لاهنت يابومشعل

القصيده اللي بها ياما لقاني من ضناعبيد هاني هي حروة الصحيح انها ثلاث ابيات ، وهي كالتالي :
امشي مع العربان واجمع من الربد ....عدي قعود عقيل المرجحاني
واكل من المصلي واغمس من الزبد ...ياما لقاني من ضنا عبيد هاني
مرارتي طاحت بخفي عن الكبد.....يعنى علينا ولا لنا كل عاني

البيوت اللي بها ملكني مثل العبد واني عنده تقل زاني ، ماهي لايقه ولاظنتي انها يقولها او انها مغيره تغيير جذري لانها اول يبي لها سمكره ، مكسره ولايعتد بها ولفظها ماهو مطابق مع باقي الابيات

وانا ادري انها ماوردت بكتاب قطوف الازهار بس اني انا حست السوالف ، هاللودعك تحسبني عديتها بقطوف الازهار ، اما قصيده نعمان ، على كلام اليمني ان السبعه عقبوا دهام بحدى المعارك وسليمان غالب امره انه ماهو صادق ، وهذي عادة الشعار يمدحون الامير والفارس ولو فيه شجاع عديم من ادنى العرب راعي او اي رجل مايذكرونه وتمجيدهم يبقى دايم للامير والعاده هذي من خلال مالحظت انها تهفي كثير من الفريس بالذات ليا صار ماهو شاعر ، لان محد يمدحه الا قليل اما اغلب الشعراء دايم عند الشيوخ والامراء والحكام ،مثل التبيناوي حسن اكتن اسمه قصايده بابن رشيد اعوذبالله طيّره بالخضيرا ،، وابن رشيد محمد يوم يغزي مغازيه معه من شمروحرب وحضر حايل وتميم وهذولا كلهم يهفيهم ويمجد بابن رشيد لانه حاكم وهذا انت ياليمني نفس الطريقه مع دهام
والسبعه صارت بعض الامور معروفه ، ياما ليّمهم راكان بن مرشد ، حتى ان عنزة من بشر صاروا ضدهم ، وابن هذال كان يبي ياخذ الباج عليهم ، ياما ذبحوا الختروشي ،
والرفدي ساجر يوم يزعل على عنزة ويشن عليهم غاراته ومغازي ساجر ونهبه كان معه شمامره وتليمت معه ناس ماهم عنوز ، فقال مدري هو ابن هذال هالمقرود يغزي والفود لشمر ، خلوه يجي وسلقاه له ، عاد هذي الروايات اللي نسمعها ماندري ولو ان بها من الصحيح لان اللي سولوفها يذكرون اللي عليهم ولايعرفون النت ولايعرفون الهياط والجمخ ، يتليمون على شبة النار والعلوم والسوالف ويعدون السالفه حتى على ارواحهم ،
اما قصيدة هاني حسب الاختلاف ،،،

مثلا ابيت
ستر الهنوف ان وايقت مع كتبها .......هو حرمة حليل تدرج في كتبها

والصدر صدر البيت ليا جتك من حصن النواهيم تنداش ،،،، حرمة حليل تدرج في كتبها

حتي يتناسق ، لانه يقصد اليمني بكلامه اما ستر الهنوف ان وايقت مع كتبها مايتناسق وهو مثل المدح العام اللي يقال والقصيده ماهي قصيده مدح وقبله

والا انت ياسليمان فقري وبلاش...حدار دلو عاجزن ماجذبها

انشد عن اللي ترك الفود وانحاش .....كان ساجر على الزرفات ينهب وينحاش
خلا الصابور بنقرة الحير ماهاش .....الاول .ساجر وقع بنحورنا ليه ماهاش ....خلوه ربعه يوم لحقوا طلبها
وغيرها كثير
لحقوه عيان على الموت عطاش ......وقع طريح وسابقه ماركبها ،،،

لان السبعه رموا ساجر الرفدي ، وبغم يذبحونه مار ادخله السحيحير وقبل الرجال يشحون بالفريس ،والسديري الله يرحمه هضم الاحداث من جانب السبعه والفدعان ، حيث ان كتابه فيه كثير من الاخطاء ، مثل حدا قصايد سعدون العواجي مقدمها وهي متأخره ، وهي مرثيه غالب بعياله وضعها باول الكتاب ، مانلوم حنا السديري لانه ناقل ، وربما انه ماصادف احد يروي له ،
ومثلها مقتل هايس القعيط ، حيث ان هناك روايه ان اللي ذبحوه السويلمات وليس ولد عقاب ، والروايه اللي يسولوفنها الشيبان ، ان اللي رماه حمد الحميطري ، من الحماطره
ويقولون انه رماه قبل يركب فرسه يوم حط رجله يبي يركب وهو يرميه ، ويقولون لو انه تساوى عليها مالهم حيله به ، وهذي سوالف الشيبان وولد عقاب راح غزاي ويوم وصل له الخبر انه مات
نكس لديرته وقال تقاضينا ، الحين يجيني واحد يزعل يقول ليه تقول هالكلام وانت تقلب الحقايق وفيه قصايد تثبت عكس ماتقول ، انا مااقول قولي صحيح ولا اقول انه كذب ،
انا اقول هذي روايه موجوده ، واللي سولفوها ماهم جيل النت، ولاعندهم تعصب ،بغض النظر ان كانت كذب او حقيقه هي روايه رويت ،
رغم ان السديري غير في كثير من القصايد ، والكلمات