*كبار شيوخ قبيلة عنزة في ضيافة الشيخ : خلف أبازهرة ، وأبن شقيقته الأعلامي الأستاذ : عبدالله العياط الخمشي ، في منزلة بمحافظة حفر الباطن..


http://hafrikhbariya.com/vb/showthre...230#post100230

مع الشكر الجزيل للأستاذ الفاضل عبدالله العياط الخمشي على توثيق هذا الحفل ونشره

فقد أطلعت على الحفل الذي اقامه الشيخ خلف بن الذّيب بن جهبل أبو زهرة شيخ قبيلة الخمشة في محافظة حفر الباطن لعدد من مشائخ ووجهاء قبيلة عنزة وهو حفل مشّرف ولا غرابة فأن الشيخ خلف من أحفاد الشيخ محمد أبو زهرة وينتمي إلى سلسلة رجال من مشائخ وشجعان قبيلة ولد سليمان وهو رجل يتصّف بالشجاعة والنخوة والحميه ويمثل اسلافه الغر الميامين
عرفت هذا الرجل وتشّرفت بتوجيهه قصيدة يجاري أحد قصائدي وقد نشرتها في ديوان الوائلي وهو من الشيوخ الذين يبذلون قصارى الجهد في السعي في قضايا القبيلة وهو رجل جسور ويقول كلمة الحق ولا يعرف المجامله والمحاباه وهو حفيد الشيخ جهبل أبو زهرة الرجل الذي يجلّه ويقدره كل من يعرفه والشيخ جهبل يقرض الشعر وله من أبيات هجينية قالها في دهر جلغيف يثني على الشيخ حاكم بن مهيد الملقب ( حاكم الصوبين منها قوله :

يـا راكـب فـوق مـامــونــه *** سلم عـلى شـيخ الأطـرافـي
ضـمـن حـلالـه بـطـابـونــه *** يـوم الحـطـب دمـه السافي
الـروح لـلـمـوت مـرهـونـه *** والشمس مـا عـاد تنشافي
حـرش العـراقيب مرجـونـه *** واصبح مراح الغنم صافي

وقبيلة الخمشه القبيله التي وصفها رميح الخمشي بقوله :
قصيرنا ما حشمته عندنـا يـوم *** يـزود مـع زايـد سـنـيـنـه وقـــاره
دونه نروي باللقاء كل مسموم *** ونرخص عمار دون كسر اعتباره

والقصيدة وقصتها منشوره في كتابنا قطوف الأزهار وهي من مفاخر قبيلة الخمشه

ومن قصائدي هذه القصيدة القيت في حفل اجتماع قبيلة الخمشة المقام من قبل أسرة الجمعان في بريدة حيث قلت :

جـيـنـا نـلـبي دعـوتـك يا أبن جـمعـان *** بالمحفل اللي لم شمل الجماعه
شـمـل تـفـرّق مـن زمـان أبـو غبطان *** والـيـوم ببريـده يـتـم اجتماعـه
رابـط نسـب يجـمع حـواضـر وبـدوان *** والمعرفه بين الرفاقه طماعـه
الشمـل جـمعـه يـرفـع الـقـدر والشـان *** بالجـمع عـز وبالتفرّق قطاعه
والـتـفـرقـه ذل ومـهـونـه وخــــــذلان *** اقـولـهـا والكـل عـنـده قـنـاعه
والـحـمـد لـلـه كـلـهـم ربـع وأخــــوان *** بالوصل خير وفيه للرّب طاعه
ربـع الخـمـشـه ونــعـم عـزوة عـلـيـان *** الـلي منازلهم براس الرفـاعه
صـافـيـن من صفـوة سـلايـل سليمـان*** أهل الكرم والمرجله والشجاعه
خـمس الـبـدايـد عـدهـم دون نـقـصان *** متوارثين الطيب مثل الوداعه
شواقيه واشخـوص حـربـي وقـعـدان *** وصوامله وقرين ساس البتاعه
عـقيـدهـم مـقـدامهـم طـيـر حوران*** الشيخ اللي من عال بالكون صاعه
الشيخ أبـو زهـره من أحـفـاد شيخان *** خلف سليل المجـد ماهي اشاعه
وأدخـل عـلى الله ما اتناسى عـويجان *** قرم العيان الـلي طويله ابواعه
ولـوأبي أعـد شخوصهم حرت بحلان ***مالي بتعداد الشخوص استطاعه
يـامـا بـرز منـهـم حـمايـل وشجعـان *** طاري مفاخرهم يطيب استماعه
والـكـل منهـم يـروي الـرّمح والـزان*** يوم الزمان اللي تضارس سباعه
هـم محتميـن الجـار عـن كـل عـدوان *** يأمن وعنده عن غريمه مناعه
فـخـر بـهـم قـبـلي رمـيـح بن ردعـان *** الجـار مـا توخـذ عليه الرتاعه
يـشـهـد لـهـم قـافـه مسـجّـل بـديـوان *** قصيرهم ما حشمته بس ساعه
قـلـتـه وأنا منسوب من نسل فـدعـان*** اللي لهم خمس الفضايل صناعه
صوت العشا من دور تركي وجدعان ***نادى به ابن مهيد وقت المجاعه
وراعي العطيه كاسب الطيب حمدان *** القـرم نسل غبين ماهـو رعـاعه
وبواجت الـديـره عـلى مـر الأزمـان *** مافيه قـفـر الا يـدوسـون قـاعـه
وشـرب المغـر سنّـوه سنـه لضيفان *** لأثـبـات حـقّـه كـان بـوّاق راعـه
وحمر النواظر وصفهم دون حقران *** شجعان يوم الروح مثل البضاعه
هذي فعول الرّبع في ما مضى وكان *** مجـد كتبته عـن دواعـي ضياعه
واليـوم حـنـا بضـل حامين الأوطـان *** ساد الأمن والعـز رفرف شراعه
وصلّوا على المبعوث للأنس والجان *** نبينا المخـتـار راعـي الشفـاعـه

وقلت هذه القصيدة في حفل أقيم من قبل عيال عودة بن داله الخمشي في اجتماع قبيلة الخمشة في مدينة الشملي :

لـي الشرف بحضور حفل أبن دالـه *** رغـم الظـروف لدعـوة الربع لبيت
حـفـل الـكـرام الـطـيـبـيـن أعـنـالــه *** ما هي حسافه صوبهـم لـو تعنيـت
حيث الضمير لشوف الأجواد والـه *** القـا الكرامـه عندهـم كـل مـا جيـت
نسل النبـيـل الـلي تـشّرف افـعـالـه *** عـوده على راس النبا يشمخ البيت
كـيـف النـشامـا يـنـوجـد فـي دلالـه *** فـنجـال مـا كيـفـه ارقـيلـه وباكيـت
وساروا على منهج طريقه عـيالـه *** أدناهـم الـلي قيل يا نعـم ما اطـريت
عـيـال عـوده يـدركـون الـجـمـالـه *** صيد الرجال اللي لهم بالفخر صيت
مشكور مـن يجمع عواين رجـالـه *** تـجـمـعــوا كـل الـرفـاقـه بـتـوقـيـت
عـزوة هل الجدعا نحضر احتفالـه *** العـزوة الـلي فـي لـقـاهـم تـهـنـيـت
مثل الجبل يذري عن الشوب جاله *** الـلي بهـم وقـت الشـدايـد تـعـزويت
وأن جاهـم الجـاني يـدور الـدخالـه *** دخـيـلـهـم مصيـون مـا قـال ذلـيّـت
المـدمـي المطـلـوب صفـوا بـجـالـه *** مهما بلغ جرمه يقولون ما خطيت
والضيف ياخـذ واجـبـه فـي كـمالـه *** يقلـط عـلى عـيت الكباش العناتيت
مـا منهـم الـلي صـد للضيـف زالـه *** يـوم العـدول مـن المكايل مبـاحيـت
وقـصيـرهـم يـدلـه ويـنسـاح بـالــه *** مهما يطـول الـوقـت مـا قـال مليّت
قـصيـرهـم لـو عـال يـرفى خـمـالـه *** يحشم جنابـه عن كـلام الشواميـت
وأن جاهم اللي من الزمن باد مالـه *** قـالـوا تـبشّر بالـرفـد يـامـن أبليـت
الـكـل يـنـفـق مـن غـوالـي حـلالــه *** يـوم الـزمن جافي قبل يطلع الزيت
والـلي يحالـف جمعهـم طـاب فـالـه *** يـقــول نـلـت بـعــزهـم مـا تـمـنيـت
هـم ملتجأ الـلي غيّر الوقـت حـالـه *** صفـوة صناديـد الـرجـال الـزنـاتيت
خـصيـمهـم مـفـلـوج فـي كـل قـالـه *** حظـك ردي يالـلي عليهم تهقويـت
مـا يـوم حـطـوا للـمحـامـي وكـالـه *** بالسيـف الأمـلـح ذلـلـوا كـل نتنيـت
أعـني مـدابـيس الـوغـى بالصيالـه *** أهـل الحميا الـلي لطاريهـم أوحيت
أهـل الصخى والمرجـلـة والبسالـه *** يـوم النخـاوي والحـدا والمصاويت
لا ثـارت الجدعـا بعـصر الجهـالـه *** نالـوا فخـرهـم بالسيوف المصاليت
سـلايـل سـلـيـمـان نـعـم الـسـلالــه *** أفعـالهم مـا أحصيـه لـو كان عديت
يوم الفخـر فـوق النضى والخيالـه *** فـرحـت ضميـرك كـان بالجـد ناديت
الـلي يـنـاطـح جمعهـم مـن هبـالـه *** يـقـفي بـحسـرات الـنـدم والتـناهيت
واليوم في حكـم الشرف والعـدالـه *** لمـوا طـوارف شملنا عـقـب تشتيت
أطلـب من المولى عـزيـز الجـلالـه *** الـلـه يـثبـتهـم عـلى الحـق تـثبـيـت

وهذا مقطع من قصيدة قلتها في محفل أقيم في المذنب بالقصيم من قبل أسرة الرمضي من حاضرة قبيلة الخمشه :

من عـزوة يـوم اللقا والخصومه *** بـواسل تسـقي كـبـود العـدا سـم
والعايل الـلي وهـمه كبـر زومـه *** عـزوة هل الجدعا زقامه اليا زم
شجعان عوق اللي يركّز هجومه *** مبـطي فعايلهم عظيمات وارهـم
عمارهم ترخص بالأكوان سومه *** ونشوقهم قبس الفتايـل اليا شـم
ونطيحهم لـو نار ما أحدن يلومه *** عنـد اللقاء صابورهم للعدا طم
عـدوانهـم بالكون دوم مهـزومـه *** حزت يكون الريق يذبل من الفم
واليوم عسى الـلـه يعـز الحكومه *** حكامنا اللي لشعبهم خيرهم عم