قصائد شكر وثناء لرجال أفاضل

قال عبدالله بن دهيمش بن عبار هذه القصيدة يسند على الرجل الفاضل
محمد بن صالح بن مجرب بن فحيمة الضوي رئيس لجنة التنمية بالشقة بالقصيم :

بـسـم الـلـه الـرحـمن مـبـدأ القصيـده *** الـلـي خـلـق خـلـقـه وسـن الـعـقيــده
وبـعـده شكـرت الـلي خصالـه حميـده *** ساسه عـريـق من الرجاجيـل صـبّـه

محمـد أبن صالـح من احفـاد مجـرب *** عليه أبي اسند صادق القول واعرب
منـظـوم مـن قـافـي يـسـلّـي ويـطـرب *** مـثـل هـبـوب الـريـّح ينعـش مـهـبّـه

تسلم يا أبـو مشعل عسى فالـك الخيـر *** شهـم وكريـم ولا يجـي منك تـقصير
تـعـيش يـا نـسـل الـرجـال الـمـغـاويـر *** فرسان وأن لبسوا مـن الجوخ جـبّـه

حـيـثـك قـرابـه مـن سـلايـل سليـمـان ***عـبـرّت فـي تـكـريـم حـفـل الـعــلـيـان
كـلام صـدق ولا تـكـلّـمـت بــهــتـــان *** بالمنـبـر الـلـي كـل مـخـلـص خـطـبّـه

مشكـور يـا قـرم العـيـال أبـو مـشعـل *** أنـت الصدوق الـلي اليـا قـلـت تـفعـل
عـنـد القرابـه يا أبن الأجـواد تـزعـل *** يـفـداك الـلـي فـي كـل لـون يـتـشـبّـه

ارسلـت لـي يالـقـرم مقـطع بـنـاخيـك *** نـاصـر عـسى يـبـقيـه ربـي ويـبقـيـك
يـقـول بـالـمـقـطـع نـعـزك ونـغـلـيــك *** أطــلــب لـعــلّـه دوم فـي حـفـظ ربّـــه

اعــتـز بـانـصـافـك ومـنـك اتـشـكّــــر *** عـسـى فـداك الـلـي لـجـهـدي تـنـكّــر
حيثـك شببـه الـلي عـلي الـوكـر وكّـر *** خـرب الحبـاري يجـدعـه تـقـل خـبّـه

يـا طـيـر شـلـوى مـا بساسـك هـدانـه *** يامـن عـرف بـالـنـاس قـدره وشـانـه
مـجـلـسـك بـالـشـقـة مـبـيّـن مـكـانـه *** والـبـن الأشـقـر لـلـنـشـامـا تـصـبّــــه

مـن سـاس عـزوه تشتهـر بالحـميـه *** جـعـافـره شـجـعـان نـعـم الـسـمـيـــــة
قـصـيـرهـم حـط الـجـرس فـي دلـيـه *** وقـبـل ورود الــطــرش يـمـلأ اقـرّبــه

الطيـب وعـلـوم الفخـر مـا جـحـدهـا *** كـود الـلي اصحـاب المكـارم حسـدهـا
وأمـر مـن هـذا عـلـى الـدوم وأدهــا *** مـن بـان عـلـمـه كـل حـاسـد يـسـبّـــه

يالقرم هـرج أهـل الحسد ما صدمني *** ولا عـابـني قـدح الـبـذي لـو ظـلمني
شـرواك بـه مـا خـاب ظـنـي وخـمـني *** والـلاّش اشـهـّر بـه وبـسـمـه انـبّـه

مـجـهــودي لـعـنـاز مـا هـو نـدامـــه *** ما هـمـنـي كـثـر الـتـعـب والـغـرامـه
دايـم اجـد عـنـد الـكـرام الـكـرامـــــه *** لـي عـنـدهـم حشمـه وقـدر ومـحـبّـه

جميع منصف يـذكـر الجهـد وايشيـد *** الـلـه كـفـانـي شـر كـيـد الـحـواسـيـد
ولا صح لـلي يحرض القوم ما يريـد *** الـحـمـد للمـولـى سـقـط وسـط غـبّـه

اشوف بعض القوم صاروا عصابات *** كثر الهياط بماضي العصر الـلي فات
كـم واحــدٍ قـصــده يـثـيـر الحـزازات *** يلـقـي كـلامـه مـا دري عـن مـطـبّـه

عـبـر التـواصـل فـي جهـاز الهواتـف *** الهـرج شـت الشمـل عـقـب التكاتف
كـيـف العـلـوم السـامـجـه والتـفـاتـف *** يعـجـب بـهـا الـلي للهـدف مـا تـنبّـه

والــلـي لـغــرات الـخـلايــق تــطــرّق *** مـا يــوم فــكّــر بـالـحـقـايـق وبـرّق
يـفـرح بـشـمـل الـمـجـتـمـع لا تـفـرّق *** لـو الـمـعـايـب كـلـهـا وسـط عـبّـــه

نـعـوذ بـالـمـولـى مـن أهـل الـبـلابـل *** الـلي خلطـوا مـا بيـن حـابـل ونـابـل
الـلـي تـغـطـرس جــاه لـلـكـبـد دابــل *** حـتّى تـضجّـر مـن مـلاكـع اعـطـبّـه

والخاتمه صلّوا على مهدي الناصس *** المصطفى اللي وضّح الدين نبـراس
أدّى الأمـانـه واسلموا كـل الأجـنـاس *** ومن كفـر راسـه عـن عـلابيـه ذبّـه

قال عبدالله بن دهيمش بن عبار هذه الأبيات شكر وثناء للرجل الفاضل محمد بن صالح بن فحيمة حيث حصل لسيارتي صدمة وتغرمت مبلغ وطلب مني أن أرسل له الطلب لكي يسدده ولكني سددت واعتذرت وهو له مواقف مشرفه مع رجال منهم شخص نخاه وطلب منه سيارة وشراء له سيارة وشخص آخر كلمه وهو بالسجن وقال أنه مسجون على مبلغ ستين ألف وسدد عنه وكل الرجلين اجناب ولا يعرفهم وهو رئيس لجنة التنمية بالشقة في بريدة وقلت هذه الأبيات اشكره لأني اعتبره تجمّل :
يا ابـو مشعل عادتك دايـم تجـمّـل *** تكـرم الناصي لـو أنـك ما تعـرفـه
ما كبيت بوجه من هـو بـك تأمـل *** الكـرم والجـود لـك مهنـه وحـرفه
للحـمـول البـاهـظـة طبعـك تحمّـل *** ومن عنالـك ملتـزم حليـت ظـرفـه
وكـل ضيـف اليا لفـا ما هو مهمّل *** الرّطب للضيف من قنـوه تخرفـه
وكـم هـرفي من سببـك أمـه ترمّل *** يا ابن صالح تستوي لك كل ترفه
يا أبـو مشعل مكتب التأمين صمّل *** وجـم نبع العـد لـو نوشح نغـرفـه
وأبي اخبرك المبلغ المطلوب كمّل *** واحمد الله يا أبو مشعل تم صرفه

قال عبدالله بن دهيمش بن عبار هذه الأبيات اهداء للرجل الفاضل عبيد بن ذياب بن شامان
البجيدي الموظف في مستشفى الأسنان الحكومي في بريدة على اكرامه لي ولا غرابة فهو
من بيت شرف وعز ومن حمايل وشيوخ البجايدة فقلت :

أبــي انــدب الــلـي لـلـرسـالـة يــودي *** الـلي يحـدد وجـهـت السـيـر تـحـديـد
بـالـواتـسـاب ارســل جــوابــي وردي *** يوصـل جنـاب الهيلعي حضـرة عبيـد
القـرم الـلـي عـن واجـبـه مـا يـصـدّي *** انـا اشـهـد أنـه مـن كـرام الأوالـيــــد
بـالـشـكـر لأبـن ذيـاب بـيـحـت ســدي *** ورد الثنـاء مـا فـيـه عـيـب ومـناقـيـد
ابـي اشـكـر الـلي بالسرى لـي يـبـدي *** تـقـديـر مـا قـصـده مـدايـح وتـمـجـيـد
الــمــدح بــالــطــيّـب مـــرادي اودي *** ومـن طـاب فـعـلـه مجـدوه القـواصيـد
كـل يـوم يـدعـيـنـي مـرامــه يـغـــدّي *** غـيـر التوسـط فـي انـجـاز المواعـيـد
ادنـا خـويـاه لـخــدمـتـه مـسـتـعـــدي *** يـقـول ابـشـر تـم لـك كـل مـا تـريــــد
وأن بـار خـطـو الـلي ضميـره مصدّي *** عـبـيـد مـتعـود عـلـى الطـيـب تعـويـد
لـه الـفـخــر لا قــال شـامـان جـــــدي *** مـن روس عـقـب قـني نعـم الأجاويـد
شـامـان لـجـمـوع الـيـتـامـى يــقـــدي *** الـعـزوة الـلـي حـافـظـيـن الـتـقـالـيــد
الجـمـع الـلي لجـمـع المعـادي يضـدي *** مـا راعـهـم وقـت اللـقـاء كـل تهـديـد
عـزوة هـل الـبـلـهـا بـعـصـر التـحـدي *** الـيـوم الأقـشـر عـنـدهـم كـنـه العـيـد
عـدوهـم لا صـال مـسـرع يـهـــــــّدي *** عصـر السيوف وفـي زمان البـواريـد
اهـل الصحـون الـلي دسـمـهـا يـنـدي *** مـن كـثـر مـا تحمـل كبـاش ومـفـاريـد

قال عبدالله بن دهيمش بن عبار هذه الأبيات اهداء لسعادة الدكتور صالح بن
عبود الرمضان حيث له مواقف مشرفه ويثني على والدة الرجل المعروف عبود
الرمضان من كبار قبيلة الروس ومن الحمايل :

من عمـل معـروف كـلـن لـه مـدان *** والجـمايـل بالحـمايـل مـا تضيـع
كـل طـيّـب عـادتـه فـعـل الحـسـان *** والـردي كـوبـان يشبـه للضـريـع
طـاب نـظـم القـاف واعلنتـه بـيـان *** وامـدح الـلي له قدر عند الجميع
صالـح الـلي فـاز في طـب السنـان *** يـبـذل المجهـود بالـلي يستـطيـع
اشهد أنه ما نـزل بـارض الطمـان *** عـن مهابيـط الـوطـأ دايـم رفـيـع
مجتهـد في جـد ما يرضى الهـوان *** من حمايـل مـا تجـد منهم وضيع
علمهم معـروف من قـدم الـزمـان *** طفلهـم يرقى سنـود وهـو رضيع
من كـبـار الـروس عاليـن المكـان *** كـل منهـم بالمـراجـل لـه صنيـع
يوم عصر الكون ما منهـم جـبـان *** ويبذلـون المـال بالـوقـت الشنيع
نـسـل جـدوّع الـحويدر يـوم كـان *** الـبــوادي يـنــزلــون بـكـل ريــع
فـي زمـان الـلي يعـالـكـن العـنـان *** فوق سرد الخيل يحمون القطيع
صالح العبـود مـن نسـل رمضـان *** والـده مشهور مـن عـزوة منيـع
أبـو صالح خاطـره مـا يـوم شـان *** طيّـب الأخـلاق والصـدر الوسيع
طـاهـر المهجـة وعـفيـف اللسان *** وأن نخى مضيوم بالفزعه سريع
يـا عـسى عبـود فـي عـز وأمـان *** وعسى أيامـه كلها قـمـرا وربيع

قال عبدالله بن دهيمش بن عبار هذه الأبيات يثني على قاسم بن حبيب :

دام عـزّك بـالـفـخـر يـا أبـن حـبـيـب *** دوم يا قاسـم عـلى العـليـا مسيرك
عـادتك يذخـرك مـن ظـرفـه صعيـب *** ومن بدت له لازمه جاء يستشيرك
وعادتـك تـنـفـع صديـقـك والقـريـب *** تـنصي بالمعـضلـة مـن بـد غـيـرك
وانت اللي منك الكرم ما هـو غريب *** تجتهد بإخلاص من صافي ضميرك
اشهـد أنـك دوم بالصـاحـب تـطـيـب *** تـكـرم العـانـيـن وتحـشّـم قـصيـرك
وأن لفـاك الضيـف للجـزلـة تجـيـب *** يا عسى يكثر يا ابـو عـزوز خيـرك
شهـم وأخلاقـك كما الشهّـد بحـليـب *** وافـي وصافي وطيبك هـو سفيـرك
تـبـذل المعـروف بالصـدر الـرحيـب *** تعـمـل الإحسـان والمـولى نصيـرك
كـل مـن جـاك بـلـزومـه مـا تخـيـب *** تحـتـفي بـه كـنّـه بـمـالـك خـشيـرك
مـا ذكـر بـك يـا نسـل حـمّـاد عـيـب *** والفدامة والـردي مـا هـو عشيـرك
تسلـم وعسـاك مـا تـراجـع طبـيـب *** ومـن تقـاليـب الـزمـن ربـك يجيـرك

قال عبدالله بن دهيمش بن عبار هذه الأبيات يثني على الرجل الموقر عناد بن
جابر بن دبكل العبدلي حيث كان يدافع عني في كل مجلس ويشيد بجهدي :

يا عناد يا أبو أحمد لك الشكر يا عناد *** يـسلـم جـنـابـك يالـنـبـيـل الـنـجـادي
اشكـرك ثـم اشكـرك يا نسـل الأجـواد *** فـيــك الـحــمـيـه يـا كـريــم الأيــادي
واشكـر جـميـع الـلي بمجهودنـا شـاد *** اهـل القـلـوب الطاهـرة هـم اسنـادي
شـرواك يـالـشـغـمـوم يـا قـرم الأولاد *** شبـحـك رفـيـع ودوم تصعـد سنـادي
انـت الـذي دايـم عـلى الطـيـب معتـاد *** خصمت الـلي هرجه عـلى غير قادي
يـفـدا جـنـابــه كـل هـايــف وسـرمـاد *** مـا عــنـده الا الـثــرثــرة والــدوادي
طيبك يا أبن دبكل عـلى الـدوم يـزداد *** الـلـه يــعــزّك يـا عـريـب الـجــدادي
كبار الشفيع أهـل الكرم لا غـلا الـزاد *** عـلى الفـضيـلـه حـافـظيـن المـبـادي
مجـنـاك مـن اهـل المفاخـر والأمجـاد *** عـبـادلـه شـجـعـان يـوم الـطـــرادي
قلته وأنـا لك يا أبيض الـوجـه حـمّـاد *** حـيثـك تـدل الـلي عن الـدرب غـادي
عـني تـذود اليـا غـلـط بعـض الأفـراد *** مـا كـنـت عـن ذكـر الحقيقه حيـادي
يـوم أنـت بـالأحـوال الـكـل بـك شـــاد *** طـيـبــك لـمـن حـدّه لـزومـه يـنـادي
مـن طـاب فـعـلـه يـمـدحـه كـل قصّـاد *** والـلي طمـن فعـله غشـاه السـوادي

وقلت هذه القصيدة اثني على الشيخ محمد بن عبدالله الحجاج محافظ عيون الجواء سابقاً والمستشار لصاحب السمو الملكي الأمير الدكتور فيصل بن مشعل بن سعود أمير منطقة القصيم حالياً حفظه الله .

لـقـيـت حـاتـم مـثــل حـاتــم يـشـابــه لـه *** انـا اشهـد أنـه بالوصايـف يشادي لـه
والـلي نشـدني عـن المقـصـود انـوه لـه *** القصد مـا يخـفى عـلى النـاس تحليلـه
خـذ صـامـل الهـرج الصحيـح وتـنبهـلـه *** الشيخ ابن حجاج معـروف فـي جيـلـه
محمـد ابـو سعـود يسلـك طـريـق اهـلـه *** ابــوه سـود مـن الــوقـايــد مـعـامـيـلـه
مـن يـوم شفتـه عـرفـتـه بـأول الـوهـلـه *** بالجـود مـا يـقـبـل نـصايـح عـواذيـلـه
مـن ينصحـه فـي حـفـظ مالـه يسفّـه لـه *** حيـث الصّخى طبعـه ولا يـريـد تعديلـه
طـبـع الكـرم والطيـب بالصـدر يـنـده لـه *** كـفّـه يـجـود وسـلـم جــدّه يـنــادي لـه
طول المدى ما صح لـه بالـزمن مـهـلـه *** دايـم يـجـيـه مـن المسـايـيـر تـحـويـلـه
نـال المراجـل والمـراجـل مـاهـي سهلـه *** مـن صعـبهـا مـا كـل رجـلٍ تـواتـي لـه
مـا يـوجـد الـلـي غـاضـبـه أو تـكـرّه لـه *** مـن عـفـتـه كـلـن يـحـبّـه ويـدعـي لـه
كــم حـاشـيٍ راعـيـه بـطـّـل يــدوه لـــه *** فـي جـفـنـة الـلـي قـلّـطـه مـع مـواكيلـه
مطبـوخ ومبـرك عـلى الماصـة الشّهله *** الضيـف مع صـف الصياني يـراعي لـه
عـلـم الفخـر يرغـب وصولـه ويشر لـه *** طيبـه نقي مـا حصـل الطيـب فـي حيلـه
ومن جاه محـرج بالوجـاهـه تـوجـه لـه *** هـو فزعت الـلي بوقـت الضيق يشكيله
الأسـلـمـي طـفـلـه تـربّـى عـلـى كـهـلـه *** راعـي اللحيسـة دوم تسكـب فنـاجـيـلـه

وقال عبدالله بن دهيمش بن عبار هذه الأبيات يثني على الشيخ عبدالله بن عبدالمحسن المبدل أبو عبدالمحسن :

بـديـت اسـطّـر بـديـع الشعـر بحـروفـي *** واكتب معـاني لأهـل العـرف مكشوفه
أبي امدح اللي من الرجاجيل بـه نـوفي *** الله يجيـره من غـثـا الوقت واصدوفه
اشكر جنابـه من ضميري ومن جـوفي *** وأثـني عـدد لفـح الهبايـب وعاصوفه
عبدالله الـلي بالصـّخى دوم موصـوفـي *** مـع التواضع مـن ولـي الـمـلأ خـوفـه
وقـت اللّـزم يفـزع وهـو ليس مكلوفي *** صادق صدوق ويبهج الصدر بوقوفـه
الـشيخ مـالـه للمـحـاويـج مـنـصـوفـي *** مـن يـزبـنـه يـدفـع تكـاليـف مصروفـه
يـا مـكثـر الـلي قـال مـدّه مـلأ كـفـوفي *** يـبـذل ولا يـلحـق عـطـايـاه بحـسـوفـه
هـو مزبن الـلي جـاه محرج وملهوفي *** حيثـه عن علوم الردى مبعـد الشوفه
من قال حـملي ضامني واتعب اكتوفي *** ذخـره اليا شاف الليـالي بـهـا حفـوفـه
ومن قال جيتك يـوم لمّت بـي ظـروفي *** يشكـر ولا يـنسى جـمـيـلـه ومـعـروفه
يفداه الـلي عـن المراجـل بـه عـزوفي *** يـبخـل عـلى حالـه ولا يـقـري ضيوفـه
ويفـداه الـلي يعطي وعايـد ولا يـوفـي *** يـهـف كـمـا هـفـّت مـقيـط مـا تـشوفـه

قال عبدالله بن دهيمش بن عبار هذه الأبيات يسند على الرجل الفاضل عبدالله بن سمير الحنتوشي أبو ثامر والرجال الكرام أهل الثلوثية :

لا شفـت أبـو ثـامـر تـرى الهـم فارقـني *** دوم افـتخـر فـي رفـقتـه واتنـومس بـه
القـرم عـبـدالـلـه عـلى الجيـب رافـقـني *** للمجلس الـلي صيـد الأجواد تجلس بـه
أن ضقت مـن هجس الـروابع وضايقني *** اسـج وانسى كـل هاجوس اهوجس به
مـشـتـاق لـعـلـوم النـشـامـى وشـوقـنـي *** مـجـلـس شغـاميـم الـكـرام اتـونـس بـه
رفـيـقـي الـلـي بـخــوتــه مـا يـوهـقـنـي *** شهـم وكريم ومنهج الطيـب يدرس بـه
مـا قـال خسرنـي المصروف وارهـقـني *** عـلى المواجـب يـبـذل المـال ما يحسبه
لاشـي عـن شـوف الـرفـاقـه يـعـوقـنـي *** الـعـزوه الـلـي طـيـبهـم عـالـي الـنسبّـه
الـوقـت بمجـالـس الـوافـيـن يسـرقـنـي *** مـا أنـود مهـما طـال ليلي ولا انعس بـه
رب المـلا فـي صحـب الأخيـار يرزقـني *** الـلي عـرفهـم هـم رصيـده وهـم كسبـه
وعسى الـولي من قـرب الأنذال يعتقـني *** ومـن كـل مغـتـاب للعـرقـوب بـه لسبـه
وش عـاد لـو أنـي هـجـرتـه يـلاحـقـنـي *** نـابـه عـلـيـه دايـم الـدوم يـضـرس بـه
هـذاك الـلي مـن دون غـلطـه يخـانـقـني *** خـلّـه يـولـي قـلـعـتـه مـا اتـدنـس بــــه


وقال عبدالله بن دهيمش بن عبار هذه القصيدة يثني على الرّجل الفاضل المهندس عبداللّطيف بن حمد بن صالح الخطيب :
الخـطيـب الـوايـلي يسعـد صبـاحـه *** اطلـب المولى عسى يصفي زمانـه
نـال صفـات التـواضـع والسمـاحـه *** من عـرفتـه بالثـنـاء يلهـج لسـانـه
فاهـم ومـدرك وفـي عقـلـه رجاحـه *** والفهـم والعـرف عند الناس زانـه
يشتغل في عزم واخلاص ونصاحة *** في عملـه اربـع مناطـق لـه مدانـه
الـحـدايـق تـزدهـر فـي كـل واحـــه *** والسهـال الـريـد صـارت ديـدحانـه
يا كـثـر بـذلـت جـاهي لـه صـراحـه *** وصار ابـو نـواف ذخـري بالأمانه
اشكـره مـا دامـت الفرصـه متـاحـه *** لـه مواقف واضحه صعب انسيانه
طـاب كيـفي يـوم شفـت الأستراحـه *** وسـرني أن الصديـق الـرّب عانـه
يا شبـيـه الـلي الـيـا رف بجـنـاحـه *** صيـرمي بالجـو يعجبـك اطـيـرانـه
قلتها واخبـرك في هـرج الفصاحـه *** افخـر بمدحـك خـذ الهـرج التقـانـه
لـك غـلا بالقـلب في اوسع مساحـه *** وعنـد كـل النـاس لك قـدر ومكانـه
وقال عبدالله بن دهيمش بن عبار هذه الأبيات من الهجيني يسند على المهندس عبداللطيف الخطيب :
الـلـه يـعـزك يـا ابـو نـواف *** عـسـاك مـرتـاح ومكـيّـف
تعـيش يـا عـالـي الأهـداف *** يفـداك الـلي طيبـه مزيّـف
من عادتك طيّب ومضياف *** ما تذخـر الجـاه واتضيّـف
هـل انت سافرت للمصياف *** ولا انـت بالديـره مصيّف
لك الشكر مع جزيل القاف *** بالصـدّق ما قالهـا مهيّـف

قال عبدالله بن دهيمش بن عبار هذه الابيات شكر وثناء للرجل الفاضل سعود المدحلي أبو عبدالعزيز
فقد تذكّرت أنه عندما قلت قصيدة فيها نخوة لأعتاق السجين نايف بن سلامه الجعفري وسجّلت شيلة
بصوت سعد الجفران الجعفري وعندما سمعها الأخ سعود تفاعل ودفع ونوه أنه تفاعل مع قصيدتي :

بـاح الكنين وسجـت مـن ضيقـة الجـول *** ورحـت اتـونـس عـنـد بعـض الـرفـاقـه
الـطـّيـب أفـرح بــه الـيـا طــل لــه زول *** قـلـبـي عـلـى شــوفـه يـزيـد اشـتـيـاقـه
شـروى سعـود المدحـلي صـادق الـقـول *** مـا قـيـل يـوصـف فـي ريـاه ونـفـاقـــه
صيـتـه ظـهـر بالمجـتمع لـيس مجهـول *** مـن عـفـتـه يـعـجـب جـلـيـسـه اخـلاقـه
يصـعـد بـعـلـم الطـيـب مـا يـنـزل نـزول *** ريـف الـذي يـشـكـي مـن الـوقـت فـاقـه
عـن واجـبـه مـا قـال بالـظـرف مشغـول *** سـهـل الـجـنـاب ولا ذكــر بـه حـمـاقـه
مـثـل الجـمـل ينقـل عـلى متـنـه حـمـول *** ولا مـل لـو يـوضـع عـلـيــه الـوسـاقـه
القـرم الـلي طبعـه عـلى الطيـب مجبـول *** والـخــالــق الــرحــمـن وفـّــر ارزاقــه
شـهـم وكـريـم وعــنـد الأجـواد مـقـبـول *** كــلّــن يــبـي قــربـه ويــكــره فـراقـــه
بـيـتـه عـلى طـول الـزمـن دوم مـدهـول *** حـيـثـه صـدوق ويـحـتـفـظ بالـصـداقـه
مـا يـوم بـابـه شيـف مـغـلـق ومـقـفـول *** يـفـرح بـضـيـفـه وأصـدقــاه ورفــاقــه
يـامـا ذبـح للضيـف حـاشي مـن الشـول *** تـعــول عـلـيـه مـن الـمـجـاهـيـم نـاقــه
فـزع مـع الـلي يشكـي الـروع والـهـول *** يـنـخـى ودفــع الـمـال سـبـب اعـتـاقــه
مـن دعـوتي بالـقـاف حـوّل عـلى طـول *** لـلـجـعـفـري مـا قــال مــالــي عــلاقــه
أبــو عــبـدالـعـزيــز لــه شـكـر مــدبـول *** مـع جـود كـفّـه لـه عـلى الـبـذل طـاقـه
جـمـالـتـه لــو فـات حـولـن بـأثـر حــول *** تـبـقـى مـع اسـمي فـي سجـل البطـاقـه
مـن يـشـمـتـه جـعـلـه مـعـوّق ومشلـول *** وعـسـاه يـبــقـى طــول الأيــام عــاقــه