تابع
* وقال عبدالله بن دهيمش بن عبار العنزي هذه القصيدة يوصف بعض مشاهداته أثناء زيارته
لشعبة نصاب ورفحاء وعرعر والجوف وطريف ويشيد بكرم وحفاوة رجال عنزة الذين حظي
بلقائهم أثناء تلك الزيارة معبراً عن مشاعره بالثناء والوفاء لذلك الرجال ويذكر أسماء الكثير
منهم ويعتذر لمن فاته ذكر أسمه ويسند على عواد بن شعيّب : 132
بسم الكريم انظم من الشعـر قيفـان *** واكـتب عـذيـات المعاني بقـرطاس
وأعـوذ بالرحـمن مـن كـل شيطـان *** مـن عاذ بالرحمن ما جاه وسواس
قم يا نديب أركب على جيب نيسان *** مديـل واحـد لـون بديـة تقـل مـاس
تـوه وصل من طوكيو صنع يابـان *** جابوه للمعرض على شارع انكاس
ما فـيه ذارب كـود غـلوه بالأثمـان *** لو كـان تصرف قيمته عبـت كياس
عـز الطلب ما هو مهرقـل وخربان *** هو منوت اللي راح زاير وعساس
يقطـع مهاميـه الـوعـر والسمهدان *** ويبوج عسرات الفيافي والأطعاس
تبـارك المـولى تـقـل روج شـيهـان *** عسى الولي يحميه من كل لـولاس
من يركبه مـا نـاد لـو كان سهـران *** تبـارك الـلـه ما دخـل جفنـه نعـاس
ساقـه غـلام مـن الشغـاميم ديـقـان *** متعـوّد لمسرى الغداري والأدماس
من العاصمة مندوبنا سـار عجلان *** حث السرى والسير للبنص دعّاس
ويوم أعتـدل ممشاه والخط له زان *** مـا هـمـه الـلي لعـالي النـور كبّاس
سـار بطريق سديـر مع خـط بنبـان *** وتجـاهـل العـداد لـو دق الأجـراس
واليا وصلـت المجمعـة دار عثمـان *** شرّق على خط الحفر وزن وقياس
واليا توهلت الحفـر ما نـت بلشـان *** عـّدل يسارك صوب بير ابن هباس
وميّل يمينك كان جيت ابن وجعـان *** واسلك طريق البادية بـر واعفـاس
تلقا بضواحي شعبة نصاب عـربان *** يزبنهم المنيوب وأن حـل به يـاس
تلقا طـوارف مـن سلايـل سليـمـان *** ولابة هـل الملحا شديدين الأمراس
وأشاجعـه بـالمرجـله فـعـلهـم بـان *** يتلون أبـن معجـل للأضداد طساس
المهيوب أهل الفخـر يـوم الأطعـان *** وبـدور وخليفـات وعـيـال بلعــاس
من زارهـم يرتـاح لـو كـان تعـبـان *** يدله وينسى كل هاجوس واعماس
يا صاح بلغهـم مع الشكـر عرفـان *** شكر وثنا ينبع من شعور وحساس
وسلام مـني مـع شـذا ورد ريحـان *** فـوح الخمايل من بختري وبسباس
مني لأبن جـارد ولـد سعـد سلطـان *** سلايـل الـلي سمعتـه ترفـع الراس
ومـحـمـد الحـمـاد والـشـيخ راكـان *** نسـل العـديم الـلي للأخصام نسّاس
ومحمـد مـراوغ مـع الـقـرم حـران *** ومحـمـد الـفـلاح لـلـعـيـب مـا داس
ومتروك ابن مصيليخ خلفة جميان *** ومحمـد العمـر كسب عـلم نـوماس
وناصر الدهمة مـن كبـار السنيـان *** وأبن جذيل من أهل الفعـل والبـاس
والقرم مفلح من صماصيم مطخان *** والمنسي حميدان معدوم الأجنـاس
وأبن بريك الجعفري وابن جـروان *** وعـيد وبشير القـرم للـبـن حمـّاس
والأسـود الـلي مـن سلايـل عليـان *** وجربوع المرّقـد سليم من الأدناس
ثم أمش يالمندوب من شرق فيحان *** سافر عسى ما جاك عايق وحبّاس
تلقـا بـعـرعـر مـن رفاقـة وصدقان *** معدن ذهب ما خالطه زنك ونحاس
بـلـغ تحيـاتي لصـقـر ابـن عـطـران *** وبشير أبو خالـد وباتـل وهوجاس
ورميّض ابن خليف وأيضاً مطيران *** والأشجعي قـرم العيـال ابن دواس
ثـم أتجـه لطـريـف يا طيـر حـوران *** يعـجبك جـوه بـه ذعـاذيـع نسنـاس
سلم على اللي خاطره دوم ما شان *** نـزه الشوارب مـا تـدنـا للأطـفـاس
متعب ندي الكـف مـن نسل قـعـدان *** وأخوانه اللي بالكرم حمرالأمواس
الـكـل منهـم عـادتـه يـذبـح الضـان *** قصده كرم ما هـو منافـق وهـلاس
القرم اللي دايم على الطيب شفقان *** أنوار بيتـه بـددت داجـي الأغـلاس
مع الكرامة جـاب فديـوا وشرطان *** بالصوت والصوره مسجل وعكّاس
وأشكر جميع الـلي حضرنا بديـوان *** وأهدي لهم شكر وسلامي بكـّراس
أبـن الشريفي خلفـة الشيخ كنعـان *** وشلاش نسل معرب الجد والساس
وقحيط أبو قاسم وعلي أبن عشبان *** وعـزيّـر وثـنيـان للطـيـب غـراس
ومنهم تحرك صوب ذربين الأيمان *** للجوف يـم رويل مرذيـن الأفـراس
الربع اللي بصوير وهـديـب سكـان *** وأهـل زلوم وما خلطهم من الناس
وأهـل النظـايـم والزبـارة وهـدبـان *** مـا يـنسي ميـقـافـهـم تـقـل حـّراس
وسلم عـلى كـل البنيخي والأخـوان *** اللي دعـوا بمناسبة حفل الأعراس
تجـمعـوا بـصويـر والـكـل فـرحـان *** نسمر عـلى ترنيم زينين الأحساس
وأتـراثـنـا الـدحـة مـواريـث جـدان *** هي سلم أهلنا من قبل دور جساس
الـلي بلقـاهـم نــّور الحـفـل وأزدان *** يومين فاتـن عندهـم فـرح وإيناس
الـلي مضـايفهـم تـقـل شـم ضلعـان *** تبـارك الـلـه كنها هـضبة اضـراس
والنعـم بالقعقـاع من نسل روضـان *** كف اللغـى يـوم المضاهير تحتاس
وأبن اللميخ الهيلعي وأبن ورهـان *** وأبـن دويرج من صواريم قـرناس
وهـزاع الحمـادي وبـدر العـوينـان *** ثم الخضع منصورمن عقب حواس
وأبن غـشم وأيضاً سلايـل بشيتـان *** وأبن جـزلـه لا صـار للخشم لماس
وأبن علي بندر مـن أحفـاد حمـدان *** وابـن الكويكـب للرجاجيل مرواس
وعيال زيدي والكريـم أبـن جفنـان *** ومهدي العايد ستر مدقوق الألعاس
وكاتـب الغبـن مـع شقيـقـه قـريـان *** وعايد بن فدغاش به طيب وحماس
والقـرم سالـم والنصيـري عـشيـان *** ردالهجا وايبس حلوق العدا ايباس
ومنصور وبن شعيل وأبن عكاشان *** ومطـرد العـياط لا جـتـه الأتـعـاس
وهـزاع القهيـوي وحضرة عنيزان *** وجزاع بن مهدي بالأشعار نبراس
وهايل وابن قايم وعـازم طعيسان *** نسـل الـلي أفعـالـه جـدايـد ودرّاس
ونعم بكل اللي حضرنا من الأعيان *** والـلي بعيد الـدار ما هـو بالأحناس
قعاقعـه وأشبال مرعـض ودغمـان *** وكـواكـبة لباسـت الـدرع والطـاس
ونسل الفـريجي بالملازيم شجعـان *** من نسـل زايـد كلهـم خلفـة جـلاس
يتلون زيزوم الجموع أبـن شعـلان *** يـوم الركايـب قافلـه مثـل الأقـواس
تاريخهم معروف من قـدم الأزمـان *** ولـف لهـم وليم وموزل وتـوماس
ونـعـم بهـل العـلـيا الـيـا ثـار دخـان *** وصار المعابك وأشتغل كل ترباس
وتعـاقـبـوا كـوخ النواظـر بكرخـان *** وثار المشوك وأشهب الملح قبّاس
عـدوهـم وقـت اللقاء عـاد خسـران *** في ساعة يكثـر بها قـطع الأنفـاس
يـوم الرجال أجسامهم تـقـل نيشان *** بالكـون وأجساد العدا مثل الأكداس
شقوا صميل الخصم كانه بهم خان *** بالقاع راسه له مراغـه ومطحـاس
يوم الفخر بالسيف والرمح والـزان *** والكـل منهـم للوغى كـان مدبـاس
اليوم اللي كانوا على الخيل فرسان *** راحوا لك الله مثل تشليع الأضراس
اللي عـلى دور الجهل يوم الأكـوان *** يرحمهم الله كلهـم تحـت الأرمـاس
وأولادهـم وأحفادهـم مثـل مـا كـان *** اجواد نسل اجـواد والعـرق دساس
صـافيـن مـا فـيهـم هـلابـيج رديـان *** ولا بهم اللي عن المواجيب خنّاس
ويلان من ويـلان مـن نسـل ويـلان *** اللي بهـم ما بـار مدحي ولا خـاس
مدحـتهـم بالصـدق ما قـلـت بهتـان *** واللي شنونا روسهم مابها عطاس
و من لا يعد الحق مخطي وغلطـان *** ولا يجحـدون إلا هلابيج واخساس
أعتـز وأفخـر بالحمايل هـل الشـان *** الـلي لهم فـي قمـة المجـد مجـلاس
أفخـر بهـم مـا همني قـول نـدعـان *** الـبـايـق الـلي لـلمـواعـيـن لـحّـاس
الخايب الـلي حـط الأقـراب عـدوان *** ومـن خسته لجبـاه الأضداد بّـواس
ومن لا تعـزوى في قرايب وخـلان *** مثل الهبيل اللي على المرح نكّـاس
ولا درت من قولي زوايد ونقصان *** ولاني عـلى غـرات الأجـواد بـلاس
ولا جيت أريـد اجـرب فلان وفـلان *** ولاني مغـربـل للحـمـايـل وسـّواس
ومن عادتي ما خاوي النذل كوبان *** ولانـي رفـيـق لكـل خـايـب ولقـّاس
من قـارب الأجـواد كاسب وربحان *** ومـن رافـق الأنذال يبشر بالأفلاس
من لا غطس بالجم ما جاب مرجان *** در البحـر مـا يدركـه كـود غطـاس
والـمعـذرة عـن كـل زلـة ونـسيـان *** العـفـو يا ابعاد الهقاوي والأحداس
والـلـه ما قصدي تجاهـل وحقـران *** ولامقصدي لحقـوق الأجواد بخّاس
حـاولـت أوضح كل شاهد وبرهـان *** لاشك بعض الوضع شايك وحسّاس
واليوم أمن ولا بقي خوض ميـدان *** نرفل ونلبس مـن جديـدات الألباس
قـلته مثل ما مقصدي لمزت إنسان *** ولا مقصدي للخلق هـازب ولغـّاس
وأسندتهـا لعـواد بالـقـاف فـهـمـان *** يـقـرا القـصيدة والمناعيـر جـّلاس
يا أبن شعيّب ما نـت يالقـرم بحلان *** أجهـر بهـا مـا بـيـك بالأذن همـاس
أنـت الـذي تـفهـم تـرانـيـم الألحـان *** ومن يسمتع لقرايتك بالطرب هاس
والخاتمة صلوا على نسل عـدنـان *** الـلي أحـاديثـه رواهـا أبـن عـبـّاس
* وقال عبدالله بن دهيمش بن عبار العنزي يسند على حران بن عشوي البدري
ويثني على رجال من قبيلة عنزة الذين حظي بلقائهم في ضواحي شعبة نصاب
ورفحا وعرعر وطريف وسكاكا الجوف والقريات : 133
يا وايل أكتب قيـل ما فيـه تصحـيـف *** سجل روابع خافقي وانقش حـروف
خـط الكتـاب وغـلـف الخـط تغـليـف *** واليا ختمت القـاف حطـه بمظـروف
أكتب صدى فيض المشاعر بتلطيف *** من جـم فكري خاطري حافها حـوف
زان المجـال وطـاب نظـم التصانيف *** عـذب المعاني صغتها ما بها جنوف
مـن فـن بـدع القـيـل ولفـت تـوليـف *** مـتـفــقــده لا يـنـقــده كـل مـنـقــوف
جانيه مـن ورد الفـياض النـفـانيـف *** نفح العبيراللي من الروض مقطوف
ما قـلت منظومي بهافي السراجيـف *** اللي خياله غـض والخصر ملهـوف
أسنـد عـلى حـران ريـف المهاجيـف *** قـلبه لفعـل الطيب مغـرم ومشغـوف
ما عـند أبـو نايف تكاسـل وتسويـف *** بتوصيل خـطـي للشغـاميم مكـلـوف
وده لستـر المحـصنـات الغـطـاريـف *** الربع الـلي لهـم جـمـايـل ومعـروف
أظهر ثناء الأجواد من دون تحريف *** أولاد مشـجـع بالمـراجـل بهـم نـوف
وبـاقـي ضنـا عـنـاز ما هـم لفـاليـف *** مهما نشيد بمدحهم مـا بها حسـوف
مـا أريـد أفـنـد كـل واحـد بـتعـريـف *** الشـكـر يـشمـل كـل الأجـواد لفـلـوف
ولو أبي أعد شخوصهم قيل تهديف *** أخـشى يـقـال فـلان وفـلان محـذوف
ومن لا ورد طاريه ما قلت به حيـف *** مـا أسبهـم والكـل بالفعـل موصـوف
نعـم بهـم من شعبـة نصاب لطـريـف *** لـبــلاد دومــة لـلـقــريـات لـلـجـوف
صافيـن مـا فيهم عـفـون وهـذاليـف *** ولا طـب مجلسهـم دويـني وملقـوف
بيض الوجيه أهل القلوب المواليـف *** زاكيـن ما فـيهم مناحـيس واجلـوف
حاولت أوصف كل ما شفت توصيف *** وأصور اللي تشبح العين واتشـوف
جيـت الـذي عـلى المراجل مزاهيـف *** بين الحفر ونصاب في بـر مكشوف
الـربـع الـلي مـا يكرهـون التكـاليـف *** كـل يـوم يأتـيهـم مساييـر وضيـوف
الـربع الـلي مـا حسبـوا للمصاريـف *** لأجل الكرامة فدعوا ببيض الصوف
عـزاه لـلـي يصالـن الـقـدر بالصيـف *** يطهن طعام ضيوفهم ما يقـلن أوف
عمـار يا كسـور المروبـع مشـانيـف *** يزمي بعـالي الحيـد كنـه عقـرقوف
وعمـار يا صفـر الـدلال الـمهـاديـف *** فنجالهن يصبغ كما خضاب هانـوف
أنا أشهد أني عندهـم طـاب لي كيـف *** رايتهم البيضاء عـلى راس قفقـوف
يا زيـن مجلسهـم اليـا هبهب الهيـف *** يجلي عن الخاطر ثمانيـن صـادوف
من ضافهم يلقـا حـفـاوة وتـشـريـف *** ويصخون بالبلجيك وكلاش النكوف
فوق الصياني صفـوا الحيل تصفيف *** وذبح الهرافي عندهم صـار مألـوف
لكـن بهـم ذارب اليـا جـاهـم الضيف *** يصبح أسيـر بـدارهـم تـقـل موقـوف
لـومـا جـبـرنـاهـم بكـثـر المحـالـيـف *** ما يعذرون الضيف لو عنده ظروف
ثـم انـتـويـنـا لـلـسفـر دون تـوقـيـف *** عـقب العتيم سـراه والليـل منصوف
جينا أهل عرعر بالفخر فعلهم شيف *** وعـن زايد التكليف رفنـا بهـم روف
رجـالهـم لـو يـاخـذ الـديـن تـسلـيف *** مابه عن الواجب تهاون ولا عزوف
والـلي اعتـذرنا لـه مرافـة وتخفيـف *** غير السلام وشوفهم مالنـا اشفـوف
ومن عندهم سرنا لحفـل الزوافـيـف *** وبصويـر لاقـونـا طوابيـر وصفـوف
لابـة هـل العـليـا كـبـار المضـايـيـف *** النجـر يضبح والـمعـامـيـل بـرفـوف
اللابـة الـلي يعــطـرون المـراهـيـف *** يـوم المـقـمـع والـفـتـايـل ومسقـوف
اللابـة الـلي تـردع الخـصم بالسيـف *** صمع القلوب أيمانهم للعـدا احتـوف
اللابـة الـلي جمعـهـم للعـدا أيـخيـف *** اليا ثارت العليا غـدا النـور مكسوف
اللابـة الـلـي مـا تـطـيـع الأراجـيـف *** بالكون ما يطري على قلوبهم خـوف
وأن ثار عج الخيل مثـل العـواصيف *** الجـمع الـلي قـدامهم شالـه الطـوف
حالوا على اللي مقـط الناس بالليف *** ورجع معيف مخبـث الفـال مدغـوف
وقـت اللقـاء تقـفي عـداهـم مناكيـف *** والـلي غـزاهم عـاد بـالخـام ملفوف
تركي على كبود المعـادي مراضيف *** وتسقي العدا سم العرابيد واحضوف
ريف النضا حامين عوج السراعيف *** يـوم الـركايـب قافـلة كـنها خشـوف
عـاداتـهـم ذبـح البكـار المـزاغــيـف *** وببيوتهـم تشبع مساكين واضعـوف
وعقب الوناسة والطرب والسواليف *** بالحفل اللي ما به مزامير وادفـوف
سرنا على اللي كن جوه هوا جنيـف *** لطريف نسنـاسه ذعـاذيـع نـفـنـوف
وجينا على اللي ما تجيهم صواديـف *** يستاهـلـون الـنعـم مثـني ومـردوف
للضيف والجيران صاروا كما الريف *** الكـل منهـم باسـط الـراح واكـفـوف
مثل الحرار الـلي بروس المشاريـف *** مـن هـد خـلا الريش بالقـاع منتوف
طبـع الكـرم حطـوه مهنـة وتوضيف *** حيث الشرف موفور والمال متلوف
أعـتـز بالـلي طيبهـم لـيـس تـزيـيـف *** ومـن لا اعـتـز بلابـته بألف ذالـوف
ولاني بحـال أهـل العـلـوم التفـاتيـف *** الـلي مـذاهـبهـم عـلى عـدة صنـوف
شيـن الضميـر الـلي بقـلبـه لغـاليـف *** صـداقـتـه بالـدلبحـه درق وازحـوف
الـلي يـدرفـع صـاحـبـه بالـمهـاييـف *** وعـن المعـادي ناظره تقـل مطروف
تمـت وصلـوا عـد مـن داج بالخيـف *** على الرسول عداد ما هب عاصوف
* وقال عبد الله بن دهيمش بن عبار هذه القصيدة مجاراه لأحد قصائد الشاعر عبدالرحمن بن عايد الطويلعي : 134
يا راكب الـلي كنهـا الطير وأن طـار *** مــن وارد الكـنـفــيـر واشـنـطـنـيـة
كـنـفـيـر لا شالـت مـع مـدرج الـقـار *** صـوت الـمحـرك كـا رعـود بـرديـة
كنفيـر شـفـت المـروحـة يـوم تـندار *** مثـل الـرحـا بيـديـن خـطـو الصبيـة
كنفير طـارت والسماء مابـه اغـبـار *** الـجـو صـافـي نـسـمـتـه ذعـذعـيـه
كنفـيـر طـارت والـدخن خلـفـهـا ثـار *** فـوق المطـار اللي تشاعـل ضويـه
كنفيـر تشعـل بـالـدجـا ليـت الأ نـوار *** كــنـه لـميـع الـبـرق وقـت المسيـة
كـنـفـيـر تـجـري بـالهـوا تـقـل تـيـار *** وسـط الفـضـاء مـا تلحقـه مدفعـيـة
كنفيـر مـثـل طـرازهـا مـا بعـد صـار *** كـنـفــيـر مـافـي بـالـمـديـلات زيــه
كـنـفـيـر تـاخـذ بـالـنسانـيس محـدار *** تـشـق مـوجـات الأجـواء الـفضـيـة
كنفيـر لا ناضـت مـع الـجـو مشـوار *** تـوصل غـريـب الـدار لـديـار حـيـه
كنـفـيـر عـن مسيـرهـا تنشـر أخبـار *** وبالبوصلـة تـمشي لـحـروة نـويـه
كنـفـيـر مثـل الطيـر فـر من الأوكـار *** طـالـع خـيـال الـصـيـد بـالمهمـهيـه
كنفير تشـدا اللي عـلى صيدتـه غـار *** واختـار مـن جـول الحباري حظيـة
كنفيـر تجـري بالفضاء عبـر الأبحار *** مـا درهـمـت بـالسهـلة الجـرهـديـه
كنفير مـن يـبي السفـر فـوقهـا سـار *** ركـابـهــا يـرتــاح مـــيــه بــمـــيــه
نــوت عـلى الأقـلاع والـرب سـتــار *** يـصـونـهـا الـرحـمـن رب الــبــريـة
ملاحـهـا مـن نـقـوة الـغـوش طـيـار *** يطـوي المسافة فـي خلال ضحويـه
ياخـذ رسالـة مـن يميـن ابـن عـبـار *** مـظـمـونهـا شـعـر وسـلام وتـحـيـه
مـهـداه لـلي صاغ منـظـوم الأشعـار *** الــقـرم ابـن عـايـد عـريـب السميـه
عبد الرحمن لـلي لـه عـلـوم واذكـار *** الـولدعـي راعي الصخـى والحمية
مـن راس لابـة مـا يهابـون الأخطار *** صيـد الحـمـايـل عـزوتـه ولـدعـيـه
عـزوة هـل الـملحا شغاميـم الأخيـار *** مـن وهـب من عـنـاز مـاهـم نـزيـه
قلتـه وأنـا يـاالـقـرم مـن نسل عـقـار *** ضنـا فـريـض وعـزوتـي مـقـرنيـه
مـن لابـت الـفـدعـان بـواجـت الــدار *** حـمـر النـواظـر يـذبحـون الشفـيـه
ويـلان وأن لاحوا عـلى قب الأمهـار *** خـيـالـهـم بـالـكـون يـنـطـح سـريـه
مـن هـازهـم وقـت اللقاء هج بادبـار *** كـمـا تـهـج مـن الـوحـوش الشليـه
عنـده خـبـر معـلـوم لـو كـان ما نـار *** خـلـوا دمـاغـه بـالـمـهـنـد شـظـيـه
قـطـعـانـهـم تـرعـى زمـالـيـق نــوار *** مـا وفـروهـا لـو تـكـون امـحـمـيـه
غصب عن العدوان يرعون الأقـفـار *** يـوم المطـارد فـوق سـرج العـبـيـه
مـن ديـرة البلـقـا إلـى حدود سنجـار *** ومـا حـده الخـابـور لأقـصى زويـه
يـرعـونـهـا فـي حـد صـارم وبـتـــار *** يــرعـونـهـا بـالسيـف والـبـنـدقـيـه
داجـوا على الزرفات في كل الأقطـار *** وسيـوفـهـم كـانـت جـوازوهـويــه
خصيمهـم بـامـر الـولي كـود يـنهـار *** لـو بـه شجـاعـه يـفـقـد المعـنـويـه
الـلابـة الـلي تكـرم الضيـف والجــار *** ما هـم من اصحاب النفوس الدنيـة
تـاريخـهـم يـروي قـديمـات الأخـبـار *** يشهـد لـهـم يـوم الـمـراجـل فـتـيـه
هــذي فـعـايـل لابـتـي عـبــر الأدوار *** الـلابـة الـلـي مـا تـهـاب الـمـنـيـــه
في ما مضى هذي مفاخـر هـل الكـار *** ودنيـاك تقلـب بـيـن صبح وعشيـه
مثـل العـزوم العازمـه ما بهـا اعـذار *** تـهـد حـيـل أهـل الـعـزوم الـقـويــه
ترميك بعـض الحيـن بالصالي الحـار *** واحـيـان تـنـعـم بـيـن مـيـه وفــيـه
احيان تشـرب من قـراطيـع الأمــرار *** واحـيـان من عـذب العـدود العذيـه
ولا تـامـن الدنـيا تـرى الوقـت غـدّار *** مـن تـنكـبـه تـرميـه وسـط الهبـيـه
تـلكـد عـلى العـربان مـا تعطي انـذار *** يـا عـونـت الـلـه مـا بهـا مـرحميـه
مـشـاكـل الـدنـيـا شـنيـعــات واكـثـار *** عــوج مـعــاويـج سـوات الـحـنـيـه
احـيـان تـأتـي بـالـدواهـي والأشـرار *** واحــيـان تــأتـي بـالـبـلأ والـبـلـيـه
واشـوف بـالـدنـيـا عـبـايـر وتـعـبـار *** مـا بـقـي لسـلـوم الـحـمـايـل بـقـيـه
صار الفـتى يقـدم على العيب والعـار *** ولا عـاد يخجـل لـو عـلـومه رديـه
صار ابـن عمك ينتحس منك وايـغـار *** تـقـل اجـنـبي مـا يعـتـزي بعـنـزيـه
والمـال لقلـوب المـلأ مـثـل الأسحـار *** ومـن كـثـر مالـه صـار لـه جاذبيـه
الــمــال يــودع لـلـرجـاجـيـل تـعـبـار *** يـرفع وضيع الشـان لـو هـو هفيـه
من كثر مالـه صار له حـزب وانصار *** كـلـن يـنـافـق لـه يـريـد الـعــطـيـه
لـكـن قـلـيـل المـال لـو كـان مـغـــوار *** كـانــه لـفـا مـا قـيـل يـاالـلـه حـيـه
مـن قـل مـالـه مـا سـوى ربـع ديـنـار *** يـخــف وزنـه مـا يـعـادل وقــيـــه
وأهـل الـدنـاعــة لـو يـكـونـون تجـار *** مـا يغـتـنون أهـل النفـوس الرديـه
قـلـتـه ونـظـم الـقيـل عــبـره وتـذكـار *** وانفوسنـا مـن فضـل ربـي غـنيـه
والـرزق مـن مـد الولي والـي الأقـدار *** مـقـسـوم والـنـيـه تـراهـا مـطـيـه
ثـم الـخـتـام أعــداد هــطـال الأمـطــار *** صـلـوا عـلى هـادي العبـاد ونبيـه
يتبع