|
اخيل يا حمزه سنا نـوض بـارق" "يفرى من الظلما حناديـس سودهـا |
على ديرتي رفرف لها مرهش النشا" "وتقفاه من دهم السحايب حشودهـا |
فـيالله يالمطلـوب ياقايـد الرجـا" "يا عالـمً نفسـي رداهـا وجودهـا |
انك توفقها علـى الحـق والهـدى" "مادام خضرا ما بعد هاف عودهـا |
وابدل لها عسـر الليالـي بيسرهـا" "وجل المشاكل فـل عنهـا عقودهـا |
وافرج لعينٍ لا اقبـل الليـل كنهـا" "رمـدا وذارفهـا تغشـى خدودهـا |
وكبدٍ من اسقـام الليالـي مريضـه" "عليها من جمـر اللهايـب وقودهـا |
تقطعـت الارمـاس عنـا ولا بقـا" "الا وجـودٍ دايمـاً فـي وجودهـا |
حبيبي ومقصودي لعبده الـى عطـا" "واهايب افضاله ما تقـاس مدودهـا |
فيا حظ من ذعذع على خشمه الهوى" "وتنشى من اوراق الخزاما فنودهـا |
وتيمم الصمان الى نشـف الثـرى" "من الطّف ولا حادرٍ مـن نفودهـا |
مع وجه سلفـانٍ الـى لاح بـارق" "نحت له ولو هو نازحٍ من حدودهـا |
ياميةٍ هم مشعل الحرب الـى دنـا" "حريـب ورفـت للملاقـى بنودهـا |
حريبنا نسقيه كـاسٍ مـن الصـدا" "والحبـه الزرقـا لكبـده برودهـا |
وان زارنـا سبـعٍ يـدور لـغـره" "كفوفه دروعٍ من فجايـا صيودهـا |
عبينا لزوراته قراهـا الـى اقبلـت" "وخطرنا على زيزومها اللي يقودها |
وعقب الطمع ترجع سرايـاه كنّهـا" "غيا جملةٍ صفـت عليهـا فهودهـا |
وتغشـى قطـي الخيـل دمٍ لكنّـه" "تزيعج (دلا) اولادٍ عطاشى ورودها |
وان ثقل اللي في اللقا يـروي القنـا" "اللـي لونيـات السبايـا سنودهـا |
زعجناه بارقاب المطارق ورادتـه" "عرجـا دوامٍ للجرايـر تـرودهـا |
فإن جـر حربـيٍ علينـا جريـره" "صبرنا عليه ايلين نقـوى ردودهـا |
فـلا قوينـا الـرد نجزيـه مزنـه" "حمرا تزلزل في رهقهـا رعودهـا |
رعدها القهر ومصبب الدرج وبلهـا" " وحدبٍ مقابيس البلا فـي حدودهـا |
بمذلقـات الهنـد والشلـف كنّـهـا" "(ألسن سلاقي) متعبتهـا طرودهـا |
كما مزنةٍ نشت على الجوف واسبلت" "غثا سيلها يملا الحفن مـن نفودهـا |
والاخرى على (جوده) غثاها لكنّـه" "مصاريم زرعٍ في ليالي حصودهـا |
وراهن يوم يقصـر الظـن دونـه" "حظوظ مـن الله وافقتهـا سعودهـا |
غزوٍ على البره تذلهب بنـا الرشـا" "وتقطعـت عنـا ملفـق جرودهـا |
تولفـت بـدوان نجـدٍ وحضرهـا" "بإعدامنـا قامـت تجـدد عهودهـا |
تولف علينا الذيب والفهـد والنمـر" "سبـاعٍ علينـا ولفتهـا اسـودهـا |
جمعهم لنا ليثٍ على الدرب جابهـم" "فلا عاد نقوى لـو بغينـا ردودهـا |
كفانا بهـم ربٍ لـه الحمـد والثنـا" "علينا مدوده ليس تحصى عدودهـا |
لك الحمد يا معبود والشكـر والثنـا" "وجيهٍ على البيدا نساوي سجودهـا |
ومـرٍّ يكفونـي مذاريـب ربعـي" "واتاجر بنفسي واتنومـس بزودهـا |
الا الـى شفنـا عليهـم هزيـعـه" "من دونهم حمـر المنايـا نذودهـا |
عسـى جـوادٍ ماتفـرّج يصيبهـا" "شبا مطرقٍ يقطع ملاقي عضودهـا |
وانا ذخيرتهـم اليـا دبـرت بهـم" "شعث النواصي والنشامـا شهودهـا |
وملفى مساييـرٍ الـى جـو عينـوا" "قريشيةٍ يعبـا مـع الهيـل عودهـا |
مع منسـف وحايـل اليـا اقبلـوا" "لا علقـت مـا يحتملهـا عمودهـا |
ولاّ ردومٍ من ورى الحجـز نيّهـا" "تداوي بها الربع النشامـا كبودهـا |
وننثر عليهـا السمـن زود وتعمـد" "لشواربٍ تروي القنا فـي هدودهـا |
والـى لفانـا مجـرمٍ ضـده النيـا" "كنّـه بعيطـا نابيـاتٍ حيـودهـا |
الى ضد حمله في متونـه وزارنـا" "نسفناه عنـه ايليـن تبـرا لهودهـا |
وبالجاه نرخص غالي المال دونـه" "ووراه سيوفٍ مرهفـاتٍ حدودهـا |
نقلـط للعقـال بالعـقـل مثلـهـا" "ونعبـا لعيـلات المقـرد قرودهـا |
ومن دوّر العليا نجازيـه بالرضـا" "ومن دوّر القصيـا نلقّيـه كودهـا |
لينه يبدل زجـرة الهـدر بالرغـا" "وقومه تكثّر لطمهـا فـي خدودهـا |
هـذي عوايدنـا لهـذي ومثلـهـا" "ونفس الفتى لابـده مـن لحودهـا |
ولاهيب فعـل مـن يدينـا بديعـه" "سوالف رجـالٍ خلفتهـا جدودهـا |
وصلوا على خيـر البرايـا محمـد" "ما لعلع القمري ومـا هـب نودهـا |