مجاراة للشاعر محمد المزعل العنزي
يقول ابو عبد الرحمن :
در هجس الـغـياب ودر هجـس الـحضـور = لاتـمـثــل وصـــور لي حــقـيــقة لـقاك
وارتـسم في عيوني طـيف جسر العبـور = فـوق بحـر الــظروف اللي تــضيق فضاك
كــم لاجلك صـبرت وصرت شخصٍ صبور= رغــم قٓـســوة ظـــروفـي مــاتـبدد غـــلاك
مــاثنـتني ظـروف الـوقت لوهي تجــور = كــم لاجـلك تـحـمـلك الــشقا في رجــاك
يانــديـمة مــشــاعـر ياشقيـقة شـعور = اسعـد الله صـباحك واسعد الله مـساك
يـاملـيـحـه تـرى المسلم بـطـبعـه غيور =لاتخفضي جناحــك مـع جـمـيـع اجلساك
واحــذري يامـليحـــه لايصــيـبك فـتــور = كــان طــال الـغـياب وطيف هجري دعـاك
لاتــهـجري مـحبك لاجل بـعـض الامـور = اصـبـري مــثـل صـبري واثبتي لي وفـاك
والــوفــا والـتفـاني مـن قـديـم الـعصور = ديــدن الـمخلصين وطــبـع مـغـرم هـــواك
محمد مزعــل العنزي
مجارتي للاخ ابو عبد الرحمن
اســــطبـر يا صـديقــي ,,,,,,,,
اسطبر ياصديقي وانت رجلً صبـــور= والله الله يخـــفـف يا مـحـمــد عنــاك
والصبر عادتلك وانت رجــل امخبـــور= الهــقـاوي غــريـزه والدلايـــل وفــاك
لاتعجـــل بشـيً فيــه بعـض الامـور = خايفً ما يناسب شكلها مــســتواك
قلتها لك وانا اللـي كان لي به مرور = ويومها يا محمد مـا ضـناني ضـــنـاك
وانصدمـت بظـلامً ما ظهر فيه نـــور = وانجرحت بخفوقي بيد شخصً هناك
ما نعـــم الخلايـــق والليــالي تــدور = وانظـر لكـف يــدّك وافتكــر بقـصــراك
وثـــق تماماً بأني مخلصً لك غيـــور = وما اتمنى لنفسي ودي انـه مـعـاك
والله اني مااحسدك شي فيه السرور = وانت تدري وعارف يا محمـد غلاك
ولا تغــرك سـواليف الدجـــل والغـــرور = وانت حرً وانا ادري يرتقي بك ذكاك
قالهــالك عضيـــدً باللـــزم ما يبـــور = قـدمــك بكـل هيـّه مــا تمشا وراك
ســيفك اللي اتخبره ماعطالك دبــور = وكـل غـالي ملكته دون شـكً فـداك
محمد بن سوعان الربيّع

شكراً للأخوه الشاعر محمد بن مزعل والشاعر محمد بن سوعان الربيّع على هذه القصائد الجزلة ولا غرابة فكل منكم شاعر قوي وقد ذكرني هذه القصائد بلغز سبق وأن وجهته لمحمد المزعل قبل عشرون سنة وهو يرمز إلى معنا حيث قلت :

يا محـمد أبي ابتدي لـك لغـزٍ مباشر *** وانشدك عن الذي في ملفظه يربش
لو تلفظه تنحرج من ضحكت الكاشر *** اللي بعرض الملأ يخوش ويخربش
حطيـت لـه عكـفـه اليا سجل الناشر *** وهو يشبه للي يفن الرمل وايهربش
العـام الأول خبرتك كنـت لـه حاشر *** في ساقت العين مارالعين ما تبربش
واليوم عدته لوضعـه ماله مخاشر *** ماعاد تحرج من الفاضه ولا تكربش
تــراه مـع لابـتـه تـرتيـبـه العـاشر *** تلقاه فوق الجبل كان انت متغـربش
يوجد مع المفتكروايضاً مع الداشر *** وأن ما حليته يحله ضاهـر الحربش
وأنت الذي عادتك لللاش ما تعاشر *** ولا ترافق اللي يزوم بكبر ويطربش

ستاذنا الفاضل واديبنا المتألق دائماً عبدالله بن عبار
اشكرك يابو مشعل على مرورك الطيب وتعليقك الرائع والراقي
ابو مشعل انت هرم شامخ مازال يجابه تقلبات الواقع دون كلل او ملل
وهذا بشهادة الجميع وبالتأكيد شهادتي فيك مجروحه لكن هذا الاكيد فالله درك
استاذنا الفاضل ومرجع عنزه وشاعرها الكبير عبدالله بن عبار المعنى
تقبل خالص مودتي واعجابي وتقديري
اخوك / محمد بن سوعان الربيّع الجراح .