قال عبدالله بن دهيمش بن عبار هذه الأبيات يثني على الرجل الفاضل منصور
ابن إبراهيم العليان الشمري الكريم المعروف وصاحب المواقف المشرفة :

يـا الـلـه الـلي كـل مخـلـوق خـلقـتـه *** يـا ولـي الكـون غـيـرك مـا دعيتـه
يـالـكـريـم العبـد مـن فضلـك رزقتـه *** أنـت الـلي كـل البشر رزقه حصيته
وبـعـد ذكـر الـلـه منـظـومي نطـقتـه *** مـن روابـع خاطـري شعـري بديتـه
بالشعـر مـثـل الرحيـق الـيـا لعـقـتـه *** وبه اللي مثل الحناضل ما اشتهيته
قـلتـه وفكـري عـلى الطيّـب اشفقتـه *** والـردي كـوبـان قـربـه مـا بـغـيتـه
اعـتـزي بـالـلـي يـرحّـب كـل وقـتــه *** ذاك أبـو إبـراهيـم عـزك لا نصـيتـه
يا منصور انـت الكـرم بابـه طرقتـه *** وكـل شـمـر تـفتخـر بـالـلي سـديتـه
الكـرم والجـود بـه هـمـت وعشقتـه *** والضيوف بـكـل يـوم بـوسـط بيتـه
أنـت الـلي يفـرح اليـا وزّع اصدقته *** تـرفـد العـانيـن والنـاصي عـطيـتـه
مـن يوصف بالكـرم سـرت ولحقته *** وانت اللي طبعه يشوش اليا نخيتـه
مـن نـوى يسابـق تقـّدمـت وسبقـتـه *** عـن معانـد حضرتـك ليتك نهـيتـه
بالكـرم مـن حـاول يـبـاري فـهـقـتـه *** بالكـرم يا طـول مشـوارن مشيـتـه
يا سليـل الجـود حـملـك كيـف طقـتـه *** شـلـتـه بمتنـك وثـقـلـه مـا شكيتـه
مـا تـحـيّــل بـالـرفـيــق ولا درقـتـــه *** ولا غضب منك الصديق ولا شنيته
تـفـتـخـر بـأمـجـاد جـدك مـا محقـتـه *** ما اختفى ذكـره عـن اللاّيـم حميته
أشـهـد أنـك مـذهـب ابـوك اعتنقـتـه *** صرت مثله بالكرم واظهرت صيتـه
فـي ديـوانـك رايـب الفنجـال سـقـتـه *** كـل مـا جيتـك وجـدت الـلي هقيتـه
مـع نـفـيـح الـعـود ينعـش لا نـشقتـه *** من الجذوع الصاملة مـا هـو فتيته
وكـم كبـش بخنجـرك حـلـقـه شلقـتـه *** من سمـان العيت لضيوفك شويتـه
ترغب أن الضيف يرشف من مرقته *** مـا تغـالـيـت الثـمـن حـالاً شـريـتـه
يا كثـر الـلي يـذبـح الجـزلات فـقـتـه *** ويا كبـر حـظ الشريطي كـان جيتـه

قال عبدالله بن دهيمش بن عبار هذه الأبيات نصيحة للذين سطوا على مشجر قبيلة عنزة
ونسخوه ووضعوه باسمهم والبعض نسخ فرع من المشجر ووضعه باسمه وهو ناقله
حرفياً من المشجر الرئيسي والبعض ينقل من كتابي ولا يشير للمصدر وهذا ما يجوز وقلت :

ذقـت مـطـعـوم الـحـلا والـمـر ذقـتـه *** ولا اخـبـر يـوجـد كتـاب الا قـريتـه
أجـمـع وشـمـل القـبـيـلـة ما فـرقـتـه ** وكـل ممدوح افتخـر بـه مـا هجيته
واحمـد الله فـزت والمخطي عـزقـتـه *** كـل مـن حـاك المكـايـد مـا خشيتـه
قـلـت هّـود يـالـذي جـهـدي سـرقـتـه *** بالتجاهل كيف حتى اسمي نسيتـه
الموضوع الـلي شلحتـه كيـف بقـتـه *** كـل منشـورك مـن كـتابـي خـذيتـه
يـوم تأليـفي كـما الـوسـقـة وسـقـتـه *** ما حفظت العـلـم والمولى عصيتـه
منهـج القـانـون والشـرع اختـرقـتـه *** والنـظـام المـتـبـع كـيـف ازدريـتـه
كـل مـا سـويـت بـعـيـونـك رمـقـتــه *** يا عجـب وشلـون مجهودي كميتـه
يـا الـذي يشبـح وينظـر فـي حدقتـه *** الـمـصـنـف كـيـف وجـوده نـفـيـتـه
لازم تـشـوفـه إذا جـفـنـك مـلـقـتـــه *** ما انصفـت وكـل فعلـك مـا رضيتـه