أتحفنا الشاعر المعروف حمد بن سالم الضوي الجعفري بهذه القصيدة بمناسبة عودة الأبن مشعل بن عبدالله العبار من خارج الوطن بعد أنجاز مهمته في عمله فقال الشاعر حمد :

عـن أذنكم يا أهـل المواقف دقـايـق *** من وقتكم تكفون وقفـه سريعـه
دام الشعـر لـه ذوق والـجـو رايـق *** بشـارك أهـل المـفـردات البديعـه
فـي مجـلس بـه للفـنـاجيـل سايـق *** لأهـل المقـامات السمايا الـرفيعـه
أجمل حفل لا جيت له ما أتضايـق *** لـربع لـهـم فـعـل الجمايـل طبيعـه
فدعـان نسل عبيـد ماهـم لصايـق *** ولا يحسبـون مـن القبايـل نـزيعـه
ربعي ذرايه عن لهيب الحـرايـق *** حـزامي سنادي لا وقع من وقيعـه
ثـلاث جمـوع ولابـنـا من فـرايـق *** متـكـاتـفيـن ونـابـذيـن الـقـطـيـعـه
سليمان مع مفدع ومسبع شقايق *** الـطـيّـب كـلّـه حـايشينـه جـميـعـه
وباقـي ضنـا عنّـاز نـعـم العـرايق *** من حـد عـرعـر لين حـد الوديعـه
الـجـد وايـل مـا خـلـطـنـا لحـايـق *** ضرباتنا بنحـور الأعـداء وجيـعـه
يـوم المعـارك واشتباب الفشايق *** يـوم الشقـا وذيك السنين الفضيعه
للـزود والناموس صرنـا رفايـق *** من الـلـه خلقنا ما رضينا الهزيعـه
وكـل القبـايـل للمعـالـي عشايـق *** وهضـم الحقوق مخالـفـه للشريعـه
والـيـوم لا خـيـفـه ولا دم رايــق *** وابـطـونـنـا مـن كـل خـيـر شبـيعـه
بفضل الـلي خلو مملكتنا حدايـق *** الـلي لهـم مـن جملـة الشعب بيعـه
وعن محتفلكم ما منعنا عـوايـق *** وداع أبـو مشعل نستجيب ونطيعـه
حفل الأديب الـلي به المدح لايق *** نـسّـاب ومــؤرخ قـبـايــل ربـيـعــه
علمه شهر فوق الطوال الشهايق *** نـجـم بـدأ بـيـن الكـواكـب لمـيعــه
بليهـان للصعبـات قـادر وطـايـق *** حـمـل قـواه الـغـيـر مـا يستطيـعـه
درع عنزة ما هي دعاوي حقايق *** حصن من حصون الأمان المنيعـه
تشهـد لـوقـفاتـه جميع الخـلايـق *** وأتـقـدّر أفـعـالـه وتشكـر صـنيعـه
الـلي خـدم ربعه بشتى الطرايـق *** ومنصى لمن ضاقت عليه الوسيعه
بحور الشعر صارت ابحره غرايق *** وفـكـره دلـيـلـه للأمـور الـسنيـعـه
بالكاس يضفر في نهار السبايـق *** مـالـه منافس مـركـزه بالطـلـيـعـه
مـا يـلتـفـت لمجمعـيـن اللـفـايـق *** يطـلع سمـا عـن العـلـوم الوضيعـه
وأقول من يجحد مساعيه مايـق *** وقـلـوب مرضانـه وروس ٍصديعـه
العـد يـروي صابحـه والـغـبايـق *** والـرس مـا يسق ِ الظـوامي نبيعـه
والمـعـذره يـا طيبـيـن العـمايـق *** يا أهـل المقـامـات السمايا الـرفيعه

جواب عبدالله بن دهيمش بن عبار على حمد بن سالم الضوي

حي الجواب اللي لـه الفكـر شايـق *** كنّه زهـر روضن تخالـف ربيعـه
مـن شاعـرٍ شغموم للشعـر تـايـق *** شّرف ونـور الدار يضوي شعيعه
حـمـد سليل المجـد بالطيب فـايـق *** الجعـفري نسل الـرجـال الشجيعه
مـن روس لابـه يحتمون الأنـايـق *** يـوم المغازي والشرور الشنيعـه
من ساس نسل عبيد ماهم هلايـق *** باجـوا حـدود بـلاد سنّـه وشيـعـه
مـن خيـبـر الحـرّة لحـد الحـوايـق *** كـم خايـع باجـوا مع الـذود ريعـه
مـن رازهـم بـالكـون لـلـمـر ذايـق *** وأن لقحت الفتنة وبـيّـن ضريعـه
يروون حـد الـلي صفاحه رقـايـق *** شامـان تـوحي بالجماجم قـريـعـه
وأن ثـار ملـح مبـولـدات التفايق *** تمرج قلوب أهـل العقول الخليعه
وأن صـاروا ضعاف العزايم علايق *** وحل القـضى والكـل يطلب منيعـه
باليـوم الـلي فـيـه المنايـا تـوايـق *** تشيب بـه روس الطفال الرضيعه
عـدوهـم بـه واسع الـبـر ضايـق *** أقـفى معيف وصاب قـلبـه خـريعـه
ما عاقهم عن مكسب المجد عايق *** فرسان كان الحـرب شبّت وليعـه
مـا مـنـهـم الـلي للمـواثيـق بـايـق *** العـزوة الـلي مـا تعـرف الخديعـه
خـاضوا بغـبـات البحـور الغـمايـق *** بـواسـل مـثـل الأسـود الـبـتـيـعـه
زمـلٍ تشيـل حمـولهـا والـوسايـق *** اليا باد حيل أهل المتون الهكيعـه
نـذكـر فخـرهـم بالسنين العتـايـق *** ولـو مـا تحاصيته تعـرّض لضيعه
لـو كان نسكن بالقصـور الغلايـق *** نجهد لحفض سلـومنـا والطبـيعـه
يـوم الـذي يسعى يـدور اللـقـايـق *** يجري ويبحث عن وسايط شفيعه
تـاريـخ وايـل جـلـهــا والـدقـايـق *** حفـظـتهـا واليـوم عـنـدي وديـعـه
لـكـن لـغـراّت الـمـلأ مـا اتهـايـق *** ولاني مـن الـلي كـل خـافي يذيعـه
الـعـزوة الـلي مثبـتـه بالبـطـايـق *** مـن يـوم تلكـد خيـلـنـا بـالـوريـعـه
واللي عـلى تشقلب نسبها شفايق *** هرج الخطأ لو راج ما أحدٍ يطيعه
المجـد ثابـت والنسب لـه وثـايـق *** نسب نسب مـافيـه شريـه وبـيعـه
بعض العلوم الـلي تسبب وهايـق *** تـخـدع مسامع للخـرافـه سميـعـه
البيـت مـا يـذري بـلـيـا شـقـايـق *** عـن السموم وعـن لوافح صقيعـه
والثـوب مـا يـلبس بـلـيـا بـنـايـق *** ومن يزرع الصبخى فقد كل ريعـه
نبع الرسوس الناضبه والخرايق *** مثل السراب الـلي ضحاحه بقيعـه

المهندس مشعل العبار حمد لله على السلامة ولا تعبت ان شاء الله وعودا حميدا...


الاستاذ عبدالله بن عبار صح لسانك ولسان الشاعر حمد الضوي ونعم بالجميع اسعد الله مسائكم على ريح القهوة والشعر العذب .....

شاعر وأديب ومؤرخ قبايل ربيعه

عبدالله العبار

صح لسانك وبيض الله وجهك ويعلم الله انكم تستاهلون أكثر يابو مشعل
وردك شرف كبير بالنسبه لي ولاعليكم زود أنتم اهل الوفاء
يعجز اللسان عن عبارات الشكر والإمتنان
ولكن أرجع واقول بيض الله وجهك
حتى ترضى كفيت ووفيت

دمت بحفظ الله







تحياتي لشخصك الكريم