( القصايد الوطنية وقصايد الإشادة في أمجاد القادة - من الديوان المطبوع وغير المطبوع ) - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

10-28-2025, 08:15 AM

تابع

قصائد رثاء في بعض زعماء المملكة رحمهم الله

قال : عبدالله بن دهيمش بن عبار هذه القصيدة رثاء بصاحب الجلالة المغفور
بإذن الله الملك فيصل بن عبدالعزيز آل سعود طيّب الله ثراه :
يا عين زيـدي دمعـك اليوم زيـديـه *** عـلى الفـقـيـد الـلي فجعـنـا بفـرقـاه
هـلي مـن العبـرات يا عين وابكيـه *** العـاهـل الـلـي بالـفجـيـعـة فـقـدنـاه
الـكـل بـه مفجـوع يصفـق بايـاديـه *** نـنعـى ومعنـا سايـر النـاس تـنـعـاه
الشعـب يـنـدب بالأسى فـقـد غاليـه *** لـو ارتحـل تبقى على الدوم ذكـراه
كـل الوطن محزون من فقد راعيـه *** ذكـراه تـبـقــا خـالـده مـا نـسـينــاه
مرحـوم من عمـت علينـا حسـانيـه *** وش عـاد لـو كنـا بالأشعـار نـرثـاه
الـلـه يـرحـم شـامـخ المـجـد بانـيـه *** الـلي رفـع صـرح المعـالـي بيمنـاه
من كوثر الجنة عسى الرب يسقيه *** يـا رب تجـعـل جـنـة الخـلـد سكنـاه
الـمـوت لا بـد كـل حـي يــوافــيـــه *** العـبـد رزقـه والأجـل عـنـد مـولاه
عـمـر الفتى لـو قـلت طالـت لياليـه *** لا بــد مـن يـوم يـعـــود لـمــثـــواه
لـو يـنـفـدا فيصل بالأرواح نـفـديـه *** العـمـر دونـه نرخصه مـا انـتغـالاه
ليت اللي مثله سهم الأقدار يخطيـه *** العـاهـل الـلـي مـا يـوصـف حلايـاه
لا شـك تصريف الملأ عـنـد بـاريـه *** هـو الإ لــه ولا لــنـا غـيــره إيــلاه
باح العـزا والشعب باحت عـزاويـه *** وخالـد عـزانـا فـي زعـيـم فـقـدنـاه
خـلـيـفـة الفـيـصـل يـكمـل مـبـاديـه *** عسى الولي يحميه وايسدد اخطـاه
يمشي على منهاج فيصل بمـاضيـه *** ويـبني مفاخـر والـده قبلـه ارسـاه
ويسنـد عـلى شبـلٍ بعـيـده معـاديـه *** فهـد الفهـود وموطن الليـث مربـاه
فـهـد ولـي العـهـد نـفخـر بـطـاريـه *** سقم الحريب وذروة المجـد عـليـاه
والنايب الثاني عسى الرب يحميـه *** نطلب عسى المولى عن الشر ياقاه
عـبـدالـلـه الصنـديـد ربـه ايـقـويـه *** الباسـل الـلي كـل الأضـداد تخـشـاه
واشبـال مـقـرن باللـوازم عـوانـيـه *** سور الوطن عـند الملازيم واحماه
يا حـي والـلـه لا بـتـه هـم دوانـيــه *** انجـال ذاك الـليـث مثـلـه وشـرواه
من عال بالمصقول قصـوا عـلابـيه *** لطـامـت الـعـايـل نـهـار الـمـثــاراه
عـدوهـم غـلطان وإبليس مـغـويــه *** وصديقهـم يبـلغ عـلى غايـة امنـاه

* عبدالله بن دهيمش بن عبار العنزي هذه القصيدة رثاء بجلالة الملك خالد
ابن عبدالعزيز طيّب الله ثراه :
جـل الكريم الـلي عـلى الكـون دايـم *** يـبـقـى جلالـه خالـقـي والـمـلأ زال
يا الـلـه يا محـيي العـظـام الـرمايـم *** يا خالق الإنسان من طين صلصال
يـا رب مـن لطـفـك تهـون العظايـم *** ليـت القـدر يعـفـي شغاميم الأبطـال
عـنـا ارتحـل خالـد زعيـم الزعـايـم *** نبـكيـه فـي دمـع عـلى الخـد همـال
يـبكـونـه الشيخـان بـيض العمـايـم *** وعـلـيـه يبكـون الأرامـل والأطفـال
أبـو الثـكـالا والضـعـوف الـيـتـايـم *** زبن الدخيل اللي حداه اشهب اللال
عـساه يسكـن بـالجـنـان الـنـعـايــم *** بالـخـلـد ينهـل مـن نـقـاريح وازلال
دونـه نبيع الـروح مـن غيـر سايـم *** لــو يـنـفـدا خـالـد فـديـنـاه بـالحـال
لا شك أمـر مجـري هبوب النسايـم *** رب الـمـلأ الـخلاق بـيـديـه الآجـال
العــبـد مـالـه عـن صفيـح الـردايـم *** ولا بـد من رملٍ على الراس ينهال
مرحـوم يـا نسـل الملـوك الصرايـم *** عسى خـلفنـا عـقب خالـد بالأنجـال
أنـجــال لـيـثٍ لــه فــعــايـل قــدايــم *** ما مات نمر وفي عرينه له أشبـال
صرح الفخر يبقى على الـدوم قايـم *** بوجود أبو فيصل لمجد الفخر نـال
فـهـد خـلـف خـالـد بـكـل الـلـزايـــم *** فهـد الفهـود المقرني ذرب الأفعـال
نسـل الملـوك الـلي تـزيـل الـظلايـم *** فهـد نهـج منهـج زكييـن الأعـمـال
يـنـعـم بـعـدلـه كـل سـاجـد وصـايـم *** لأجـل الأعمـال الخيـرة يبذل المـال
وولـي عـهـده مـا بـفـعـلـه وهـايــم *** الباسل اللي باللقـاء ضـد مـن عـال
يعيـش أبـو مـتـعـب قـوي الـعـزايـم *** عضد الفهد عـند الشدايد والأهوال
نضـايـض المقـرن شمـوخ وعلايـم *** حاشوا عظيمات المفاخـر والأنفال
سـور الوطـن عـن لافحات السمايم *** مثـل الحيـود الـلي تـذرابـها جـبـال
مثـل السـراة شمـوخـهـا بـالـتهـايـم *** رواســي مــا هــزهــا كــل زلــزال
نـالـوا مـقـام المجـد فـوق الهـمايـم *** فـوق السبـايـا وأحـمـر الـدم شـلال
حـتـى تـعـلـوا فـوق بـرج الـنعــايـم *** أفعالهم تربـوا على وصف الأقوال
نالـوا عـلى صـرح المعـالي غـنايـم *** غـنايـم نـفخـر بـهـا عـبـر الأجـيـال
لـهـم الـفـخـر والـعـز والمجـد رايـم *** رام وسـعـى لـه بالـمـلازيـم فـتـال
بالسيف الأملح زالـوا أهـل النمـايـم *** حـاشى يحـاول خدعهـم كـل دجـال
عن غيرهـم مجـد الفخـر دوم شايـم *** يستاهـلـه مـن كـان للحـمـل شيـال
والـلـي يـعـاديـهـم جـداه الـهـزايـــم *** والسيـف يعـبـا مجـرديـنه للأنـذال
أنـجـال مـقـرن بـالـحـرايـب عـدايـم *** عـوق الخصيم وللهـواشيل مدهال
رضـيعـهـم نـال الـفـخـر بـالتـمـايـم *** مثل الصقر مرباه في راس ما طال

* عبدالله بن دهيمش بن عبار العنزي هذه القصيدة رثاء بصاحب السمو الملكي
الأمير محمد بن عبدالعزيز رحمه الله :
يا الـلـه يا للي بالخـفاء دوم عــلام *** يا لواحد اللي شيّد العـرش تشييد
يا من خلقـت الكون فـي ستـة أيـام *** يا الله يا محيي الغصون الهواميد
يا مـن لـك عبـادك سجـودٍ وصيّـام *** يا مقـدر أعـمار البشر بالمواعيـد
يا منزل الأمزان من سحب وغمام *** أنزل على محمد حقوق الرواعيـد
مرحوم يا ريـف الأرامـل والأيـتـام *** يا مـن دخيلـك مـا تعـرض لتهديـد
من لاذ بـه دايم عـلى عـز وإكـرام *** تمضي سنينـه بالفـرح كنهـا العيـد
فرحت ضمير الـلي تنصاه منضام *** يزيـل عـنه الضيم والغبـن والكـيـد
الوايلي ساس الشجاعـة والأقـدام *** ليث الوغى له بالمراجل شواهيـد
بـالـكـون سيـفـه للمعـاديـن لـطـام *** حـليـاه عـنتـر بالملاقـى وأبـو زيـد
مضراب سيفه للعـدا حتف وإعدام *** غمقٍ صوابه يرمي المتن والجيـد
شذرات عينه يـوم تنظر للأخصـام *** كـن السـهـوم بنـونهـا والعـبـاريـد
الليث الأروع من صناديد ضرغـام *** ليـث الليـوث الـلي يضد الصناديد
الحـر الأشقـر مـن مـواكيـر غـنـام *** إلـى كـفـخ خـلا الحبـاري مـلابـيـد
ما ينمحي علم الفخر عبر الأعـوام *** ترفع له البيضاء على قمة الحيـد
شبل حَمَل جملتْ شهادات وأوسـام *** مفـاخـره ما هـي نحـايـل وتـقـليـد
منجـوب ساسه من صماصيم حكام *** مجد المفاخر وارثه سيد من سيد
سطـر لهـم التاريخ بسطور الأقـلام *** تاريخ صـدقٍ بالسـجـلات تـأكـيـد
مـن عـزوةٍ مـا طـاوعـت كـل نـمـام *** صفـوة سعـود مطوعين المعانيد
جـد الحـمـولـه بـيـّد الـتـرك ودهــام *** وحجـر اليمامـة ضمهـا للمليبيـد
سـاد وحكمهـا وحـرر الـدار بحسام *** كافح وحددها على الهجن تحديد
وسادوبها أنجاله من الشرق للشام *** سقم الحريـب وللمعـادي لـواديـد
عنها أبعدوا شبح الظلاله والأوهام *** هـدوا صعبهـا والجنـاة المحاقيـد
بهـم ارتفع عـز العـروبـه والإسلام *** غصبٍ على عدوانهم والحواسيد
نطلب من المولى عسى عزهـم دام *** ريـف البلاد أهل الفخر والتحاميد
للمملكـة مـثـل الـرواسـي والأعـلام *** ساروا عـلى منهاج سنة وتوحيد
سور الوطن وحماه بالموقف الهام *** وهم نصرها لا صار بالأمر تعقيد
من ضمن غيري كلمة قلتها سهـام *** ما أقـدر أعـد أفعالهم مـار تجهيد
وأطلـب مـن الله بالبدايـة والإخـتـام *** يرحم فقيد الشعب نسل الأجاويـد

وقال : عبدالله بن دهيمش بن عبار العنزي هذه القصيدة رثاء بخادم الحرمين
الشريفين الملك فهد بن عبدالعزيز آل سعود رحمه الله:
يـالـلـه يـا رحـمـن تـجـبـر عـزانــا *** بالعاهـل الـلي المسلمين افجعـوبـه
نـدعـوك بـاسمـك يا معـليّ سمـانـا *** تضفي عـليـه المغـفـرة والمثـوبـه
يـا رب عـفـوك لا تـخـيـّب رجـانــا *** الطـف بحـال الـلي قـليـلـه عـيوبـه
الطـف بعـاهـلنـا وزعـيم ازعـمانـا *** تـقـبـل حـسـنـاتـه وتـغــفـر ذنـوبـه
قـايـد مـسيـرتـنـا وحـامي حـمـانـا *** حـرز الوطن لا صار للكون شـوبـه
يـقـهـر معـادينـا ويـعـز اصـدقـانـا *** ريـف الصحيـب وللمعادي عـقـوبـه
القـدر حـان وصـادق العـلـم جـانـا *** وما قـّدر المـولى عـبـاده رضـوبـه
والصبر في وقت المصيبـه جدانـا *** نصبر على البلوى ولو به صعـوبه
ومـن حـان يـومـه مـا يـرده بكانـا *** العـمـر يـبـلا والسـنـيـن محسـوبـه
مـرحـوم يالـلي بواحبـه مـا تـوانـا *** يـجـهـد عـلى عـز ومعـزة شعـوبـه
يـا مـا سهـر باسبابنـا مـن غـلانـا *** ويـا تـلـقـّى مـن الصعـوبـات نـوبـه
عدل القضاء الصنديد حاز برضانا *** ريـف البـلاد بشرقهـا مـع جـنـوبـه
يعـوضنـا بـاللـيـث مرهـب اعـدانـا *** قـروم الرجال الـلي طريقـه مشوبه
اخـوانـه مـن بعـد الـولي ملتجـانـا *** سقـم المعـادي والخصـوم مغـلوبـه
بعـد الولي هـم سورنا وهـم ذرانـا *** يا ما عفوا عن عاصي عقب توبـه
جـيـنـا نـبـايـعـهـم ونـعـلـن ولانـــا *** حيث الفخـر والمجد مبطي رقـوبـه
نسـل الـزعيـم الـلي رفـع مستوانـا *** الـلي الـيـا صار اللـزوم اعتـزوبـه
عبدالعـزيـز الـلي مـن الكيـد عـانـا *** يـوم أن نـار الحـرب والـع شبوبـه
بجهـود أبـو تـركي بـدأ العـز هـانـا *** حكمـه عـلى بلاده ربيع وخصوبـه
جـاهـد وأسـس بـالـجـزيـرة كـيـانـا *** وأنجـب ملـوك بالمسيـر اقـتـدوبـه
هـم قـدوة الأمـه سـبـايـب هــدانــا *** منهـم وهـم نص الكتـاب احكموبـه
زالـوا دواعي جـوعنـا مـع ظمـانـا *** وزال الكـدر والعـز ذعـذع هبـوبـه
وأن فـر دالـوب الـزمـان وحــدانـا *** هـم حيدنـا اللي نتجـه دوم صـوبـه
نـطـلـبـك يـا رب الخـلايـق عسانـا *** مـا نـفـقـد الـلي كـل خـيـرٍ سعـوبـه
وعسى ضناهم هـم مـقـادم ضنانـا *** يـصـونهـم مـولاي مـن كـل حـوبـه
رب الـعـبـاد مـن المحـبـه عـطـانـا *** نحبهـم والنفس مـا هـي مغصـوبـه
يـا مـن نـشـد عـنـا نـفـيـدك تـرانـا *** ارواحـنـا لـقـادة وطـنـا جــلــوبـــه

قال عبدالله بن دهيمش بن عبار العنزي هذه القصيدة رثاء بالملك عبدالله
ابن عبدالعزيز طيّب الله ثراه :
من حـان يـومه ما يفيـده طبيبـه *** ولا أحـد يـردّه يـوم تـأتي اسبابه
سـهـم المنـايـا كـل حـي يصيـبـه *** ولا يوم عاد اللي تنوشه حـرابـه
ومـا قـدّر الرحمن مـابـه غـليبـه *** ماحاد عنه المصطفى والصحابه
يا الـلـه يالـلي الكون تعلـم بغيبه *** يا منزل الماء من غمام السحابه
تغـفـر لمن فـقـده عـلينـا مصيبه *** يا رب تـجـعـل فـي يمينـه كتـابـه
عاهلنا أبو متعب عسى الله يثيبه *** عسى ولي العـرش يجزل ثوابـه
عساه يسكـن بالجـنـان الـرحيبـه *** يافـارج الشـدات خـفـف حسابـه
الـيـوم كـل الشعـب يـنعى حبيبـه *** الكـل منهـم جـايح الحزن صابـه
حـزت لفانا العـلم ساعـه رهيبـه *** شعب الجزيره يجبـر الله انصابه
شعبه من الحرقه جروحه عطيبه *** مـاحـد يلـومـه لـو يشلّق ثيـابـه
مـالـوم قـلـب الـلي تـزاود نحيبـه *** عـبّـر بالـلي كنّه ضميره وجابه
على الذي ما يـوم بـار بصحيبـه *** الـلي جـمع عـفه ولطف وحبابـه
العاهـل المحبوب مـا داس ريبـه *** يطمع بعفو الـلـه ويخشى عذابه
نبت على الأنصاف والعدل شيبه *** عـدل المناهج مـن بـدايـة شبابه
الحاكم الـلي يشكر الشعب طيبـه *** ذخـر المواطن بالفخـر يقـتـدابـه
والـلـي يجـيـه بمجلسه يحتفيبـه *** عنده جميع الشعب مثل القـرابـه
حـلال عسرات الأمـور الصعـيبه *** تخضع له الشجعان قدر ومهابه
الـوايـلي نسـل الجـدود العـريـبه *** مـا زال نذكـر بالمنـابـر خـطـابـه
مادامكم في خـيـر ماهي غـريبـه *** يقـولـهـا لشعـبه ويشكـر جنـابـه
عقب الفجيعه بالظروف العصيبه *** سلمان في وقت الحرج يعتزابه
خليفـته سلـمـان شعـبـه رضيبـه *** الكـل فـي سلمان يـبـدي اعجابـه
الجود طبعـه والفخـر من نصيبه *** والطيب سلمه والصخى يلتقابـه
سلـمـان بالقـالات يفـلج طـليـبـه *** من صغر سنّه بـه نبوغ ونجابـه
الحـر الأشقـر مـاكـرّه بالجـذيـبه *** راس الجبل يصعد معالي هضابه
نسل الزعيم اللي يضادد حريبـه *** عبدالعـزيـز الليـث يـوم المجابـه
حـد الوطن عـذّي جوانب شعيبه *** صنديد ما يقـرب خصيمه لغـابـه
المقرني من ساس عزوه صليبه *** مـن لابـة آل سعـود يا نعـم لابـه
وعند الختام القول نرسل نـديبـه *** فيض المشاعـر نرسلـه بالنيابـه

وقال عبدالله بن دهيمش بن عبار هذه القصيدة أبيات رثاء بصاحب السمو
الملكي الأمير سلطان بن عبدالعزيز آل سعود رحمه الله :
يا رب تـرحـم فـاعـل الخيـر سلطان *** بحسناك يـا خـلاّق آدم مـن الطيـن
يا رب تجعـل منـزلـه عنـد رضـوان *** يا خالـق المخلـوق يا ناصر الديـن
يا رب تجعل لـه مع الحـور مسكـان *** في جـنـة الفـردوس يسكـن بعلّيـن
يشفع له اللي فارضٍ خمس الأركان *** المصطـفى الهادي أمـام المصلين
نـدعـوك يامـن للمخـالـيـق رحـمـن *** ترحـم فقيـد الشعـب يـارب يا معين
سلطان فـقـده عـم شعبـه بالأحـزان *** جميعهم مـن جـايح الحـزن بـاكيـن
سلطـان مـع لطفـه للأخصام مـالان *** لطـيـف بالصاحب وضـد العـنيديـن
سلطان يذكر دوم في فعل الأحسان *** أبـو الـيتـامـا والضعـوف المساكين
سلطان ريف الجار به دين وأيمـان *** دوم أيـتهجـد والمخـاليـق غـافـيـن
سلطان سلطان السعد طيـر حوران *** إلـى شهـل تـلـبـد جـميع الشياهيـن
سلطان نـال الجـاه والقـدر والشـان *** وملك قلوب الناس في فعله الـزين
سلطان يعطي دوم في سـر وأعلان *** دايـم بـفعـل الخيـر ينفـق ملايـيـن
سلطـان كـفّـه بالصخـى تـقـل هتان *** فيه الكرم والعطف واللطف واللّين
سلطان ريف اللي من القـل حيـران *** عـز الـوفـود اليـا تـنصّـوه عـانيـن
سلطـان طـيـبـه لـه دلايـل وبـرهـان *** فعـايلـه ما هـي هـقـاوي وتخـمين
سلطان للمعـروف والطيـب عنـوان *** كـل الخلايـق بـالـكـرم لـه مـقـرّيـن
سلطان أبـو خـالـد سـلايـل كحيـلان *** منشاه من صلـب الملوك العريبين
سلطان من عقبه عـزانا لـه أخـوان *** وأنجال من صلب الفقيدة سلاطين
عـقبـه عوضنا في صناديد مرخـان *** نـقـوة أسـود وبالحـرايـب عطيبين
آل السعود اللي على الحـق ميـزان *** نسل الملوك بمنهج الشرع ماشين
مليـكنـا المحبـوب للشعـب مـزبـان *** هو ذخرنا لاصار وجه الزمن شين
وأخـوانـه الـلي بالملمـات شجعـان *** حـكـامـنـا الأبطـال عـوق المعاديـن

وقال عبدالله بن دهيمش بن عبار هذه الأبيات ايضاً رثاء صاحب السمو الملكي
الأمير سلطان بن عبدالعزيز آل سعود رحمه الله :
مرحـوم يا مـن يـتـصـف بالرجـولـه *** الـبـاسـل الـلـي لـلـمـراجـل تـهــيـا
نطلـب عسى الجـنـة منـازل حلـولـه *** فـي ضـل خـلاّق الـخـلايـق تـفـيــا
سلطـان عـنـوان الـفخـر والبـطولـه *** سلـطـان سـاس المرجـله والحميـا
مـدح الـزعـيـم الـفـذ كـلـن يـقـولــه *** مـن كـرم جـوده كـن حـاتـم هـنـيــا
النـاس فـي فعـل الجميـل شهـدولـه *** شهم وبشوش بكـل مـن جـاه حـيـا
سلطـان لـه بالمجـد صولـه وجولـه *** الحـاكـم الـمأمـون طـلـق المـحـيّـا
الـمـقـرني يـتـعـب عـلى كـل طـولـه *** حـتـى بـلـغ مـجـده مـقـام الـثـريــا
مجـده تسلسل مـن عريـن الشبولـه *** نسـل الزعيم اللي على المجد عيـا
سلطان نجد اللي الرجال اخضعولـه *** ساوى الصقـور الجارحـه بالحديـا
مـا حـصـل العـليـا بـليـن وسـهـولـه *** يـوم السـبـايـا عـجـهـا لــه غـبـيّـا
يـتـعـب جـواده بـالـمـسيـر وذلـولـه *** على النقا المكشوف مـاهـو غشيا

* وقال عبدالله بن دهيمش بن عبارهذه القصيدة رثاء بصاحب السمو الملكي
الأمير نايف بن عبدالعزيز آل سعود رحمه الله :
كـل الـبـشـر صـيـورهــم لـلـتـلايــف *** والعـمـر يمضي بين حـزن وسعـاده
الـمـوت حـق ولا تـفـيـد الـحسـايـف *** وعـمـر البشر يوقف على حـد مـاده
مـن كـان بـالـدنيـا الـدنـيـه تـكـايـف *** سهـم المـنـايـا مـا سلـم مـن هـجـاده
يـالـلـه يالـلي بـحـال الأجـواد رايـف *** شـعــب الـبـلاد أرحـم فـقـيـدة بــلاده
أجـبـر عـزا حـزن القلـوب اللهايـف *** نــطـلـبـك يـا رحـمـن صـبـر وجـلاده
حجم المصيبة خلّـت القـلـب هـايـف *** وضـح الـنهـار اعـتـم وكـتّـم سـواده
حـنـا فجعـنـا فـي عـديـم الـوصايـف *** لاشــك لـلـمــولــى بــخـلــقـــه أراده
نايـف بفعـل الطيـب والمـجـد نـايـف *** حــرٍ يـلـوف الـصـيـد بـاول هــــداده
تشهد على الأفعال بيض الصحايـف *** سـبـع الـرجـال الـلي زهـتـه القـيـاده
مـودع ثـقـيـلات المحـامـل خـفـايـف *** والشعـب بـعـد الـلـه عـليـه أعتمـاده
فـي كـاهـلـه يحـمـل ثـقـيـل الكـلايـف *** بـالـعـدل مـنـهـاجـه طبـيعـه وعـاده
مـن هيبتـه خـلا الصعـايـب عسايـف *** لا شـافـه الـمجـرم تـصيـبـه شـراده
خـلا الـمـعـانـد عـن نـويـه يـسـايـف *** عــن الغـوى والطـيش يـلـزم حيـاده
نايـف بطش فـي كـل سارق وحـايـف *** ومـن روّج الآفـات حـاده وصــاده
مـن مـارس الأرهـاب للخيـر عـايـف *** كـان انتحى عـن مسلك الحـق بـاده
شعـب الوطـن للأمـن خابـر وشايـف *** والـكـل يـرقـد مـهـتـنـي فـي رقــاده
مـلاذ مـن لافــه مـن الـظـيــم لايــف *** ملجـأ الضعيف أن شاف ظلم ونكاده
مـهـمـا تـلـفّـظ بـالـمـديـح الشـفـايـف *** أفــعـال نـايـف مـا حـصيـنـا اعـداده
مـن يمدحـه مـا قـال بـه هـرج زايف *** رمـز المـفـاخـر وارثـه مـن اجـداده
لا يـفـرحـون الـحـاقـديـن الـهـدايــف *** يخسى المـعـادي مـا يحقـق امـراده
الــدار فـيـهـا مـعـطـريـن الـرهـايــف *** سـقـم الـحـريـب الـيـا تبيـّن عـنـاده
رحـل ومن فضـل الـولي لـه خـلايـف *** الـعــز بــأخــوانـه وجــمـلـة أولاده
الـلي لـهـم فـعـل الـرجـولـه وضايـف *** مــا يـركنـون لـنـاعـمـات الـوسـاده
نـسـل الـمـلـوك مـزبنـت كـل خـايـف *** معـهـم عـلى كسب المعالـي شهـاده
بجهـودهـم لـمـوا جـميـع الطـوايـف *** والـحــق مـبـطـي تـابـعـيـن ارشــاده
الـلي أودعوا شعـب الجزيره ولايـف *** يقضـون في شرع الولي هم اسناده
واعـلومهـم عـنـد الخلايـق طـرايـف *** فــوق الـمـعـالـي يـطـلبـون الـزيـاده
نـذكــر ثـنـاهـم كـل مـا هــب طـايــف *** من مقـرن الأول على الشعب ساده
نـالـوا فخـرهـم فـي زمـان العـطايـف *** يــوم الـرجـال الكـل يشعـف جـواده
يـا مــا تـعـلـوا مـومـيـات الـسـفـايـف *** يـوم النضا والعـوص يكرب شداده
والـيــوم نـنـعـم فــوق زل وقـطـايــف *** الخـيـر عـم وزال عـصـر الـقـراده

* وعبدالله بن دهيمش بن عبار العنزي هذه القصيدة رثاء بسمو الأمير محمد
ابن سعود الكبير آل سعود رحمه الله :
مرحوم من ساقه على القدر مـولاه *** تـمّـت سـنـيـنــه ثـم ربــه أخـتــاره
رب الــمــلأ خــلاق الأرواح نـــاداه *** ولـبى نـداء مـولاه يـسكـن جـواره
نطـلـب عسى ربـه يغـيثـه بحسنـاه *** وعسـى الكريـم أينجحـه باخـتبـاره
يا الـلـه تجعـل جـنـة الخـلد سكـنـاه *** وعسى الولي يحميه من حـر نـاره
وعسى الـذي قدم من الخيـر يلـقـاه *** زين العـمـل يجـني غـرايس بـذاره
يدعي له الـلي نـال طـائـل بمسعــاه *** سعــالـه بـجــاهــه ورد اعــتـبـاره
ويدعي له اللي زل بـه قـدم وأنجـاه *** أنـقـذ حـيـاتـه قـبـل يـصـدر قـراره
ويدعي لـه المعتـق إلى سـاق مـداه *** عقب الوهق واليأس جته البشاره
ويدعي له الـلي بـأول العـمـر ربـاه *** حتـى تـرعـرع والـتحـق بالـوزاره
ويدعي لـه الـلي قـلبّـه جـور دنيـاه *** خـلاه عـقـب العـوز يسكـن عمـاره
ويدعي له اللي يشكي الفقر وأغناه *** وعـقب الفقـر خلاه صاحب تجـاره
ويدعي له اللي جـت تراقـل مطايـاه *** زال الدجى بظلمـاه وأشرق نهـاره
ويدعي له اللي حـده الوقت ثم جـاه *** واقفا مرفوع الرأس عقب الزياره
يشـهـد لـه التـاريخ مـا اظـن ينساه *** علمـه ظهـر بالنـاس مثـل الـمنـاره
حيـثه بـذل مالـه بالإحسان وأفـنـاه *** الطيـب والمعـروف سـلـمـه وكـاره
يعـطي ولـكـن مـا يحسـب عطـايـاه *** تـنفـق يـميـنـه دون تـدري يـسـاره
حـكيـم رأي وصـاحـي الفكـر يقـداه *** وتأخـذ من أرياه الرجـال استشاره
بالصـدق والإخلاص تبـرز أحميـاه *** مـا لان بـأسـه لـو تـلـيـن الحـجـاره
والخصم ما يقبل عجاريف عوجـاه *** ومـن نـاحـطه قـرب فـنـاه ودمـاره
والمعتدي طقه على الخشم وأدمـاه *** ومضراب سيفـه ما تضبـه اجبـاره
فيه الكرم والجـود من طيب مجـنـاه *** طـبـق سلـوم الـبـاديـه والحضـاره
الـقـاف يـقـصـر مـا يـعـدد مـزايـــاه *** مجـده يفـوق أعـداد رمـل الزبـاره
نفخـر بمـدح الليـث لـو مـا وصلنـاه *** ونبـكي عـلى فـقـد الفقيـد بحـراره
نطلـب لـه الرحمـة وبالشعـر نـرثـاه *** ونـهـل عـبـرات الـدمـوع بـغـزاره
ولـو يـنـفـدا محمـد بالأرواح نـفـداه *** وعمر الفتى لا بـد يحين احتضاره
وعسى عوضنا بالصقـور المضراه *** مـواكـر طـيـور الـسـعـد والـنــداره

***