قال عبدالله بن عبار :
يـوم جيـت البنك ودعـت ودعيـت *** أطلـب المولى لممدوح السجين
يشهد الله من ضميري قـلت ليـت *** ليـت لـي قـدره اخلص كـل ديـن
وين اللي من دونهم دوم احتميت *** ضد من غـزّر لـه إبليس اللعين
وين اللي حزت نخوني ماختفيت *** بالمـواقـف يشهـدون المنصفين
وين اللي بأمجادهم مبطي شديت *** وين الـلي بهم اتفاخر لي سنين
وين الـلي مجدتهـم بألـفيـن بيـت *** لا على مقصد ولا جيت أستعين
وين فعـل الـلي لفخرهم ما نسيت *** أعـتـزي بجدودهم في كل حيـن
وين اللي وقت الحرج فيهم هقيت *** ويـنـكـم يـا عـزوتـي يالغانميـن
وين اللي وقت اللّـزم بهـم انتخيت *** أسهج الأنـذال وأنـخى الطيبين
أفـزعـوا لـلي بسجـنـه لـه نـهيـت *** وبشّروا ممدوح بالعـلـم اليقيـن

وبعد نشر الأبيات الموضحه أعلاه تفاعل معها عدد من الشعراء فقال الشاعر سالم بن محمد الظريفي الجعفري :
يا أبـو مشعـل شاقـني قاف بديت *** فيه من نبع الوفاء الشي الثمين
كـل حـرف فيه در وضـوء لـيـت *** بالجزاله والهدف شعـرك سمين
أنـت نـور كالـبـدر يامـن ضويـت *** يـا فـخـرنـا يـا عشيـر الغـانميـن
دايـمـاً عـن مـنـزل الدنيـا رقـيـت *** مـرتفـع عـن منزلات الطـامنيـن
دام صوتك وأنت في ربعك هقيت *** هـقـوة تفجـع قـلـوب الصامتيـن
صـوت دوّى بـالأذان بـكـل بـيــت *** اسمعوا صوت الوفاءيا سامعين
دام بـالـمـنـبـر تـعـلـيـت ونـخـيـت *** وايـل الكبـرى لـهـا فـعـل ثميـن
طـاب ذكـرك وأنـت للفكـره بنيـت *** وربعـك الويلان دايـم جاهـزيـن
ربـعـي الـويـلان يـامـنـك نـصيـت *** يدحمون الطيـب بالعـلـم اليقيـن
ربـعـي الـويـلان لا زامـوا زميـت *** يبـذلـون الـمـال مـالـه كـانـزيـن
ربـعي الـويلان نـور اليـا انعميـت *** فـزعة تشفي قـلـوب الضايقيـن
والطـلـوحـي بـشّـره يالـلي لـفيـت *** بفزعة الويلان لـه دنـيـا وديـن
وفيك يا راعي الوفاء دوم أقتديت *** ودايـمـاً بـالـلازمـه متكـاتـفـيـن
وقال ممدوح بن صويلح الهبداني الجعفري :
هـام فكـري للقـصايـد وأبتـديـت *** بسم رب الكـون مـولاي استعيـن
بـعـد خـط فـيـه دقـقـت وقـريـت *** واستجاب الرد مني فـرض عيـن
يا بحور الشعر من بحرك رويت *** والمعين الـلـه مـا غـيـره معـين
يا أبو مشعل هقوتك فيهـا هـقيـت *** وأنـت هـاقـي بالـرجـال الطيبيـن
وأشهد أنك لا افتخـرت ولا بغـيت *** تحتزم فيهـم كـما الضلـع المتين
وأنـت لـلي فـيـه شـيـدت وبـنيـت *** حافظين الجهـد يا لـيـث العـريـن
والأمل بالـلـه لا بـعـت وشـريـت *** عـلهـا تـربـح حسـاب الـرابحيـن
وأنت وافي يـوم صوت ودعـيـت *** وهم يبي يوفون يالحصن الحصين
والـلـه يسـدد خـطـاك اليا سعـيت *** والـرجـال تـبـيـن بالـوقـت اليقـيـن
وقال الشاعر حمد بن سالم الضوي الجعفري :
يا أبـو مشعـل يـوم لبيوتك قـريت *** هـيـضـنـي يـا وريـث الـخـيـريـن
أتـهّـجـى مـا كـتـبـتــه بـيـت بـيـت *** مـرتـيـن أقـرأ وأكـرر مـرتـيــــن
غـيـر جـزلات المـعـانـي مـا لقيت *** شـاعـر مـا تـأتي ألا بـالـثـمـيـــن
كـنـت ظـامـي للمعـاني وأرتـويـت *** مـن كـلامـك يا زعـيـم العـارفيـن
أشهد أنك يا أبيض الشارب وفيت *** دون ربعك جارد السيف السنين
مـدافـع عـنـهـم دفـاع المستـمـيـت *** ولا غرابه وأنت نسل الصارمين
بالشعـر والعـرف واخلاقك سميـت *** يشهـد الخـالـق وخـلقـه شاهدين
نلـت عـلم ونلت قـدر ونلـت صيـت *** ولا نسي ماضيك غيـر الناكرين
والطـلـوحـي يـوم لفكـاكـه سعــيـت *** وقـيـد أسمـك بـأول المتبـرعين
مـا كنـزت المـال مـن جيبك عطيـت *** تحتسب لك غانمه دنـيـا وديـن
ونسب وايل جامعه عـقـب الشتيـت *** لجتهـادك شـاكريـن ومقـدريـن
أنـت رجـل فـي محـبتـهـم حـضـيـت *** ولا أعتقد في ما تبيه مقصرين
وقال الشاعر إبراهيم صخري الجعفري العنزي :
بسم رب البيـت بالقـاف ابتـديـت *** قمت أدوّر بالسمين أبـي الثميـن
قـال أبـن عـبـار يـنخى كـل بيـت *** لـه نـصيـب المجتهـد دنيـا وديـن
عـلـمـك الغـانـم تعـداني ودريـت *** نصرة المسجون فرض لكل عين
يا أبو مشعل أن تهقويت وهقيت *** بكـل حـزّه تـبشـر وفي كـل حين
حـمـد الضـوي يسـد اليا انتخيت *** بالحضور الـلي يشرّف من يبين
ومن نخى عنـاز بالفـزعه لقيـت *** حـكـمـة وأدراك والـلـه المـعـيـن
وقال الشاعر زعل طراد المضياني :
طـفـت بالكعـبـه ولبيـت ودعـيـت *** الـلـه أكبـر الـله أكبـر يا معيـن
رافعن صوتي وأكبّر ما استحيت *** أدعـي لنـفسي وكـل المسلميـن
أدعي المعبود محـيي كـل مـيـت *** خالق الأنسان مـن مـاء مهـيـن
أطـلبـك يا رب ولعـفـوك رجـيـت *** تفرج الكربه لممدوح السجـيـن
لـه ثـمـان سنيـن مـاذاق المبيـت *** بـس يـردد ويـنـكـم يالـطـيبـيـن
يالطلـوحي يالطلوحي مـا دريـت *** أن أبـو مشعـل يـقـود الحملتيـن
وقامت الويـلان تجمع مـا بغـيـت *** لـو تـبي مليار قـالـوا حاضريـن
وأبشر أنك وسط سجنك ما بقيت *** دام أبو مشعل على يدك اليمين
دام أبـن عـبـار ولّـع كـل لـيــــت *** اشـرقـت دنـيـاك بالعـلـم اليقيـن