تابع
قال مفضي بن علي العنزي هذه القصيدة يسند على عبدالله بن عبار : 1394
سـار القـلم بـالـغـصـب مـا نستشيره *** من راس كاتب واحتوى كـل مكتوب
سـوالـفـن تـكـتـب بـعـلـم وبـصـيــره *** عنهـا قليل العـرف مـا زال محجوب
الا عـلـى الأجـواد مـاهـي عـسـيــره *** قـبـلي لـقـوا بالحـانهـا كـل مطـلـوب
لاصـار مـا سـابـقـك حـمـرا نـظـيـره *** لا تسابـق العـجلات وتصير مغـلوب
سيـف المعـاني نسحبـه مـن جـفيره *** هـز المصقّل والعـب القـاف باسلوب
مـعـنـا عـلـى درب القـوافـل خبـيـره *** عـبـدالـلـه الـعـبـار يـا حـي منسـوب
هـامـات شـعـره بـالأشـاده جــديــره *** أخـذ وسـامـه مـن مقـاديـم وشعـوب
لو يستحي شعـر العرب من عشيره *** نـوخ ركابـه عـنـد راعـيـه مـرعـوب
هـو سيـده هـو صاحبـه هـو مديـره *** الـوافـي الـلي عـنـد الأجـواد محبوب
جـانـي سـؤال وصـار بالعقـل حيـره *** وعلم قريته من على النت مسحوب
مـن طييب مبـدا يا نضـاف الشريره *** نـجـيــب ونـعـلـم بـلا بـحـث مـتعـوب
رد عبدالله بن عبار على الشاعر مفضي بن علي العنزي : 1395
حـي اللبـيـب الـلي اليـا جـيـب سيـره *** بالمـرجلـه يمـدح ولا قيـل مسبـوب
أبـن عـلـي عـنـده حـمـيـه وغــيـــره *** رب الـمـلأ يحميـه من كـل عـذروب
مـن عـزوتـن لـهـم دخــالـه وجـيـره *** شجعان جانبهم على الدوم مرهـوب
ربــعــه ضـنــا عـنـاز فـي كـل ديـره *** عبـيـد وعـمارات وجـلاس ووهـوب
مـار الـزمـان الـيـوم غــيّـر مسـيـره *** كمـا ترى يا مفضي الوضع مقـلـوب
الــكــل يـكــتـب والـوسـايـل كـثـيـره *** وكثـر الخطـأ مابين ناسب ومنسوب
يـا أبـن عـلي يـاعـل بـالأمـر خـيـره *** والحمـد لـلـه بـيـرق الـعـز منصـوب
الحـسـد ولّـع بـالـضمـايـر سـعـيـره *** يـشب فـي جـوف الحـواسيـد لاهـوب
عـنـدك خبـر يالقـرم خطـو العثيـره *** يـدور بـالـصاحـب خـمـالات وعـيـوب
ماله مـواقـف كـان عـميت مـطيـره *** واليـوم ضـدي صـار لـلربـع مـنـدوب
يضحك على أصحاب العقول الغريره *** حـتّى بـنسبنا صـار يالقـرم ملعـوب
رد مفضي بن علي للمرّه الثانيه يسند على زميله عبدالله بن عبار : 1396
يا سهيـل مـا تـنكـرك كـل الجزيـره *** قحطان والعتبان ومطيـر وحـروب
وعـيـال وايـل كـل حـيـّن وديـــــره *** اسمك يدرس بأوسط الكتب مكتوب
الـوايلي بالطيب مـا احـدن خشيره *** وجـناب عنتر ما بلش وين شيبوب
مـن دون وايـل مـا تهـاب العسيره *** بلسان صـدق تستـرد حـق مسلـوب
مـواقـفـك رايـات طـيـب شـهـيــره *** تحـمـل وقـار وبـين الأجواد مهيوب
النـاس تسـعى بالأ مـور الخطيـره *** والناجح المشهور حطوا به عـيوب
رد عبدالله بن عبار على أبيات الأخ مفضي بن علي : 1397
جـانـي قـرايـض كـنــهـا نـقـد نـيــره *** مثل الذهب من معـدنه تـو مسكوب
يصوغها مفضي عسى الـله يجـيـره *** الـفـاهـم الـلي يـفـتهـم كـل مـاجـوب
يـفـداك الـلي حـاول يـقـود الجـريـره *** ضدي ولكن ما مسيره عـلى صـوب
خـطـو السفيه الـلي علومـه حقيـره *** يهرف هريف اللي من الغلث مكلوب
مـانـي بـحـال الـلـي يـغــرّه شويـره *** فـنجـال مـن يلعب بالأنساب مشروب
وأن أحتـمى لـفـح السموم وهـجيـره *** حكـامنـا يـذرون عـن لاهـب الشوب
وقال الشاعر فايز بن عواد الهبداني الجعفري يسند على عبدالله بن عبار : 1398
يا مـرحبـا ترحيبه اوضح مـن البـرق *** لالاح فـي عــرض الـمــزون وتـلالا
يلمع من الغربي ويـركـز اليـا الشرق *** فـي قـدرة الـوالـي عـزيـز الـجـــلالا
واعداد ماغرد على الغصن من ورق *** واعـداد مـا حالـوا جـنـوب وشـمـالا
تصرف مثل مايصرف الشيك للزّرق *** فـي شـاعــر لـلـمــجــد والـعــز نــالا
احرق كبود اهل الحسد والخبث حرق *** واثـبـت وجـوده بـالبـيـوت الـجـزالا
مـثـّـل بـنـي وايـل ولا يـقـبـل الـّدرق *** مـثـّل بــنـي وايــل عـلـيــه الـمــقــالا
وراعي الحسد لابـد يـطق بـه عرق *** مـن هيبتـك مـا انـتـه قـصيـر الحـبـالا
والطيب وهبـه وابـن عبار به فرق *** كـامــل ولــلــه الــكــريــم والــكــمـالا
قال عبدالله بن عبار جواب لقصيدة الشاعر فايز بن عواد الهبداني : 1399
حـي الجواب اللي لفـاني عـلى طـرق *** يـعـجـب بـه الـلـي لـلـمعـانـي تـمـالا
من قاف شاعـر عادتـه يكـره القـرق *** فـايــز عــســاه بـحــفـظ ربـي تـعـالا
تـكـويـن طـبـعـه للـعـلا قـال لـه أرق *** أصـعـد شـوامـخ عـالـيـات الـجـبـــالا
من عـزوةٍ يـوم الحمر ينهرق هرق *** عـن نـصـرة المضيوم مـاهـم كسـالا
كانوا بعصر السلب والنهب والسرق *** عـلـى الـذي يجـهـل عـليـهـم جـهـالا
ويـوم الشـلافي بالمناحـر لـهـا زرق *** صـالـوا عـلـى عـدوانـهـم بـحـتـمـالا
وأن شهّبت غبر السنين وغدت برق *** وشـح الـمكـيـل وجـور بـقـعـا تــوالا
الضيـف مـا يـمـرق اليـا مرهـم مرق *** يـلقـا الـقـرى والهيـل وسـط الـدلالا
وقال فايز بن عواد الهبداني هذه الأبيات يثني على عبدالله بن عبار : 1400
يـالـوايـلـي مـا يـلـحــقـك شـك مـنـا *** حـنـا بـصـفـك مـا جحـدنا المعاريف
ولا الـردي لــوهــو تــبــيـن وكـنّــا *** مـالـه عـن المطلاع ذب المشاريـف
انــت الـدفـاع وسـيـفـنـا يـوم سـنــا *** وغيرك يسولف بالفعايـل ولا شيف
وقــفـت وقــفــت شـاعـر مـا تـونــا *** وجمعت ربعك من جميع الأطاريـف
ومجـدت قـبـايـل لـهـا النـصـر غـنـا *** منهم عقاب الخيل بالرمح والسيف
قـلـت وذكـرت أفـعـال زبـن المجـنـا *** وثـنيت دون عيال وايل عن الحيف
كــتـبـت بـالـواقـع ودافـعــت عــنــا *** والـلي نـوى يجحدك مـالـه مواقيف
يقصر عن الجـزلـه وشعـر المـعـنـا *** لـو يلبس بشوت العرب كلها زيـف
انــت الـمــؤرخ والأديــب الـمــكـنـا *** لـولاك ضاع الحق جـملة وتصنيف
قال عبدالله بن عبار جواب لأبيات الشاعر فايز بن عواد الهبداني : 1401
سـار القـلـم حـال الطـلـب مـا تـونـا *** وبدأ يصف حروف الأبيات تصفيف
يكـتـب جـواب الـلـي بـيـوتـه لـفـنـا *** الجـعـفـري فـايـز فـداه الـمـلاقـيــف
مـنـذ الـقـدم يـالـقـرم أنـتـم وحــنــا *** مـا فـرقـونـا يـالـزمـيـل الـهـذالـيـف
نـرعـى قـفـر وديـان ديـرة مـهـنــا *** ونحيل من دار الحويقه اليا طـريـف
وأرض القفر لـو كان ماهي وطـنا *** نرعّى بها بحدب السيوف المهاديف
حـتّى بـديـار الـروم دوّج ضـعـنـــا *** مبطي لك الله نـرهب الخصم ونخيف
والـيـوم بـفـلـل وعـمـايـر سـكــنــا *** مانشعر ابرد الشتاء ولاهب الصيف
لـكـن بـلـشـنـا بـشـامـنـا مـع يـمـنا *** الحـرب فـتـنـه والـزمن له تصاريف
كـل الـبـلاوي مـن هـل الـشـر جـنا *** الفـرس والـلي يروجـون الأراجيـف
قال الشاعر فايز عواد بن ساكر الهبداني هذه القصيدة يسند
على عبدالله بن دهيمش بن عبار : 1402
سـلام تـسلـيـم يـخـصـك ويـاصــلـك *** أهديت لك صادق مشاعر واحاسيس
يامن عـلى القمّـه شموخـك ومنزلك *** نـاجح ومتـفـرّد بـشـتّـى المقـايـيس
وشلون نجهـل يا أبو مشعل فعايلك *** وأنت الذي من أسس المجد تأسيس
سطـرت مجـدآٍ مـن نـوادر جـزايلك *** وجهـدك مـع الويـلان جهـد بلا قيس
لاعاش من هـو يا أبن عبار يخذلك *** من ينكـر المعروف هيس ولـد هيس
مـتـجـمّـل ورب المخـالـيـق جمّلـك *** وشعـرك يدّرس بيـن الأجيال تدريس
عن عـزوتك دافعت كيف انتجاهلك *** يوم أن غـيـرك صار خلف الكواليس
مثـل الجبل ثابت ولا أحدن بمزملك *** ظهـرت يـومن حضرت ساعة إبليس
وصوبت ذيب الضلع من قبل ياكلك *** وربعـت فـي قـفـٍر مـربّـع ولا ديــس
والـلي عـلى قـلّـة معـرفـه يطـاولـك *** لا ضاهر بفـزعـه ولا مرخي الكيس
لا واصلـن فـعـلـك ولاهـو بـواصلك *** تـكـرم وتـبقـى يـا بـعـيـد المـراميس
وحـنـا بـصـفـك مـا دفـنـا جـمـايـلك *** تـبى لـنـا النوماس يا أبـو النواميس
ودون السميّـه مـا لحـقـنـا فضايلـك *** نـور القمـر مـاهـو شبيـه الفـوانيس
قال عبدالله بن دهيمش بن عبار هذه القصيدة مجاراه لقصيدة
الشاعر فايز بن عواد بن ساكر الهبداني : 1403
مـبـداي باسمـك يالولي مالـك الملـك *** يامن حفظت بقدرتك نوح وأدريس
وبـعـد ذكـر رب الملأ مجـري الفلـك *** موحي دبيـب الـذّر فـوق الطعاميس
يالفـكـر عـبّـر مـن قـرايـض مثايلـك *** وأكتب جـوابي واحفظه بالكراريس
يا شعـر أبـن عـواد يـا حي مـرسلك *** فـايـز سليل المجـد من نسل فـريّس
الـوافـي الـلي سـمـعـتـه مـا تـفشلك *** عـسى فـداه المخـبـثيـن المنـاحـيس
مـن لفـظ منطوقـك عـرفـنا خصايلك *** صادق ولا عـنـدك تـمـلّـق وتـدليس
ورثـت مـن جـدّك وخـالـك مـراجلـك *** يجذبك مجذب عـزوتك مابهم سيس
يا فـايـز العـواد يالـقـرم أبـي أسألك *** وش مقصد الـلي يولعوّن المقابيس
كيف أصبح لحوم الخلايق تقـل علك *** بـه نـاس تغـرز بالضهور الدبابيس
كـان افتكـرت بـواقـع النـاس تشغلك *** وتـزيـد هـمّـك والغـثـا والهـواجيس
عـلـيـك بالـلي بالصـراحـه يـعـامـلك *** ولا أهـل الضحكـه تـراهـم حمالـيس
عـلـيـك بـالـلي بالمشـاعـر يـبـادلـك *** الـلي لرضاك يكـرّس الجهـد تكريس
الـلي ولـو تخـطي عـلـيـه ايـتحملك *** ولـو تاصفه بالحلم يشبه لأبن قـيس
وقال الشاعر فايز بن عواد الهبداني هذه القصيدة رد على قصيدة عبدالله بن دهيمش بن عبار : 1404
يــالـلـه يـالـلـي كـل خـلـقــك تـأمـلـك *** بـأمـرك وتصريفك تـهـب النسانيس
عـفوك وغفرانك من الموقف الهلك *** وحفظك من دروب العنا والعواكيس
ومن بعد ذكرك هاجس الشعر جاعلك *** تظهر بيوتن جوف صدري محابيس
مـن يـوم مـن هـداج تـيمـا منـاهـلـك *** بـقـيّـس الأمعـنـا والأوزان تـقـييـس
قـافـن لأبـو مشعـل لـفـاني ومجملـك *** طلعني لصوب الـنجـوم المـراويـس
بالطـيـب والشعـر الحقيـقي معـاملك *** لو كان كثر اهل الدبش والعواسيس
ويامن عـلى سطح المجـرّه مداهلـك *** مجدك رسا بالقاع مرسا التضاريس
وبعض العباد اصغر ترى من تخيّلك *** يلعب بهـا الشيطان لعـب القراطيس
راعـي النقـيـلـي دايـمـاً مـا يـقـابلـك *** كـنـك عـلى كـبـده تـحـط المحـاميس
فـرق البشر واضح كما فرق أناملك *** تلقابـهـا العـاقـل وتـلـقى المـلاحيس
وأن دارت الدنيـا كـما دورت السلـك *** تظهـر لـك العـقـال وقـت المتـاريس
قال عبدالله بن دهيمش بن عبار هذه القصيدة جواب لقصيدة الشاعر
فايز بن عواد الهبداني : 1405
جـتـنـي يـا أبـن عـواد رسالـتـك تـلـك *** يالصيرم الـلي من فروخ القرانيس
لـي الشرف أرسل مـردّك ولا اهملـك *** وأشكر جنابك يا نسل مرذي العيس
جـادلـت يا طـيـر السعـد من يجادلـك *** حـتّى خرسّت الـلي يسبّون تخـريس
الـلي مـهـاجـيـهـم تـغـثـّك وتـزعـلـك *** مقصودهم لعـروض الأجواد تدنيس
مـا ودي أن هـروج الأنـذال تـبحـلـك *** أبـشـر تـراهـم يـالسنـافي مـفـالـيس
يالجعـفـري مـفـعـول ربـعـك يـأهـلـك *** تـفـخـر بـهـم يـوم النواظـر معابيس
أفـعـالهـم فـوق السماكـيـن تـشهـلـك *** عـن طيبهم أنشـد رجـال السناعيس
يالـلي خفاك الجعفري ول مـا أجهلك *** حـميتـه مـاهـي هـقـاوي وتـوهـيس
أن جـيـت بـيـتـه بـالـونـاسـه يعـلـلـك *** وتـلقى الـذبايـح بالصياني مفـانيس
بالقـيـض عـن حـر القـوايـل يضللـك *** شجـاع وبـفعـل الكـرم يـشبـه منيس
عسى الولي بالعطف واللّطف يشملك *** قافك عن الخاطـر يـزيـل التعاميس
قال الشاعر فايز عواد الهبداني هذه الأبيات يثني على عبدالله بن دهيمش بن عبار : 1406
فخـر عنزة ماهو من الأمس واليـوم *** هـذا أبو مشعل جعل تبطي سنينه
سيف على العدوان صارم ومسموم *** الـلي اليـاحـان اللـقـاء خـابـريـنـه
مـا تـلـحـقـه شـكّـة ولا يـلحـقـه لـوم *** لو كثّروا بعض الحجج مغرضينه
الـحـر يـكـفـخ بالجـنـاحـيـن ويـحـوم *** والبـوم مـالـه عنـد الأحـرار عينه
قال عبدالله بن دهيمش بن عبار هذه الأبيات يشكر الشاعر فايز بن عواد الهبداني : 1407
يا حـي قـرم مـن الهبـاديـن شغمـوم *** فـايـز تـلفّـظ فـي مـعـاني سـمـيـنـه
أطـلـب عسى رب المـلأ دايـم الـدوم *** يـكـفـيـه شـر اعـداه مـع حـاسدينـه
أثـنـى عـليـه طـيّـب السـاس بعـلـوم *** أبـيـات مـن منـظـوم شعـره ثمـينـه
وأسباب قولـه قـرم من مارث قروم *** سـعـد الـلي بالطيـب طـالـت يمـينـه
قال الشاعر خلف نزال القرش : 1408
تـكـريـم ابـن عـبـار حــق اواجـــب *** عـلى القبيله يا رجـال المـواجـيـب
مـن الـف الـتـاريـخ حـقـه بـيـاجـب *** وشاعر قبيله لا عوى الذيب للذيب
يستاهـل التكـريم ورفـع الحـواجـب *** الشاعـر الـلي يرتب الهـرج ترتيب
ثـنـا لـهـا يـوم انـهـا بـالـمـنـاجــــب *** يـوم الـرسايـل والقـصايـد مناجيب
الجواب على أبيات الأخ خلف نزال القرش مع التحيه : 1409
جـاني جـواب لـمـن تـمـالاه عـاجـب *** من نظـم شاعـر عـادته يدرك الطيب
قافـه غـزر مـاهـو نضيح الجـراجـب *** مـن ريهجان الجم عـذب المشاريب
خـلـف راعـي الملحا لشرواه ناجـب *** حـيثه من الـلي ينطحون المصاعيب
القرم الـلي لمحـرّف الأصـل شاجـب *** دقـق وشاف الفرق عـقب التجاريب
وقال حسين بن محمد الشملاني من اهل الفويلق : 1410
يا حي هاصوره ويا حي هالعـرض *** يا أعـز واغلا كل عرض وصوره
صورتها بالطول وصورتها عرض *** درع القبـيلـه بالمـحـافـل وسـوره
مواقفك يشهد لها من وطأ الأرض *** دون القبـيـلـة مـن قـديـم مخبـوره
راوي ومتعلم وشاعـر فحل ورض *** وموج البحـر مـا هيبك عن عبوره
جواب عبدالله بن عبار رداً على حسين بن محمد الشملاني : 1411
يا حسين رد القافـيـه يعـتبر فـرض *** شـرواك نشكـر يالسنـافـي شـعـوره
الطيب مابين العـرب كـنـه القـرض *** والمـرجلـه يا حـسيـن كـلـن يـدوره
يـنـالهـا شرواك لـو دونهـا حـرض *** حيثـك تـعـد مـن الـرجـال الصـبـوره
لاشك بعـض الناس بقلوبها مرض *** نـعـوذ بـخـلاق الـمـلأ مـن شـــروره
قال علي الجليدان الشميلاني هذه الأبيات يثني على عبدالله بن عبار : 1412
هـديـتـك مـا تـنـسي يا ابـن عـبـار *** وأظنها والـلـه من أردى هـداويـك
الـلـه يفكك من صواديف الأخـطار *** كـل القبـيـلـه دايـمـاً تـفتـخـر فـيـك
زوداً عـلى طيـبـك بالأشعار بيطار *** بالفهـم والحكـمـة تـنظـّم مـبـاديـك
نطلب من المعبود جلاب الأمـطـار *** عـلى طـريـق الخير مولاي يهديك
وصـلاة ربـي عـد مـا طـايـر طـار *** عـلى النبي الهـاشمي دون تشكيك
جواب عبدالله بن دهيمش بن عبار على ابيات علي الجليدان : 1413
يا مـرحبـا حيـيـت يا مـكـرم الجـار *** يا عـلي بن جـليـدان ربي يحييـك
شرواك يشفق للسوالف والأخبـار *** وكتب القبيله تعتبرها كـما الشيك
أنساب حمران النواظـر والأزهـار *** ومجد ونسب عـناز يالقـرم يعنيك
وديواني اللي كل مضمونه اشعار *** قـرايـضه كـانـك قـريـتـه تـسلـيـك
والخاتمـه أشكـرك يا طـيّـب الكـار *** ياعل ربي الله يابن الأجواد يبقيك
قال محمد بن رويضان الدهمشي هذه القصيدة يسند على زميله عبدالله بن دهيمش بن عبار : 1414
حي ابو مشعل حي وافي السلومي *** تـحــيـة فـيـهـا الـعــلـوم اتـطــرى
شاعـر بـني وايـل قـوي العـزومي *** من لابـة الفـدعان ساس المقـّرى
صـيتـه تعـّلى فـوق حـد النجـومـي *** بالعرف محدن في حضوره تجرى
ألا يـا ابـن عـبـار جـتـكـم عـلـومي *** عـلوم قـلـب شاف منهـا المضّرى
مـقـابـل الـديـره يجـيـب الهـمومي *** الـلي على المقناص شبل مضّرى
تـلـقـاه مـثـل الحـر دايـم يحـومـي *** وعـن مجلس الخايب يحب يتورى
الـلي يعـذرب بالـرجـال القـرومي *** باهـل القنـص والبـر قـام ايـتزرى
مـاسـر بـالـه طـيـبـات الـسلـومي *** والـيـا حـكـا ما جـاب عـلـم يسرى
هـذاك والـلـه فـيـه مـالي لـزومي *** الـيـا جـلـس داخـل تشطرت بـّرى
يا عـل مثـلـه بالعـرب مـا يـدومي *** غـيـر الفـلس بمقـابـلـه لا تحـرى
عبرت لـك عـن واقـع شبه يومي *** هـواجس تـطـري عـلـي وتطـرى
قال عبدالله بن دهيمش بن عبار هذه القصيدة رداً على الشاعر محمد بن رويضان الدهمشي : 1415
مبـداي بالـلي مـا لغـيـره نصـومـي *** الـلـي بـذكـره يـجـتـهـد كــل قــّرى
ومن بعد ذكرك ياللطيف الرحـومي *** أصـدح بنـظـم القـافـيـه مـا اتـدرى
جاني قـوافي من زمـيـل محشومي *** الـذ واعـذب مـن شـهـالـيـل غـّرى
بالواتسب مـاهـو بظـرف مختومي *** مـافـيـه شـمـع ولا اطـرافـه مغـّرى
يا مـرحبابـه عـدد نـبـت الحـزومي *** واعـداد رمـل مـن الهـبايـب يـّذرى
يا محـمـد رويـضـان مابك ثـلـومي *** مـن لابــة تـدلــه بـهــم كـل عــّرى
يـذرون عـن لافـح لهيب السمومي *** مـثـل الجـبـل مـن لاذ حيـده تـّذرى
مـن رازهـم بالكون عـاد مهـزومي *** يمسي ويصبح عن مكانـه مسّرى
أقديت يوم أنـك سهجت الـرخـومي *** حيث الردي مثـل السمال ايتهـرى
خطو الذي مثل الحصان العـزومي *** يـبيع بعـروض البشـر وايـتشـرى
والجاهل الـلي مـا يعـرف اليمومي *** لا تنصحه لـو كـان شفتـه تـعـّرى
قال الطالب المبتعث لأمريكا الشاعر محمود بن عبدالله العبار هذه الأبيات
يسند على والده عبدالله بن دهيمش العبار : 1416
أنا أشهـد أن البـعـد يا عـزوتي شين *** فـرقـا الأحـبـه زاد غـبـن الـلــيـالــي
ربـع وأهـل والبيت عـايش به سنين *** بفـراقهـم يا صعـب وضـعي وحـالي
لـي عـام مـا راعيـت الأحباب بالعين *** فـي ديـرة الأجـنـاب سـاكـن لـحـالـي
لاشك مـا انسى ذكـريـات العـزيزيـن *** أمي وابـوي الـلي عـلى القلب غالي
لا تـفـكـر أن الـبـعـد عـنـكـم يـعـزيـن *** ولا تحسب أني عـنك يابـوي سـالي
وبـعـده يا أبـوي أهديك مني سلامين *** مـنـي لــك ولأمــي وكــل الـعـيـالـي
عـقالـك المـايـل بـراسك عـلى ايمين *** ودي بـشـوفـه لــو دقـايـق قـبـالـــي
هـذا هـو عـقـالـك أجـل أنـت هـلحين *** عـنـدي يـساوي شوفـتـه كـل مـالـي
يالـلـه طلبتـك يا منـاصـر هـل الديـن *** تـعـز أبـويـه يـا عـزيـز الـجـلالــــي
يا بـوي ربـيـت الصقـور المضـريـن *** مـا يـسـكـنـون الا بـروس الـعـوالـي
وأنـا أحـمـد الـلـه ما أخوانـي ردييـن *** هم فزعتي هـم عصبتي هـم ضلالي
قال عبدالله بن دهيمش بن عبار هذه الأبيات جواب لآبيات نجله محمود : 1417
حـيـيـت يـا مـحـمـود عـد الـمـلايـيـن *** واعداد مـا فـوق الثـرى مـن رمالي
أحسنت ثـم أحسنت بالمنطـق الـزيـن *** قـافـك ثـميـن وكـل هـرجـك صمالي
تـشكي مـن الغـربـه وبـعـد المحـبيـن *** والحمـد لـلـه مبتعث مـا انـت جـالي
الـنـاس يا محـمـود حـتى السلاطـيـن *** مـابهـم الـلي قـلبـه مـن الهـم خـالي
أصبر تـرى الـلي تشتكي منه روتين *** وخـلـك مـن الـلي يـبعـدون المـدالي
اللي درسوا بالغرب والهند والصيـن *** بالعـلم صاروا من أصحاب المعـالي
أطـلـب لـك الـتـوفـيـق آمـيـن آمـيــن *** وأدعـوا لـك الـلـي للمخـاليـق والـي
أنـك تـفـوز بمستـوى فـوق تسعـيـن *** وترجع عزيز الشان والراس عـالي
وأنت العوض باللي تحملت من ديـن *** مـن عـظم قـدرك مـا تغـاليـت مـالي
قـلـنـا تـضّـم ولا حصل بـس تـرميـن *** والـرزق عـنـد الـلـي عـليـه اتـكالـي
حـنـا لـك الـلـه بـالـكـرامـه غـنـيـيـن *** ما نجـلب الشيمه مـن أجـل الـريالي
قال محمود بن عبدالله بن دهيمش العبار هذه الأبيات يسند على والده : 1418
سلام تسليمت وفاء من خاطري للي يشوف
ابـدابـهـا واخـتم بها عـذب القصيد واجـزلـه
من بعدها يا هاجسي لا تشتحن مافيه خـوف
أسنـد عـلى قـروم الرجال الـلي تحل المعضله
أولهم أعـني والـدي عبدالله طيّـب ومعـروف
كـل الرجال أهـل الفخـر بصدورهم له منزله
أبـوي نفسه عـزهـا مـا باعـها بجمع الألـوف
يفـداه الـلي عـلى الـردى يـبـرم شنبه ويفتـلـه
جـمّع فخـر قـبيلته باصـدق دلايـل والقطـوف
وديـوان شعـر الوايـلي مجـد القبيلة يشملـه
ما عاشر سفال البشر ولا صادقه كل مهفوف
وبيته تجيه الغانمين وأهـل الغوى ما تدخلـه
قال عبدالله بن دهيمش بن عبار هذه الأبيات جواب لأبيات نجله محمود : 1419
مشكور يا شبـل بـدأ صـف القوافي بالحـروف
يـنهـل غـزيـر القـافـيـة مـن جـم منبـع منهـلـه
محمود يتبع سيرتي عسى التّعـب فيه مخلـوف
وأطلب عسى الله يصلحه يمسك طريق المرجله
محمود من مطلع صبـاه للعـلـم ضميـره شغـوف
كـل الـدروب يـدلـهـا مـسـلاكـهـا مـا يـجـهـلــــه
يـدرس عـلـوم الترجـمه واليا بـدأ نشر الكشـوف
كشـف التـفـوّق مقصـده اسمـه يكـون مـن أولـه
محـمـود يـتبـع سلـمنـا طبـايـعـه شهـم وعـطـوف
وأن قـال أبن عـبـار أبـوي يفخر وعـلمي جـمّلـه
من فضل خلاّق الملأ أصبر عـلى صعـب الظـروف
ولا هـمـني هـرج السـفـيـه الـلـي جـداه الـبـلـبـلـه
قال الشاعر محمود بن عبدالله بن عبار هذه الأبيات يسند على والده : 1420
يالـلي مربيني عـلى الشّـرع والديـن *** أطلب عسى المولى يزيد احسناتي
لـكـن الـيـا عـدّى مـن اللـيـل ثـلثـيـن *** لـك دعـوةٍ مـني وأنـا فـي صلاتـي
كـفـيّـت ثـم وفـيـت يـا والـدي لـيـــن *** غـديـت أميّـز بـيـن الأربـع جهاتـي
تبغـي أجـي مثلـك ولكـن عـلى ويـن *** هـذا هـدف قصـدي وغـايـة مناتـي
النابغة يـوم اشتهـر في هـاك الحيـن *** غـديت مـثلـه يـا حـميـد الصفـاتـي
جمعت شمـل انسـاب كـل العنـزتـيـن *** وأفخـر بالـلي سويـت مـدّة حياتـي
تجمـع تـراث ولا جـمعـت الملايـيـن *** يكفي جمعت شعوب عقـب الشتاتي
نصيحتـك يـا ابـوي فـي ذمـتي ديـن *** وطاعتك حق ومـن ضمن واجباتي
قال عبدالله بن دهيمش بن عبار هذه الأبيات جواب لأبيات نجله محمود : 1421
قـريـت يـا محمـود منطوقـك الـزيـن *** تـسلـم يالـلي مجدتني مـن غـلاتـي
أطلـب عسى رب الخلايق لـك يعيـن *** وعسى يكون الظّرف عندك مواتي
مـا تنقـضي كـل الحوايـج بـيومـيـن *** خلّـك صبـور ولا تـخـالـف وصاتـي
العسـر يـا محـمـود يـقـفـاه يسريـن *** عسى الفرج من والي العرش ياتي
رب المـلأ يحميك مـن لـوعـة البيـن *** مجهد ولـك مـنـوه تسـوي سواتـي
يـامـا صبـرت أيـام وشهـور وسنين *** بـذلـت مـجـهـودي وكـوّنـت ذاتــي
والـلي تكاسل مـا تمكّـن عـلى شيـن *** ولا خـيـر بالـلي مـا كلامـه ثـبـاتـي
وفـي مـع شخوص الـرجال الوفيين *** دايـم شديـد الحـرص فـي ملـزماتي
قال الشاعر محمود بن عبدالله بن عبار هذه الأبيات يسند على والده ويقول : 1422
يا ابوي من طيبك ترى صاحبك طاب *** واصبح موضـف يشتغـل بالحكومه
لكـن مـن التفـكيـر مـا بـاقـي اعصاب *** بالـلـيـل يـسـهـر مـا تـهـنـا بـنـومـه
وده يـطيـب وصـاحـب الـكـذب كـذّاب *** لـو يلبس اغـلا غاليه مـن هـدومـه
الطيـب يـبـغى لـه رجـاجيـل واشنـاب *** مـا تـستحي مابـيـن قـعـده وقـومـه
وحـنـا الحـيـا فـينـا مـوقع عـلى كتاب *** بـاوراق فـيـه مـوقـعـه ومخـتـومـه
والطفـل ذاك الـلي تخبـره تـرى شـاب *** روّح شبابـه ينشـده عـن عـلـومـه
الصـاحـب الـلي يـبـذل لـرزقـه اسباب *** ماهو سوات اللي غرق في حلومه
لاصـك بـاب الـرّزق يـفـتح لـه ابـواب *** والمجتهد يتعب عـلى قـوت يـومـه
طـالـبـك ثـم طالبـك يـا زاكي الأنساب *** حاول تحـل الـلي بـقي مـن همومـه
قال عبدالله بن دهيمش بن عبار هذه الأبيات مجاراة لأبيات الشاعر محمود : 2423
الـوقـت يـا محمـود حسّب لـه حساب *** أبــوك مـا جــرّب حـيـاة الـنعــومـه
أبـوك يـا مـحـمـود يـصبـر للأصعـاب *** مـا يطلـب المخلوق تقضي لـزومـه
يـقـضي لـزومـه بـالمـكـّده والأتـعـاب *** ولـه بالمراجل يا فتى الجود هومـه
والـلي يـبي يحافظ عـلى كل الأوجاب *** ومهـمـا تـكلّـف مـا يـخـلي سلـومـه
يـصبر ولـو حملـه ثـقـل ضلع ديراب *** والـلي حـمولـه كـايـده مـن يـلـومـه
وكم مـن غلام صار من ضمن شّياب *** يـسند عـلى كـفـوفـه اليـاراد قـومـه
والـحـمـد لـلـه فيـكـم الظـنّ مـا خـاب *** أنـتـم سناد الـلي تـراخـت عــزومـه
قـلـتـه وأنـا مـاكـنـت يـابـوك مـرتـاب *** عنـد الـولي رزق الخلايق عمومـه
ولا يـوم أنـا بـاطـلـت فـي حـق طلاّب *** ولا جـانـي الـديّـان يطلـب خصومه
قال الشاعر محمود بن عبدالله العبار هذه الأبيات يثني على والده : 1424
هـاض جاشي وأرسل المنظوم لـلـي *** شال مـن هـمي عـلى متـنـه دبـول
أن نـوى لـلـطـيـب يـنـزل لـه مظـلي *** وأن بـرك للحـمـل يشتـال الحـمـول
الـكـريــم الـعــابــد لــربّــه مـصـلـي *** الحـشيـم الـوافـي الـشـهـم الـعـدول
والـدي وش بـه أقـول ووش أخـلـي *** يـرتـكـي لـلـكـايـده مـا هــو مـلـول
يـتـصـف بـالـصـدق دايـم مـا يـزلّـي *** وعـن كـلامـه مـا يـزول ولا يحـول
الحـليـم أن كنـت مخـطي لـي يحـلي *** مـا خبـرتـه يـوم يـمسي بـه زعـول
مـا يـنـام ألا حـجـاجـه مـسـفـهــلـي *** مـا غضب مـني عسى عمره يطول
قال عبدالله بن دهيمش بن عبار جواب لأبيات النجل الشاعر محمود بن عبدالله العبار : 1425
مـن جـزيـل القـاف نجـلي مـرسلـلي *** الأبــن مـحـمــود ذخــٍر مـا يــزول
أشهـد أنـه شـاعـر وشعـره يـسـلّـي *** أفـتخـر بـه وأفـتـخـر بـالـلي يـقـول
الـزعـل يـا مـسـنـدي خـلّــه يــولـي *** وأنت تعـرف أبوك مـا ينـزل نـزول
مـا نـزلـنـا بـالـوطـا مـقـدار مـلّـــي *** نـرتـفـع يالـقـرم فـي روس التـلـول
وأنـا كـنـت أرجـيـك بـايـام مضـلـي *** حـتى تـم الخمس والعشريـن حـول
بـالـلـزوم أبـيـك تـبـقـى مـحـزمـلـي *** مـا تـبـور بـواجبي تـرفى الخـلـول
أنـت وأخوانـك ذراي وساس ظـّلي *** كـان شح الريـف في وقـت المحول
قال محمود بن عبدالله بن دهيمش بن عبار هذه الأبيات يسند على
والده عبدالله بن دهيمش العبار : 1426
مــا رفــع قــدري وعــلّا مـسـتـواي *** غـيـر اسـم أبـوي جعـلـه ذخـر لـي
ليـت عنـدي قـدرة اظهـر لـه غـلاي *** مـيـر مـا يـنقـصـه فـي دنـيـاه شـي
والـدي شـمـسٍ تـعـلّـت فـي سمـاي *** بالمسـاء يـقـلـب ظـلام اللـيـل ضـي
والـدي نـسنـاس طـيـبـه فـي مسـاي *** يـنـعـش الـخـفّـاق كـنـه عـذب مـي
والــدي مــن يــدمـح الــزّلــه وراي *** مـن لهـيـب الشمس ياخذنـي لـفـي
جـعـل ربـي مـا يـخـيّـب لـي رجــاي *** مـا يـغــيـب الا وأنـا مـانـي بــحــي
قال عبدالله بن دهيمش بن عبار هذه الأبيات جواب لأبيات الشاعر محمود : 1427
يا محمود أخبـرك عن غـايـة منـاي *** أطـلـب أنــك مـا تـسيـر بدرب سـي
أدري أنـك دوم تـبحـث عـن رضـاي *** قـرم وأخلاقك كريمة مـا أنـت عـي
دام لـك مـنـوه تـبـي تـلـحـق جـزاي *** كـان بـك قـصّـرت لا تـزعـل عـلــي
وكـانـك تـفـكّــر بـفـقـري أو غـنـاي *** الــولــي مــولاي مــا مــدّه شـــوي
لا تكـاثـر مـا وصـل لـك من عـطـاي *** لـو شريت الـلي عليها حـرف جـي
لـكــن الـلـي دوم يـخـلــف كــل راي *** الـلي من اسبابه طويت رشاي طي
أبيات اثني بها على الرجل الفاضل فالح بن جديع الغضوري : 1428
اشكر جناب الغضوري خـلفـة جـديع *** المخلص اللي للوطن اسس قروب
عـن الـوطن يكتـب جـميع المواضيع *** للمملكه شامل من الصوب للصوب
يـنـظـم لـقـروبـه قـحـاطـيـن وسبـيع *** وبهـم مطران وفيه عتبان وحروب
وكـل القبـايـل والـرجـال الصعاصيع *** بقروب ابو فيصل لهـم اسم مكتـوب
وقد تفاعل مع هذه الأبيات الشاعر علي صالح الضوي فكتب هذه المجاراه
حـيـالـلـه الـلي نـّوع الشعـر تـنويـع *** شاعـر قدير ولـه مـعـزه ومحبـوب
تسلم يا أبـو مشعـل بكـل المواضيع *** ياللي تقول القاف والقاف محسوب
تمدح بها ابن جـديع راع المشاريع *** الـلي مجمّعنـا من اقـطـار وشعـوب
الـوافـي الـلي مـن رجـاجـيـل بـتـيع *** الـلي عـلى الطولات والعز موهوب
جواب عبدالله بن عبار على الشاعر علي بن صالح الضوي :
حـي البـيـوت الـلي لـفـني بتـوقـيـع *** شاعر فحل والقاف له فـن واسلوب
علي بن صالح يوم عصر المقاميع *** ربعه هـل الجدعا اليا هوجر الشوب
كـم مـرّة غـنـوا الـيا وصلوا الـريع *** يـوم القبـايـل بيـن طـالـب ومطلـوب
لك الشكر يا مطـوّع القاف تطويـع *** واشكر جديع اللي من العود منسوب
يتبع
آخر تعديل عبدالله بن عبار يوم 07-11-2022 في 06:50 PM.
|