هذه القصيدة قالها عبدالله بن دهيمش بن عبار العنزي وهي عبارة عن شكر وثناء بالشيخ سليمان الفالح السبيعي أبو نايف لموقفه المشرّف في حل مشكلة عقلا السميان العنزي ولهذا الرجل مواقف كثيرة :

شكـر الثـنـاء تستاهلـه يا سليمـان= حيثك يا أبن فالح تحوش الجماله
حليت عقـد اشكال عـقلا السميـان= وأنـت الذي تنصى عـلى حل قالـه
عقـلا كريم ومن مناعيـر جـذعـان =رجل مجـرّب مـن رجـال الشكالـه
أدرك فـخـر لعـيـال وايـل بجـيـزان= كـلـن يـنعـم لـه الـيـا جـاء مجالـه
يا شيخ معـروفك وضعتـه بديقـان= القرم أبو متعب عسى الخير فالـه
عملت طيب بموقعه مانت خسران= يـستـاهـلـه قـرم كـريـمـه سـبـالـه
نظهـر ثـناك بكـل مجلس وديـوان= جـمـالـتـك مـاهـي بـعـقـلا لـحـالــه
جمـيع رجـل ينتبـه عـرق فـدعـان= يشكـرك يامـن كـل معـروف نـالـه
تسلم يبو نايف على فعل الأحسان =الطيب لك من ساس جـدك سلالـه
ما هي غـريبه منك مجناك سبعان= أهـل الكـرم والمـرجـلـه والبسالـه
شبهتـك لحيص المحـامـل بليهـان= مثل الجمل لـو يثقـل الحمل شالـه
مجناك من لابه لها الطيب عنـوان =لا جـاهـم المضيوم يلـقـا الدخالـه
واليـا هجـدهم تـالي الليـل ضيفـان= الـكـل بـالـربـعـه تـطـامـى دلالـــه
تـنـدى صيانيهم من مفطح الضان= ينصاهم الرجـلي وراعي الزمالـه
هـذي فعـايلهـم عـلى مـر الأزمـان= سـلـم بـه الـوالـد يـعـلـم عـيـالـــه
ولا أنت يا سليمان يا ذرب الأيمان= الطيـب سلمك ما خـذيتـه عـتـالـه
قلت وعـلى قولي دلايـل وبـرهـان= وأنت الذي يا شيخ مـدحي زهالـه
والـلـه مـالي قصد لاشـك عـرفـان= ماني لفعلك يا أبيض الوجه زالـه
ترفع لك البيضا على راس ما بان= مشموخ عيطا مـن عـوالي جبالـه
يالعامري يا صاحب القدر والشان= لـك الشكـر عـن لابـتي بالـوكـالـه

قال الشاعر بدر بن صالح الفرحان الجلعودي العنزي من أهل الخبرا هذه القصيدة يرحب بزميله عبدالله بن دهيمش بن عبار العنزي :

عـبـدالـلـه العـبـار حيـيـت حـيـيـت= يـا مـرحـبـا يـوم لـفـيـت وتعـنيـت
أي والله اسمع بك وودي بشوفـك= جيتـك مـن الدمام ولشوفتك جيـت
امشي بدون شعـور بالخـط طـايـر =عـاني مـن الـدمام أمشي بلا ليـت
عـنيـت متلهـف لشوفـك ومشتـاق= أفخـر بشوفت حضرتك يوم طليت
شاعر لك بالشعر صولـه وجـولـه =لي الفخـر لا قـلـت قـدامـك القيـت
وأخبرك باللي بالفخر معجبن فيك= أنـك بشعـرك دون لابـتـك ضحيـت
وافي مثـل جدودك ولاهي غـريبـه =مـادامـك بـدار الشهامـه تـربـيـت
أقولها من قـلـب مخلص وصـادق =يا مرحبابـك مـن هنـا لين تكريـت
شـرفـتـنـا يـالـقـرم بـزيـارتــك =ذي شـرفـتـنـا فـي جـيـتـك يـوم لبيـت
أي والله أفرحبك مثل فرحة السيل= لجلك حضرت ولا أنا عنك صديت
والمـعـذره كـانـه بـدأ مـني قصـور= والمعـذره كاني بمدحـك تباطيـت
عـنـدي طلب لي الشرف لـو تلبيـه= يا ليتـك تـلبـيـه يـا لـيـت يـا لـيـت
فـي كـل سـنـه ودي تسيّـر عـلـينـا= هـذي مناتي صدق لا مـن تمنيـت
وأخـتـم كلامي عـدد ما طـار طايـر =واعـداد حبات الرمل والنـوابـيـت
عـلى نـبي بـشـّر الخـلـق بـالـديـن صلوا =على محمد معي يوم صليت

قال عبدالله بن دهيمش بن عبار هذه القصيدة رداً على الشاعر بدر بن صالح الفرحان الجلعودي :

أشكـرك يا بـدر عـلى نـظم قـيفـان= حيثك بنـا في محفل الـربع حييـت
الله يثيبك جيت من غـرب ظهـران= ورحبت في لفوت زميلك وهـليت
دامك لشوفي يابن الأجواد شفقان= أنـا بـكـلامـك يالـزميـل استعـزيـت
يا بدر غايت منوتـك بـر واحسان =ولي الشرف لدياركم كـان سجيـت
أشكر نسل فرحان في كل الأحيان =العـزوه الـلي فـي لـقـاهـم تهـنيـت
أهل الكرم والجود والقدر والشان =عـاداتهـم ذبح المهاجيـل والعـيـت
الشكـر والعـرفـان لعـيـال فـرحان =من مارثة جلعود يا حي ما طريت
الـلابـه مـن صـمـاصـيـم حـمـــدان= فخذ العماير ساسهم كـان قـصيت
سلايل حضيري حمايـل وشجعـان= مروين حـد المرهـفـات المصاليت
حماية الريشا على الخيل فـرسان= يـوم اللقا عـوق العصاه الـزناتيت
رجـالـهـم صنـديـد للخـصم مـالان= لا صار طعـن يـفتـت العـظم تفتيت
وأعتـز في عناز حضـره وبـدوان= العـزوه اللي ما شنوها الشواميت
من خيبر الحرة إلى غـور بيسان= ومن ديرة البصرة اليامنطقة هيت
داجوا بها الويلان بالسيف شامان= وعلومهم بالطايله مثل ما اوحيت
هذا جوابي وأبلغ الشكـر الأخـوان= الـلي احتفوبي يـوم للديره الفيـت
ثـم السموحة كـان بالقـول نقصان =مشكـور يالمنعـور بالحـق وفـيّـت

قال الشاعر سليمان بن إبراهيم الفرحان الجلعودي العنزي هذه القصيدة يسند على عبدالله بن دهيمش بن عبار العنزي 0

بـسـم رب الـبـيـت كـشّاف العـلـل= يعـلـم الـلي خافي وسط الصـدور
مـرحـبـا بـالـوايـلـي ابـن الأصــل= ومرحبا بالـلي معـه جـانـا يـزور
مـرحـبـابـه عـد مـا وبـل هـطــــل =مرحبابه في عـدد ريش بالطيور
وايـلـي لا بـغـى الـمـعـنـا حـصـل= صخـره بأبيات جت له من بحـور
أفـرحـي يـا بـلاد وافـرح يا جبـل= وأفرحي يا شجارها وكل الزهور
مـرحـبـابــه يـوم بـبـلادي نــــزل =ديـرتـي بـه نـور وأزدادت بـنـور
ديـرة الخـبـرا تـحـيي مـن وصـل= في رياضه وأفرحي بـه يا قصور
قـولـنـا صادق ولا جـابـه زلـــــل= جـدنـا سالـم فـعـل لأجـل الـجـذور
وأشـهـد أنـه مـا راعـي الـمـثـــل =كـل قـوم غـيـر عـنـاز الـنـمــــور
والـقـبـايـل كـلـهـم فـيـهـم بــطــل =والـقبـايـل كـلهـم فـيـهـم صـقـور
قلت أنـا الأبيات وأشعـر بالخجل =كيف أقوله عند من ينحت صخور
مـيـر عـفـوك يالبـنـاخي بـالخـلـل =واطلـب السماح منكـم يالحـضور

قال عبدالله بن دهيمش بن عبار العنزي هذه القصيدة رداً على الشاعر سليمان بن إبراهيم الفرحان الجلعودي العنزي :

حـي مـن خـط الـقـوافي بـالسجـل= نظم ابن فرحان صاغه بالسطور
مـرحـبـابـه عـد مـالقـمـري زجـل= وعـد ما بالكون من كوكب يـدور
ودي أن الـرد يـوصـل لـه عـجــل= وأشكرالمنعور بالصوت الجهور
والـلـه الـلي يعـلـم بـغـيـب الأجـل =مـا لقولك يا بن إبراهيم مخصور
قـلـتـهـا مـا قـلـتـهـا زيـف ودجـل= وأحمـد المولى سليم من الغـرور
وأنت يا سليـمان يـا نعـم الـرجـل= أفـتخـر بـك وأنـا فـي ردك فخـور
يالسنافي مـن كـلامـك لا تـخـجـل= حيث شعـرك صادق ما فيـه زور
بالتهـلي زلـت عـن فـكـري وجـل= فـي تعابـيـر المشاعـر والشعـور
وأنـت مـن لابـه يـفـكـون الهـجـل= المسـوح الـلي عـلى بـوه تخـور
يـوم سرد الخيل بالبـيـداء تحجـل= فـعـلهـم بالكـون بالقـوم مخـبـور
يـقـدم الـفـارس وللـسـربـه يـجـل= يـوم زرق الشلف يطعن بالنحور
الـكـهـل مـنـهـم يـقـلـده الـنـجــــل =وارثين الطيب مـن قـدم العصور

وهذه القصيدة أرسلت عبر منتدى العبار من نظم الشاعر فيصل بن عبدالرحمن بن عبدالله التويجري العنزي يسند على زميله عبدالله بن دهيمش بن عبار العنزي يقول :

سر يا قلم وأبـتـد بجزل التراحيب =بالوايلي راعـي العـلوم السفيـره
عبـدالـلـه العبـار مـدي المواجيب =الـلي نظم شعـره بمجـد العشيـره
فدعاني المجنى حصان الأطاليـب =مـن لابـة يـوم المـلاقـا شـهـيـره
فدعان بالهيـه عطاب المضاريـب =حمر النواظـر في نهـار المغيـره
قـوم تعلـوا فـوق روس المراقيـب= أهـل الفـعـول الطيـبـات الكثيـره
من صلب وايل لابـة تمقت العيـب= يشهد لهـم بالطيب في كـل ديـره
سلايل الـويـلان عـوق الحواريـب= أهـل سيـوف بالمـلاقـا الشطيـره
ربعي هل العادات كسابت الطيـب= أولاد وايـل طـيـبـيـن الـسـريـــره
ومدحي بأبن عبار مابـه عـذاريب= رجـل يـمـيـنـه بالمكـارم خبـيـره
ترفع له البيضا بروس الشخانيب= رجل جعل خدمة ربوعه مصيره
يستاهـل النـاموس نسّـاب وأديـب =يـذود عـن وايـل قـلـيـل نـظـيـره
قيفان شعره كالسيوف المحاديـب= في وجـه من شره مقـفي بخيـره
سطـّر لنـا أمجـاد القبيلـة بترتيـب =يا كـم واحـد قـد نـهـل جـم بـيـره
رجـل صميـدع بالمهمـات كالذيـب =يشعب على درب المعالي بعيـره
رجـال وافـي مابهـا شـك أو ريـب =يرجي رضى رب ربح مستجيره
تسل يا أبن عبار يا ماكتر الطيـب =ياللى على درب المراجل مسيره
وصلوا عدد مايشرق البدرويغيب= عـلى نـبـي سيـرتـه خـيـر سيـره

جواب عبدالله بن دهيمش بن عبار العنزي على الزميل الشاعر فيصل ابن عبدالرحمن بن عبدالله التويجري العنزي :

يا مرحبـا حييت يا طاهـر الجيـب= يا فيصل اللي بـك حميـه وغـيـره
فيصل نعـده من اعزاز الصاحيب= الصاحـب الـوافـي نـعـده ذخـيـره
شروى جنابه نذخره للمصاعيـب= الـلي بـوقـت الـلازمـه نستشيـره
ولا الردي لوهومن أدنا الأقاريب =ما فيه ثابـه كان صارت جـريـره
الحـر يعـطب صيدتـه بالمخاليـب= والتبع عن صيد الجـزايـل عثيـره
الوايـلي فيصل عـريب المجاذيب =عسى الولي من كل عايق يجيـره
لك الشكر يالوايلي قولـك مصيب =صغت القوافي في معاني غزيـره
مجناك من لابـه تروي المغاليـب =نسـل التـواجـر للمعـادي نحيـره
الكل يشكر طيبهم عقـب تجـريـب= يذكر فخرهم كـل شعـب الجزيـره
للطيب يا فيصل تـدربـت تـدريـب =ولك نفس بعلوم المراجل جديـره
وأنت الذي تفهم جـميع الأساليـب= والصدق تدركـه العقول المنيـره
الناس خاضت بالعـلوم الطباطيب= الـلي يحـطـون الصغـيـره كبـيـره
الكـل يـبغي جـده الـزيـر وكـلـيـب =والكل صابه يا أبن الأجواد طيره
الصدق يـبـقى ولا تـدوم الأكاذيـب= والـزيـف مـابـه للقبـيلـه بـريـره
الـزور والتحريـف مابـه مكاسبب= ولا فاد تحريض الجموع الغفيره
والرابح اللي جنب الحيف تجنيب= ومشى على الواقع بفهم وبصيره
وايـل ضنـا عـنـاز مابـه معـاييـب= هو جدنا المشهور ما نريد غيره

قال الشاعر محمد بن فرعين العنزي هذه الأبيات وقد أرسلها منتدى العبار لزميله الشاعر عبدالله بن دهيمش بن عبار العنزي يقول :

هـات القـلم نكـتـب بـيـوت جديـده =من شعر ابن فرعين توه مسويه
وأرسلـتـهـا لـلـي حـبـالـه جـويـده =القرم أبو مشعل له القاف نهديه
قـرم العـيـال الـلي اهـدافـه بعـيـده= يا حي رجـل ماشي درب أهاليـه
ما اقلتهـا من شان مقصود اريـده =لاشك واجـب عـلى فـعـله نهنيـه
يـا حـي رجـال عـلـومـه فـريـــــده= لـه منـزل عـالي وفعـلـه معـليـه
مـواقـفـه يـوم الـظـروف الشديـده =يوم الرجل يصد عن وجه ناصيه
يـوم الـرجـل هـمـه يجمع رصيـده =يحب فعل الخير والجار يرضيـه
نويت أبي أنشر مدحكم بالجريـده =وأقول أبن عـبار ما أحـدٍ يباريـه
قولوا معي يا أهل العلوم المجيده= أدعـوا لعبـدالله عسى الله يقويـه

قال عبدالله بن عبار رداً على زميله محمد بن فرعين العنزي :

جانـي مـن محـمـد عـلـوم مفـيـده= أبيات من نظمه تقل مسبك جنيه
حي الزميـل الـلي عـلومه وكـيـده= مظمون قوله نفتخـر في معانيـه
يـثـني عـلى مجـهـودنـا لـلـبـديـده= اللابـه الـلي دوم نفخـر بطـاريـه
الـلابـه الـلـي بـالـمـلاقـا عـنـيــده= الـلي معـاديـهـا تـضـده وتـكـديـه
عساك يـا محـمـد حياتـك سعـيـده =جاك الجـواب ولا لقولك مـزاليـه
عديت من جهدي مواقف عـديـده =تسلم على مدحك لك الشكر نثنيه
وشروى جنابك نفتخر في حميده= المحـتـرم شـرواك ربـي يـحـيـيـه
يفداك الـلي ضدي يحوك المكيـده =الـلي يـدور لطيّب العـلـم تشويـه
والـعـذر مـن تـاخيـر رد القصيده =شروى جنابك له علينـا مشاريـه

هذه الأبيات من نظم الشاعر متعب بن عيد بن مرهق الغضوري وقد ارسلت عبر جوال الشيخ بندر بن محمد بن عيد السويلم نجل أحد مشائخ قبيلة الغضاورة :

يا عيال وايل صوتوا لأبن مشعان =يستاهل التصويت يا عيال وايـل
أما البيارق من قديـمات الأزمـان =رفعها أبو مشعل جـزيـل الفعايـل
يـوم أرتكى للحـمل شالـه بليهـان= يشهـد لـه التـاريخ هـو والقبايـل

وهذا جواب عبدالله بن دهيمش بن عبار على الشاعر متعب بن عيد :

يا متعب أبن عيد تذكر بالأحسان =وتشكر على نظم البيوت الجزايل
يالقرم لـك مـني تشكّـر وعـرفـان =حيثـك تصرّح بالعـلـوم الصمايـل
وأهـل الحميه هـم سلايل سليمان= هـذا الـوكـاد ولابـهـا قـول قـايــل
وبندر أبو خالد بعـلم الفخـر بـان= نسل الحمايـل من سلايـل حمـايـل
أبـن سـويـلـم مـن مقـادم عـليـان =يا ما كسب من غانـمات وجمايـل

وقال الشاعر متعب بن عيد بعد أن سمع كلمه من أحد الرجال فلجمه :

يا هجوسي يا هجوسي بالعجل ناديتك=حضري لي بالبيوت الوافيه واجملها
يا قريحة دام أنا من شط العرب غذيتك=والله أن أبيات شعري لا اقضها وافتلها
كم وكم يالقافية عـلى الـوعـر مشيتـك=وكم وكم يالقافية جبنا الدرر واجزلها
لا حصل بعض المواقف يمها هـديتـك=اصخرك صخر الدناميت لجبال لهدا واشعلها
أسمع أسمع يالمعذرب دام انا خصيتك=السوالف دامها وصلت لأبن عبار ما نجهلها
معـقـب الفنجـال كـان أنـي لهـا خليتـك=بالأسف بعض الأوادم هـرجها فشلهـا
لا تحسب أن المراجل بس خذني جيتك=المـراجـل يعـجـز الـرجـال مـا حصلهـا
المراجـل فـاز فيها يرحـم الـلـه مـيـتـك=شاعـرٍ مـثـّل قـبـيـلـه كـامـلـه بـكـمـلـها
فاز فيها اللي جهلته بس عنهـا أنبيتـك=تعـرفـه كـل الـرجـال الـتـالـيـه وأولـهـا
أبو مشعل هو فخرنا وعنـه أنا حديتـك=الأديـب الـلي فعـايـل لابـتـه فـصـلـهـا
أبن عبـار أفتخـر بـه مـار أهجـد ليتـك=الفعول اللي وصلها أنـت مـا تاصلهـا
خل عنك النقد وأجلس واسترح في بيتك=لا تحـسب أن المـراجـل لـقـمـةٍ تـاكـلـهـا
التهتاون والسهولـة مـا تشـيّع صيـتـك=لا تحسب أن المعـالـي صيـدةٍ تخـتـلهـا

فأجاب عبدالله بن عبار بهذه القصيدة رداً على زميله متعب بن عيد :

يا متعب عساك تسلم بالشريط أوحيتك=عاش من قال البيوت وعاش من سجلها
حيث ساقـتـك الحمية عـدنـي وصيتـك=والمراجل يا أبن مرهق قدها وتفعلها
أنت من أهـل الحميه والفخـر عـديتـك=ما تجـامـل من كلامه مثـل خبط البلهـا
وأنت لو ما فيك غيره كان ما هميتـك=الحميـه بـك طبيعه يصعــب اتعـدلهـا
أنـت سيـفي باللـوازم للعـدو سنيـتـك=تنطح خباث النفوس المخبثه تزعلها
حي من سموك متعب مار أنا سميتك=طير شلوى كان هد المسمنه يجطلها
وأنـا شرواك أفتخربه قـلتها وهنيتـك=بالرجولة والبساله حيثك من أهلهـا
حيث لي عندك معزه يالزميل اغليتـك=يالصديق اللي خصومي دايم تجادلها
دام لي عندك معزه حتى أنا عـزيـتـك=لك أهدي جزل التحيه والردود اقبلها
والرجال أهل البلابل لو سالت افتيتك=أن جهـدي يالزميـل كبـودهـم دابـلهـا
قلتها والشكر لله بالجهود أرضيتك=والعلوم اللي تشرف لابتي نعـملهـا
يالكريم اللي لضيفـك دوم تـذبح عيتـك=والرجـال أهـل الكرامه ربعتك مدهلهـا
دايـم لسوق المواشي تـتجـه وانـيتــك=مـا تغاليـت الـدراهم بالصخى تـبـذلهـا

وهذه الأبيات من شعر الشاعر صالح بن عبدالله الجطيلي يسند على عبدالله بن دهيمش بن عبار :

عـديت في بـرٍ خـلا راس مرجـوم= وغنيت من جزل البيوت العـذابي
الـقـوم لا قـامـت أنـا أقـوم للـقـوم= مـا دام قـومتـهـم تـشرف جـنـابي
جزل القصيد اللي منقى ومحشوم =لـو مـا نخـيـتـه باللـزوم انتخـابي
ملزوم أنا في مدح الأجواد ملزوم =وأعـدهـم ذخـري وكامـل زهـابي
وأنتـه يا أبن عبار للشعر زيـزوم= فيـك الوفاء والطيب والعـز رابـي
وجه الرجال ومن نبا روس قروم= عـيـال وايـل من كهـول وشبـابي
هم لابتي هم تاج راسي على دوم= وذاري لامـن الـزمـان انـتـحـابـي
هـذا سـلام مـن الجطيلي ومفهـوم= لعـيـال وايـل حـافـظين الـوجـابي

قال عبدالله بن دهيمش بن عبار هذه الأبيات رداً على صالح بن عبدالله

حي الكتاب اللي به القاف مرسوم= مهديه لي صالح عـزيز الجنـابي
متـفـقـده عـن كـل عـايـز ومثـلـوم =أعذب من السمن الزلال العرابي
تعيش يامن صغت بالقاف منظـوم= سجـلـت قـافـك يالـزميـل بـكتـابي
منطق فهيم من الرجاجيل شغمـوم أ=هديت له عبر المشاعر اعجابي
أكتب مرد القاف لـو كنت مـزحـوم= أخـاف من قولـت زميـلي كبـابي
يا مادح اللي هابهم صاحب الزوم =أولاد وايـل بالـلـقـاء مـا تـهـابـي
لاجـاهـم الـلي من دنـايـاه متهـوم =عـده بعـيـطا شامخـات الهـضابي
اللابـه الـلي بالفضايل لهـا سلـوم =ما ينتقص من قدرهـم قول هـابي
مبطي لهم بالطيب تاريخ واعلوم= بـهـم اتـبـاهـا وأفـتـخـر بانـتسابي

قال الشاعر عبدالكريم بن محمد بن سليمان الجطيلي هذه القصيدة يسند على عبدالله بن دهيمش بن عبار :

باسم الجيلي أرفع الكـف هالحـيـن= ترحيبة لك فـوقـهـا ازكـا سـلامي
يا مـرحبـا واهـليـن عـدة ملايـيـن= اسقيتها بالمسك مـن راس زامـي
وغـلفـتها بالكـاد والـورد والتـيـن =جاتك مثل ترف غضيض القوامي
يا مرحبابك يا ابن عبتار وأهليـن =ويا مـرحبـا بـاولاد وايـل عـمـامي
بيضت لك رايه رفيعـه مـن سنين =وذبيت عن وايل وأخذت الوسامي
نسبت وأرخـت وذكـرت البراهيـن= وكل عنـزي لـك يعترف باهتمامي
حقـك عـلينا نحفـظه داخـل العيـن= ينبـع بـه الأخـلاص بـالـدم حـامـي
عـليـك لـي مطلوب وأبيـك تعطيـن= اقبل طلب ربـعي وحقـق احـلامي
تكـفـا يا أبـن عـبـار تـمـم لبيتـيـن= أبـيك تـقبـل دعـوتي وأنـت سـامي
أبـيك تشرّف كـل مـن لـك محبـيـن =تقـلـط وتـاخـذ واجـبـك بالـتـمامي
يالقرم أنا طالبك أريد أوفي الديـن =حيثـك عـن الـويـلان دايـم تحـامي
قـلتـه وحـنـا جـدنـا يعـرف حسين =ومـدلـج يقـلـط للضيـوف اليـدامي
وحنـا على طريق الأجـداد ماشين =نـكـرم ونـلـجـم خصمنـا باللجـامي
واجـدودنا بالطيب والعـز ضفرين= عـدوهـم مـن فـوقـه الطيـر حـامي
منا شجاعٍ سـار مـن ضمن ستيـن= عبداللـه المنعـور فـارس ورامـي
وحنا تحت ظـل الملـوك المسميـن= حـمـايـة الـسـنـة عـيـال الأمـامـي

قال عبدالله بن دهيمش بن عبار هذه القصيدة رداً على الشاعر عبدالكريم بن محمد بن سليمان الجطيلي :

مبداي بالله خالق الخلق من طيـن =رب الـمـلأ خـلاق نـور وظـلامــي
جـل الكريم المعـتلي حـامي الديـن =منشي سحابه من نفيض الغمامي
ومن بعـد ذكـر الـلـه رب الأكاوين= نـويـت أوضـح بالقـوافـي عـلامي
جـواب قـرم من القـروم المياميـن=عـبـدالكريم أرسل لطيف الكـلامي
عبدالكريم ارسل قوافيـه يـدعـيـن= لـه جـل تـقـديري وجـل أحـتـرامي
لـي الشرف اقـلط بذيـك الديـاويـن= والشاهد الله شوفكم هـو مـرامي
والنعم والـله بالـرجـال العـزيزين =عـزوة شغـاميـم الجطيـل الكـرامي
شفت الكرامه عندهم والنبـا زيـن =وعـود البخـور يـقـدونـه اشمـامي
يا ابن محمـد ما كفـا قـول نعـميـن= اشكرك يا نسل الـرجال الحشامي
دعوتك تقبل يا أبن الأجواد بعدين= لازم نـزورك يـا رفـيـع الـمـقـامي
خذ الوعد يا ريف من جوه عانين= مـن شيخـنـا بنـدر عـداه المـلامي
أبـن سـويـلـم يـفـتهـم بالـقـوانـيـن =خبـيـر بسلـوم الـرجـال ونـظـامي
كانه وعدك بيوم خمسه وعشرين= في عطلـة الخميس مـابـه دوامـي
حـنـا معـه لـزيـارتـك مـستـعـديـن= وأطلب عسى يحفظك رب الأنامي
أقـولـهـا وحـنـا لطـلـبـكـم ملـبـيـن =واجـب زيـارتـكم عـليـنـا التـزامي
وصلواعلى الهادي أمام المصلين =تـم الجـواب وبـالصـلاة الخـتـامي

شعار وافيين

لا يسعني الا ان استمتع بما تكتبون ..




ابو مشعل

بيض الله وجهك ووجه كل من اسندت عليه واسند عليك




ابنك


سعد مسهوج العنزي

عبدالله ابن عبار

صح لسانك وتسلم على الرد وما عليك زود يا ابو مشعل

لكن وانا اخوك فيه ابيات الظاهر انك نقلتها عن طريق الخطا في القصيده ويعلم الله اني ما كنت ابي ذكر موضوع الخلاف اللي صار عليه مشكله بين بعض افراد القبيله وانا لست مؤيد لموضوع انكار العزوة لوائل بن قاسط لانه لا يوجد ما يثبت انه ليس هو وهذه السالفة بالذات ياابومشعل تهم عنزة كلهم ولاهي سالفة ان الناس تبي الزير وكليب يصيرون جدانهم وبس لكن هذا شي متعارف عليه من زمان ولا فيه شي الى الان اثبت انه عكس الصحيح فوائل وعنزة وجهين لعمله واحده ولا اظن انه يعاب على العنزي افتخاره بصيت كليب والزير وعمرو بن كلثوم (بالفعل لا بدينهم لانهم كانوا بأيام الجاهليه والافتخار بالانتماء الى الدين الاسلامي وهو العزة الحقيقه) وهو ليس بالامر الغريب فهل يحق لغيرنا الافتخار بافعال أبناء وائل ونحن لا!! انا وانت وغيرنا من شعراء عنزة ذكروا الزير وكليب في قصايدهم وهذا شي معروف من قبل المسلسل ياابو مشعل وليس حادث طارئ.

الحقيقه انا كل اللي كنت ابيه اكتب هالقصيدة شكر وعرفان لما قمت به من جهد جبار لهذه القبيلة العريقه قبيلة عنزة الوائلية ويعلم الله ان كثير من نهلوا من جمة بئرك وقصائدك في الذود عن القبيله تشهد لك وقصائدك بالنصح اكثر من رادعه (لمن شره مقفي بخيره) جعلك الله ذخرا ياابن عبار

انا اضع القصيدة هنا للتبيــّن ان البيت اللي عليه المشكله هو (يذود عن وايل قليل نظيره) اذا كان القصد بوايل هنا قبيلة عنزة عامه لا وايل العلم فلا باس لان قصدي كان (يذود عن ربعه) بقصيدة ضد من يحاول النيل من القبيله لا يذود عن اسم وائل العلم وحده ومحاولة اثبات انه ليس بوائل ربيعه الشهير وهو العزوة الحقيقة في ربيعه وهذا هو القصد

ياابو مشعل هذا الموضوع سبب مشاكل حنا في غنى عنها وانا لست هنا لكي اوجه رجل بعمر ابي لا والله لكن اريد تبين القصد من قصيدتي ومحاوله البعد عن التفرقه التي سببها موضوع خطير واي عنزي غيور لا يريد ان يرى ابناء قبيلته يتفرقون او يحدث بينهم المشاكل

والله من ورى القصد

(عناز) من (وايل) ولا هم بخافين &&& ان قيــّل (وايل) صاح (عنـــاز) لبيه

هذه قصيدتي كما كتبتها

سر يا قلم وابدا بجـزل التراحيـب ** بالوايلـي راع العـلـوم السفـيـره
عبـدالله العبـار راع المواجيـب ** اللي نظـم قولـه بمجـد العشيـره
فدعاني المجنى حصـان الاطاليـب ** من لابـة ٍ يـوم الملاقـا شهيـره
فدعان بالهيه عطـاب المضاريـب ** حمر النواظر فـي نهـار المغيـره
قوم ٍ تعلـو فـوق روس المراقيـب ** اهـل الفعـول الطيبـات الكثيـره
من صلب وايل لابة تمقـت العيـب ** يُشهد لهم بالطيب فـي كـل ديـره
سلايل الويـلان عـوق الحواريـب ** اهل السيوف الصارمات الشطيـره
ربعي هل العادات كسابـة الطيـب ** اولاد وايـل طيبـيـن السـريـره
ومدحي بابن عبار مابـه عذاريـب ** رجـل يمينـه بالمكـارم خبـيـره
تركز له البيضا بـروس الشخانيـب ** رجل ٍ جعل خدمة ربوعه مصيـره
يستاهل النامـوس نسّـاب واديـب ** يذود عـن ربعـه قليـل ٍ نظيـره
قيفان شعره كالسيـوف المحاديـب ** في وجه من شـره مقفـي بخيـره
سطر لنا امجـاد القبيلـه بترتيـب ** ياكم واحـد قـد نهـل جـم بيـره
رجل ٍ صميدع بالمهمـات كالذيـب ** يشعب على درب المعالـي بعيـره
رجال وافي ما بها شـك او ريـب ** يرجي رضى رب ٍ ربح مستجيـره
تسلم يا بن عبار يا ماكـر الطيـب ** ياللي على درب المراجـل مسيـره
وصلوا عدد ما تشرق الشمس وتغيب ** على نبـي ٍ سيرتـه خيـر سيـره