قال الشاعر \ عبدالله بن عودة الجعفري العنزي هذه القصيدة يسند على زميله عبدالله بن دهيمش بن عبار العنزي وذلك بعد أن سمع شريط التصدي للحملة المغرضة والإشاعات المضللة التي بثت من البعض للتنكر للجهد الذي بذله لقبيلته بدافع الغيرة والحسد يقول :
هـاض الفواد وهـل وبـل المعـاني **يـرزم سحابـه ثـم يـمطـر حقـوقـه
سيلـة مـن القـمة نـزل بـالطـمـاني ** ما جاء بدربـه مع طريقه يسوقـه
نـّزل رضـم ضـلـع كـبـار المبـانـي ** وقشع شجر شعبانها من عروقـه
وأخـذ سبع ليـال مـا أدري ثـمـاني ** والسيل يضرب في محاير فلـوقـه
شهرين بأرضه ما وطى مودماني ** أخضر فيها العشب واشتد سوقـه
وجيته عقب ما شوق قلبي دعاني ** لنظم البيوت اللي عجيبـه طروقه
الصفحه روضة عشب تزها زهياني ** والـزهـر بالكلمات تـمتـم نطوقـه
بهـديـه لـلي فـي عـلا المجـد بـاني ** بدر الدجى ما أظن يخفى شروقه
قـرم ضهـر صيتـه لقـاصي ودانـي ** نفسه عـلى روم المعالي شفوقـه
أديـب لـلـويـلان عـلـم وضـمـانــي ** والشـاهـد التـاريخ وثـّق حـقـوقـه
بحـث وتـعـب وأجـتهـد واستبـاني ** ودور عـن الـواقع بشتى طـروقـه
وجـاهـد وكـافـح بالقـلـم واللساني ** الـرأي حكمـه والصواب بنطـوقـه
صوت عنزه صوته جهار اعـلاني ** ومن اعترض لأسم القبيله يعوقه
شامخ سوات طويق مـا يـوم لاني ** مـا هـزه التـيـار وأخـلـف وثـوقـه
يا ريح هبي صوب جـدي ويمـاني ** ماهزضلع طويق عاصف شعوقه
يا أبـن دهيمش يا رفـيع المكـانـي ** المجـد قـمـه وأنـت منـزلك فـوقـه
تستـاهـل الـلي راب بالـزعـفـراني ** فنجـال ريح الهيل ينعـش نشوقـه
يأبى الردي عن سمعتك والهداني ** رايتـك بـيضاء والحلوق مخنوقـه
وش عاد لـو ينهق طويل الأذانـي ** زمـالـت الشيطـان يملـك خـفـوقـه
وش عاد لو جت من ربوع دواني ** راعي الحسد كبده عليك محروقه
والحسد شـّره من قـديـم الـزماني ** هبيل أخـوه أرداه وأعـطـب فلوقـه
وامجـاد فعلـك مـا عليهـا ارهـاني ** كـالـلـيـل والـنـهـار بـانـت فـروقـه
لا يضايـقـونـك خـايـبيـن المعـاني ** وأنـت الأديـب الفـذ نفسك خلـوقـه

وقال عبدالله بن دهيمش بن عبار هذه القصيدة رداً على الشاعـر عبدالله بن عودة الجعفري العنزي :
سـميـت وأدنـيـت الـقـلـم بالبنـانـي ** هاض الفكر والقاف نفهم ارموقه
حـي الكتاب الـلي من القرم جـاني ** رحبـت بـه والقـلـب يـزداد شوقـه
من شاعـرٍ صاغ البيـوت السماني ** دلا رعـد شعـره تـلاعـج ابـروقـه
عبدالـلـه العـوده عـريـب المجاني ** قـرم العيال اللي عـريقـه اعموقـه
مـن لابـةٍ تـروي شطيـر السنـانـي ** جـعـافـرة كـعـم المعـادي وعـوقـه
اليا اعتلـوا من فوق كور العماني ** رجالهـم مـا يـقـرب الخصم نـوقـه
أهـل بـيـوت مـشـيـده بـالـبـيـانــي ** ومن ضافهـم هبر الهرافي ريوقه
مشكـور يالمنعـور طـلـق اليمـاني ** مثـل القطامي يـوم تطلـق اسبوقه
مشكـور يالـلي بالحـقيـقـه يـرانـي ** شرواه مـا غمض عن الحق موقه
بالقاف يـردع مـن بقـولـه هجـاني ** ومن عـد حـق الله ما أحـدٍ يفوقـه
الـحـر طـبـعـه للخـطـأ مـا ايـدانـي ** وصدرالحليم اليا انظلم زاد ضوقه
عند القـروم الصيد قـدري وشاني ** ولاني بحـال الـلي أيجلق اشدوقـه
كـل القبـيلـة عـدهـم مـن اخـوانـي ** مخلص ولا نقبـل خـديعـه وبـوقـه
أثـبـت لشخـوص الحمـايـل كيـاني ** ولا اشكل علي اللي يجدع اعلوقه
بعـض الـرخـوم مفرقيـن العـواني ** بيـت الفخـر تفتح خلايل اشقوقـه
والـلي بـلمـات المجـالـس شنـانـي ** يـبي النسب عـلى مزاجـه وذوقـه
هو يحسب أنه يابن عوده وساني ** لا شك أنا ما شاق قـلبي عـقـوقـه
خصمي شكمته بالـرسن والعنـاني ** ومن زوّر الواقع عطيتـه لعـوقـه
يـبـغي يـحـط لـعـزوتـي جـد ثـانـي ** والكذب مالـه عنـد الأجواد لـوقـه
قـص النسـب هشـام والأصفهـاني ** مبـطي ولا تـو العـبـاد امـخـلـوقـه
الـعـلـم وضـّح كـل مـا كـان فـانـي ** والـلي مضى يصعب علينا لحـوقه
وقـولٍ بـلا مـعـنـا حـلـوم وأمـانـي ** ضريع ما يجنا الثمر مـن عـذوقـه
واللاش لـو هـو من نحانيح هاني ** تكرم عنـه قدره مثـل جـرو طوقـه

جزيل الشكر للشاعر عبدالله بن عوده مع انه ماهي غريبه منه فزعته للعم ابو مشعل لان هذي الهقوه فيه وفي كل عنزي او غير عنزي يشوف الحق ويدافع عنه واقول للعم ابومشعل ياجبل مايهزك ريح ومشكورين على هالقصايد الطيبه .

العم ابومشعل الله يمسيك بالخير وانا سعيد جدا لتواجدك في نفس الوقت اللي انا متواجد فيه واشكرك كثير الشكر على هالمجهود الجبار وجعله الله في ميزان حسناتك واحب ان اقول استمر في ما تراه هو الصح والله هو الموفق واقول انه لا تقذف بالحجاره الا الشجار المثمره وحشاك من القذف ، ولي طلب اذا امكن ان تزودني باي مستجد يحصل عندك في موضوع ال الزعين في البوكمال واخيرا اطلب من الله ان يمدكم بثوب الصحه والعافيه ودمتم .



ابنكم الداعي لكم بطول العمر
العبدلي 73