( اليوم الوطني الثامن والثمانين )

يصادف يوم الأحد الثاني عشر من شهر محرّم لعام 1440 هجري الذكرى الثامن والثمانين لليوم الوطني لتوحيد المملكة العربية السعودية على يد المغفور له بإذن الله الملك عبدالعزيز بن عبدالرحمن آل فيصل آل سعود طيّب الله ثراه وفي هذه المناسبة السعيدة قلت عدد كبير من القصائد عبر مشوار حياتي الشعرية ويسرني أن انشر بعض القصائد القديمة الجديده التي سبق وأن ضمنتها ديواني ( ديوان الوائلي ) وقد نشرتها بعنوان ( الأشادة في أمجاد القادة ومن تلك القصائد هذه القصيدة :

مبداي باسم مكون الكون باسبـوع *** منشي العبـاد وكايـنات الطبيعــــه
ومن بعد ذكر الله سجلت موضـوع *** عـن واقـع كـل الـوسايـل تـذيـعــه
تـاريخ عـبـره بالسجـلات مطـبـوع *** عـد الـوقـايـع مـا تجـاوز وقـيـعـه
شعب الجزيرة كان شتان وامـزوع *** شملـه تـفـرق كـل عصبـة مزيعـه
وصـل القرايـب بينهم كان مقطـوع *** حـل التباغـض والجفـا والقطيعـة
هـذا غـزا هـذا بـجــردات وافــزوع *** وهـذا عـلى هـذا يـدور الـهـزيعـه
ياما بها صالت جموع على جمـوع *** كـون وحرايـب والنتايـج فجيـعـه
لقحت ضغاين وانتجت دم وادمـوع *** تشيب مـن هولـه طفـال رضيعــه
كـل بـذل روحـه عـلى غير منفـوع *** مثـل الـذي يـتـبع سـرابٍ بـقـيـعـه
سلم زمن عصر الجهل كان متبـوع *** سلب ونهايب والمصايب شنيعـه
وبالمجتمع عمت خرافـات وابـدوع *** وراجـت شعـاويـذ العبـاد اللكيعـه
ظلـم وظـلام وداعـي الحـق ممنـوع *** وكفر ومعاصي والمناكر فضيعه
وكثر النكد والكيد والهـول والـروع *** والجور واعمال الدجل والخديعه
مع الجـفا والحيف والـذل والجــوع *** خيـّم عـلى كـل الـديـار الـوسيعـه
من عقب هذا لاح في جوها اشموع *** البـدر نـوّر فـي سمـاهـا شعـيعـه
جاها الفرج من والي الكون مدفوع *** والعـز حـل بجالها عـقب ضيعــه
نسل الدروع لـدارهم حـرز وادروع *** صفوة هل العوجا صوارم ربيعه
مجد الجزيرة والفخر عادها رجوع *** لـيـث بـشـرع الديـن يمنع منيعـه
لبّـا نـداء شيخ مـن الـظلـم مفجـوع *** للحـق يـدعـي ما لـقا مـن يطيعـه
دعوه من السنه لها جذوع وافروع *** فـيهـا الصلاح وللخلايـق نـفيعـه
نادوا لدين الحق في صوت مسموع *** وتبايعـوا لأجل الهدى خير بيعـه
وتحالـفـوا انـصـار للـديـن واربـوع *** وتعـاهـدوا يحيـون حكم الشريعه
وقضوا على الفجار والضد مقمـوع *** وسدّوا عـلى كل العصاه الذريعه
مـا هـازهـم مـن دار بالدار مطمـوع *** خابوا دعـاة اهـل العلوم الخليعه
تركي اعـاد المجـد مثـني ومـربـوع *** مضراب سيفـه ماتشافى صريعه
سيفه يقص رقاب وامتون واضلوع *** به الشفـا وعلاج روسٍ صديعـه
تركي فعـل فعـلٍ بـه المجـد مشفـوع *** ضربـات كـفـه بالمعـادي فـنيعـه
وفيصل لبوه العضد والزند والكـوع *** مجناه من صلب الفهـود البتيعـه
شبل نهـل مـن صافي المجد ينبـوع *** علمه كما النبراس يجـذب لميعـه
من عانده راسه عـن المتن مشلوع *** حـدب القشاعم من يمينه شبيعـه
كم طاغيه من مضربه طاح مجدوع *** خـلي طعـام للـوحـوش المجيعـه
كم حاقـد قـلبه مـن الغيض ملـقـوع *** يخـفي غـليله والضماير وجيعــه
مـن خلـق ربي واهسه دوم منزوع *** كـنـه يـراهـم فـي وطنهـم نـزيعـه
سقاه أبن مقرن من الموت قرطوع *** واقـفـت خـيـولـه للمنايـا سريعـه
خلا دعـاة الـشـر هـجـاد واهـجـوع *** سيفـه فتك باهل النفوس الدنيعـه
بالشيمه الشماء لـه اهداف ورموع *** توصيف فعـل الليث ما نستطيعه
الليث اللي قلبه من الصلب مصنوع *** نمـر نجب هك النمور الشجيعــه
سور الوطن واحماه والضد مردوع *** دانـت لـهـم كـل القبايـل امطيـعـه
بصروح عـز شامخه مابـها صدوع *** اشـمّ مـن شـمّ الجـبـال الـرفـيعـه
وجـدد سوابق مجـدهم طايل البـوع *** عبدالعـزيـز الـلي فخـرنا صنيعـه
جّـمع شتايـت ديـرة شعبهـا انجـوع *** وليمّ شمل شعب الجزيرة جميعه
ساد الوطن من بـاب جـده الميقـوع *** ومـن ديـرة الخفجي لحد الوديعه
عبدالعزيز اللي يخلي الصعب طوع *** ومن عال دلـه بالدروب السنيعـه
امجـاد عـزه تـرتـقي لـلعـلا اطـلوع *** ومجهـود فضله مرغدين ابريعـه
والحمـد لـلـه بيـرق النصر مرفـوع *** والمملكـة بـيـن الـدول بالطلـيعـه
مـا وردت عـادات غـرب ولا شـوع *** ولا هي لترديـد المبـادي سميعـه
ولا جاملت كفر البشر ذل وخضوع *** تـنبـذ قـوانـيـن العـبـاد الوضيعـه
والمملكـة صارت بساتيـن وازروع *** عـم الـرخا والخير وازهر ربيعـه
لبست بـلدنـا عـزهـا بـافخـر النـوع *** عـلـم وتـطـوّر والمبـانـي بـديعـه
ولا مر يـوم غـير به صار مشروع *** وإلـى انتها المشروع يأتي تبيعـه
وصلوا عـدد ما قام سجـاد واركوع *** عـلى النبي مهـدي العباد وشفيعه

* ومن قصائدي القديمة التي نشرتها في ديواني ( ديوان الوائلي ) ولكني اشعر في قصور لأن معظم قصائدي اكتبها وانشرها بالصحف وفي الديوان ولم تصل أصحابها وهذه المنظومة المربعه تحتوي على ذكر الملك عبدالعزيز بن عبدالرحمن آل سعود طيّب الله ثراه وأنجاله الغر الميامين قادة هذه الأمه المجيدة وقد سلسلت أبناء الموحد حسب ترتيب السّن وهي عبارة عن مشاعر وفاء للقادة الكرام :

سلم الصحابة يا ابن مقـرن تبعــته *** ومجـد الأوايل يا ابـو تركي رفعتـه
وشمل العروبـة في كفاحـك جمعته *** وسجـلت بجهودك من المجد تاريخ

وجبت الرجال اللي لوطنهم ذخيـرة *** تـركي تـكـنى بـه زعـيـم الجـزيــرة
هـو تـركي الأول عـلومـه شهيــرة *** نسل الذي مجده على سطح مريخ

وسعود مجـده بالمفاخـر ايـمجــدك *** انـت الذي يا سعود عاضدت والدك
وانت الذي تبني المعالي سواعـدك *** شيخ وسلايل شيخ مجناه من شيخ

وفيصل ولـد عبدالعزيز الصريـمـة *** مـذكـور بـالـهـمــة وقـو العـزيــمـة
مـواقـفـة بـيـن الخلايـق عـظـيمــة *** ليث الوغـى نوّخ هل الزوم تنويخ

ومحمـد بحـزات المصاعـب محمـد *** الشبـل بـعـلـوم الـمراجـــل تـعــمـد
دم الـمعـادي مـن صقـيــله تـجـمـد *** ما ينجحـد فعـلـه نـهـار الـمنـاويـخ

وخـالـد سنـام المـجـد والعـز خـالـد *** ساس الفخر والجود للشعـب والـد
صنديـد في يـوم اللـقــا والمجــالـد *** عـوايـده جـدع الشيوخ المجاويــخ

وناصـر سليل الليـث للحـق نـاصـر *** النمـر مـا فعـله عـن المجد قاصـر
مـن دور مقـرن للـزمان المعـاصـر *** حلـويـن للصاحـب وللضد زرنيـخ

وسعد كما حرٍعـلى الصيد ضرمان *** ساس النفايل والفضايل والأحسان
الليث مدباس الوغى عـالي الشـان *** جدوى عـدوه بـس حسرة وتفتيخ

وفـهـد فهـد كـل الضراغـم تـهـابـه *** مـن هـمته مايقـرب الخصم غـابـه
صقـرٍ الـيـا شـل الحـبـاري بــنـابـه *** تـلقـا عـلى الـبيـدا مـن الدم تلطيخ

ومنصور نفخر بـه ونعـم بمنصور *** حيثه سليل المجـد بالطيب مذكـور
الصيرمي علمه مع الناس مشهور *** لـه الـرقـاب الـلي تعـلت مـطاويـخ

وعـبـدالـلـه الصنديد لـيـثٍ مـضـرا *** محـدٍ عـلى وصلـت عـريـنه تجــرا
مـثـل الحسـام الـلي افعـولـه تطـرا *** سيـفٍ بـيـد تركي زعيـم المصاليخ

وبندر عزيز الجار محمود الأفعـال *** النادر اللي يرخص الروح والمـال
مذكور بالتقوى وزينـات الأعـمـال *** منقـذ ملاهيف العبـاد الـمصاريـــخ

وسلطان سلطان الرجال الصناديـد *** قـاد الدفـاع وجـدد المجـد تجديــــد
حـد الوطـن عـذّاه عـن كـل تهـديـد *** وحصن بلدنـا بقـاذفـات وصواريخ

ومشعل صميدع باللوازم وحلحيـل *** الصاطي اللي من قروم الرجاجيـل
الحيص شيـال الثقـل والمحـاميــل *** لا مـاج عن شيل الثقل كل طخطيخ

ومساعد من الأشبال عالي مقامـه *** مجنـاه مـن ساس الفخر والزعامه
ما دك بالصنـديد عـرق الرخـامــه *** مـن ناطـحـه يلقـا مهـونـه وتوبيـخ

وعبدالمحسن اللي حميده سجايـاه *** عـلى المكـارم شاهـده فعـل يمنــاه
المحسـن الـلي نذكـره ما نســـيناه *** الحـر الأشقـر بالشبب لـه مصابيخ

ومشاري إلـى عـدو فعايل مشاري *** مثـل القـطامي كان شاف الحبـاري
الشبـل بعـلـوم الفخـر لـه مــواري *** شنكـار مخلابـه مثل قاسي الصيـخ

ومتعـب مبيد الضد زبـن الـونيـات *** حـلال مـبـروم العــقـود الصعيبـات
هو المجرب حين وقـت المهـمـات *** كـان انتهت حيلات روس المداويخ

وطـلال عـنـوان الـكـرم والـمـروّه *** شـهـم وكـريـم ونـفتخـر فـي سمـوّه
ويـوم اللقـا حلحيـل يـقـهـر عـدوّه *** ينفـق لـوجه الله مـا مقصده ميــخ

وعبدالرحمن الوايلي عزالأصحاب *** مثل الحسام بشذرته حتف الأرقاب
البـاتـع الصنديـد نطـاح الأصـعـاب *** شلـّخ عـدوه شـاطـر الـحـد تشليـخ

وبـدر الشجاع اللي فعـوله حـميده *** عـسـى تـدوم ايـام عـمـره مــديــده
يا سعد من هـو باللـوازم عـضيـده *** زيـزوم شجعـان الـرجال المطانيـخ

وتركي الثـاني من صناديد الأنجال *** إلـى تلاقـوا بالوغى والحمر سـال
هذاك نسل المقرني بطـل الأبـطـال *** أدبـر خصيمه وانهـزم عقب تكميخ

ونـواف نفخر كـل مـا قـيـل نـواف *** نواف محمود الخصايل والأوصاف
الليث اللي فعـله بالأعيان ينشـاف *** يـفـوز وعيـون المعـادي مفـاضيـخ

ونـايـف وزيـر الـداخـليـه سـنـدنـا *** لـه بـالفضـايـل والنفـايـل شـــهدنــا
عن من عبث بالأمن يحمي بلـدنـا *** جـاهـد ورسخ حايط الأمن ترسيـخ

وفـواز فـاز بـعـالي الـمـجـد فــواز *** ريف الـذي من جايح الوقت معتاز
الحـر الأشقـر بالهـدد يشبـه الـبـاز *** يفـرا الثنادي مخلبه ليس تمشيــخ

وسلمـان قـدوه باعتـدالـه وسـلمـه *** هـو الـزعيـم اللي مع الناس علمه
مشهور في عـدله وطيبه وحــلمـه *** مثـل العـلم فـوق الجبال الشواميخ

وماجد سطام الضـد بالكـون ماجـد *** مـن عـانـده يصبح مطيـع وهـاجـد
سقم المعادي يـوم عـض النـواجـد *** دوخ عـدوه طـايـل الـبـاع تـدويــخ

وعـبـدالإلـه الـليـث نشكـر جـنـابـه *** السيـف باللـقـوات يـروي ذبـابـــه
مـثـل المهنـد فـي نـهـار الـمجـابـه *** ضربه يغور بقاسي العظم ويصيخ

وأحمد هـو الحلحيل شيال الأثـقـال *** ذخـر المواطن عند شدات الأهـوال
وأن ثقـلـت القـالات للحـمـل شيـال *** بـه يهتـدي روع العقـول المطافيخ

وسطام عوق الخصم للضد سطـام *** نسل الزعيم اللي بالأكوان ضرغام
ريـف الصحيـب وللمعاديـن لـطـام *** صـقـر الجـزيـرة بالعلا لـه مكافيـخ

وثامـر ليا عـدّو هـل الطيـب ثـامـر *** نسـل الـذي فـي نجـد ينـها ويامــر
زبـن المجنى مجـلسه دوم عـامــر *** خـلا الجزيـرة مرغـده خيرها طيخ

وممدوح نعم بطيب الفعل ممـدوح *** لـه بالـعـلا دايـم مـرامـيع واشبـوح
نسل الذي يوم الوغى يبذل الروح *** سجـل فخـر مجـده بـخـط المناسيخ

ومشهور نعم بطيب الفعـل مشهور *** نعم بسلايل صايب الراي والشور
صقر الجزيرة دوم بالخير مشكـور *** بالسيـف بـاد الملحديـن المتـاويـخ

وهذلول نعـم بعـالي القـدر هذلـول *** نسل الـزعيم اللي ليا ضول الضول
قرم الرجال اللي له امجاد وافعـول *** مـن حربته روس العدا تقل بطيـخ

وعبدالمجيد الـلي عـلومه مجـيـدة *** مـن عانـده شـاف النـكـد والمكيـده
نسـل الـذي مجـد المفاخـر يشـيدة *** مـا ضاع وقـته بالعجـب والطرابيخ

ومقرن عزيز الشان ذرب الفعايـل *** نسـل الـذي بـاعـه بالأفعـال طـايــل
الليث تشهد له عـلى العـدل حايــل *** يـوم الشـرور المـدلـهـمه مفـاريـخ

وحمود نجل الليث بالفعل محـمـود *** شبل النمر شبه الفهد صفوة العود
مذكور بالمعروف والفعـل والجـود *** تشهـد لهـم بالـغـانـمات التـواريـخ

ولابـة هـل العـوجـا ملـوكٍ وحـكـام *** بنـوا عـلى التوحيد رايات الإسلام
مبطـي فعـايلهم جليـلات واعـظـام *** عـلوا مقـام العـز فـوق الشـواميخ

* وهذه القصيدة قلتها سابقاً في خادم الحرمين الشريفين الملك سلمان بن عبدالعزيز آل سعود حفظه
الله ورعاه عندما كان أمير الرياض ولكن معاني هذه القصيدة تجدد في كل وقت وقد نشرت بالصحف :

يالله يالـلي لـواسـع الـكـون نسّـقـت *** انـت الـذي كـل الـخـلايــق خـلـقـتـه
وانت الذي انجيت وافنيت واعتقـت *** واحييت جيـل وجيـل زال ومحقـتـه
فرعون من بعـد التجبر لـه اغرقـت *** وموج البحرعن درب موسى فلقته
انشيت سحب الغيم بالمزن له سقت *** سيلـه عـلى القـاع المحيلـة دفـقتـه
يالـلي عـلى غيـب الضماير تهايقـت *** يـا خـالـقـي مـا غـيـر بابـك طرقتـه
يـا خـالـقـي بـحبـال جـودك تعـلّـقـت *** يـا رب حبـلـك مـا تفـصّـم احلـقـتـه
سـمـعـت مـا قـالـه نبـيـّك وصـدقـّـت *** وتـبعـت ديـن المصطفى واعتنقتـه
واطلـب عسـاي بطاعـة الله توفـقـّت *** والرشد عن درب الضلالة فرقـتـه
بـاسمـك بـديـت وللمعـانـي تـطـرقـّت *** فاض القريض ومن لساني نطقته
الشعـر تـاق لمـدح سلمـان واشتقـت *** فاضت روابع خاطري من شفقتـه
مـدحـت عـنـوان الصخـى ما تملـقـت *** قولي بمدحـه واقعـي ما اختـلقـتـه
لاشـك مـهـمـا فـي مـديـحـه تعـمـقـت *** وصفه يفـوق الـلي بعيني رمقـتـه
يـابـو فـهـد بـالمجـد فـقـت وتـفـوقـت *** والمدح والتمجيد والوصف فقتـه
أنـت الـذي يـالليـث لـلطـايـلـه تـقــت *** وانت الذي فعـل المراجل عشقتـه
البـخـل عـفـتـه بـالـثـلاثـة وطـلـقـــت *** ولا هي غريبه لو عطيته اورقتـه
يـابـو فـهـد مـا يـوم لـلـجـود فـارقـت *** حيث الصخّى في راح كفك رفقـته
مـا يـوم من كثـر الهواشل تضـايقـت *** وكـم معسرٍ من رزق ربك رزقـتـه
يا مـزبـن الـلي يشتكي ميلـت الوقـت *** ينصاك بالشدات مـن شـان وقـتـه
وأن جالك الـلي قال للحمـل ما طقـت *** من ثقـل حمله فوق حملك وسقتـه
يا ما عطيـت من المحاويج وانـفـقـت *** مالك عـلى فقـر الضعافي هرقـتـه
مـن كـثـر بذلـك مـا تمللـت وارهـقـت *** تطلب من المولى مثوبـة اصدقتـه
بـالـمـرجـلـه لأخـلاق والـدك طـبـقـت *** تفـرح صديقك والمعـادي عزقـتـه
حصلـت مقصـود الرجـولـه وحقـقـت *** وانت الذي سور الضديد اخترقته
واهـل الغـدر والبوق لقلوبها احرقـت *** تدحـر خصيمك ما تهمك اشهقتـه
وأن كـان ضـاع الحلم لعـداك زهّـقـت *** تـطـعـن عـدوك ما تفيـده ادرقـتـه
لـكـن عـدوك مـا غـدرتـه ولا بــقـــت *** جيته عـلى وضح النقـا ما درقتـه
وانـت الـذي لخلـول الأضـداد فـتّـقـت *** ومن لا مشى بالحق ستره هتقتـه
جـداه قـولـه لـيـتـنـي مـا تـوهـقـــــت *** يـوم انـت في كف العداله صفقتـه
اصغـيت للشاكي من الظلـم واطرقـت *** وتسمل عيون اللي تحملق حدقته
الـلي اشتكى مـن مظلمـه بـه ترفـقـت *** والـلي يعيـل تعـدلـه عـن طفقـتـه
سـديـت بـاب الـشـر يالليث واغـلقـت *** من عال عن دربه عثرته وعقتـه
فـكـرت بـحـلـول الـمـشـاكـل وبـرّقـت *** والحـق دون المشتكي مـا خنقتـه
عـادل ومـن حـكـم الـعـدالـه تـوثـقـت *** والمجـد مبطي وارثـه مـا سرقتـه
شبحـك عـلى العـلـيـا ولا يـوم دنـقـت *** سعـيـت لـلعـلـيـا وشـفـك لحـقـتـه
وعن رقـي مشموخ العلا ما تعـوقـت *** تصعـد ومن رام المعـالـي فهقـتـه
حـتى عـلى روس الشـوامخ تسلـقـت *** والـلي يسـابـق بالمفـاخـر سبقتـه
قـلـتـه ولانـي لـكـلـمـة الزور لـفـقـت *** والشعرصوت من القوافي زعقته
سـطـرت مـن عـذب المثايـل ونمـقـت *** ذوب العسل ترياق شهـده لعـقـته
غـربـّت بـالـدار الـوسـيعـة وشـرقـّت *** والـمـر والـحـالـي بـدنـيـاي ذقـتـه
وصلوا على اللي بسنته حّرم المقـت *** عـد الطعوس الـلي تـزاوم ابرقتـه

شعر عبدالله بن دهيمش بن عبار الفدعاني العنزي مع تحبات موقع قبائل ربيعه عامه وقبيلة عنزة خاصه

صح الله لسانك أبا مشعل ..
سلمت روحا و جسدا و فكرا و قلما ..
قرأنا شعرا .. أدبا .. تاريخا .. سيرة ..
وفاء لولاة الأمر ..
ذكر أمجادهم ..
حب الوطن ..
حفظ الله لنا ديننا و ولاة أمرنا و وطننا ..
و حفظك ربي من كل مكروه و تبقى سالما شامخا ..

صح لسانك وسلمت بنانك ودامت قريحتك الفياضه الزاخره بالعطاء الشعري الذي دائما راقي وزاخر باالمعنى الجزل والمناسبات ذات اهميه سوى كان وطنيه او اجتماعيه او تاريخيه
ودائما لها وقع في النفوس والعقول المدركه لغزارة المعنى والحبك الجميل والذي لايمل

طابت ايامك ونسئل الله ان يديم عز الوطن بالامن والامان وان يوفق ولاة امرنا ويعينهم