحــل وسـلـمـهـا لـلأنـجـال تـسلـوم
حـكّـام تـنجـب مـن صماصيـم حـكّـام *** يـفـخـر بـعـادل حكمهـم كـل محـكـوم
يـوجـد بـهـم مـثـل المهلـهـل وهـمّـام *** عـدوهـم يدبـر عـلى الخشم ملـطـوم
زبـن الدخيل الـلي مـن القهـر منظام *** وملاذ الـلي جاهـم من الغبن مظلـوم
في ضلهم عشنا على خيـر ما ايـرام *** ما منهـم الـلي يحمـل الكبـر والـزوم
تـاريـخ مـاضيـهـم مـسـجّـل بـالأقـلام *** عـبـر الوثـايـق بـالسجـّلات مـرقـوم
عـثـمـان سجـل فـعـلهـم وابـن غـنـاّم *** هم عـز من يشكي كوابيس واهموم
يوم الزمان اللي مثل عـصر الأصنام *** لـبّـوا نـدا شيح من الغـيض مـكـلـوم
القـاضي الـلـي يسهـر الليـل مـا نـام *** شاف المناكر والتجا الشيخ مـزحـوم
عاهده أبن مقرن على دحر الأخصام *** حـتـى يـقــر بــزلـتــه كــل مـتـهــوم
كانـوا عـلى مذهـب من الشرك هـدّام *** وأرشدهم الـلي بقوة الحـق مدعـوم
من عـزوة المقرن عسى عـزهـم دام *** مـن ساد منهم يحمي الديـن ملـزوم
زالـوا خـرافـات الجـهـالـة والأوهـام *** عـلى الضلالة والجهل شنوا اهجوم
احـفـاد الـلي صـدّوا طوابير الأعجام *** فـوق الجيـاد وقـوضوا دولـة الـروم
يحفـظـهـم الـلي بـغـايـة السـر عـّلام *** رب الـخـلايـق مـالـك الـمـلـك قـيّــوم
قال عبدالله بن دهيمش بن عبار هذه القصيدة يثني على الرجل الفاضل الشيخ برجس بن عرعر
بن شاعف الضبيان من مشايخ قبيلة المحلف من الدهامشة ويشيد بمواقفه المشرّفه : 200
قـال الـذي صاغ الـقـوافـي ونـظـّمهـا *** بحـر الشعـر موجـه تلاطم مـرافيها
مهـديـه لـلي حـروف القـاف يفهمهـا *** برجس أبن عـرعـر يحلـل قـوافيهـا
برجس تبع سلم الجـدود ومكـارمهـا *** مكـارمـه مـدح الـثـنـاء مـا يـوفـيهـا
نـسل الحـمـايـل عسى ربـي يسلمهـا *** لـي الشرف أمـدح فـعـايـل سنافيهـا
مـن والـده كـل الـمـراجـل تـعــلّـمهـا *** والـنـار تقبس من مقابس مجـافيهـا
نـفسه عـن دروب الَضلالات ينهمهـا *** تبقّى عـفيفـه نـزعـة الشـر مـافيهـا
يـامـا مـن الحشـوا للضيفان قـدّمـهـا *** والضان لضيوفـه يـقـلّـط هـرافـيهـا
بالجـود مـا هـمّـه خـسايـر تـغـّرمهـا *** عـلى الكـرم تشهد قـدوره واثـافيهـا
من عـزوة نالـت من المجد مسهمهـا *** يوم المغازي خفاف الهجن تحفيهـا
عـن المـراجـل مـا تـرخّـت عـزايمها *** أفـعـالـهـا فـي سجـل المجـد يكـفيهـا
وبـيـوتهـم مـثـل الشوامخ معـالمـهـا *** يسعد بهـا الـلي سنين الجوع يلفيها
عـدوانـهـم بالكـون تكـثـر هـزايـمها *** يخشى المعادي من مطاعن شلافيها
العـزوه اللي خشوم الأضداد تلطمها *** تفنا العدا وصدور الأصحاب تشفيها
بـرجس جـهـودي للقبيـلـه يـقـيـّمهـا *** ولـو شاف خملة رفيع الشان رافيها
شهم الرجال أهـل الفضايل يحشمهـا *** أبـو زياد أهـل الـرذايـل ايـجـافـيـهـا
مـن يشمـت رجـال القبيلـه ويظلمهـا *** فـي منهجـه كـل الـتـقـالـيـد نـافـيهـا
والـلي بـني وايـل يـبـوح بمثـالـمـهـا *** يوم قدحوا بجدودنا قـلـت وش فيها
وأهـل الجحود الـلي تـوزع قسايمها *** الـلـه مـن أمراض الضماير يعافيهـا
يـا شيـخ مـا يشكـل عـليـه شتـايمهـا *** مـن بـاع حـظّه ذّمـتـه دوم يهـفيـهـا
دام الـنـمـايـم والـي الكـون حـرمـّهـا *** ما انسامح أصحاب البلابـل ونعفيها
مـن ألـف إنسـاب القبـيـلـه ولـيمـهـا *** في كـتب عـن كـل الشوايب مصفيها
ومـن الـذي يشنـا القرايب ويتهمهـا *** يـبي النحايـل عـلى الـويلان يضفيها
جـدود حـقـرّ بـهـا وجـدود عـظـمّهـا *** مـرامـه أنـوار الـحـقايـق يـطـفـيـهـا
واللي المصادر عـلى كيفه يترجمهـا *** مـا يـقـدر يـزيـل المـراجع ويخـفيها
مـا يـربح الـلي هـل التزوير يدعمها *** مـا يـدري أنـه بالمـهـافي يهـلـفيـهـا
وش الـذي غـطّـى القبيلـه ونـومهـا *** لابـد مـا نيقـض مـن الـنـوم غـافـيها
قال الشاعر عبدالله بن دهيمش بن عبار العنزي هذه الأبيات يثني على اللواء علي المدبل 201
سجلت منظـومي يالأجـواد مجبـور *** يـا سامعيـن القـول لي لا تـلومـون
يا عـلي بـن مدبـل تجـملت مشكـور *** أشكرك بلسان الثـناء ألـف مليـون
يا صاحب المعروف بالخير مذكـور *** لا زلت لـك يالقرم بالفضل مديـون
وفيـت بالواجب ولا جيـت بقـصـور *** وأنت المجـرّب باللـّوازم ومبخـون
ماهي غريبه منك يا صايب الشـور *** حيثك من الـلي بالمواجيب يوفـون
يالوايلي مجناك مـن مـاكـر صقـور *** مـا ذكـر بجـدودك هلابيج وعفـون
فـخـر جـدودك بالتـواريخ مسطـور *** خط بسجل المجد من خمسة قرون
نسل الجدود الـلي لهم بالفخـر دور *** رومي ولـد وطبان والناس يدرون
سليل من علمه مـع الناس مشهور *** حمايل مـن صلـب مرخـان يعـزون
يا فزعت العاني اليـا جاك مضـرور *** أنـت الـذي شـرواك للملتـزم عـون
جـيتـك ولا ذخـرت يالقـرم مـذخـور *** عـنيت نـاصي والأجـاويـد ينصون
ورجعت راضي من قبالك ومسرور *** جـمالتك وصلت وأنا منـك ممنـون
كـرمـت لـي بالـرقم تشكر وماجـور *** مجهـد ولا تذخر من الجهد مكنون
وقال عبدالله بن دهيمش العبار هذه القصيدة يسند على العميد سليمان بن سعدون : 202
قال الذي سجل مـن القـاف منشور *** أبيات مـن نظمي لها الناس يقرون
أسند على قرم من الغـوش منعـور *** أبن شبيب الهاشمي نسل سعـدون
جـده زعيـم المنتـفـق مشعـل النـور *** مـن روس لابـه بالمكـارم يعـيـون
زبـن الدخـيل الـيـا كـبـا كـل مثـبـور *** منهـم مقـاطع حـق ورجـال قانـون
شيخان لكن مـا بهـم كـبـر وغـرور *** لهم الفخر موروث من دورهارون
نسل النمور نمور تنجب من نمور *** ونسل الحمايل ما تدنى على الهون
ولا الـردي شخصيتـه بــس ديكـور *** هيكـل خيـال وداخـلـه فـلم كـرتـون
ناصيك ياسليمان واشكي لك الجور *** دنـيـاك هـذي كـلهـا غـلب وغبـون
طال المطال وخاطري صارمكسور *** أسهـر طويل الليل والبال مشطـون
والحر لو صبر له حساس وشعـور *** قلته ومن يسكت عن الحق ملعون
ولا ظنتي يصبر على الغلب ممرور *** الغلب يودع صاحب العقل مجنـون
مقهور والله يا أبن الأجواد مقهـور *** مقهور من قـل الوسايـط وممهون
من دون شفي حـال يالقـرم عاثـور *** كيف الوسلة يابن سعدون وشلون
باللي خدعني بالوعـد والوعـد زور *** قـال انتظـر يومين والرقم مظمون
واليوم فات من الوعد عـدة شهـور *** وصارت مواعيده تخامين وظنون
لاجيت أراجع ماقدرت أدخل السور *** دونـه عساكـر عـن قـبـالـه يـردون
وذكـرت مـا قـال المتـنـبي بكـافـور *** وطـرى عـلى بالي كلام أبن لعـبون
قلته ومن يظلم عسى يدعسه مور *** مسرع وحمله خالف الوزن بالطون
ولا عـساه بمظلـم الحبس مخـفـور *** ياقع بجـرم ويقضي العمر مسجون
مـا للعـبـاد بـقـطـع الأرزاق مقـدور *** الـرزق من مـد الولي مبدع الكـون
يتبع