مساجلة بين إبراهيم الحرير الفدعاني وعبدالله بن عبار

انتشر خبر عن سجن أمرأة عنزية في البحرين وبعض أبنائها بسبب دين تراكم عليها ونشر الخبر نخوه لأهل الخير وأهل الحمية وقد ساهمت بمبلغ حسب قدرتي وتلقيت خطاب شكر من الرجل الفاضل عزيز بن عويد الشطي الخشتي الخريصي وكذلك هذه القصيدة من شعر الشاعر ابراهيم بن حرير العنزي من اهل البحرين وما قمت به هو واجب ولا شكر على واجب :

مـن الـرفـاع اكـتـب سـلام وتـحـيــه *** لـربـعٍ لهم بالمجد صيتٍ ورايـه
أنـا افـتـخــر بـالـعــزوه الــوايـلـيــه *** اقـولهـا بالصّدق مـاهي دعـايـه
ربـعـي هــل الـعـلـيـا فـي كـل هــيـه *** يشهد لهم بالمجد صدق الروايه
مـن يـوم عصر الحـرب والجاهليـه *** لين اشرقت فيهم انوار الهدايـه
ارجـال والـلـه ما رضـوا بـالـرديـه *** دايـم حـمـات الـدار درع اوقـايـه
وأبعـث سلامي وأعـتـزازي هـديـه *** ومهما أحيي فيـه مـاهـو كـفـايـه
لعبـدالـلـه العـبـار راعـي الحـمـيـه *** الـلـه يحفظه من خطـر كل سايـه
وجدي على شوف الرياض العذيه *** لا شفـتهـا فـيـهـا دواي وشـفـايـه
ديـره عـن التعـريـف دايـم غـنـيـه *** المملكة ارض الـعـرب والـهـدايـه
واقـبـل تـحـيـاتـي بـنـفـس نـقـيــه *** بـأول كـلامـي وأوسـطـه والنهايـه

قال عبدالله بن دهيمش بن عبار هذه الأبيات رد على الشاعر إبراهيم حرير العنزي :
حـيـيـت يا راعـي العـلـوم الـعـذيـه *** يالشاعـر أبن حـريـر فيك الكفايـه
ارسلـت عـذب القـاف يالقـرم لـيـه *** جـاني جـوابـك وأفتهـم كـل غـايـه
ارسلـت يا إبـراهـيم جـزل الهـديـه *** والخـط واضح منهجـه بالـقـرايـه
مـاهـي غـريـبـه لا نـختنـا خشتيـه *** عـزيـز نـادى وقـال لـبّـوا نـدايـــه
قـال أبـن شـطي يـا رجـال السمّيـه *** مـن الديـن تنخى مـا عليها جنايـه
والـيـا فـزعـنـا لا نـخـتـنا عـنـزيـه *** تـدور عـن ظـيـم اللـيالـي حـمـايـه
يـاعـل تـنـتـهـي الـحـيـاه الشـقـيـه *** ويـاعـل يشمـلهـا الـولي بالعـنـايـه
الـمـقـتـدر يــدفـع بـنـفـٍس رضـيـه *** وصل الـرّحم مذكـور فـي كـل آيـه
مـن طيـب ساسك قـلت تثني عليه *** وأن كان قصّرت اعتذر عن ردايـه
حـطـّوا خـبـر عـند الربوع ودريـه *** وبـثـوّا خـبـرهـا مـا تـفـيـد الكمايـه

تستاهل الثناء ابو مشعل.ولانشك انك فعلت الخير لله كما نعرف عنك وشكرا للشاعر ابراهيم بن حريرلرد الجميل بالثناء