ياهلا بك يابومشعل انا ادري انك جمعت من تراث القبيله مالم يجمعه غيرك ، فأنت لك السبق في ذلك ولك ميزه انك لحقت الناس الاولين ،لذلك من المؤسف حقيقة ان يذهب كل ماجمعت سدى ـ وتعبك ووقتك وجهدك ومالك وانا اقول هالكلام هذا وانا اتفهم وجهة نظرك اللي انت متسمك بها وتبريرك ، الا اني لااجده مقبول حتى وان تفهمته منك ،وكتاب السديري هذا هو عندي شراه والدي حفظه الله نسخته القديمه اللي غلافها اسود وصفحات الكتاب صفراء والصفحه الوحده تقل عشرين صفحه من كتب اليوم ، لان هذيك الطبعه من الكتب القديمه ، اللي ورقها به غلظ ، شراه والدي وينقلونه اهلنا بالطبيق وهم بدو ،والكلام هذا حروة طلعة الكتاب على ذكرك وعلى عهدة الرواه يقولون الطبعات التاليه تفتخت عن الاوله ماهي مثلها ، والسديري اصلا ماذكر شين ضد شمر بل انه حرف الابيات اللي بها قوة من قصايد سعدون العواجي ، وسعدون العواجي قصايده حماسيه وقافه فريد ، وعلى ذكر ذلك ذكر فواز الغسلان ان قصيدة شبر من البيدا يعوضك الافزاع ،،،وسود الليالي يبعدنك عن الضيم ،،،، انها لواش بن نمران وهو مخطي ، حيث انها لسعدون وواش ماهي له ويمكن انه احد قايلن له انها لواش ، لكن ماهو معناته انه صحيح ، المشهور انها لسعدون واذا جاء واحد قال لواش مايجعل هذا دليل على الاول وحرفها حرف سعدون ، المهم ،،،، ان السديري غير ابيات ولم يذكر اصلا احداث كثيره ، ورواة شمر اصلاً رووا احداث لولاهم مادرينا عنها ، يعني السديري ماذكر ان عقاب اخذ الاخاوه على اهل الضلع ولم يذكر قصيدة الشمري باكر يجينا عقاب ينزل على فيد ،،،وكلن على معيده يسوق الريالي ،، تولموا ياهل البقر والمعاويد .....الخ القصيده هذي ماذكرها السديري هذي الشمامره يسولفونها ، عاد الشمامره ماهم جيل النت الناس الاوله ، وانا برقت بحاجتين الناس الاولين يعدون الصحيح مايزملون منه ، لا شمر ولا عنزة ، وتحويله بيضا نثيل هذي عقب اللي ذكرها السديري اول شي ، قبلها جوهم من طرف هاللغف يم طويه والمكلا وهاكالمحاري وعنزة ماهي بس ولدسليمان معهم من بشر ومعهم من ضنا مسلم هاللي يم الحجاز ـ الحين العنوز مايبون السوالف ذي وصارت امور يم عنزة وشمر التالين مايبون طرياها وهي صحيح وبها مهامز عليهم كلهم ، ومعارك صارت بجهات احيمرات وابركان بالكالمحلات وهذي وين على خط الروضه ذوان دليل ان عنزة تعدت غاد وهذي جنوب حايل وعنزة قاموا يبطشون بالارض وشمر ساقت الاخاوه ، وعقاب قام يغزي ورى على حرب جنوب شرق هاللي يم رخا ذوان دليل انهم مسيطرين على الارض ياما كسروهم شمر يوم صلال ينسحب من المعركه وعقب ذبحه عقاب وصلال انسحب بالشملان اللي معه ماندري وش بينه وبين الشمامره فيه سوالف ذكرت وسمعتها ان من العنوز ومن الشمامره ،والشملان فريس وهم كانوا جناح مايستهان به مع العواجي ، هالودعهم كسروا عنزة ، واحتفظوا شمر بالارض اللي ماجتها عنزة يوم يقول شاعرهم وديارنا حنا لنا به تصاريف ،، سلمى ورمان واجا والعصامي ومعركة روضة التنهاه شمر كسروا عنزة لولا السبع الخياله منهم لزام والجلوي والخمج والاربعه الباقين ليا هالحين ماندري منهم ، والا هجت عنزة وهجت اباعرها ماغير عقاب والمرتعد ومعه قليلين بقوا يوم حدوهم من البيضا ليا قاع المرتعد ياما وصلت الروضه يوم يبكي ولد المرتعد والمرتعد قال سكتي الورع يامره ، اللي جاب له مسكت الورع ، وهم بالقاع ، القاع ذوان هاللي به اهل الهجن الحين الناس الحين مايبون يقولون قاع المرتعد ، هذا اسمه ومسمين الميدان ميدان بيضا نثيل للهجن ، وعششهم وغريفاتهم بشنقه وانا اعتقد ان هذا من الخيانه التاريخيه ـ المرتعد ماهو زامل من خيالة شمر وقاموا بين طراد ونزال ياما وصلوا الروضه هاللي ذوان شمال اسبطر والعماير وبعض عنزة هج هجيج اباعره ، ويوم جم الخياله السبعه كسروا شمر ورثعوا بهم ، اللي عاد يقصد سعدون في روضة التنهات قرطن الالباس ،،، وذبحن لياما جيت بيضا نثايل عاد هجت شمر عقب هذا واقفت وعقاب لقط جريس وذبحه بزواقيب ، ومسلط هج وهجت شمر معه ، وهم قبل بيوتهم وحلالهم قدامهم لانه رحل وجوهم على الخيل والجيش وبيوتهم وحلالهم من اول فاهقينهن غاد يوم يرسل القصيده سعدون ياراكب اللي مالهجها الجنينا
وينه السديري ماذكر الامور هذي كتاب السديري كتاب يوم تقراه اسلوبه جذاب والا الاحداث متقدمه ومتاخره ماهي على تحقيق تعتبر ذكر احداث وتجميع بس ،،، السديري تولجوه بعض الحروب وبعض الشمامره ، وهو اصلا ماذكر شين ، واللي ذكره مايعتبر شين قدام الكلام اللي ذكرته فوق مع العلم ان رواة شمر ذكروا اشنع من كتاب السديري،،

الفرق ان الناس هالحين تحسس من كل شي ولايبون يقبلون بعض الامور القديمه ، ومن الخطا معاملة الوضع القديم وربطه بالحاضر ، مثل يوم يقول وارد العواجي شربنا الحشايش ، هذاك اكالحين عندهم من الكار ، وحنا لو نبي نحاسب الاولين حسب وضعنا الحالي مابقى شي من معاني الحدث الماضي ، كيف حنا نحكم عليهم ونغير مجرى الامور
فقط لان الوضع اليوم لايشابه الماضي ، مابقى من تاريخنا الماضي من الغزو والخيل والركاب والهجن والشعر والاحداث والمناقيد اليوم تقريبا شي وتبدلت الحياه ، وفوق هذا نجي حنا ونسلب الحدث ونغيره ونصيغه على كيفنا
انا ماعلي من وزارة الثقافه والاعلام والا دور النشر تطبعه والا ماتطبعه اوديه لبنان والا اي دوله تطبعه لي ، وهل الرقابه عندنا تفهم وتحكم على التاريخ ، وعلى اي اساس يحذفون وعلى اي شي ؟ اذا حنا غيرنا التاريخ هذا معناته
ان هذا التاريخ لم يعد تاريخ ولم يعد الحدث حدث ولم تعد القصيده قصيده ، المسأله رغم التعقيد هي بسيطه جدا ،
الغايه من جمع التراث والتاريخ هو حفظه حتى لايندثر ولكن بعد جمعه وتغييره نحن هنا لانعد محافظين بل محررين
وكأننا نعيد صياغة الحدث والشعر على حسب وضعنا الحالي مما لايجعل الحدث نفسه الحدث ولا القصيده هي القصيده