قصائد جديده

هذه القصيدة من شعر عبدالله بن دهيمش بن عبار أهداء لأنجال الرجل الفاضل مبارك
بن فراج البرازي السهلي رحمه الله تهنئة بمناسبة زواج الشاب أحمد بن مبارك البرازي
وأخص أخيه الشيخ عبدالله بن مبارك السهلي رئيس مركز البطين في القصيم وأعمامه
وأخوانه وجميع أسرة الفراج وقبيلة البرازات واسأل الله أن يديم أفراحهم باليمن والمسرات :

يا حي كرت من الشغاميم جاني *** خلفـة مبارك مرسلينه عـيـالـه
نويت ألبي دعـوة الـلي دعـاني *** أبن فـراج المحترم طـاب فـالـه
يا ربعنا من قـدركم جيت عاني *** وبالشّعر أهني حيث هذا مجاله
أحمـد نقـدّم لـه جـزيـل التهاني *** واجـب علينـا نشاركه باحتفاله
عساه يـبلـغ مقصـده والأمـاني *** ونطلب يا عـل القرم شفّه يناله
دعيت والدعوة لهج به لساني *** عسـاه دايـم دوم مسـرور بـالـه
سلايـل مبارك عـريـب المجاني *** له الفخر من ساس جدّه وخاله
العـزوه الـلي مجدهم ما خفاني *** نسل البرازي يدركون الجمالـه
جمع البرازي من قديم الزماني *** لـهـم فعايل يـوم عصر الجهاله
بـرازات لـهـم بالمعالي مكـاني *** يـوم العـرب كلن يميـّز رجـالـه
برازات فازوا في جميع المعاني *** بـهـم صفات المرجله والبساله
الشيخ أبن لحيان بالفعـل بـاني *** يذكر نهار الحرب شب اشتعاله
حيـث أبن بشر سجـلّـه بالبناني *** وبالكتب أبن بسام دوّن فعـالـه
خزيّم أشهـر من سهيل اليماني *** شيخ ويقود جموع ماهو لحاله
يتلونه الـلي عالجوا من يعـاني *** الهارف اللي الغلث زاود هباله
يجري بوسط عروقهم دم قـاني *** ألينه أصفى من العسل بالبياله
وهـبه من المولى ولابـه مثاني *** كـرامـه مـن الـرب جّـلا جلالـه
الجـد الأول في خلاص وتفـاني *** حظي بـدم المصطفى يوم جاله
شهدت أنا بالـلي سمعته بأذاني *** عـبـر العصور موثقين المقاله
علم الفضيله عن فخرهم كفاني *** أقـولها والقـول نـذكـر صمالـه

قال الشاعر ندا بن خساف الرودسي يسند على عبدالله بن دهيمش بن عبار :

اكـتـب قـوافـي وارسـلـه في عـجـالـي *** حـيـث الأيفون يـودي العـلم وايجيب
انـظـم جـزيـل القـاف واكتـب مـقـالـي *** مـافـيـه داعـي لـلـورق والمـكـاتـيـب
أبـي انسـخ القيفـان واجـلـس لحـالـي *** مكتوب عـلى اللّمس عبر الحواسيب
اخـيـر مـن مـجـلـس غـلاط وجـدالــي *** نفحـات هـرج مـن الوجيه المغاضيب
تـلــفــظ مـلاسـنـهـم حــرام وحــلالـي *** واهـل الـنـمـايـم بالطـبـايـع لـواسيـب
تـلـقـى بـهـم طــيّـب وفـيـهـم انــذالـي *** والـلي ضميره طاب يبعد عن العـيـب
ويـن الــرجــال الـعـاقـلـيـن الـثـقـالـي *** الـلي اليا سمع الخـطأ ينفض الجـيـب
لـعــب الــورق مـلـهــاه يـا هــمـلالـي *** صدري يضيق اليا حضرت اللواعيب
دايـم سـهـارى بـالـلـيـالـي الـطـوالــي *** وتسمع زعوج الصوت بين المغاليب
لـعـب الـورق مـاهـو بـفـوز البطـالـي *** لـكـن يخـرب مجـلس الـربـع تخـريـب
ونـاسـة الـمـجـلـس عـلـوم الـرجالـي *** وبعـض البشر يحتاج دوره وتـدريـب
يـازيـن مـجـلـسـهـم بـجـنـب الـدلالـي *** وتحدثـّوا فـي ماضي المجـد والطـيـب
اقـصاص تـروى بالعـصـور الخـوالـي *** مثـل قصص جساس والـزيـر وكليـب
واسـنــد لأبـن عـبــار قــرم الـعـيـالـي *** الـقـرم أبـو مـشعـل قـليـل الـعـذاريـب
الـلـي حـفــظ تــاريـخـنــا أول وتــالـي *** أديـب وشاعـر وايتحـدّى المتـاعـيـب
كــتــابــه الــلــي ولــفــه ســر بــالــي *** ومجـلـداتـه تـطـرب القـلـب تـطـريـب
راوي وقــدره عــنــد الأجــواد عـالـي *** عـلمه ضهرمن فوق روس المراقيب
ابــن عــبــار الــقـــرم دايــم مــوالــي *** الـلي نـظـم شعـره بـمـجـد المعـازيـب
ودونـك لـغـوز بـنـظـمـهـا طـاب فـالي *** حـيثـك تـحـل المبهـمـات المصـاعيـب
وش عـذرا سـهـمهـا بـرمـح الهـلالي *** تقـذف سهـوم الموت مثـل المشاهيب
تسـوق المـوت بـدون حـرب وقـتالـي *** وترمي ودون سلاح ولهدافها تصيب
هـدفـهـا الـلـي عـنـده جـمـالٍ ومـالـي *** تـذبـح احبـاب ولا عـلـيـهـا مـطـالـيـب
وصـويـبـهـا كـنـه مـصـيـبـه هــبـالـي *** مـا اظـن يـبـرأ فـي عـلاج وتـطـابيـب
ووش عـذرا عـليـمـه بـغـيـب الليـالي *** والعـلـم يـبقى عـنـد مـن يـعلـم الغيـب
تصـدق مـع الصالح بـصدق وصمالي *** ولا تـحــب اهــل الـدجــل والأكـاذيــب
نــوب تــبــشّــرنــا بــخـيــر بـقــبـالي *** تـصـدق ولـهـا بـالـبشـايـر تـجـاريــب
وأحــيــان خـبـرهـا يـسـبـب اجـفـالـي *** من حـيث يـنذر فـي كوارث وترهيـب
والـعـلـم عـنـد الـلـه عـزيـز الـجـلالـي *** يـسمع دبـيب الـذر تـحـت السـراديـب
يـالـلـه الـلـي مـا غـيـر ظـلـك ظـلالــي *** تحمينـا بظـلـك عـن سعيـر اللواهـيب
تـرحـم عـبـادك فـي جـنـوب وشمـالي *** وترحم اهـل التقوى بشرق وتـغـريـب
وعـلـى الـنـبـي صليـت بـآخـر مـقـالي *** شـفـيـعـنـا يــذكـر بـكـل الـمـحـاريــب

قال عبدالله بن دهيمش بن عبار هذين البيتين في حل الألغاز :
لــغــزك تــراه الـعــيـن حـلّـه بــدالــي *** صـوابـهـا مـثـل شـطـيـر الـمـخـالـيـب
والـلـّغـز الـثـانـي يـا كـريـم السـبـالـي *** رؤيـا المنام الـلي تجـي لـك مـنـاديـب

وقال عبدالله بن دهيمش بن عبار هذه الأبيات :

قال من يهدي على ربعه سلامه *** يبلغ الوافي ويسهج كل حاقـد
كل منصف ما تجي منه الملامه *** ومن توقّع مـا يذمـه كـل ناقـد
من يحـوك الكيد ما يبلغ مرامه *** ولا يفيده لـو مع الزمّره تعاقـد
أحمـد المولى على عز وكرامه *** والحسود النار في جوفه تواقد
والحقير المـدح مـا يرفع مقامـه *** دام هو للطّيب والإحسان فاقد
البـغـي والظـلـم تـالـيهـا نـدامـه *** والبشر لـه هـادم اللّـذات زاقـد
والجزاء عند الولي يوم القيامه *** يوم يبعث من مقـرّه كـل راقـد

الرّجل الفاضل المقّدم طيّار متقاعد ورجل الأعمال المعروف سعود بن شحاذة بن معتاد المهيد
الفدعاني جاء ليشاركنا في فرحتنا بحفل الأبن النقيب منصور بن عبدالله العبار ومعروف عن
سعود مواقفه في أعتاق الأرقاب بمساهمات جزلة في دفع الديات وله مواقف مشرفة يعرفها
كل من يعرفه ويسرني أن أهدي له هذه الأبيات المتواضعة فأقول :
فـكـري تهيّض بالبيوت الغـزيـره *** والبال عبّر عن كوامن شعــوره
مـهـداه لـلي كـل مـاجـيـب سيـره *** مواقـفه عـنـد الـرجـال مخبـوره
يا سعـود بـك تعتـز كـل العشيـره *** حـمـر النـواظـر كلها بـك فخوره
أنـا اشهـد أنـك باللـوازم ذخـيـره *** الملتـزم ينصاك عـنـد الضـرورة
مجـهـد وتـبـذل للـرفـاقـه بـريـره *** تـبي المثوبـه والثنـاء ما تـدوره
من حـده ظـروف الليالي تجـيـره *** كـان اشتكى مايل زمانه وجوره
يسلـم جـنـابـك يـا نـقي السريـره *** لـك نفس دايـم بالحـميا غـيـوره
يالنادر الـلي مـا يوصف بـغـيـره *** جـزل العـطايا وافـياتـن شـبـوره
القـرم رغـم الـواجـبـات الكثيـره *** جـانـا وشرّف حفلنا في حضوره
واطـلب لعـل يـكثّـر الـرب خـيـره *** ما يـوم بالواجـب تـبيّـن قصوره
يـحـل صعـبـات العـقـود العسيـره *** حكيم رأي ودوم بالراس شوره