( قصائد متبادلة بين محمد بن فرحان بن عبدالله العفري
الشملاني وعبدالله بن دهيمش بن عبار الفدعاني العنزي )

قال الشاعر محمد بن فرحان بن عبدالله العفري الشملاني هذه القصيدة يسند
على عبدالله بن دهيمش بن عبار :
راكب الـلي صانعه ماهـو يهودي *** صانعـه يعـرف بجـّده واجتهاده
وارد اليابـان مـتـقـن بالجـهـودي *** راكـبـه يـبهـج ضميـره بالقـيـاده
كل من هـو جّـربه وسط النفودي *** يعطي اللي صممه شكروشهاده
فكس لند كروز مركاب الأسودي *** مركب الـلي مـا ايتحـرى للزياده
ما شراه الـلي تبهـدل بالقصودي *** ولا يسومه من يعسرنّه اقصاده
لا دعست البنص وافتر العمودي *** يسبق الحـر النداوي في هـداده
ما يعبأ غـيـر من حـمـر الوقودي *** صافي الممتاز يسرع من وقاده
لا ركـبـتـه مـا تـمـل ولا تـنــودي *** غرفت اللي جهزت تزها القلاده
الفخـامـة كـلهـا والـلـون عـودي *** فـكـه الـلـه شـر راعين الحساده
كنـه الـلي يعطي العـاز الجنودي *** ضابـطً قـدم الكتايـب مـن افـراده
ولا كـنّـه شيخ للسـربـه يـقـودي *** سار قـدم الخـيـل متـعـلي جـواده
سار يبي العاصمة دار السعودي *** صوب أبن عبارهو منهات مـاده
هو فخـر عناز ساسه والعمودي *** مـا يجامـل من تمـادا في عـنـاده
أبو مشعل بالكـرم طبعه يجـودي *** شهم متواضع وفيه الطيب عاده
رمـز للـويـلان يا نسل الفهـودي *** جعـل مـن عقبـك بالجنـة مـعـاده
وافي بالحيل يا عـرب الجـدودي *** يا عسى ايامـك مسرات وسعاده
ما ينال العـز من يهوى القعودي *** قـلتهـا والعـلـم نثبـت لـك وكـاده
كـل طـيـّب مـا يحسـب للـنقـودي *** عاشق فـعـل الكـرم داخـل فـواده
نـعـم يا حـلال عسرات العقـودي *** انت كل الطيب راسك هـو سناده
يا شبه حر على الصيد مهدودي *** اشقـر ولا تـاجـد بـريشه سـواده
لا شهل بالجـو يجتـاز الحـدودي *** شاف حجم الخرب يشبه للجراده
حين يكفخ في جناحه بالطـرودي *** كـل ما هدوه شاف الصيد صاده
فكه المولى من عيون الحسودي *** كـان هـده صاحبه يشفي مـراده
يا بعـد عـفنن يعـلـه مـا يـعـودي ** مـا يشب الـنـار من بخلـه بـزاده
أن تكلّم هـرجتـه تغـثي الكبـودي *** أخـو مـرّه مـا يحوّل عـن شداده
امدحك والقاف مابي لـه ردودي *** يا فـخـر عـنـاز قـافي بـك أشـاده
أطلب الله يا عسى عمرك يزودي *** جعل ما توصل طبيب ولا عياده
ولك سلامي عد بـراق الرعودي *** وعدد منبوت الخزامى بالحمـاده

وقال عبدالله بن دهيمش بن عبار العنزي هذه القصيدة مجاراة لقصيدة
الشاعر محمد بن فرحان العفري الشملاني يقول :
راكـب الـلي مـا تعـثّـر بالحفودي *** يطـوي القـاع الدماثـه والجـلاده
مـا تعـبّث بـه حلابيـث الهنـودي *** ولا دخل عند المحرّج في مـزاده
نوعه الفكسار والسعر محدودي *** يشترونـه حـيـن ورّد مـن بـلاده
فـيـه ذارب مبلـغ القيمـة يكـودي *** مـن قـرأ تسعيـرتـه يلـزم حيـاده
يجـذب الـونّـه ويلطـم بالخـدودي *** تلتهب مثـل السعايـر فـي فـواده
وده بـمـثـلـه ولا عـنـده نـقــودي *** يـوم يصرف مبلغه كبر الوساده
من فضت خزينته عنـه محدودي *** منـوت الـلي قيمته يملـك أيجاده
يستـوي للـراجحي ولا الرشودي *** ومـن تـكـّنى بالمعالي والسعاده
منظـره سبحان خـلاق الوجـودي *** والكفر زرعه مثل شوك الكداده
يشبه اللي نقضّت شقر الجعودي *** يلفـت الأنـظـار كـنـه زول غـاده
من بريـده مرسله يحمـل ردودي *** يوصل الـلي رتّب المعنا وجـاده
قاف محمد مثـل نقروح العدودي *** نقحه يخشى من النـاس انتقـاده
افتخر في صاحب القلب الودودي *** يبتكر جزل القوافي من اعـداده
من جوابه بـاح مكنون السدودي *** والذكي شرواه ما يـلـزم ارشاده
محمد الفرحان شبل من الأسودي *** مـن حمايل ما بهم خبث وقـراده
عـزوتـه بالطايله تـرقى السنودي *** مـا تجـد فيهم خـمول ولا بـلاده
للصديق أحلامن مشال الصعودي *** بـس لعداهـم بهـم كيـد ونـكـاده
بدّت العـفـري من خيـار البدودي *** طـيبـيـن ومخـلصيـن بـالـعـبـاده
دايـم يـحـيّـون بـقـبـال الـوفـودي *** ومن هجد بالليل يفرحهم هجاده
قلتها وعرف العفارى كل فـودي *** الظـفـر والجـود فيهـم والجـواده
نـقـوة رجـال مثـل شـم الحيـودي *** كل منهم ورث طيبه من اجـداده
يا عسى يفداهم العفن الحقـودي *** من هقابه خـاب ظـنّـه وأعتقـاده
الفخـر ما ياصلـه خطـو الهبودي *** لـو تـفـوّه بالـريـاسـه والعـقـاده
ماينال المجد من يهوى الرقودي *** لـو جدوده من خيار القوم ساده
عن مواجيب الرفاقه به صدودي *** أنحسـل والـنـار تـالـيـهـا رمـاده
والزمان اليوم من حظ الشرودي *** صـار لأصحاب التمّلق والربـاده
في زمان اليوم يا كثـر الحشودي *** كـل مسلم ينتظـر حـرب الأبـاده
الأعاجم سلحـّت حـوث الـزيـودي *** والنصيري يلـزم السنّه جـهـاده

السلام عليكم ورحمه الله وبركاته



صح ألسنتكم قصيده نفسها طويل ومن أعلام شعر أبداع وجزاله

صح لسانك ولسانة يا أبو مشعل
جزل كما عهدناك أمدك الله بالصحة والعافية وأطال بعمرك
تحياتي

ما ينال العـز من يهوى القعودي *** قـلتهـا والعـلـم نثبـت لـك وكـاده
كـل طـيـّب مـا يحسـب للـنقـودي *** عاشق فـعـل الكـرم داخـل فـواده

ماينال المجد من يهوى الرقودي *** لـو جدوده من خيار القوم ساده
عن مواجيب الرفاقه به صدودي *** أنحسـل والـنـار تـالـيـهـا رمـاده

سلمتما ،،

أبدعتما ،،

فالوصف دقيق ،، واللفظ رقيق ،،

والأسلوب مدهش ،،، والتعبير منعش،،،

فحقيقة المتلقي ـ القارئ ـ حرك مشاعره واهتز وجدانه واشتعلت جذوة أحاسيسه ،،

وقفة أدبية

( إنما الشعرما أطرب وهز النفوس وحرك الطباع )

تقديري لكما ،، واعتزازي بكما ،،

شكراً للأخوة حسن العصيمي وهزاع صباح الخمعلي وعبدالله الموسى الخرشاوي على مروكم وأطلاعكم وتشجيعكم لنا في بدع هذه القصائد وحيّاكم الله

محمد العفري
عبدالله ابن عبار
بارك الله فيكم قصائد رائعه ونفتخر فيكم يا عيال وائل

محمد العفري
عبدالله ابن عبار
بارك الله فيكم قصائد رائعه ونفتخر فيكم يا عيال وائل

الفخـر ما ياصلـه خطـو الهبودي =لـو تـفـوّه بالـريـاسـه والعـقـاده
ماينال المجد من يهوى الرقودي =لـو جدوده من خيار القوم ساده
عن مواجيب الرفاقه به صدودي = أنحسـل والـنـار تـالـيـهـا رمـاده

صح لسان الأخ الشاعر محمد الفرحان العفري ولسانك يا أديب وعزيز وايل ..

أبيات لها معانٍ بعيدة وسامية بسمو من قالها فأنعم وأكرم بالجميع والعفارى عز الله خير نقوة ومن أعز العوائل العنزية الذين نفخر برجالاتهم وبما يحملونه من مبادئ وحمية وحب للقبيلة شهد لهم بها كل من عرفهم وقاربهم وجاورهم ، وصح لسانك يا أديب وائل على هذه المجاراة التي حملت في طياتها كل ما يحث على المعاني الطيبة وعلى التمسك بالطيب وبالعادات والقيم الكريمة ولا نستغرب منكم هذا السمو فأنت في كل موقف ما زلت تحث وتذكر الجميع وتحيي فيهم روح التماسك والتكاتف والتفاني في سبيل القبيلة وأبناءها برجاحة عقول الحكماء وببُعد نظر العقلاء وبقلب الأب الحاني على أبناء عشيرته وجعلت من نفسك فداءً لهم أمام قوى لا نشك أنها هرمت وخارت وخيّب الله مساعيها لأنها أمام الحق والصدق بلسان ويد أديب وائل المخضرم حفظه الله ورعاه ..

الأخوة : صاعد المصلوخي وأبو أريج ومحمد بن دوهان شاكراً ومقدراً أشادتكم بهذه القصائد وأقدّر مروركم وأطلاعكم وهو شرفاً لي حياكم الله وبيّاكم