قصيده قديمه ما اعرف شاعرها - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

01-15-2012, 02:12 AM

القصيدة لاب زعلان على اعياله ويقول فيها

ياعيال خوالكم من منقع الطيب ماتقولون لي من الردى جاكم

اخوكم / احمد عبيد غنام الوايلي

اريد القصيده كامله جزاكم الله خير

01-15-2012, 10:07 PM

الأخ / احمد عبيد غنام الوايلي

القصيدة حسب معلوماتي المواضعه

لشاعر قديم إسمه ( جحيش السرحاني )

قال قصيدته في عياله حيث دعا عليهم وقيل إن الله استجاب دعوته ولم ينجبوا أولادا وقيل أنهم تزوجوا مرة ومرتين وثلاث من أجل أن يرزقهم الله ولكن أمرالله قد نفذ وانقطعت من ذلك الزمان ديارهم ....... (ولم ينجبوا أولادا) . والقصة أنهم تنكروا لوالدهم حيث توفيت أمهم وهم صغار وقام بتربيتهم حتى كبروا وكان لهم بمثابة الأم والأب يسهر الليالي على رعايتهم وراحتهم وفي النهار يذهب لجلب الطعام والشراب لهم ... الخ وعندما كبروا تنكروا له وأصبح لا يريده أحد منهم مراعاة لخاطر زوجاتهم اللاتي تأففن من خدمته وصار كل واحد منهم يطرده من بيته فما كان من الوالد إلا أن سكن إحدى (الخرابات) حتى صار لا يقوى على النهوض أو السير وضعف بصره فذهب زاحفا يتوسل ويرتجي أبناءه بأن يمكث عندهم حتى يقضي الله أمره فلم يستجب له أحد منهم ...

فقال فيهم الأبيات التالية :

قال الذي يقرا بليا مكاتيب=يا للي تقرُّون العمى من عناكم

يا عيال يا للي تشرفون المراقيب=تريضوا لي واقصروا من خْطاكم

خوذوا كلام جحيش مابه تكاذيب=مثل السند مضمون للي وراكم

ويا عيال وان صرتوا ضيوف ومعازيب=ترى الكلام الزين مِلْحت قراكم

وترى البلاسة من كبار العذاريب=ترى البلاسه ما تطول لحاكم

يصير بعيون الرفاقه تقل شيب=ليا منَّه اقبل قيل هذا بلاكم

المذهب المذهب ترى المذهب الطيب=وترى ردى المذهب يبوّر نساكم

ياعيال ما سرحتكم للمعازيب=ياعيال ما عمر المعزب ولاكم

يا عيال ما ضربتكم بالمشاعيب=ولاسمعوا الجيران لجَّة بكاكم

ياما تسعرت الخلايق تقل ذيب=أريد من صيد البراري غذاكم

وياما قطعت من الفياض العباعيب=من خوف لا يقصر عليكم عشاكم

أحفيت رجليني بحامي اللواهيب=وخليت لحم الريم خالط غداكم

واليوم شوفوا لحيتي كلها شيب=وشوفوا محل تخوضعي في ذراكم

قمت اتوكّا فوق عوج المصاليب=وقصرت خطايه يوم طالت خْطاكم

ياعيال يا عيالي عليكم مطاليب=عطوني القرضه جزا ما وتاكم

خوالكم ياعيال هم ماكر الطيب=ولو تتبعون الجد ماحدٍ شناكم

ياعيال ياعيال الخنا كلكم عيب=ياعيال مادري هالردى منين جاكم

ياعلكم في حاميات الاصاويب=ياللي على الوالد خبيث لغاكم

قصيتكم واسْنَدْت وادي سلاحيب=ولقيت بالصبخا مدافيق ماكم

ياعيال بعتوني بصفر العراقيب=ماهي حقيقة سوَّد الله قراكم

يالله عسى عَماركم شمسها تغيب=ويعتم قمركم ثم يظلم سماكم

وعسى نساكم..لا تحمل ولا تجيب=ولا حْدٍ من الورعان يمشي وراكم

شفت الجفا والحيف والغلب والريب=بطلوعكم لابيض الله قراكم

ماني بفاضحكم بوسط الاجانيب=باعمالكم يدرون كل قْرباكم

لوكان تدرون الردى والمعاييب=صرتوا مع المخلوق مثل خْوياكم

والله وأعلم

01-16-2012, 12:43 AM

الاخ العزيز حمد

السلام عليكم ورحمة الله وبركاته

زادك الله علم وفطنه وفقهك بالدين والدنيا وزادك علما وفهما وحفظ قلبك وفؤادك وعقلك بحفظه

انه هو السميع العليم

اشكرك جزيل الشكر يوم رديت علي واعطبتني سؤلي وشفيت قلبي شفا الله قلبك من العين والحسد

والبخل والحقد والزلل ومن امراض القلوب ومن امراض العيوب امين اللهم امين

شكرا عزيزي جزاك الله خير واسلم وسلم

اخوكم / احمد عبيد غنام الوايلي