تابع
قال سلطان الأدغم السبيعي بعد أن شاهد صورة من صور عبدالله بن
عبار القديمة منشورة بتوتر يقول : 1579
تـبي الشباب وفاختـك يا أبـن عـبـار *** تغشنـا في صـورتـك وانـت شايـب
حـنـا من عـيـالـك قـد عـيالنـا كـبـار *** يالـلـه بحسن الخاتمه ما انـت تايب
ورد عبدالله بن دهيمش بن عبار على سلطان الأدغم :
الصـوره الـلـي شفـتهـا بـس تـذكـار *** ما القصد يالأدغـم اغـش الحبايـب
حتى انت كانك من طويلين الأعـمار *** لابـد مـا تـشيّب عـلى غيـر طـايـب
مـانـي مـخـادع يـالـسنـافـي ومـكـار *** والشايب أن ماتاب هـذي مصايـب
ما سرت في منهـج ملاحـد وفـجّـار *** أخـشى مـن المـولى مـديـر الهبايب
وكـان الكبـر يا نسل الأجـواد معيـار *** كـل البشـر حـطيـت فـيهـم معـايـب
جـميع شيّـاب العـرب كانـوا صـغـار *** وآخـر مصير العبـد تحـت النصايب
أخـذت بالـدنـيـا مـن الوقـت مشـوار *** ولا لـي عـلـى ذريــة آدم طــلايــب
ولامن حسايف كود تعسيف الأمهار *** ولاني عـن الواجب لك الـلـه غايب
ثم جارى هذه الأبيات عدد من الشعراء قال شاعر : 1580
هـذا القصيد الـلي عـلى الذوق يندار *** مـثـل المـهـار العـاديـات النجـايـب
استغفـر الـلـه ماهـو بعـزف الأوتـار *** الا ولا شـابـه مـن الحـيـف شـايـب
وقال شاعر آخر :
أنا احسب أن صدره شمالي لكن فار *** دمـه وأنـا اقبـل منـه ما كان جايب
شايب وشاعـر لـه مكـانـه ولـه كـار *** جعـلـه يكـون بخـيـر والبـال طايـب
وقال شاعر آخر :
الشايـب البيطـار فـي نـظـم الأشعـار *** يـبغـي يعـرضني لصفـق الهـبايـب
وأنـا مـا اثـورها عـلى غـيـر معـيـار *** ومن تهمة الموضوع ماني بهايب
وقال عبدالله بن عبار يجاري الشعراء بهذه الأبيات : 1581
لا تـشـوهـونـي عـنـد ربـّات الأخـدار *** ما يقبلـن الشيـب شـقـر الـذوايـب
بـس اتـركـوني لا تبـيحـون الأسـرار *** لـو شبت مـاني يالأجاويـد خـايـب
من فضل ربـي لـي حشيمه ومـقـدار *** عـنـد الـرجال الـلي تـفـك النشايب
لـو تـنشـد مـبـارك يفـيـدك بالأخبـار *** عن سيرتي يخبرك في علم صايب
أجـمع نسب عنّاز في خمس الأقطار *** واليـوم شبـت ومشعـل النجل نايب
بـني وهـب وجـلاس وعـيـال عـمـار *** وعبيد الـلي هـم عزوتي والقرايب
قال قرناس العنزي 1582
شيـطـان شـعـري زايـداتـن عــيـاره *** واليـا زهـمته سطـّر القـاف تسطير
يترك هـزيـل الحـرف وياخـذ خياره *** لعـيـون بـن عـبـار رجـالـن شهـيـر
اديـب ويكتـب فـي فـنـون ومـهـاره *** ونسنـد عـليـك العـلم مافيه تـزويـر
قال عبدالله بن عبار:
تـعـيـش يـا كـاتـب لـطـيـف العـبـاره *** قرناس صيرم دربوه الصقاقير
لا أدلا على الصيده بمخلب اضفاره *** خلا ذعاع الريش يذهب شنانير
الشاعـر الـلي الطيـب سلمه وكـاره *** وجـه لي أبياته ومذكور بالخير
قال نهير بن محمد بن حجر الدهمشي : 1583
ان قيل أبن عبار هـو شاعـر الجيل *** بصدق كلام الناس في شاعر جزل
الشاعـر المقدام بوصف الرجاجيل *** تقولـه العـربان صدق ماهـو هـزل
اشهـد شـهـاده بـينـن كـنـه سهيـل *** هـو شاعر الويلان ولا ينعزل عزل
عـبـدالـلـه العـبـار يا خـيـر تـمثيـل *** هـو الأديـب وشاعـر واختم الجـزل
قال عبدالله بن دهيمش العبار هذه الأبيات جواب لأبيات الشاعر نهيّر بن محمد الحجر الدهمشي : 1584
أبن حـجـر نسـل الـرجـال الحلاحيـل *** الدهمشي يصـدق كـلامه مـا يـزل
شيخ القواسم يوم عصر المصاويل *** يـذكـر فـعـل جـدّه اليا ارتج الـنّـزل
يـثـني عـليـه أبـيـض الوجـه بالقيل *** وأشكر جنابـه عـدد منبوت الحـزل
وأثني شكر لأهل القروب المشاكيل *** صافيـن ما معهـم كـذوب ولا رزل
قال نهير بن محمد الدهمشي :
يـا مجـلس زرتـه الـلـيـلـه *** عـسـاه عـامـر بـديـوانــه
مجـلس ويـلان وتفـصيلـه *** مجـلس تـراثـي بـعـنوانـه
وصـلـت يـمـه بتـوصيـلـه *** مهدي يواصل مع اخوانـه
نـبـي نـتـواصـل بتحليـلـه *** ونشوف نهجـه وسلـوانـه
وسـلام مـنـي لـرجاجيلـه *** الـدهـمـشـي قـّدم الـحـانــه
وقال عبدالله بن دهيمش بن عبار هذه الأبيات مجاراة لأبيات
الشاعر نهير
يـوم أبـو قاسم بـدأ قـيـله *** مـا نهمل الـرّد مـن شانه
نسمع كلامه ونصغي له *** ونقـول صح الـلـه لسانـه
خـذ لك مع الرّبع تعليله *** حيث الشعـر تفهم أوزانـه
مهدي تـشّرف مفاعيلـه *** يطيـب مـن طيب شيبانـه
من قوم ما تقبـل العيلـه *** فريض من روس فدعانه
قال الشاعر نهير محمد الدهمشي هذه الأبيات يثني على عبدالله بن عبار :
يستاهـل التكريـم شخص أبن عـبـار *** حقّـه عـلى الـويلان تقديـر واكـرام
سـجـل لـنـا تـاريـخ وايـل بـالأمصار *** وأنساب وايـل سجله كتـب واعـلام
ترى الخطا يحصل من صغار واكبار *** هـو سجل الأنساب بـوراق واقـلام
قال عبدالله بن دهيمش بن عبار :
يالدهمشي مشكور يامهدي الأشعار *** مشكور يا نهيّـر عسى العز لك دام
ياليت من شاف الخطأ يا أبن الأبرار *** يجهـر بتصحيحه ويخبرني اشمام
لاشـك يـشـمـت كـل هــايـف وهـّذار *** هـذر بمجالس وأكثـر النـاس ظـلاّم
قال نهيّر بن محمد الحجر هذه الأبيات يسند على عبدالله بن دهيمش العبار: 1585
تحيه لأبن عبار *** نهديها للشخص البار *** ابو مشعل هالمختار
راوي وشاعر قديم
نحيي عبدالله حيل *** وبقروبنا تساهيل *** ونقدم له ورد وهيل
ابن دهيمش هالحليم
فارس ضيف للفرسان *** وانرحب به بالديوان *** عبدالله هو العنوان
ابو مشعل هالرحيم
قليلا مثله رواه *** وتاريخ عنزة سواه *** وتعب بجميع اخطاه
من صغره وهو فهيم
لا تهمك بعض الحساد *** ولا تهمك بعض النقاد *** ما عندهم والله وكاد
والأريا بعضه سقيم
بعبدالله لازم نشيد *** مجملنا عند البعيد *** لازم يعطى ما يريد
يستاهل كل التكيم
وقال عبدالله بن دهيمش بن عبار جواب لأبيات نهيّر بن محمد الحجر 1586
يا ابن حجر يالمغوار *** تسلم يا عزيز الجار *** الفخر مبطي لك كار
يا نسل الشهم العديم
يسلم بوحك يالحلحيل *** واشكرك الشكر الجزيل *** جدك فوق سروج الخيل
على القواسم زعيم
تسلم يا نسل الشجعان *** يوم الصوله بالميدان *** ربعك يكدون العدوان
لا حضر إبليس الرجيم
تسلم يا فيع الجاه *** ابياتك حتني مهداه *** ومثلك نفخر في شرواه
وأبي اشكرك من الصميم
تسلم يا نسل الأجواد *** حيث أنك عريب اجداد *** قرم وللجزله معتاد
يحفظك المولى العظيم
يا نهيّر هرجك سديد *** لعلك دايم سعيد *** مثلك يزهاه الحميد
عزيز وقدرك حشيم
قال الشاعر نهيّر بن محمد الحجر هذه الأبيات من الهجيني يسند على
زميله عبدالله بن دهيمش بن عبار : 1587
يا قـروب هـون عـلى العـبـار *** بـدا بجـمـعـه وهـو صغـيّـر
وعـن القبيلـة يجيـب اخـبـار *** يـبـدي جـهـوده ولا يـغـيّــر
ألـف بـحـوث عـليـهـن سـار *** يـتعـب عـلى كـلـمـة الخـيـر
جـاكـم لعـرعـر يشوف الدار *** فـي شـوفتـه صـار متحـيّـر
والــدار الأول هـو المخـتـار *** لـو مـره وجـايـه مـسّـيــــر
من الـدار الأول تجيه اذكـار *** قالوا له عـرعـر ترى كبيّـر
قال عبدالله بن دهيمش بن عبار هذه الأبيات جواب لأبيات الشاعر
نهيّر بن محمد الحجر : 1588
تـعـيـش يـا صيـرم الأحـرار *** جـنـي مـبـاديـك يـا نـهـيّـر
اشكـر جنابـك عساك مجـار *** وافهـم هـدف فكـرك النيّـر
يا أبو قاسم ما أخبـر معيـار *** بـيـه لـلـي قـصـده يـعـيّــر
المعـتـدل مـنـهـجـه مـا بـار *** جـنبـت الـلي حبلـه قصّيـر
أنشر فخر عزوتي بأصخار *** ولانـي عـلى العالم مصّيـر
يـوم أنني من شباب اصغار *** ما اغبط اللي بنومه متيّـر
اكتب نسب وأنظم الأشعـار *** ولا زلـت جـاهـز ومتهـيّـر
قال عايد العمير العوادي هذه القصيدة يسند على عبدالله بن دهيمش بن عبار : 1589
يالـلـه يالـلـي دوم يـعـبـد ولا شـيـف *** يـا عـالـم مـا بـالـخـفـا والـبـيـانــي
أنـك تجـنـبـني عـن الـغـي والـزيـف *** وأنـك عـلى خـيـر الكـلام اتـهـدانـي
سـلام مـنـي يـم راعـي الـمـواقـيـف *** يـوصـل لأبن عـبـار جـزل المعـاني
شاعر بني وايل من السيف للسيف *** ومـن الجـدي حـتّى سهيـل اليـماني
الـلـي تـحـمّـل كـل دفـع الـتـكـالـيـف *** كـرّس جـهـوده بالعـمـل والتـفـانـي
مـاهـي هـروج مـزيفيـن السواليف *** مـا بـقـي شـي مخـتـفـي بالطـمـانـي
الـلي بـذلـته لأجـلهـم كيف ما شيف *** مجني عـليـك وكيف حطـوك جـاني
يا حيف يا بعض الرجاجيل يا حيف *** الـلـي عـلـى زلّــة رفـيـقــه يـعـانـي
الخـطـأ وارد من جـميع الأطـاريـف *** يـجـوز يخـطي بالهـدف والمـعـانـي
من دوّر الهفوات خلّه عـلى طـريف *** ولا يـدوّر الـزّلات غـيـر الـهـدانــي
فعلك جزيل وعند كـل العـرب شيف *** يـشهـد لجـهـدك كـل قـاصي ودانـي
حقّك عـلى الويـلان حفـله وتشريف *** تليـق باسمك يا عـريـب المـجـانـي
قال عبدالله بن دهيمش بن عبار هذه القصيدة مجاراه لقصيدة الشاعر
عايد العمير العوادي : 1590
يا عـايـد بـقـافـك تشـرفـت تشـريـف *** وشكرك لهـج بـه يالسنافي لساني
عـبـر الـذي مـا غـلفـوه بمـظـاريـف *** بالـوات سـاب اليـوم يالقـرم جـاني
مجدتـني يسلم جنـابـك يا أبن سيـف *** حـيـثـك نـزيـه وللخـطـأ مـا تـدانـي
يا أبـو عبدالله كـان تسمـع أراجـيـف *** هـرج المسفّـه مـا يهـزهـز كـيـاني
لـو يشمتـون السافـلـيـن الهـذالـيـف *** عـنـد الـذي شرواك يعـرف مـكاني
ازلـه كـلام مـروجـيـن الـخـواريــف *** واحـدهم اسبق من قـعـود العـماني
حـكـيـت بالـواقـع ولا قـلـت تـزيـيف *** تـاريـخ عـنـزة من قـديـم الـزمـاني
راعي الحسد يكوى بحر المراضيف *** ولا أحـد يطيع اللاّش كانه هجـاني
والـلي يشجّع ناشـر الكـذب والهيف *** مـلـزوم يلـجـم بالـرّسن والـعـنانـي
يا مكثر اللي يصفف الهرج تصفيف *** مـالـه طـلـب لـكـن بـشـرّه بــلانــي
مابي ندم عـلى التعّـب والمصاريـف *** مـادام يـعـني عـزوتـي والـعـوانـي
مجهـد ولا تـطـري عـلي التحاسيف *** ولا فاد مضعوف البخت لـو شناني
قال عايد بن سيف بن عمير العوادي هذه القصيدة يسند على عبدالله بن دهيمش بن عبار : 1591
اخاطب رجـال الشعـر والشعـر ديـوان العـرب
نصيحة من منصحٍ ينصح بها الرجل النصيح
ياجب علينا الأحترام والرّد بحدود الأدب
خلك من الوزن الثقيل والرد بالشي الصحيح
واللي كلامه يجرح غيره سكوته من ذهب
اخير له من كلمة تمرض لها شخص صحيح
وكلامك العذب النقي اكيد يمتص الغضب
اختر من اللّفظ الحسن وتجنّب اللّفظ القبيح
وأحذر تعرّض للنسب أن كان ما يمك طلب
خل المخلوق لخالقه وأن شفت سرٍ لا تبيح
واليا هجيت لشخص أنت تهجي لك عرب
لو استثنيت بمدحهم تراه ما يفيد المديح
وأحذر من التلميح والتجريح وأحذر لا تسب
تـرى المـسبـه دايمـاً تـزود جـروح الجـريـح
النار تبدأ من شرار والشّر من كلمة غضب
ترى المشاكل نصها اسبابها الشعر القبيح
واليا مدحت الشخص من أجل المصالح والذهب
مدحك خـطأ يا صاحبي ولا يصح الا الصحيح
وجهت نظر وابديتها ومن بعدها ليه طلب
موجهن يم الأديب الشاعـر الـفـذ الفصيح
شاعر وأديب وله مكانه بين شعّر العرب
أبـن عـبـار الـوايـلي ماهـو بحاجه للمديح
نبي نصيحه من جنابك يمنا حسب الطلب
أما تأيدنا ونستمر ولا تنصحنا ونستريح
قال عبدالله بن عبار هذه القصيدة جواب للشاعر عايد بن عمير : 1592
لاهنت يالحر الصيود اليا هوى يرمي الشبب
يا عـايـد الـرّب يحـمـاك صرّحـت بالقول الصريح
في عصرنا كما تشوف سوالـف منهـا العجـب
ما سنها نبي الهدى ولا سنها عيسى المسيح
ما اشكل علي أهـل الجحود اللي يكنون الحسب
يا عايد النمر الفروس ما جفله كثر النبيح
من سار بالدرب العوج خاب وخسر ثم أنّكب
الظالم المولى خذله ماله مجيب ولو يصيح
دوجت وسجلت البحوث من عطوى لأم السّرب
ويشهد لخدمة عزوتي حتّى الذي وسط الضريح
دجت بجنوب المملكة دار الصياعر والكرب
وفي كل ديره زرتها حضيت بالوجه الفليح
ما درت من شعري طمع ولاهو مخصص للّطرب
بالعـز وعـلـوم الفخـر سجّـلـت منـظـوم القـريـح
ومن لا تعزوى بعزوته وش عاد لو ربّى الشّنب
هـذاك يـبـقى مـنـزلـه مـثـل المـعـوّق والكـسيـح
من فضل خلاّق البشر راعي المكيده ما غـلـب
يسعى يـبي يـذلـنـا مسرع وصـدره لـه فحيـح
الحاقدين أهل الحسد حطّوا على النار الحطب
مـن لا يـودك لـو سكـت يبـين بغـضه بالنفيح
ودليل نكبات الزمان ما صار في حمص وحلب
عقب الثراء رجالهم أصبح مثل راعي وضيح
وحـنـا بضـل ملوكنـا الـلي يهـدّون الصعـب
بأسبـاب حـكّـام العـدل تـنـام بالـدو الفسيح
قال الشاعر عايد بن سيف العمير العوادي هذه القصيدة عندما طلبت سألته
ماهو جديدك من الشعر أرسل لي هذه القصيدة يقول : 1593
قالـوا جـديـدك قـلـت هـذا جـديـدي *** جـميـع مـا مضالنـا تـقـل مسيار
الـلي مضن تقريب سبعين عـيـدي *** مثـلهـن مضيتهـم تـقـل مـشـوار
لـوهي عـلى كيـفي طلبت المزيدي *** لاشك عنـد الـرّب تحديد الأعمار
ولابـد مـن يـوم يـحـيـن الشديـدي *** في وقتناالمحتوم نرحل عن الدار
وأفطن تـرى معنـا رقيب وعتيـدي *** واحـد على يمناك والثاني ايسار
مـا تـلـفـضـه تلـقـاه شـي وكـيـدي *** أقـر بسورة قاف تعطيك الأخبـار
والشعر بـه هـزل وجزل ومفيـدي *** وبـه شعـر مثـل القاز يولع النـار
وكـلن يطـب وياخـذ الـلي يـريـدي *** وهـو يتحمّـل مـا يـريـده ويختـار
ياصل لك المطلوب بأسرع بريـدي *** مـع السّـلام تـوصلـه لأبن عـبـار
وحـنـا بـعـد منكـم نـبـي نستفيـدي *** أنـت الـذي بالقيل شاعـر وبيطـار
وأنـت الـذي بالـراي رايك سديدي *** يا محصي الويلان في كل الأقطار
وأنت الذي وقت المخاصم عنيدي *** خليت خصمك يوم حان الوعد نار
جواب عبدالله بن دهيمش بن عبار على الشاعر عايد العمير العوادي : 1594
ياعايـد أبن عميـر جعلـك سعيـدي *** وعساك ما تشوف المكايد والأكدار
ويـاعـل عـمـرك بالليـالي مـديـدي *** حيثك عزيز الشان من ربعك خيـار
وحيثك من اللي يكسبون الحميدي *** عـاقـل لبيـب وبالذكاء عندك أفكـار
أنـت الـذي لجـزل المعاني تجيـدي *** شاعر وأديب ودوم مبدع بالأشعـار
يالـنـادر الـلي للـجـزيـلـه تـصيـدي *** مثـل القطامي حـر من ماكر احـرار
صدقـت يا عـايـد وقـولـك رشيـدي *** الـلي ذهـب يالـقـرم مـا عـاد تكـرار
المـوت أقـرب من حبـال الوريـدي *** ولابـد يـفـنـا كـل مـن فـوقـهـا سـار
لـولا الأمـل عــنـد الأوادم بـعـيـدي *** كـل البشر من واهـس الهـم تنهـار
كـلن سعى بـدنيـاه يجـمع رصيـدي *** ناس بغناه وناس يشكون الأعسار
والـرابح الـلي من العـمل يستفيدي *** وفي منهجه ينهج مناهيج الأبـرار
والمفلس الـلي جارك الـلـه يحيدي *** عن الصواب ويعتبر ضمن الأشرار
والـلي بظـلـمـه للـخـلايـق يـكـيـدي *** الـلـه حـسيـب لـكـل خـايـن وغـدّار
وكتب الشاعر عايد العمير هذه الأبيات يطلب مجاراتها يقول : 1595
بـلهـون يا نـقـالـة الهـرج بـلـهـون *** لا تنقـل الكلمـه وهـي مالهـا اثبـات
واثـبـاتـهـا مـاهـو بكـلمـة يقـولـون *** ولا في شهادة واحد ظمن الأموات
واللي يجيب الهرج ماهو بمصيون *** تبـدي عـليه من الرجـال الملامـات
وقد جاريت ابيات عايد العمير بهذه الأبيات :
يا عـايـد بن عميـر نشكـرك مليـون *** دونـك جـوابي مع جـزيـل التحيات
الناس يا عـايـد لهـا قـلوب وعيون *** وأهل العقل ما يصدّقون الأشاعات
والهرج ما يقبل من انسان ملسون *** الـلي يـلـفّـق بالمجـالـس دعـايـات
ارسل الشاعر عايد بن عمير العوادي ثلاث ابيات ويطلب مجاراتها يقول : 1596
قـطع المواصـل بيننـا غـيـر مرضي *** اقـل مـا تـرسـل سـلام بـرسـالـه
واجنب الـلي يزعـل الناس وارضي *** الـواحـد الـلـي كـل حـيٍ يـسـالـه
ولو تمشي البيداء بطولٍ وعرضي *** ما تاجـد الـلي مقنعـه راس مالـه
وقال عبدالله بن دهيمش بن عبار هذه الأبيات مجاراة لأبيات عايد العمير :
يا عـايـد ابـن عـمـيـر أديـت فرضي *** والوصـل مع مـولاي عـز الجـلالـه
والخـل الـلي يالقرم يفرح بحرضي *** ما اشفق على قربه ولا أبي اتصاله
ومن قال مقصودي متاعي وقرضي *** يقطع وصـل عـمّـه ويـزهـد بخالـه
الأستاذ محمد بن زيدان الهزاع ابو زيد اثنا في قروب ضنا فريض على 1597
الفقيد صايل بن الأفنش رحمه الله في كلام فقلت هذه الأبيات اشكره :
صدقت في مدح الفقيده يا أبو زيد *** قلت الصحيح وكل هرجك صمايل
تسلم يا أبن زيدان يا أبن الأجاويد *** الطـيّـب الـلي يـنـعي مـثـل صايـل
حيثـه يـعتد مـن الـقـروم الأوالـيـد *** ويفعل كمـا فعـل الرجال الحـمايـل
فقال محمد أبو زيد مجاوباً :
لاهنـت يالخـال بكـلامـك فـلا أزيـد *** يستاهـل التمجيـد وافي الخصايـل
قلت الصحيح ومن يعرفه شواهيد *** مـا قـيـل عـنـه يـسـبـب نـكـايــــل
يسعى لفعل الخيـر مـابـه تصاديـد *** ذكـره غـيـري والـحـقـايـق دلايـل
بـك افـتخـر يالخـال وازيـد واعيـد *** عـبـدالـلـه الـعـبـار لـلـنـعـم نـايـل
الشاعر موسى بن عيسى الجذيان الجذع الشميلاني اهدى لي هذه الأبيات
الجزله وهو رجل جزل قالها مجاراة لأحد قصائدي القديمه التي نشر منها
مقطع في التويتر والذي منها قولي : 1598
أوصيـك لا تـزرع جـمايلك بغـلـيس *** ينكرك لو كثّر على خشمك البوس
وهذه أبيات الأخ موسى :
تبـقى يا أبـن عـبـار فـوق المقاييس *** وتبقى مع الشعّار معجـم وقاموس
ولك هاجس ما صار بين الهواجيس *** ما يعتلي فوقه ولا جنس هاجوس
لا صار يبرك لك على ركـبـه إبليس *** ماهمّك الـلي من ورا الجن ملبوس
من سبّت اشعارك تهيج الأحاسيس *** ومن النعاره والسّطر تنطح الروس
وتحـطـم حصون وتـفـك المحابيس *** ومن الخـيـال تخـلي الشي ملمـوس
وش آخـر الـلي مدونه بالقراطيس *** نـبي انتعـلم منكـم اعـلـوم وادروس
وقال أبو أنور الشمري هذه الأبيات عبر توتر مجاراة للمقاطع المنشوره أعلاه يقول : 1599
ربـعي طـنـايـا وافـتخـر بالسنـاعـيـس *** وسـلام لـلـويـلان مـن راس سنـعـوس
أنـت الأديـب ابـن الأدب والـكـراريـس *** واللي جهل مـن عـلمكـم يـأخـذ دروس
تبقى الجبل راسي وصعب التضاريس *** تبـطي عـظم ما غـيـرت شامخ الروس
تبـقى عـلـم شـامـخ شمـوخ القرانيس *** واكـبـر ظـلام اخـفـاه نـور الـفـوانـيس
وقول الشاعر محدى الهبداني الذي اشرت له هو :
يا حليس نظـرات الجـفـا تطـرف العيـن *** شوف البغيض بنونها تقل مشهاب
يا حليس وأن ما شفت أنا شايف شين *** اشـوف نـاس قـوم بهـدوم الأصحاب
نـاس تـشيـل البغـض مـاهـم خـفـيـين *** القـلـب فـيـه الـريـب لـو يضحك الناب
عـنـهـم تـنحـوا يـا قـلـوب البـعـاريـن *** عـن ديـرة الأقـراب روحـوا للأجـنـاب
أما الرجلين الذين اشرت لهم فهم هديس بن صبر بن دخين العريفي من الكرماء
المشهورين ومن الحكماء المعروفين في قبيلة السبعة خاصه وفي قبائل عنزة عامة
ويعرفون كرمه وعفته وشهامته الكثير من الأجناب أما رشيد فهو رشيد بن مطر
الممرح أبن موينع من حمايل السبعة وهو رجل حكيم وبعيد نظر ويرى بعين الحقيقة
ولا تاخذه بالحق لومة لائمقال الشاعر عبدالعزيز بن إبراهيم المسيحل هذه القصيدة
يثني على جهد زميله عبدالله بن دهيمش بن عبار : 1600
يـا سلام الـلـه عـدد وبـل الغمـام *** وعــدد بـراق تـلألأ بـالـمـخـيـل
ياصـل الـلي لـه معـزه واحـتـرام *** راعـي الجزلات والفعـل النبيـل
ابـن عـبـار الـكـريـم ابـن الكـرام *** الحشيم الجـزل كسّاب الجـميـل
الأديـب الـبـاحـث الـفـذ الـهـمـام *** الـمـؤرخ عـد نـبـعـه سـلسبـيـل
هـمـتـه عـلـيـا ولا دوّر حـطـــام *** لأجـل ربعـه شايل الحمل الثقيل
مجتهـد فـي مقصده شـد الحـزام *** مـا تـوانـا وقـال شـي مستحيـل
مضى وقته دوم يسعى كـل عـام *** ليـن وثـق كـل بـحـث بـالـدلـيـل
وثـق الأنسـاب خـبـره واهـتمـام *** وسجّـل الأجيال جيـل بعـد جيـل
يا أبـو مشعل دايـماً سـر للإمـام *** زاد حبـل الـود واثمـر بالحصيل
الشجـرة تنسيقها واضـح تـمـام *** واضح المجهود ماجاء له مثيل
يعتبر جهدك على صدرك وسام *** مااختلف فيك التواضع يالأصيل
يعجـز التعبير عـن نـظـم الكـلام *** للوفاء لك ياعسى عمرك طويل
وبختصرها بـدعوة قبـل الختـام *** يا عساك بحفـظ مـولانـا الوكيل
والعـذر ثـم السموحـه والسّـلام *** وفي أمان الـلـه والمولى الجليل
قال عبدالله بن دهيمش بن عبار هذه القصيدة جواب لقصيدة الشاعر عبدالعزيز بن إبراهيم المسيحل :
بـسـم رب الـكـون خـلاّق الأنــام *** مـن روابع خاطري نظّمت قيـل
رد أبن إبـراهيـم سجّـلتـه شمـام *** جـاه عجل الرد والشكر الجزيل
مرحبـا بـعـداد مـن لبس الحرام *** وعـد ما شدوا على البيدا رحيل
ومرحبـا بـعـدد من صلّى وصام *** وطاف باللي شادها نجل الخليل
يـا عـبـدالـعـزيـز عـداك الـمـلام *** الثنـاء والمـدح فـي حـقّـك قليـل
عـزوتـك بالكون يحمود الجهـام *** بالقنا والرّمح والسيف الصقيل
لـو تكون ارواحهم تذهـب عـدام *** بالـوغى يهـدونها دون الدخيـل
ماشقيت بوصف مردوع الوشام *** زاهي الهندام والخصر النحيـل
التـوّلـع يا أبـن مسيحل والغـرام *** في مفاخـر لابتي ريـف الهزيل
أكـتـب ولا هـمني خطـو الخمـام *** السفيه وصاحب العـقـل الضليل
من يكـن الحسد لـه قصد ومرام *** في ضميره ران مع غـل وغليل
حشمتي يا مسندي عند الحشام *** والـردي كوبـان ماني لـه عميل
التعـبّـث بالنسـب عـيـب وحـرام *** ولا رضي بالهون لكـود الذليـل
لـو حطـونا بالنسب خلفة هشام *** في نسب عـنـاز مـا نقبـل بـديـل
وقال عبدالعزيز بن إبراهيم المسيحل هذه القصيدة رد على زميله
عبدالله بن دهيمش بن عبار للمّره الثانيه : 1601
مرحبـا بـرد الكـريميـن الحشـام *** عـد مـزنـن هـل وسيولـه تسيل
وعد زهرالروض وعداد الخزام *** وعـد ما يحنى من ثـمار النخيل
يا ابو مشعل العفو يا أبن الكرام *** ذا تواضع منك ياراعي الجميل
أنـت راعي الأولـه فـوق السنام *** من ثمـار جهودك الباحث يشيل
ردك ابقيته عـلى صدري وسـام *** افتخر به في المجالس والسبيل
وأنت ابيض وجه جودت الزمام *** والصلايب مالهـا غـيـر الأصيل
كل قصدي من وراء نظم الكلام *** اشكرك والشّكر في حقّـك قـليل
واجـبـي اشكـر رفيعـيـن المقـام *** اهـل حلـم وعـلـم والخلق النبيل
مثـلـك وشـرواك يالحـر القـطـام *** يا عـريب الجـد يـا عـز النـزيـل
ومـن تـولـّع مثـلك أبـد مـا يـلام *** لابـتـك افعـالهـم تـشفي الغـلـيـل
من نصاهم عـز والـلـه ما يظام *** ربـعـك الـويـلان أهـل مد جزيـل
والعرب تدري بقصدك والمرام *** ذاع صيتـك كالفـراهيـدي خـليـل
وصدق جهدك بدد غبار وعسام *** وعـادة المصباح للظلمه يـزيـل
وفي أمان الـلي عيونه ما تـنـام *** الكـريـم الـواحـد الـرّب الكـفـيـل
قال عبدالله بن دهيمش بن عبار هذه القصيدى جواب لقصيدة الشاعر
عبدالعزيز بن إبراهيم المسيحل للمّره الثانيه : 1602
راكـب الـلـي يشبه لربـد الـنعـام *** صابها من طلقت الرامي جفيـل
أو كما الصيرم ليا شاف الحمام *** مـن شفقته حادها عـقب المقيل
لـه ثـلاث أيـام مـا ذاق الـطـعــام *** زاد كونه وأرتكى بالجهد حـيـل
حين ما سمعت رفيفه يـوم حـام *** صوتها من خوفها نوح وهديـل
جيـب يكفي كـان كلّـف بالمهـام *** من مصانع طوكيوا آخـر مـديـل
جهـز الفكسار وأركب يـا غـلام *** جيب توه جيب من شركة جميل
يمشي من العاصمه قبل الظـلام *** سـار للطـايـف ولا يـبغـي دلـيـل
يوصل الـلي بالمكارم لـه نـظـام *** أبن مسيحل ستر نقاّض الجديل
أبن مسيحل دلته تجـلي الوخـام *** في دلاله نصف بن ونصف هيل
والمفـطّح حيـن تـلـفي لـك يـدام *** يـذبـح الجـزلات مـا كـفّـه بخيـل
مـن قبيلـه مـا تحـورف بنهـزام *** تـرسـي اليـا ثـار مقباس الفتيـل
بني وايل لا غشى البيدا العسام *** بالمعامع والمطـارد فـوق خـيـل
بالـوغى لاصار بالجـمع التحـام *** مـن يـلاقي جمعهم يجـدع قتيـل
بالذي يشظف صماصيم العظام *** الحـدب يقطع جـلامـد من يعـيـل
قال عبدالعزيز بن إبراهيم المسيحل هذه القصيدة رد على قصيدة
عبدالله بن دهيمش بن عبار : 1603
مـرحـبـا بـأبـيـات مـن جـزل الـكـلام *** مـن مشـاعـر شـاعـٍر مـالـه مـثيـل
صـيـرمـي ولا يـجـارى لـيـن حــــام *** غـبـٍة مـن طـبـهـا يـرجـع كـلـيـــــل
وصلـت مـن العاصمـه قـبـل الظـلام *** طـيـبـهـا الـفـواح سـابـقـهـا بـمـيـل
اطيب من العـود وأزكى من الخـزام *** ساقهـا الذعـذاع مع شمس الأصيل
صـافـيـات وكـنـهـا قـرح الـجــمـــام *** زاكـيـات وسـايـقـات الـسـلـسبـيــل
كــافــيــات ووافــيــات بــالــتــمـــام *** خـالصـات وجـزلـةٍ تـروي الغـلـيـل
كـيّـف بـهـا الـفـكـر كـيـف واستقـام *** كـيـف دلـة زعــفــران وبـن هــيــل
شـاش راسي من معـانيهـا العـظـام *** كـل بـيـتٍ يـجـلـي الـهـم ويــزيـــــل
لازم أن الـرد يـاصـل لـه اشــمــــام *** الـشـكـر مـمـدوح مـع رد الـجـمـيـل
يا هـجـوس الفـكـر تـدريـن الـمـرام *** استـعـدي وهـاتـي المعـنـا الجـزيـل
يـا نـديـبـي طـلـبـتـي كـثـر اهـتـمـام *** انـهـج وجـب مـوتـر ثـانـي بــديـــل
جـيـب لـكـزس مـا بـعـد طـوّل مقـام *** وارد الـيـابـان جــاي مـن الـوكـيـل
لـونـه ابـيـض لا مشى وسط العتـام *** يـشـدا لـبـرق بـرق وسـط المخـيـل
يسري تالي الليل من قبل الأزدحـام *** وجهـتـه للعاصمه حـول ألـف كـيـل
بـالـمـشـاعـر والـتـحـيـه والـســـلام *** مـسـتـمـر ولا يـحـيـد ولا يـمـيـــــل
ياصـل لساس الأدب عـالـي المـقـام *** كـاسـب النـومـاس بالفـعـل الـنبـيـل
ابـن عـبـار الـحـشيـم أبـن الحـشـام *** اشهـر مـن الـنـار بالضلـع الطـويـل
الأديـب الـلـي بــنـا صـروح جـسـام *** شـادهـا بـالعـلـم تـبـقـى لـكـل جـيـل
حـكـمـه وتـاريـخ وأنـسـاب بـنـظـام *** مـع مـفـاخـر قـوم يحـمون الـدخيـل
والشـعـر لـبـحـوره امـواج الـتـطـام *** مـنتـدى مـوسوعه واخـبـار ودليـل
بـه طـمـوح وصـلـة فـوق الـغـمـــام *** بـه أراده مـا يـعـرف الـمـستـحـيـل
رايـتـه بـيـضـاء وعــداه الــمـــــلام *** بـه نـزاهـه مـعـدنـه مـعـدن اصـيـل
مـن سـجـايـاه الـتـواضـع بـانسجـام *** وفـيـه ليـن وحـزم ضـد الـلي يعيـل
ومـن سـجـايـاه الـكـرم ابـن الـكـرام *** ومـن سجاياه الصخّى وذبـاح حيـل
مـا ذكـر مـن سـيـرتـه قـدر الجـرام *** سـيـره تـشّـرف لـهـا وزن ثـقـيــــل
اثـقـل مـن سـاق وطـميه مع سنـام *** سيـرتـه عـطـره مع العـلـم الفـضيـل
اهـل لـلـتـقـديـر واهـل الأحـتـــــرام *** ذاك ابـو مشعـل ونـفخـر بـه زمـيـل
وأسـأل الـلـه حـامي البـيت الحـرام *** يحـفظـه بالحـل وايضـا وبـالـرحيـل
قال الشاعر عبدالله بن شتوي الأكلبي يثني على الشيخ سلطان بن خالد مهيد : 1604
انا من الجنوب وشاقني موقـف الصنـديـد
وتشجعـت فـي فـعـل مـن الشيـخ للـقـاده
بحـدود الشمال ومطـلبـه واضـح ومـفـيـد
طـلـب مـن ولـي العهـد مـا كـان معـتـاده
هـمّه ربـعـه الـلي مـا شملهم نظـام القـيـد
بـدون ويـبـي تـصحـيـح لآبـاه واحـفـاده
هـذا مـوقـف مـاهـو بـعـادي ولا تـمـهـيـد
ومـحـمـد لا قـال يـحـقـق مـنـاه ومـــراده
مايطلب رصيد فلوس ربعـه هـم الرصيـد
عسى الـلـه يبيّض وجـه قـايله واجـهـاده
وتنشدت من هو قيل سلطان نسل مهـيـد
وصحيح الفعـل مـا يصلـح ألا من اسيـاده
سلايـل منـادي بالعـشا في زمـان الجـيـد
يـوم الفعـل محـدود عـلى الكفـو واحـفـاده
تـردد ذكـر راعـيـه عـبـر الفـضـا تـرديـد
ولا زال ذكـره عـبـر الأجـيـال لـلـســـــاده
يا خالـد ولـد رافـع امـانـه مـعـك واعـيـد
بـلـغ شـكـر ابـو مـتـعـب لسطان وانشـاده
هـذا هـو صحيـح الشيخ يستاهل التمجيد
يـعـد النعـم فـي صانـع الطـيـب وامـجـاده
جواب عبدالله بن دهيمش بن عبار مجاراه لقصيدة الشاعر عبدالله شتوي الأكلبي : 1605
من أقصى جنـوب المملكه نسمع التغريـد
مـن الـقـرم الـلي بـيشـه مـرابـيه وبـلاده
شاعـر ومن أكلب عن الموجبه مـا يحيـد
عـبـدالـلـه الشتـوي جـزيـل الشعـر جـاده
عـنـزة وبـني أكـلـب لـهـم بالنسب تـأكيـد
قـرايـب كـمـا وضّـح الـتـاريـخ بـاسـنــاده
سـلايـل ربـيـعـه نـسـل نـزاز بـالـتـحـديـد
قـبـايـل عـريـقـه والـمـكـارم لـهـم عـــاده
بـني عـمـنـا أكـلـب الـيـا دوبـح الـرعـديـد
بعـصـر المعـامع والـوغـى يـقـدح زنـاده
زمـانٍ مضى يرسون أكلـب سوات الحيـد
زبـون الـطـريـح الـلـي تعثّر به جـواده
أبااشكرك ياللي تشيد في موقف ابن مهيد
حـفيـد الـكريـم الـلي يصـوّت عـلـى زاده
قـديـم الفخـر سلطـان عـاد الفخـر تجـديـد
أمــجــاد الـجــدود يــورثـــه جــد لأولاده
الشيخ أجهـد لـربعـه لـعـل يحصل تعـميـد
مـن الـلي يهمـه فرحـت الشّعـب واسعاده
لقـاء الشيخ بمحـمـد يشابـه نـهـار العـيـد
محـمـد أمـلـنـا يحـفـظـه محـصي عـبـاده
يتبع
آخر تعديل عبدالله بن عبار يوم 07-12-2022 في 06:37 PM.
|