الشكر لك يابن عبار ، الحديث معك لايمل ، حتى لو انا مختلفين بوجهات النظر فان هذا لايهم ،
وبالنسبه للرجال اللي حجزوا بينهم تعتبر حاله فرديه ، وفيه مثلها ، ولو ابي اسولف مثلاً ، يوم انك طريت ورد الماء ، اكالسنه سنيات مضن قديم قبل طلعة المطاق يوم الناس كالحين على العدود ، قيضوا اجناب على بيضا نثيل ، والبيضا انا ماادري عن ماها ، بس ان صاروا عليها ناس وفرزوا لناس وجم حروب اهل مجاهيم ويوم نزلوا البيضا قالولهم الماء ما يكفي وهم صادقين ، لان عليها مايكفيها ، وقالوا لهم عندكم قليب البغقا ماعليها احد والسبعه عاد قليلين واهلها ماكلهم حاضرين اكالحين، وهي عد ، ونزلوا عليها حرب وفرزوا لهم ، واهلها غايبين عنها ،عاد اهلها الشيابين من المسكا ، لكن قبل الناس قوانين ، لاغابوا الشيابين قلطهم الاقرب، وان غابوا قلطهم اي مسيكي وان غابت المسكا يقلطهم اي سبيعي وان غابت السبعه قلطهم اي واحد من ضنا عبيد وان غابت ضنا عبيد قلطهم اي عنزي ،لكن مثل الحوله والناس اللي ماهي قاطنه العد ، ردهم عيب ، لو ان بعض الناس ماهو بحال مايسقيك لو انه برقبتك ويشح عليك بشربة الماء وحلبة الناقه وهذي من العفانه والبخل، عاد عنزة لو بها من الاصناف ذي وتلقاها بجميع قبيله لكن مع فارق طبوع الناس ، العام الاول والسنيات اللي مضن ربعت عتيبه ومطير وهالجنوبات من حرب وغيرهم يوم جم ديار عنزة غرب حايل صار الربيع يم هالنفود والنقره والخرم والوسوق ، ويوم يعبون ويّتهم انتم ياهالجنوبات يتهولون ان العنوز مايخذون فلوس عليهم ، وواحد مد فلوس لشايب عنزي راعي خزان والشايب ثاع عليه قال اعقب وانا ولد ابوي ، وواحد عبا وايته وعقب صنّخ قدام الخزان يتنى راعيه يجي يحسب انه يبي يجي ، وجاه واحد سبيعي قال انت وش عندك اطلع عنا ، قال ابي اعطي راعي الخزان حقه ، قال ياولد ماهو تفضحنا ، تسند الشملي وتحدره وتاصل تيماء وتنكس مااحد يقول لك وين انت رايح ، وعقب يتضبضب ويمشي ، وعنزة والله ونعم حتى والله بالمراعي اهل الطرش يدقون مضحى الغنم حول البيوت مايقولون لهم شين ، مع ان العنزي مايسويها ،خص الناس اللي تفهم وتدرا بعض الامور ، مضحى الغنم واللي حوله من محارم البيت ، ولااحد يجيه ،لكن العنوز مايكلمونهم ولاعمرهم قالوا لااحد شي الا عند شي يلمس ، وان كان هنيا حالات فرديه من العفانه فهي تحسب على من فعلها.

بالمناسبه يابومشعل ذكرت قصيدة جدوع بن عثعث ، انا ماعندي خبر منها ، ولو توردها فضلا لاامرا ان لم يكن بالسؤال حرج ، وكذلك على الطاري بما انه جاء ذكر جدوع له قصيده ياراكب حمرا ردوم من الحيل ،،، من جيش ابو تايه بناره وسمها ،،،،
فهو يوصف ذلول وعليها الافيحج وسم الحويطات ، مما يدل ان الذلول مكسوبه من ابو تايه او انه يستفزع ويحرض ويدلل على ذلك مجازا، عاد انا مدري هو انت ياعوده ولا غيره ، لكن الغالب انه عوده ابوتايه لان له اشتباكات مع السبعه وفيه قصايد وردن بقطوف الازهار تدل على هذا لو ان التفاصيل ماهي واضحه ،والدسم له قصيده الله من يوم جرى بالدفينه والمفاد ان السبعه كسروهم
مع ان ابوتايه له مغازي ضد عنزة وضد شمر متنوعه ،،، وتقل اكثر من مغزا ماهو مغزا واحد ،وهنيا غزو ثاني لعنزة هاللي يسمونه الشيبان غزو عنزة فانا لااعلم هو على دور الاخوان يوم تمشي عنزة مع ابن عقيل وتوجهوا شمال لديار بني عطيه وبلي والحويطات ، والحويطات حويطات التهمه هاللي شيخهم ابوطقيقه ، وفيه توصيفها لشاعر عنزي ذكر بها الديسه يوم يقول يوم انا لفينا الديسه ، او بهالمعنى ، وللاسف انا لحقنا سوالف كثيره الا انا ماحفظناها وسجلناها ، وراحت واكالحين اما من صغر سن او جهل ،
وهنيا غزو بعد يم ابن درويش من شيوخ الحويطات بعد اللي يم الاردن ، الاحداث هذي ماهي واضحه فهل هي مع الاخوان او قبلهم او بعد ايام الفوضى يوم صار انقسام الاخوان يوم الدويش وابن دهينه والرفدي وفرحان ابن مشهور واكالاحداث المعروفه ، لان بعدها صار انفلات وقامت الناس ترجع للغزو بعد الديانه لو انه ماهو مثل ماكان قبل الا انه حصل ،انا عندي رس منها بس فيه تفاصيل ضايعه هنا وهناك ،

وللاشاره لابن درويش اعتقد انه بخيت ابن درويش له موقف مشرف ، يوم جاء ترحيل عنزة من الجفر وباير والظاهر انه امر حكومي اكالحين عيا على الناس اللي عنده من عنزة وقال مايرحلون اللي نزلوا عندي ، اما باقي عنزة تم ترحيلها بحكم ان عنزة ماهي قبيله اردنيه اكالحين ، عاد هذي عندي بهذا مدري عقب ابوحنيك اوبهاكالحروه ، او على دور عبدالله الشريف ولد شريف مكه اللي طرده الملك عبدالعزيز واخذوه البريطانيين ونزلوه بالعقبه وعقب نفوه يم قبرص ياما توفى ، اللي هو حسين اللي قاد الثوره العربيه واتفق مع البريطانيين ضد الدوله العثمانيه ،وخدعوه بمملكة عربيه يصبح ملكها ، من ديار بكر بتركيا يحدها ايران شرق والجزيره العربيه الى لبنان وفلسطين مار ماحصل له لون ، ومراسلاته الاخيره دخل حاله نفسيه يكرر الكلام والاتفاقات اللي عقدها مع البريطانيين والبريطانيين يراوغونه بالكلام ،
المهم ان حاكم الاردن اكالحين كان ولده او ولد وولده امر بترحيل عنزة بحكم انها قبيله نجديه سعوديه وفعلا رحلوا عنزة وبعضهم زبن ابن درويش وبعضهم من اول كان عنده وعيا عليهم ومدحه الخمشي بهجينيه ،
يـراكـبــن فــــوق عـيـدابــه
وضحا زهت بالدناديشي
مامـونـتـن مـابـها اخـنابه
تزهى جـديـد القراميـشـي
تلفي على الشيخ واقرابه
على بخيت ابـن درويشـي
ختـم علـى الطيـب عيـابـه
من عند حمر الطرابيشـي
يــوم الـرحم بـار بانسـابـه
والعـرف غـادي تناويـشـي
مابينـهـم صارت طـلابــه
ورحولهـم يمهـم حيـشـي
هــذا ولــد شايـبـن جـابـه
ماهو خطو واحدن ديشـي
ابيض من الشـاش يجزى بـه
يـانـاقـضـات العـكـاريـشـي