ياهلا بك يابومشعل ابقاك الله

انا والله قلت كلام واجد وانت قلت كلام واجد ، وانا وضحت ماعندي حتى اني مااتحسف بعدين اني ماقلت لك ، وانا والله يابومشعل وللامانه ان قصايدك القديمه لازلت محفتظ بها بعضها ماهو مثل اللي بديوانك ذوان ، واشرطة كاسيت قديمه ، اللي بعضها قبل اخلق على هالدنيا ، وذكرك ودفاعك عن عنزة واسمك نسمع به وحنا ورعان والناس كانت بذلك الوقت ماهم مثلهم الحين يتشفقون لعلوم الرجال والسوالف والقصيد وطاريه قبل النت وقبل القنوات يوم الناس بها اكالحين صفة من صفات الماضي اللي الحين نتشفقه، واذكر قصيدتك اللي رديت على المطيري والتي تختلف عن النسخه الموجود الان في ديوانك بورقها جتنا وحنا بالشماليه الغربيه باقصى السعوديه على حد الاردن ، بورق طبع كربون يوم الكربون اكالحين ، واذكر اني من الحماس وذال انها تضيع رحت للمكتبه وصورتها قطعة صور ذال ان احد يطلبها وثم مايردها وانا اكالحين طالب بالابتدائيه وليا هالحين على لونها عندي ، ومن الامور الطريفه اني اكالحين هذيت منها ابيات في الاذاعه المدرسيه والكلام هذا حروة 1417 او 16 والله اني ذوان ناسي بس ابدا يا 16 يا 17 وحنا بديرة اجناب يمكن ما بالمدرسة عنوز اكالحين الا عشره او ادون ، ويوم هذيت الابيات اذكر اليوم الثاني بغـرم بعض الاخوان من القصيده وجاب حدا الطلاب اليوم الثاني قصيده نبطيه ، ماتفطن علي الحين ، مار ان سببها توريدي الاول ، لان عندنا اكالحين مدرس عنزي من اهل سوريا ، واظنه فدعاني ، خلا طابور المدرسه كامل يصفق لي بعد ماقلت القصيده ،،،، اكاليوم وين راسي ماامرحت اكالليله ،،
وبعد ماجاب الطالب الثاني قصيده اليوم التالي ، منع مدير المدرسة القصائد النبطيه ، وقد فهمت انه حصل استياء من بعض المدرسين بأنه يجب فقط القاء القصائد باللغة العربيه الفصحى ، وبعدها اغلق هذا الباب ،،
كما اني لازلت اتذاكر الشيبان وهم يتسامرون حول قصة ابن هذال، وحول معاني القصيدة وابطم وهم يسولفونها ويتدارسونها بعضهم افضى الى ماقدم ، رحمهم الله تعالى جميعا ، حيث كان هناك تواصل بين ابناء عنزة في ديرة ماتسكنها عنزة وانا اكالحين متحمس معهم ولا ادري من وين هي هابه ،،،

الوكاد اني طولت بالهرج انا مار نشكرك على سعة صدرك وتفهمك وتقبل خالص تحيتي