تابع
قال عبدالله بن دهيمش بن عبار العنزي هذه القصيدة تهنئة للرجل الفاضل سعد بن دخيل
العبلان البرازي السهلي بمناسبة زواج أبناءه محمد ودخيل الله وعبدالله : 162
يا سعـد لـك مـني تهـانـي وتـبـريـك *** مـبـروك يا عـل الـعـيـال يـتـهـنـون
رب الـعـبـاد لـنـيـة الخـيـر يـهـديـك *** وتـدوم في حفظ الولي مبدع الكون
جار وصديق لدعوتك كيف ما جيك *** حضرت مع الـلي لحفلك يحضرون
فـرحـك يـفـرحـني ولـبـيـت داعـيـك *** حيثـك من الـلي بالمراجل يفوزون
الـشـاهـد المـولـى نـعـزك ونغـلـيـك *** قـدرك كبيـر بـداخـل الصدر مكنون
تجهد على الجزله عسى الله يقويك *** تعـمل جـميـل وكـل ربعـك يخبـرون
شهم وكريـم ودوم بالخـيـر نطريـك *** جـزل ونزيه من العذاريب مصيون
جـيـران بـيتـك عـدهـم من بنيخـيـك *** وكـل المعـارف يا سعـد لك يعـزون
عيبـك يا أخـو صيته الياجاك ناخيك *** ما تذخر الواجب لمن يطلب العون
رب الملأ من حسن الأخلاق معطيك *** تشوم للمعروف لـو كـنـت مديـون
عـادتك تـاقــف باللّـزم دون عـانيـك *** تصبر على الشّده ولا تتبع الهـون
يبشـر بـعّـزه يا سعـد مـن يخـاويـك *** وتفـزع مع الناخي اليا قال تكفـون
أبـوك لـدروب المـراجـل مـوصـيـك *** حـفـّاظ سـلـم وتـفـتهـم كـل قـانـون
تستـاهـل التمجيـد والمـدح زاهـيـك *** صـفـوة حـمـايـل باللـوازم يـعـدون
مهما مدحت المـدح مـا أظن يوفيـك *** مجناك من عزوه للأمجاد يسعون
يحرون في كسب الثنا دون تشكيك *** بـرازات ربعـك مابهم شك واظنون
فيهـم طبيعـه قـولـت الـلـه يحـيـيـك *** عـاداتـهـم للضـيـف دايـم يـحـيـون
تـاريـخـهـم بـيـن القـبـايـل يـعـلـيـك *** توجد بهم ميـزه بهـا الخلق يدرون
رجـالـهـم دمّـه بـتـقـديــر بــاريـــك *** بأمـر الـولي مـنـه المغاليث يشفون
أجـواد نسل أجـواد مـاهـم صعاليـك *** ربـع الـذي لأفعالـه النـاس يقـرون
أبن لحيان الـلي يخوض المـداريـك *** يـوم القبايـل بين طاعـن ومطعـون
أنشد عـنه بيض الصحايف وتنبيـك *** أبن بشر جـاب الخبـر وأبن لعبون
قال عبدالله بن دهيمش بن عبار هذه الأبيات نخوه للشيخ فرحان بن منديل بن
موينع شيخ قبيلة البيايعة وجميع رجال الموينع والبيايعه الكرام : 163
نـنـخـاك يا فـرحـان يا نـسـل منـديـل *** لـو كـان مـا قـصّـرت أول وتـالــي
يا أبـن مـويـنـع حـملنـا بـيّـد الحـيـل *** بـاهـض ولا يـقـواه كـود الجـمـالي
وأنت المنيب الـلي يشيل اثقل الشيل *** مـن عـادتك شيـل الحمول الثقـالي
ونـنـخـا عـيـال زريـق ربـع مشاكيل *** نـنـخـا جـمـيـع كـبـارهـم والعـيـالي
ومـا عـقبـه مقبـل زحـول الرجاجيل *** الـلـي مـنـازلـهـم بـروس الـعـوالي
صـيـد الـرجـال النـافـليـن الحـلاحيـل *** مـن أهـل العـرفـا طيـبيـن الفعـالي
أنـتـم صناديـد البـواسل عـلى الخيـل *** وأنـتـم جـنـب حـم الـذرى بالمفالي
وأنـتـم مـلاذ الـلي جـرالـه غـرابـيـل *** يا عز اللي جاكم من الخوف جالي
وأنـتـم مـن الـلي يتعـبـون المعاميـل *** يا أهل الرباع الـلي زهتها الـدلالي
يا موقـديـن الـنـار فـي مظـلـم الليـل *** فـيـهـا الـدفـا لا هـب بـرد الشمـالي
يا أهـل المعـاني والبيـوت المداهيـل *** فيها الحجـا وفيها الـذرا والضلالي
يـا ريـف هـتـاش الـبـداه المحـاويـل *** لاجـوه هجـافـا والمـزاهـب خـوالي
أنتم وحنـا أقـراب من ماضي الجيـل *** وأنتم فـزعنا بـوقـت عـسر الليـالي
نـخـيتـكـم يـا خـلـفـة عـبـيـد بالقـيـل *** نـخـوة جـماعـه لـيس مـني لحـالي
ولد وضنا ماجد من خريص وكحيل *** بـواجـت الـديــرة بـعــاد الـمـدالـي
فدعـان مـن قـدم العصور المساميل *** منهـم وهـم منكم اصحاب وغـوالي
فـي جـاه مـن يأتيه بالوحي جبـريـل *** وفـي جـاه مولانـا عـزيـز الجـلالي
فـكـوا حـديـد الـلي مـقـيّـد بـتـكـبـيـل *** نبي العفوا يا أهل العـلوم الجـزالي
تهنئة للشيخ الفارس نايف بن عبد بن خلف الحريميس الفدعاني العنزي بمناسبة
فوزه بالمركز الأول لبطولة العالم للفروسية المقامة في قطر : 164
مـبـروك يـا نـايـف بـفـوز البـطـولـه *** نـلـت الفخـر يا شيخ بافـعـال يـمنـاك
مـن جـدك حريميس ساس الرجولـه *** تحـري بكسب الطايـلـه يا أبن بـرّاك
لـك جـد تـتـبـع بـالـمـراجـل فـعـولــه *** وحـنـا الـذي نفخـر بمثلك وشـرواك
تـبـت ايـديـن اهـل العـزوم الكسوله *** مـن خـار عـزمـه مـا يسوي سواياك
يـا شيخ فـوزك يـعـتبـر باسـم دولـه *** بالـفـوز شـرّفـت الـوطن لا عـدمنـاك
فـي وسـط مـيـدان تـطـارد خـيـولــه *** طـلـعـت الأول فـي تـوافـيـق مــولاك
عسى الفـخـر والـفـوز دايـم تـنـولـه *** وربـعـك بـني وايل سنادك ومـركـاك
فـارس وتـنسب مـن سلايل حمولـه *** وعـودت طبعـك للفخـر بـأول اصباك
هذه القصيدة مسنده على الشيخ صالح بن فريح العقاب العواجي شعر عبدالله بن دهيمش بن عبار : 165
طـرى عـلى بالي مـن الشعـر قيفـان *** في مدح اللي ربعـه لفعله يحمدون
من يمدح أبـو سعود ما قيل غلطـان *** صالح قوي الباس مـا يتبع الهـون
مـا بـار صالـح فـي رفيقـه ولا خـان *** ولاهومن اللي دوم للشمل يشظون
الشيخ عقب الـلي يقودون الأضعان *** يـوم الحـرايـب للجهـامـه يـقـودون
ساس الفخـر خلفة فريح بن جمعان *** سلايل الفارس عقاب أبن سعـدون
أبـوه فـريـح وعـمّه الشيخ فـرحـان *** نسـل الـذي وقـت اللقاء ما يهابون
من عـصر جـارالله وغـانـم وزيـدان *** وحجاب مروي باللقاء كـل مسنون
وفريح الأول من صماصيم فـرسان *** ضـد العـدا يـوم الـرجـال يتنـاخـون
حـمـايـل ومن روس عـزوة سليمان *** دايـم عـليهـم كـل الأجـواد يـثـنـون
نـالـوا فـخـرهـم يـوم للخـيـل ميـدان *** بالمعترك دايم عـلى الموت يردون
واليوم سلـم ولا بقى حـرب وأكـوان *** سبـايـب الـلي بالشريـعـه يحكمون
ياصالح أبن فـريح يـا ذرب الأيمـان *** شفـت العـبـاد لكـل ناجـح يحسدون
بـان الخـفـا يا شيـخ والمختفي بـان *** بـانـت حقايق وأنكشف كـل مكنـون
الناس يا صالح بهـا اشكال والـوان *** تلقابهـم صاحي وبالنـاس مجـنـون
تـوي لقيت أن أكـثـر الناس عـدوان *** الشيـن يـبدونـه وللـزيـن يـخـفـون
كنـت احسبهم لـي رفـاقـه وصدقـان *** لاشك صار الحدس تخمين وظنون
لقـيـت بالعـزوه حـمـايـل لهـم شـان *** ولقيـت بالعـزوه هـلابيج واعـفـون
ولقيت الـلي طبعـه تـنـكّـر وجحدان *** ولقيت اللي من غير داعي يلومون
بـهـم الـذي ينصف ويثـني بعـرفـان *** وبـهـم الـذي من دون ذمّـه يسبون
بهم الحقود الـلي طلس قـلبه الـرّان *** وبهم النزيه الـلي لـه الناس يغلون
ولا هـمني يا مسنـدي قـدح سفهـان *** ما دام الـلي مثلك بجهدي يشيدون
أعـرض عن الـلي للمخاليق طـعّـان *** الـلي بطعن أنساب الأجواد يشقون
الـنـاس مـا تسمـع هـذاريـم كـذبـان *** سود القلوب الـلي بالأقوال يخطون
بالقـص مـا نبني عـلى قـول بهتـان *** ناخذ من اللي قولهم صدق مظمون
والـلي يـخـاف الـلـه مـا يظلم انسان *** نـعـوذ بالـرحمـن مـن كـل ملسـون
أهـل الظـلايـم من قـديمات الأزمـان *** من فضـل خـلاّق المـلأ مـا يفوزون
الظلم مبطي بـاد عـرش أبـن كنعان *** فيما مضى قضى على ملك فرعون
* وقال عبدالله بن دهيمش بن عبار هذه الأبيات يثني على ناصر العرق المري
وعبدالله بن حماد القديري الشمري : 166
يستـاهـل المـادح جـنـاب الـقـديـري *** النعـم مبـطي حايشه يا أبـن حمـاد
لو كان أنا ما امدحك يمدحك غيري *** والـمـدح يـزها للحمايـل والأجـواد
مـدايـح مـا اغـش فـيـهـا ضمـيـري *** مـن خـوف ينـقـد قـولـنـا كـل نقـاد
بـيـن الرفـاقـه بان علمـك شهيـري *** عـلمك ظهر بالطيب ما بين الأفراد
يا سمي عن طيبك نشدت الخبيـري *** حيثـك لهـتـاش الخـلا تـبـذل الـزاد
عـز الـلـه أنـك لـلنشـامـا عـشيـري *** مجناك من لابـه يحوشون الأمجـاد
شمر هـل الطولات ريف القصيري *** حـامين مـن سلمى إلـى حـد بـغـداد
ولا أنـت قـرم وبالفهـامة بصيـري *** وأنت الـذي تسير في هدي وارشـاد
ارشـاد نـاصـر للمـطـابـع مـديـري *** الشيخ أبـو صالح شبيـه أبـن شـداد
الـقـرم لأ فـراد الـمـطـابع نصيـري *** الطيب له موروث من دور الأجـداد
* قال عبدالله بن دهيمش بن عبار العنزي هذه القصيدة يثني على مهل بن هبيكان العنزي وصالح الرشيد الودعاني : 167
عنيت أريـد لرخصة السيـر تجـديـد *** لقسـم النسيم الـلي عـلينـا قـريبيـن
ولقيـت مهـل وقـال مـا بـه مواعيـد *** أن سهـل الـله سوف تأتيك هلحين
الجعـفـري نسـل الرجـال الصنـاديـد *** الـوايـلي عـز الـذي جـوه نـاصيـن
مجناه من صفوة حمايل ضنا عبيـد *** لابـة هـل الجدعـا سطـام المعاديـن
جعـافـرة بالـكـون عـوق المعـانـيـد *** بالمعـتـرك يـوم المـلاقى ضريريـن
ريـف الهـواشل متعـبيـن البـغـاديـد *** كانوا بعصر الجوع حمر السكاكين
أشكـرك حيثـك مـن قـروم الأوالـيـد *** وأشكر زميلك فاعل الطيب والزين
صالح عزيز الجار من خلفة رشيـد *** النادر اللي من شخوص الوداعين
أنـا أشهـد أنـه مـن سلايـل أجـاويـد *** حيثـه يعـرف الموجبة والقـوانيـن
ما دك به عـرق الرخـوم الرعـاديـد *** ولا يجذبـه عـرق العـفون الردييـن
مثـل القطامي عادتـه يـدرك الصيـد *** صيده سميـن إلى كفـخ بالجناحيـن
الـزايـدي يكسـب مـدايـح وتـمجـيـد *** حيث الجمايـل بالرجـل تعتبـر ديـن
سهـل الجنـاب بـلا تراخي وتعـقـيـد *** طبعه بشوش ولا يقول النبا الشين
لا شـك دق الكمبيوتـر عـلى الـقـيـد *** وقـال الغـرامة مبلغـه حول الألفين
نعطيـك كشـف مخـالفـاتـك بتـفـنـيـد *** بالصدق مـا نعطيك ظنـه وتخميـن
قـطع الإشـارة ثـم تعـطـيلـت السيـد *** مـع سرعه وتفحيط وسط الميادين
قـلت أنا يا صالح عن الحق ما حيد *** لكن تـؤكـد مصدر الكتب مـن ويـن
شـلات تـفـحـيـط الشـوارع نمـاريـد *** والـلي يقطعــون الإشـارة مجانيـن
ولا لي بهـذا يا فـتى الجـود تعـويـد *** تلقى الخبـر عنـد الرجـال المسمين
قـال أطـمئـن ولا نـبي مـنـك تسديـد *** ملفك أبيض وأترك الجيم والسيـن
وفهمت قوله مزح ما القصد تهديـد *** وكتبت لـه من جيد القاف عشرين
قال عبدالله بن دهيمش بن عبار هذه الأبيات المتواضعة يسند على دالش أبن
عوض بن ميزان ويثني على فرحان بن باني الجعفري : 168
سجلـت مـن فكـري تناظيـم قـيـفـان *** وبديت اعـبـر من غـزير المعـاني
يادالش اسمع جابتي يا ابن ميـزان *** أن كـان تـنشدني افـيـــدك تـرانـي
اسنـدت مظمـون القضيـه لفرحـان *** الجعـفـري قـرم العـيـال ابـن بانـي
يـقـوم بالـواجـب سلايـل جـعـيـدان *** الـبـاسـل الـلي فـي لـزومي كفـاني
انـا اشهـد انـه يالسنـافي كحـيـلان *** الـلي عـلى وصـل القـرابـه ايعـاني
يا عـنـك ما تـلـه معـامـيـق رديـان *** مـن راس لابـه مـا خلطهم اهـداني
لابة هـل الجدعـا خلايـف سليمـان *** لهـم الحمـيـة مـن قـديـم الـزمـانـي
مـالـه عـذر مـادام جـدانـنا اخـوان *** حيثـه رفيق ومـن ضنا عبيد دانـي
عـوايـده فعـل الفضيلـه والأحسـان *** يـكسب جميـل ولابـد العـمـر فـاني
وان ماتمكـن نعـذره طـيـر حـوران *** مسمـوح مـانـي لـلأجـاويـد شـاني
عـنـد الرجـال الـلي تقـدر لنـا شـان *** ولا نطلب الا مـن عـريب المجاني
والحـمـد للـه مـا ظـلمنـا ولا انسان *** لا شـاكي مسلـم ولا احـدٍ شكـانـي
ابـغـي سـتـر وجـهي وتسديد ديـان *** ملحـوح واستنـظـر أجـار المبـاني
أخـيـر لـي مـن مـنـت فـلان وفـلان *** كـان الـولي من مـد جـوده عطاني
طلبت رب العـرش خـلاق الأكـوان *** أنـه عـلى الحـق المبـيـن أيـهـداني
لـو كنت شاعـر كل ما قـلت مجّـان *** مـا درت بلغـه مـن قرايـض لساني
شعـر الهجاء به يرتدع كل غلطان *** أردع بـه الـلي فـي كـلامـه هجـاني
والـلي بـه التمجيـد والمدح يـزدان *** نـشكـر جـنـابـه بـالخـفـا والبـيـاني
اعـتـز فـي تـمجيـد ذربين الأيمـان *** ريـف الـذي جاهـم من البعـد عاني
نـصـيـت شـيـال المحـامـل بليهـان *** واستنظـر البشـرى بـعـد الـثـوانـي
قال عبدالله بن دهيمش بن عبار العنزي هذه القصيده يبارك للشيخ عوده بن حييان
الجبوري رحمه الله بمناسبة افتتاح قصره العامر في قليب الترمس بمنطقة القصيم : 169
يقـول من صاغ المعاني ضميـره *** عـن الـقـدا مـا عـال مثقـال ذرّه
نفخر بعـز أهـل الوجيه السفيـره *** وجينـا نـبـارك للجبوري مـبّـره
جـينا نبارك لـه عسى الله يجيـره *** يسعد بقصره مـا تجيه المضّره
قصره ياعـل الـرب يعطيه خيـره *** وعسى ولي الكون يكفيه شـرّه
الصـافي الـوافي نـقـي السريـره *** عـسـاه يـنعـم بالهـنـا والمسـرّه
الشيخ عوده من كـرام العشيـره *** طبع الكرم والجـود عوده مقـرّه
بـه عيب تقليط الجفان الغـزيـره *** مـا يـذخــر الـمـاجــود لـلـه درّه
درب المكـارم دوم يسلك مسيـره *** ما بان لـه مع سكّة البخل جـرّه
اليا كـرم مـا طاع شور المشيـره *** تـنـدا من شحوم الهرافي سفّره
زيـن النبا مـا قـيـل نفسه كبـيـره *** سهل الجناب ولا ذكر به مغـرّه
من ساس لابه ينطحون المغيره *** ضـد الـعـدا لا صـار للخيـل كـرّه
سلقا سقام الضـد يـوم الجـريـره *** يـوم المهنّـد لـه بالأرقاب صـرّه
سلقا حمول الخيل عـز القصيره *** زمان عصر اللي الجحافل يجرّه
من خيبـر الحـرّه لحـد الجـزيـره *** داجوبها السلقا على اكوار حرّه
صالوا على الزرفات في كل ديره *** بالجمع الـلي دار المخافه يمرّه
لـهـم مـفـاخـر لـو نـعـدّه كـثـيـره *** والمرجله مـا تنحصي فرد مـرّه
* قال عبدالله بن دهيمش بن عبار بأبو فايز عواد بن حييان العنزي : 170
الحـمـد لـلـه نـافـخ الـروح بجـمـاد *** رب الملأ المعبـود للخلـق رحمـان
الـلي بلطـفـه راف فـي حـال عـواد *** الـقـرم أبـو فـايـز سـلايـل حـيـيـان
الـلـه يجيـره من صواديف الأنكـاد *** ويحميـه ربـه مـن تقاليب الأزمـان
حيثه سليم الجاش من قلب وافواد *** من صار ما بـاق برفيقـه ولا خـان
حيثه سليل الجود من ترثت أجواد *** من روس لابـه بالفخر طيبهم بـان
أبـوه قـبـلـه كـان لـلـطـيـب مـعـتـاد *** فيه الكرم مع طاعت الله والأيمـان
ولا أبـو فايز عـن مماشيه مـا حـاد *** فيه الحبابه والتواضع والأحسان
من عـفته محبـوب مع كـل الأفـراد *** ومن نضف قلبه لابته كنها أخوان
ماهو حسود ولا مشى بدرب حسّاد *** وهل الحسد ماهم لشرواه صدقان
ولا هو حقود ولا دخـل قلبـه أحقاد *** ما قال زور ولا مسك غيبة انسان
أطـلـب لـعـلـه دوم يـنـعـم بـالأسعـاد *** وعساه يرفـل بالهنـا كـل الأحيـان
قال عبدالله بن دهيمش بن عبار العنزي هذه القصيدة بمناسبة ترميم قصر مشرف
الأثري في روض الجواء من قبل الرجل الفاضل صالح بن فريح بن غازي الفريح
وسبق وأن رمم من قبل جدّه غازي رحمه الله عام 1340هجري وقد بني القصر
عام 1265هجري حيث بناه الجد الأعلى لأسرة الفريح وهو فريح بن غانم بن
خلف بن عقيل المحيني الدهمشي وهذه الأبيات مهداه إلى الرجل الفاضل صالح بن
فريح بن غازي الفريح وجميع الفريح مع الشكر الجزيل للجميع : 171
يـا صـالح الشغمـوم يـا نـسل غـازي *** يالدهمشي مشكور يا خلفـة فـريح
عـنـدك بـتـاريـخ الـجـدود اعتـزازي *** حيثك من قـروم الرجال الزحاحيح
غـازي لـه بـترميـم مشرف انجازي *** وكملـّت مشواره أضافه وتـصلـيـح
رمـمـت قـصر الـلي بالأمجاد فـازي *** جـدّك فـريـح الـلـي زهـاه التماديـح
حــفـتــه وخـليـتـه جـديـد الطـرازي *** ونورت جـدرانـه بضوح المصابيح
جــددت بـنـيـانـه بعـصـر الـقـزازي *** وكتبت عن تاريخ الأسلاف توضيح
قـصـر أبـن غـانـم كنّـه الحيـد لازي *** ما هـدّه العاصوف والهوج والريح
قـصر الفخر راسي وساسه عزازي *** قـواعـده بـنيـت عـلى خـيـر تسليح
اشـم واشـمخ مـن حـيـود الـنـوازي *** يحجي ويذري عن سموم اللـّوافيح
بـنـاه جــدّك يـوم عـصر الـمغـازي *** وغرس بريضان الديار الصحاصيح
يـوم السـنـيـن الـلي وزاهـا يـوازي *** زمان عصر الجوع مدهل هل الفيح
الضيف يقـرى مـن حميس الجوازي *** والعـيت تقصب للوجـيـه المفـاليح
نسـل المحيني مـا مشـوا بالمخازي *** ولاهم عـن فعول المراجـل مدابيـح
نـالـوا شـهـادات الـفخـر بـامتيـازي *** ومعهم عـلى كسب النفايل تصاريح
يـوم الجفاف بنجد وأرض الحجازي *** مـا قـفـلـوا بـيـبـانـهـم بـالـمفـاتيـح
وأن صـار بضروع البهـايم غرازي *** مـاهـم عـلى شـح المكايل مشافـيح
مـا راعـهـم بـالكـون كـل انـتهـازي *** مـن ساس عـزوه للمعادي ذوابـيـح
مـا نـال مـنـهـم بـالـمعـايـيـر هـازي *** يا بـعـدهـم عـن الـردّى والسواميح
عـن الـمـعـايـب يـاخـذون احتـرازي *** مـا ذمهـم بالعيـب مـن راد تجريـح
والخاتمه أطـلب عسى الـلـه يجازي *** بالخيـر مـن نطـقـه تهلـل وتسبيـح
قال عبدالله بن دهيمش بن عبار العنزي هذه القصيدة في حفل الرجل الفاضل
الشيخ صالح بن فريح بن غازي الفريح المحيني بمناسبة احتفاله وتكريمه
لرجال من مشايخ قبيلة الدهامشة في قصر مشرف بعيون الجواء وعلى
راسهم الشيخ ابن مجلاد والشيخ ناصر ابا الروس المحيني : 172
القـاف مـن عـذب المعـاني نـقـيـتـه *** عـبـر المحـافـل للشغـاميـم مـهـديـه
مـطـلـع كـلامـي بـالـتـهـلـي بـديـتـه *** مـن شرّف أبن فريح يالـلـه اتحييـه
يـا حـي جمع يا أبـن غـازي دعيتـه *** مـا تـدعـي الا الـلي تـعـزّه وتـغـليـه
بالقصـر الـلي عـلى المعـزّه بـنيتـه *** مشرف قصـر جـدك تفاخـر بماضيه
الجمع اللي بالـروض أنـت التقيتـه *** ومن طبعـك الواجب للأقـراب تـديـه
قـدوم ربـعـك مـن قـديـم احـتـريـتـه *** وجولـك مناعيـر الـرجـال المـداليـه
صالح يا أبن مجـلاد من يـوم جيتـه *** بـوجـودكـم يا شيـخ أسعـد لـيـالـيـه
مـجـلاد مـجـده وارثـه مـا شـريـتــه *** طـيـب الجـدود الـلي للأحـفاد تمليه
من حـيـث طـيبـك يالسنافي خـذيتـه *** من جـدّك الـلي منهجه مانت ناسيه
وأعـتـز بالـلي يـرفع الـراس صيتـه *** نسل الشجاع الـلي عـريبه مجانيـه
مـفـعـول جـدّه بـالـمـدايـح عـنـيـتــه *** الباسـل أبا الـروس يقهـر معـاديـه
من دهمش اللي الطيب فيهم هـقيته *** رجالهم فـعـلـه عـن الـمـدح يكـفيـه
فـخـر محـددت الـجـمـل مـا كـمـيتـه *** نـظهـر ثـناهـم والـفخـر مـا نخـفيـه
أدنـاهـم الـلـي بـالـلّـزم لا نـصـيـتــه *** زبـن الدخـيـل وعـز ضيفـه وعانيه
شاهدهم أصحـاب الحظـوظ البخيته *** يـوم الـبـداه الـبـر تـحمي مـراعـيـه
وحـنـا بضـل الـلي فخـرهـم قـريـتـه *** حكـامنـا تهـدي المعـانـد عـن التيـه
الـلي مـنـعـوا كـل السّلـوم المقـيـتـه *** وكفوا يديـن المعتدي عـن مغـازيه
واليـوم عصر الـلي خدم حـرم بيتـه *** بـيـت الـذي كـل المخاليـق تـرجـيـه
سـلمـان تـبشـر بالـفـزع لا نـخـيـتـه *** فـزع لـجــاره ثـم حـقـق أمــانـيـــه
طـعـنـاتـه بـصـدر المعـادي مـمـيتـه *** كبح جماح الـلي المجوسي يحـديـه
لـو مـا فـزع سلمان صارت فـلـيـتـه *** الحوثي الـلي طاش وإبليس مغويه
يا أبـو فـهـد صرح المعالـي رقـيتـه *** قـمّـة سنـام المـجـد تصعـد بـعـاليـه
سـرت بـثـبات ودرب جـدّك مشـيتـه *** وعضيدك محمد عسى الـله يقويـه
مهـمـا نـشيـد بمجـدكـم مـا حصيتـه *** تـاريـخكـم بالمجـد نفخـر بـطـاريـه
قال عبدالله بن دهيمش بن عبار هذه الأبيات مهداه للشيخ صالح بن غازي الفريح المحيني الدهمشي : 173
قـلـت قـافـي مسنـده لأبـو عـمـر *** صالح المنعور من خلفت فريح
عــلـم جــدّه سـاطـعٍ كـنـه قـمــر *** منظره بين الكواكب له ضحيح
بالـكـرم جـدّه سـكـاكـيـنـه حـمـر *** يوم غلو الزاد والمسعر شحيح
فـرحـت الجايع الياصابـه ضمـر *** يطوي البيداء وصدره له فحيح
مجـلسـه فـيـه المـهـيّـل والتـمـر *** مع بخورالعود الأزرق له نفيح
دلته تطمى عـلى حـامي الجـمـر *** يجذب اللافين نجـره لـه ضبيح
والقـدر يطهى عـلى نـار السّمـر *** فيه كبش من الغنم دهنه يسيح
عادت الطرقي عـلى قصره يـمـر *** فـي مضيفه يرجهـن ويستريح
مجلسه ما يـدخـلـه مدمن خـمـر *** ولا يطبـه صاحب العـلـم القبيح
وصالح الغازي على العليا طمر *** بالكرم من يمدحه عـد الصحيح
الصـخـي لأمـجـاد جـدّه مـا دمـر *** ومن يروم المجد يزهاه المديح
من بـغى الطـولات للعـليـا شمـر *** ومـن تجـوّد بالثوابت مـا يطيح
عامل المعروف في فضله غـمر *** ولا يغط النور من عقـله رجيح
عـزوتـه ضـد الخصيم اليـا زمـر *** يـوم عبرود المشوّك لـه رزيح
تمضي الأيـام فـي بيـض وسمـر *** ولابها يبقى سوى العلم المليح
المراكب صـارت جيـوب وهـمـر *** تـطـوي الأميـال بالـدو الفسيح
وكل شخص اليوم يبني وايعـمـر *** الجميع بخيـر في مسكن مريـح
قال عبدالله بن دهيمش بن عبار هذه الأبيات يسند على نهار بن عبيد الخلاصي
أبو خلف حيث أنه يشب كل عصر ويدعي الأصدقاء لمجلسه : 174
في كـل عصر عنـد أبـو خلف شبّـه *** النـادر الـلي مـن رجـال الخلاصات
الــبــن بـالـفـنـجـال دايــم يــصـبّــه *** وبـعـده لذيذ الشاي يسكب بكاسات
سـلـم الحـمـايـل مـاسـكـه مـا يـكبّـه *** مـيـراث جـدّه بالسنـيـن الـقـديمـات
أبـو خـلـف عـنـد الـلّـزوم اعـتصبّـه *** محـزمك كانـه صـار بالوقت ميلات
عسى يحفـظه سـامـك العـرش ربّـه *** ويكـفيـه شـر وكـيـد حاسد وشمّات
نـهــار الـلـي كـل الـرفـاقـه تـحـبّــه *** نزه الشوارب سامي الأصل والذات
شـهـم وكـريـم ولا تـجـد مـن يسبّـه *** فـهـيـم وأهـدافـه ابـعـاد ورفـيـعـات
مـا فـيـه عـلـم ألا ضـمـيـره يـضبّـه *** مـن صغـر سنّـه محتفظ بالروايـات
لــو تـنـشـده عـن كــل وادي وتـبّـه *** يعـطيـك شـرح ابعـادهـا والمسافات
ولـو تنشده عن شخص باسمه ينبّه *** ويشـرح لـنـا عـلـوم عـلينـا خفيات
حـيـثـه صـمـال العـلـم يعـطيـك لـبّـه *** ولا قال كـلمه مالها شهود واثبـات
جـميـع مـن يسـمـع كـلامـه عـجـبـّه *** واليـا تكـلّـم تصغي الـربـع باسكات
أبـو خـلـف لـه مجـلسٍ مـا يـطـبّـه *** راعـي النقـيـلي والعـلـوم الـرديـات
المجلس اللي من جلس بـه رغـبـّه *** كل يـوم نقضيبه من الوقت ساعات
مجلس شرف في كل عصر نحضبّه *** يبهج ضمير الـلي يـدور الـوناسات
يجـمع من شخوص الرجاجيل صبّه *** نخبه من أهـل المرجـله والشكالات
مـا بهـم الـلي بأهـل المهايط تشبّـه *** دايـم سـوالـفـهـم سمـان وجـزيـلات
واخـتـام مجـلسهم بـه الشيـخ نـبّـه *** عـلى هـدى الهادي وتفسير الآيـات
يتبع[/size][/center]
التعديل الأخير تم بواسطة عبدالله بن عبار ; 06-28-2022 الساعة 06:40 AM
|