قصيدة من قصايدي القديمة طلب نشرها مسفر اللويبد - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

01-13-2021, 04:28 PM

طلب مني الأخ مسفر اللويبد من البادية الشرقية بالأردن هذه القصيدة وهي أبيات قالها مشعل بن عبدالله العبار بعد تخرجّه من جامعة البترول والمعادن يودع الجامعه ويتوجد عليها ويتغّزل بها وقد جاريته بقصيدة نصيحة قال مشعل بن عبدالله بن عبار :

بكت في خافقي لوعة وداع وهاجت العبرات
تمنيـت الهوى يرحل وأنا ببكي عـلى فـراقـه

الا يا نجـم خبـرني تكـلـم وارسـل النـظـرات
ترى في هاجسي حسره وداع وروح مشتاقه

تذكرت الأسى وهاجت شجوني والهوى غلطات
ألا يـا صـوت يا صرخـت سجـيـن حـن لعـتـاقـه

سحرني بسمت الدمعـه سحرني نورها بآيات
سحـرت بواحت احلامي وطبع النفس عشاقه

ذكرت أيامها الحلوة ذكرت سنينها المـرات
ذكرت الفجر والغربة ذكرت البيت ورواقـه

نويت أنقش حروف أسمك على صدري تكون أثبات
كـمـا ينقـش حـروف الـوسـم جـداني عـلـى الـنـاقـة

أبي أكتب لك كفاح أجيال وأبي أشرح لك عن اللوعات
وأبـي أرسـم نـظـرة عـيـونـك عـلى صـفـحـات بـراقـة

* فقال عبدالله بن دهيمش بن عبار رداً على أبنه مشعل يقول :

بديت القاف بسم الله عليم بخافـي الغايـــات
عـظـيـم الشـان مـولانـا ولـي الكـون خـلاقـه

تهيّـض خـاطري يبدع قصيد وينظم الجزلات
قرايض شهـد من فكـري تقاطـر ذوب ترياقه

كتبت أشعـار ناقيها عـن التحوير والـهزلات
أعـذي منطـقي وأفهم جليـل الهـرج ودقـاقـه

نصيحه قلتها مخلص ولاني للعرب شمــّات
أخـص الفـاهـم المدرك عساها تبلغ أعماقـه

أنا أبي أوصيك يالعاقل بتقوى الله والطاعات
تـرى نـفس التـقي دايـم لفعـل الخيـر سبّاقـه

تحكـم وأحتكـم بـاللي نـزل في محكم الآيات
تـمـش بنصـه وحافظ عـلى عهـده وميثاقـه

ترى من خان عهد الله مصيره ياقع بنكبات
ولـو شفتـه نجـح مـره تعيّـن ويـن مطباقـه

تجنب مذهب الفاسد تواضع وأخلص النيات
ولا ترافق حليـف الشر ترى الأشرار بـواقه

تجنب صحبت الغادر تجنب رفـقـت الشّلات
ترى من رافق الخايب لدرب العايـزة ساقه

تجنب مجلس الكوبة تجنب شلـة الحارات
تراها تجمع السافل مع السربوت والعاقه

الوالدين اللي ربوك لهم فـي ذمتـك ديـنات
ترى لو غبت يرجونك عليهم شوفك شفاقه

ترى من عق به شاره تبين من أوضح الشارات
مـقـام أبـوه فـي صـدره مـثـل تـقـديـر سـواّقــــه

يقول لصاحبه حاضر تبشّر وأبرك الساعات
ولـو نـادى لـه الـوالد تزرى وهـدل اشداقـه

عدوك يفرح بسّـوك يدور العيب والخملات
نكور ولو تصل حبله يموق ويفصم حلاقه

ترى مهما عن الأحمق تعف وتسمح الزلات
خبيث النفس لو تخطي عليك يحملق أحداقه

توقع وأحفظ لسانك ولا تبحث عـن الغـرات
حـذورك غـرة الغـافـل سهـوم العين رماقـه

توقع وأبعد النظره ترى من يكشف العورات
يـبي يفتح خـلول النـاس وعنده تنفتح طـاقـه

عن الهزلة عن الرزلة ترفع يا رفيع الـذات
مقام الحر ما يطمن مـقـره راس شـوهـاقـه

ترى من عادت الصيرم يهوم ويبعد النوهات
يـروم النـايـفـه نـفسـه لـرقي الحـيـد عشاقـه

وصاتي لك وصاتي لك تجلد وأنطح الشدات
ترى لابد ما تجـرب عـذاب الوقـت وأرهاقـه

لفعل المرجلة حاول لـو أن دروبها صعبـات
ردي العـزم والخـامـل بلـوغ المجد ما شاقه

أبي ترسم حروف العز وتسطرها على الصفحات
تـرى مـن شـام لـلـعـلـيـا يـشـوم بـنـفـس تـواقـه

حصيل العلم به تسلك طريق الفـوز والطولات
تـرى مـن كـان متعـلم يطول وتسمـو أخـلاقـه

تعلّم وأجتهد وأكدح عساك من التعب تقتات
تـرى من لا عمل خيّـم عـليه الفـقـر والفاقه

ولا تكسل سوات اللي يدور الهون والراحات
ولا تقـنـط تـرى المـولى يقيـت العبـد بأرزاقه

دني النفس ما يقنع يحوش الرزق بالحيلات
يغـش النـاس وأيخـادع ونفسـه دوم مـلاقـه

تبصّر وأفتهم وأعرف تنبه وأحذر الغفـلات
ثمين الوقت لا يمضي تـرى الأيـام سراقــه

ترى من فرط بوقته ندم بالماضي اللي فات
يـفـر الـوقـت دولابـه يسيـر ويوصـل قناقـه

تغانم وقتك وبادر ترى من طال عمره مات
رميـم الجسم بالبرزخ يعـوث الـدود بشناقه

خـذ العبـرة ولا تنسى تذكّـر هـادم الـلـذات
جديد العمـر صيوره سمايـل جـرد خـماقـه

ولا تغـتـر بـالدنـيـا تـرى الدنيـا لهـا ميلات
ولا تخـدعـك لـو تقبـل تراهـا دوم صفـاقـه

فلا تأمن غوايلها لـو أنت بمنصب الباشات
تـرى كف الزمن لازم يلـوح الخـد بطـراقـه

وصلى الله على الهادي بذكره تكمل الأبيات
عـدد ماهـل من هاشل تلاعج ضـوح براقـه

وقد أثمرت النصيحة ولله الحمد

وأتعذر من أخينا مسفر عن نشر المساجلات التي بيني وبين حباب السندي الرشيدي وحميد فحيمان الرشيدي رحكهما الله لأنه قصائد طويله أكثر من خمسمائة بيت في مجملها وشكراً