قال عبدالله الموسى الخرشاوي هذه الأبيات يسند على عبدالله بن عبار :
أبتديت بذكـر ربي وأسأله يرضى عـليـه
أسأله يحفظ لساني والفرج يوم الكروب
من يسب أنسان مثلك عاجزٍ لا يصير زيه
اللسان يبيّن الـلي حقـدهـم وسط القـلـوب
أقـرأ الـتـاريـخ تـلـقـا كـل صـادق لـه أذيـه
سنة الـلـه في عباده الأذى مـن كـل صوب
أنقتـل هابـيل غـيـلـه دون ذنـب ولا خـطيـه
والنـدم قـابـيـل شـالـه حـامـل كـل الـذنـوب
ومن بعد هـذا محمد يوصف بخيـر البـريـه
قيـل كاهـن قيـل ساحـر قيـل كـذاب ولعـوب
بـان صدقـه وأتـضح كـذب أبـو جهـل وأمـيـه
والـلـه أن الحق واضح يعـرفه كـل الشعـوب
تـأتـي الأبـطـال بـعـده عـادل بـيـن الـرعـيـه
جـاه قـتـال مجوسي عـن مـراده مـا يـتـوب
أن بـغـيـت الـرد دحـه قـلـت عـزوه وايـلـيــه
جاتـك جموع تداحـم من شمال ومـن جنـوب
وأن بغـيـت الـرد كـلمه مـن زمـان التـغـلبـيـه
لو مشد القاف صخره عنـد ابـن وايـل يـذوب
وش تـبـي أمـر تـدلـل لـو تـبي هـذي وذيـــه
بك نشوف الحـق واضح بـيـنـه كـل الـدروب
قال عبدالله بن دهيمش بن عبار رداً على عبدالله الموسى الخرشاوي :
يا أبو فهد دام عـزك عشت يا راعي الحميـه
كـل مـنـطـوقـك تـمـام وأنـت رجـّال محسوب
كـل مخـلص للقبـيلـه فـزعـتـه يـالـقـرم لـيـه
وأنت تدري كل باطـل صاحبـه دوم مغـلـوب
من فضل مولاي مجهد وأكتب أمجاد السميه
لـو تـشـدّق بـالـمـجـالـس كـل هــّذار وكـذوب
يا أبـو فهـد مـا نلـوم الـلي مقـاصـدهـم رديـه
ما يهم الهرج الأجوف من بعض عوج الدروب
من تجمّع في ضميره طبع حسد وشين نـيـه
ما يقول أدخل على الله ولا يعرف نفض الجيوب
بـارعـيـن بـالـمهـايـط والـنـوايـا شـقـلـبـيــه
كل منهم يحسب أنه عن بـني جنسه يـنـوب
الردي لـو عد نفسه مثل الـلي حمى ضريـه
الزعيم أخو المهلهل أو مثـل شيخ العتـوب
يدركون الناس وصفه بالشبـه مثـل الحطيـه
مشتقي بعيوب غـيـره والبـلا بـه والعيوب
خـاب مذموم السجايا صاحـب النفس الـدنيـه
من عمل معروف يمدح والردي دوم مهـزوب
بالـرجال أنـذال وأيضاً فيهـم شخوص شفيـه
وفيهـم هدوس وزلايب كنهم بالوصف عـوب
وقال عبدالله الموسى الخرشاوي هذه الأبيات يسند على عبدالله بن عبار :
أحـب ربـي عـظــيـم الـشـان وأجــلــــه ** فـضـايـلـه مـا تـعـد وكـيـف نحصيهـا
أجـل نـعـمـه وهـبـنـا الـديـن والـمــلــه ** مـن أمـة المصطـفى للـحـق هـاديـهـا
يـا فـخـر وايـل يا أبـو عـدنـان عـبـدالـلـه ** مهما مدحتك أفعالـك ما أقـدر أوفيهـا
قـطـفـت أزهـار الـمـراجـل كـنـهـا دلـه ** ومـديـت فـنجـالـهـا لـلي طـمـع فـيـهـا
منـظـوم شعـرك بـه التـاريخ مـا أمـلـه ** أخـبـار نـاس مضت لولاك ما أدريهـا
يـالـجـهـبـذ الـفـذ يـا حـامـي عـريـنـلـه ** يـالـوابـل الـلي هـمـل وأنبت قـوافيهـا
الوصف كـايـد وسامحـني عـن الـزلـه ** بك أنظم أبيات فـيـهـا النـفس أسلـيهـا
ريـان جـنـة عـدن صـومـك لـك يـدلــه ** وفـي ليلـة العيـد ضاعف لك حسانيها
وقال عبدالله بن عبار هذه الأبيات رداً على عبدالله الموسى الخرشاوي :
يا أبـو فهـد الله يجيرك عن العـلـه ** مولاك نفسك على الأيمان قـاديها
عادتك من طلعتك ما ترافق الشله ** هل الطغى والغوى حاشا تخاويها
على الفخر والنقا وقتك مضى كله ** وعـن الخطـا كلمتك دايـم تـنقيهـا
الطبـع يا مسنـدي بالعـالـم اجبـلـّه ** والـلي يريد العـلا يصعـد عواليهـا
شرواك فيه أعتزي ولاالردي خله ** أزله خشاش البشر ماني معابيهـا
من خط حرف الغلط نرميه بالسله ** لو شفتها أطشها وأقلع مضاويها
طبعي حليف الردى ما أرافقه لـلـِه ** والفعـلـه الطيـبـه أفخـر بـراعيهـا
قلته وعقد البلش عند الولي حـلـّه ** مولاي رب المـلأ والخلق باريهـا
قال فرج بن عوده الجعفري هذه الأبيات يسند على عبدالله بن عبار :
أنشدك بالـلـه قـل لـي وش تـقـول ** يا زعيـم الشعـر حـلـل لـي مقالي
من مشى بالنم هو شخص مهبول ** وأن نصحتـه قال ماشي بعتـدالي
كيف عقله صار به زيـف وميـول ** وأن نظـرته قـلت ذا رجـل مثـالي
هـقـوتـك يـا مسنـدي نـلـقـا حلول ** لأهـل الـنمـات يـا قـرم الـرجـالـي
والمسائل شرحها صعـب ويطـول ** بس أبعـرض شي منهـا بعتجـالي
لاجلسوا على الصحن مثل الفيول ** ويـوم أسمع هـرجهم ينسر بـالي
وبالشـدايـد مـا يشيلـون الحـمـول ** ويجحدونك لـو تـبي منهـم ريالي
يا أبو مشعل قدرهـم مثـل النعـول ** لا تـحـسـب لـلـردي أول وتـالـــي
وأنت تكرم يا عسى عمرك يطـول ** عـنـد ربعك يا رفيع القـدر غـالي
لـك مـكـانـه بالضمـايـر مـا تـزول ** لـو تـزول الراسيات من الجبـالي
تـم قـافـي وأنتظـر مـنـك الحـلـول ** رد لـي بـالـحـال لا تـتـرك مـقـالي
قال عبدالله بن دهيمش بن عبار هذه الأبيات جواب فرج بن عوده :
يا بن عوده ما أنت بالمعنا جهول ** تفهـم المقـصود ولا فيهـا جـدالي
كـب مـن ضـم الخـطـايـا بالحثـول ** واسهج اللي نـم فـوقه رب والـي
كـل سامـج مقصـده فتـق الخـلـول ** لا يهـمك حيث ما هـرجه صمالي
هـافـي الـذمـه لـه أهـداف وميـول ** بالمجالس يهترش صوتـه يـلالي
مـا يغـثـك غـيـر صاحـبك العـيـول ** بس يطعـن بـك اليا جـالك مجالي
السديـري مـن قـبـل ستـيـن حـول ** قـبـلـنـا وش قـال بالخـل المـوالي
وأحمد الـلـه صاحب الظلم مغيول ** والـردي كوبان مـا طـال المعـالي
الـوفـاء مـا تـاجـده عـنـد الـبغـول ** والمـراوغ والحـيـلّ طبع الثعـالي
والـثـعـالـي مـا تـشـبـّه لـلـشبــول ** والرخم لو طار مـا صاد الجـزالي
والمصاعـب مـا يكـابـدهـا الملـول ** ولا يـدنـّى للثـقـل كـود الجـمـالـي
وقال فرج بن عوده الجعفري هذه الأبيات يسند على عبدالله بن عبار :
يا أبو مشعل وش تقول وش تخلي ** كـل يـوم تسمع بدعـوى جـديـده
أنشـدك بالـلـه وأنـت اليـوم قـل لي ** وش يريد اللي يبي شب الوقيده
صاحبـك مـن مـا جـرالـه مستغـلي ** هايـم ومحتار من نصب المكيـده
ليـه بعض النـاس يـدرق ويختـلي ** فـي دعـاوي مابها والـلـه مفيـده
كان قصـده يا أبـن عـبـار يحـبـلي ** القصيـده مـنـه تلـقـفـهـا قـصيـده
بس أقول أبـي أتـركه خـلـه يـولي ** ما نبي لـلي النـار حطبها يـزيـده
ولا نطـاوع كـل مـن عـقلـه يظـلي ** وكـل ظـالـم يـا عسى ربـي يبيـده
وأنـت نجـم سهيـل بيّـن ومتـعـلي ** والشعـر فـي كـل طـاروق تجـيـده
ويش ريـك يا سنـد راسي وظـلي ** بالعـجـل مـردود قـافي لـي تـعيـده
أنـا أعطيتك من كلامه مـا وصلي ** ويـذكـر أنـه مـرسل يـمـك بـريـده
والخـتـام أطـلـبـك حـالاً لـي تـدلي ** في طـريـقـه تجعـل الفتنـه بعـيـده
قال عبدالله بن دهيمش بن عبار رداً على فرج بن عوده الجعفري :
مـرحبـا حيـيـت يالشغـمـوم يالـلي ** شاعـر وفهمان وأخلاقـك حميـده
يا أبن عـوده كـل قـولـك جـايـزلي ** قـلتهـا واشكـرك يالـقـرم الوليـده
أبي اعطيك الشور يا زبن المتلي ** عـذ بالـلـه من الشياطين المريـده
لا تـعـدى الحـق لـو مـقـدار مـلـي ** خابـر اهـدافك يا بن عـوده بعـيده
كـان ودك يـا زمـيـل الـعـون حلي ** أترك اللي مقصده شضي البديـده
الـقـرابـه يـالـسنـافـي كـان زلـــي ** أسمح وتلقـاه فـي ساعـه شديـده
لـو تـجي تـلـقـاه بـقـبـالـك يـهـلي ** تكسبـه بـالحـلـم والأريـا السديـده
يـا فـرج مـن عـز ربعـه مـا يـذلي ** وبالعـفـو والحلم وصتنـا العقيـده
تعـلـم أن الـقـلـب لا صـدى يحـلي ** لـو تجيب فلاش ما يمحى صديده
والـزرد يـحـتـاج لـه رمـّان بـلــي ** لـو كـربـتـه حـيـل تـفصّـم حـديـده
جـاك شوري وأنـت للـواقع تـدلي ** أحتسب وأصبر عسى أيامك سعيده
وقال فرج بن عوده الجعفري هذه الأبيات يعاتب زميله عبدالله بن عبار
قـال مـن عـبـر ضميـره ما طـرالـه ** يالـلـه أنـي طالبـك يا رب خيـره
يابو مشعل شف زميلك كيف حاله ** يالزميل اللي اليا حرت استشيره
نـار قـلبي يحرق الجوف اشتعالـه ** صار فكـري ياظنيني بالف حيـره
شـف زميلـك منشده يالقـرم بـالـه ** منتـظـر للـرد وعـيـونـه سهـيـره
يالـزميـل أرسلت لـك مـني رسالـه ** وأحتريـت الـرد في مـده قصيـره
مـا أنـت لـي يالوايـلي بالـرد زالـه ** تشتغـل ببحـوث وأعـمـال كثيـره
هـات ردك وأنـت كسّاب الجمـالـه ** يا عسى المرسول يأتيني بشيـره
قـالهـا الـلي طيّـب الـرد أحتـرالـه ** شعـركـم يـفـوح ورده مـع عبيـره
قال عبدالله بن عبار رداً على فرج بن عوده :
جت رساله من زميلي طاب فـالـه ** فـرج العـوده مـن قـروم العشيره
الـزميـل القـرم لـه حـق الـزمـالـه ** بالصداقه صادق وصافي ضميره
صافي النيـه وبـه طيـب وجـزالـه ** يـدرك الـطـولات نـقـي الـسـريـره
يا عسى يـفـداه مـن طبعـه نـذالـه ** ما سمع منطـوق عميان البصيره
أبي أقسم لـك بالولي جـلا جـلالـه ** ربـنـا الـلي مـالـنـا معبـود غـيـره
يشهـد الـلـه مـانـي لشرواك زالـه ** لكن ظروفي يا أبن عوده عسيره
مـن يقصـر عـادتـك تـرفـا خمالـه ** أسـمـح الـزلات يـا زبـن العـثيـره
وقال فرج بن عوده أيضاً هذه القصيدة يسند على عبدالله بن عبار :
يـوم أن كـلـن حـط راسـه بـكـمــه ** اسهر وهمي ضيّق الصدر والبال
كلن يابو مشعل شكا من أبن عمّه ** وكلن قريبـه صار سلطه وغربال
لـو الـقـرابـه فـيـك لـحـمـه ودمــه ** لابـد ما يلحقك فـي شين الأقـوال
يشمـت عـليـك وفـرحتك ما تهمـه ** سود القلوب اللي بها الحقد يجتال
الطيـب واجـد والبشـر مـا نـعـمـّه ** كم من قرابه له على الطيب منزال
لاشـك كـلـن يـشتـكـي كـثـر هـمـه ** وعايش بهدنيا عـلى كثـر الآمـال
وأنـت الـذي مـا تستحـق المـذمـه ** يا مسطـر بالمجـد تاريخ الأبطـال
شاعـر وأديب العـلم واصل لجمـه ** بـدر الدجـا مـا غيبه عج واخيـال
والمعتـرض يا جـعـل بقعـا تخـّمـه ** لاكف شر ولا صنع زين الأعمال
عساه بأمـر الـلـه تجي لـه مطمـه ** وتنهي حياته بعد ماتنهي الأموال
وأختامهـا صلوا على خيـر الأمـه ** نـبـيـنـا الـلـي للـثـقـلـيـن مـرسـال
وقال الشاعر فرج بن عوده الجعفري يسند على عبدالله بن عبار :
وينك يا أبـن عـبـار غـيـبـت عـنـا ** الظاهر أنك صرت صاحب مشاريع
تـجـارتـك فـي أي حـي بـوطـنــــا ** يا الـلـه عسى لك بالتجاره منافيع
عـسـاك تـسعـد يالـرفـيـق وتـهـنـا ** وأنـا أدري أنـك مـا تدور المنافيع
أنـا لـشـوفـك كـل يـوم أتـمـنـــــــا ** واليـوم شفتـك يا بـعـيـد المـراميع
وأنـسر بـالـي يـوم شـفـت المعـنـا ** وسط الجريـده كاتـب لـه مواضيع
يـا مـسنـدي شانـت وقـايـع زمـنـا ** بعـض الأمـور تقطع القلب تقطيع
يالـوايـلي أنـت الفخـر وأنـت مـنـا ** وحـنـا لخـصمك بالشدايد رواديـع
واخـتـامـهـا مـنـي سـلام يـثـنـــــّا ** وتحـيتي لـك وأعـتـرافي وتـوقـيع
قال عايض بن حامد السلمي هذه الأبيات يسند على عبدالله بن عبار :
سـلام مـنـي عـد وبـل الـمـزابـيــر ** غـر الـمـزون الـلي هـللهـا تصبـّه
يا شاعـر الشعـار صبحـت بالخيـر ** لـك عـنـدنـا بالقـلب قـدر ومحبـه
حيثك من اللي حظهم يجدع الطيـر ** وسوه على اللي نار حقده يشبه
صيتك طلع في نايفـات الشناصيـر ** وبعيد عـن هـرج الـردا والمسبه
وقال عبدالله بن عبار هذه الأبيات رداً على عايض بن حامد السلمي :
مشكور يا نسل الـرجـال المناعيـر ** عسى الـذي شـرواك يـاقـاه ربـه
مشكـور يا ريـف البـداه المساييـر ** يـفـداك مـن شال المخـازي بعبـه
الخايـب المـذمـوم لـو جـده الـزيـر ** يسهج خطات الموجبه ما ايتنبـه
لاخير بالـلي مـا يشاور ولا ايشيـر ** وش عاد لو من شاف زوله عجبه
وقال عايض بن حامد السلمي هذه الأبيات يسند على عبدالله بن عبار :
الـوقـت قـد عـّذب مشاكيل واشخـوص ** وكـم واحـدٍ يالـقـرم كــاده وحـاصـي
ولا أنت غواص البحر تعرف الغـوص ** يـالـماهـر الـلي شـاف دره وغـاصي
ياللي عـلى بعض الشواعير عاقـوص ** قـافـك كـمـا سيـف شـديـد القصاصي
أمدحك وأمدح لابتـك خص مخصوص ** أهـل الشجـاعـه طـيـبـيـن المـنـاصي
من نسل لابـه تـتعب الخيـل والعـوص ** يوم السيوف ويوم ضرب الرصاصي
ربـعـك نهـار الـلازمـه كـلهـا حـروص ** نـعــم بـكــم يـالـلـيـث دانـي وقـاصـي
وكـل القبـايـل مابهـا عـيـب وانقـوص ** كـلـن بـمـاجـوبـه شـديـد الـحــراصي
قال عبدالله بن عبار هذه الأبيات مجاراه لأبيات عايض الحامد السلمي :
يا عـايض الحامـد نجـاوبـك بنصوص ** بـدع القـوافـي مهـنـتي واخـتصاصي
ولـو كان ما رديت لك قـلـت مرخوص ** وأنت اتعرف يا طير شلوى اخلاصي
من عادتي عن واجـب الـرد ماحـوص ** ولانـي مـن الـلي فـي مبـاديـه لاصي
أرسلت لي جملة عـبـارات وانصوص ** ألـذ مـن ذوب الـعـسـل بـالـقـلاصـــي
يفداك من ينهـج على منهج الصوص ** ولو تنصحه عـن مسلكه قـال عاصي
الحـر شفـتـه يا فـتى الجـود بقـفـوص ** فـي كـل ديـره قـيـمـتـه بـانـتـقـاصــي
والطير اللي ريشه منتـف ومقصوص ** لـو هـد خـامـل مـا يـصيـد الصواصي
قال عايد بن نوار الحوسي هذه الأبيات يسند على عبدالله بن عبار :
عـزالـلـه أنـك يا أبن عـبـار غـالي ** هذا الصحيح بدون شكات وظنون
طيـبـك سبقهـم بالسنيـن الخـوالي ** ولا يسمع العاقل مهاريج مجنون
تـفـداك قـوم بـالـمـجـالـس تـلالـي ** أهل لسن وعقولهم دون في دون
أمض وتبيّن فوق روس العـوالي ** ما دام لك عـزوة فداعين بالكـون
جواب عبدالله بن عبار رداً على عايد نوار :
يا أبن نوار أخبـرك بالـلي جـرالي ** حيثك من اللي للخطأ مـا يدانـون
حيث الـذي شرواك يوقـف بجـالي ** ويجزع اليا شاف الزلايب يسبون
وأخـبـرك كـل أقـوالـهـم هـمـلالـي ** مهما بلمـات المجالس يخوضون
كـل الـعــلـوم الـزايـفـه لـلـزوالــي ** والخايب اللي يلفظ الزيف ممهون
قال محمد بن عمر الأشجعي يسند على عبدالله بن دهيمش بن عبار :
يالـلـه يا محيي العـظـام المقابـيـر ** يالـلي كونـت الكـون بستـة ليالي
يالخـالـق الـرازق عـليك التياسيـر ** مبداي باسمك يا عـزيـز الجلالي
ومن بعد ذكر الـلـه والي لمقاديـر ** سر يا قلم وأكتب على ما طرالي
ألـذ وأحـلا مـن دريـر الـمـبـاكـيـر ** وضـح الـبـكـار وربعـن بالشمالي
يرعن قـفر عشب يميل بنـواويـر ** بـالـبـاعـجـه ومـعـيـلـه والـهـلالي
أكتب سلامي وأرسله بالمحاضيـر ** بلحظات ياصل لي عزيز وغـالي
قـلته وقولي صدق ما فيـه تزويـر ** للي على الطولات حاش المعالي
مـني لأبـو مشعـل تحيـه وتـقـديـر ** الوايلي قـدره مـع الـنـاس عـالي
مـا ولـف التأليـف لأجـل الدنـانيـر ** ولا غيّر الواقع من أجـل الـريالي
ولا قال يا جحدر تراك سالم الزير ** أديـب عـالـم مـا ايتخـبـط خـيـالي
بصدق الحقايق سطر المجد تسطير ** مابـه رياء مـزكيـه مـثـل الحلالي
واخـتـامـهـا مـني تحـيـه بـتكـريـر ** لعبدالـلـه العـبـار وافـي الرجـالي
قال عبدالله بن دهيمش بن عبار مجاوباً على محمد بن عمر الأشجعي:
جـتني رساله من سليل المنـاعيـر ** محمد بـن عـمـر كـريـم السبـالي
المكـرم الـلي مـا يهـاب المخاسير ** يـذبـح عـناتيت السمان الجـزالي
يشوم عن ذبح الصخل والقراقيـر ** ولا يذبح ألا من الكباش الدغـالي
أنا أشهد أنه بالصحن يبـذل الميـر ** شوفي بعيني ما هـو قـول يـقالي
يا أبـن عـمـر كفيت شر العـواثيـر ** عساك بحفظ اللي على الكون والي
يعـود عـيـدك بالمسـرات والخـيـر ** وأشكرك يا نسل الرجال المـدالي
مـهـمـا نـعـبـّر بالعـبـارات تعـبيـر ** مـا أقـدر أعـد أوصافكم بالكمـالي
سلـّم عـلى ربعـك طـوال الأشابيـر ** كـل الجـميـع كـبـارهـم والعـيـالي
وأخص أبـو نايف ربيع المساييـر ** حـّران قـرم ولا بـطـيـبـه جـدالـي
مـريـت بـيـتـه ثـم جـتني حواشيـر ** والـلـه عليـم بـكـم طـاري بـدالي
الـقبـه الـلي كـنهـا صـومـعـة ديـر ** لاحظت مجلسها من الربع خـالي
عـقـب الخميعـا والـدلال المباهيـر ** لا جـيـتهـا صـديـت وأغـتـم بـالي
قال الشاعر متعب بن عيد بن رهق الغضوري :
مادام مالي مـن وراء المـدح مقصـود ** مـالـي هـدف غـيــر الـغـلا والـمـعــزه
أبي أمدح اللي بيّض الـوجه يا سعـود ** الـلـي عـن دروب الـرديـه مـنـــــــــزّه
فـي كـل مـوطـن لـه عـلامـات وشهـود ** عـيـال وايـل كـل أبـوهـا تـعــــــــــزه
الـديـن والأخـلاق والـشـعـر والـجـــود ** تـلـقـاه فـي رمـز الـوفـاء كـل حـّـــزه
عـبـدالـلـه الـعـبـار يـرحـم هـاك الـعـود ** الـلـي نـجـب راسـه ولـلـمـجـد لـــّـزه
قال عبدالله بن عبار هذه الأبيات رداً على الشاعـر متعب بن عيد الغضوري :
يـا متـعـب مـا عـليـك يـا مسنـدي زود ** يـفـدونـك الـلي نـفـوسهـم مـشـمئـزه
مشكـور يالـلي مـا مـشى درب منقـود ** ولا جـامـل الـلي من العـرب يستفـزه
كـان الـذي سـويـت يـالـقـرم مجـحـود ** نـقـفـل عـلـى كـل الـوسـايـل بـــــرزه
أقـولـهـا ومـن يـظـلـم النـاس مـقـرود ** ولا أشكـل عـلي الـلي مخـيـلـه يـغـزه
عـلـم الـفخـر يحتـاج لـه بـذل مجهـود ** وفـرخ الصقـر مـا يـقهـره فـرخ وزه
قال الشاعر منصور بن عبدالله العبار :
يا أبـوي تكـفـا لا تـلـقي لـهـم بـال ** ذولا الحسد والحقد أحرق قلوبهم
لا تكتـب الأشعـار بأسباب الأنـذال ** ومهما كتبوا ماأحدٍ قـرأ مكتوبهـم
يوم أنت تمشي تقطع آلاف الأميـال ** هم توهم يمشون يا أبـوي دوبهـم
يـبـقـون بـالـوادي وتـصعـد للأجـبــال ** لا حـقـق الـلـه الـولـي مـطـلـوبـهـــــم
أنـت الـذي يـا أبـوي تـبـحـث ولا زال ** وأهـل الـرذيـلـه يـكـشفـون عـيـوبـهـم
أنـت الأصـل لا تستمع بعـض الأقـوال ** لا تـكـتـرث لـو أرسـلـوا مـنـدوبـهــــم
قال سعود بن ضفيدع يسند على عبدالله بن دهيمش بن عبار :
يا أبن الرجال اللي بعيده هقاويـك ** أكـفـخ بجنحـان السعـد لا تـهيـبي
الـلـه يـعـزك ثـم يـخـذل مـعـاديــك ** كانه من أقصى الناس ولا قريبي
اللي يدس الراس وبالهرج ياذيـك ** عـلى الـرزالـه لحيته ليـن شيـبي
لا يهـز وجدانك ويضعف مـباديـك ** نبح الكلاب اللي بها الحقـد تيـبي
قال شايز خليف الضوي الجعفري :
يا حـيـد يالـلي كـلـنـا اليـوم دونـه ** وش عادحنا دونك اليوم وش عاد
كم شاعـرٍ دونـك تخـالـف اظنونـه ** وكـم شاعـرٍ يـبغي ينولـك ولا فـاد
مثلـك شريـف والعـرب يحتـرونـه ** يا جـامـع كنـز العـزاوي والأجـداد
تـكـفـى تـشـرفـنـا ولالـك مـهـونـه ** يا جـود حـظي كـانـه بجـيتك جـاد
قال الشاعر جميل بن محمد الحوسي هذه الأبيات يسند على عبدالله بن عبار :
يـالـلي تـبي تعـتـاش لـو هـو بـديـنـار ** أرضك محـل وأنت تحلم عايش زيـف
تحـفي قـدم رجـلك وتخـثع بالأحـجـار ** وتبحث عن المحار في شاطي السيف
تطـرد سراب القيض ظـامي ومـنهـار ** تبغي تبل الـريق عـن حـامي الصيـف
تبحث عن الشهرة وتلعب بهـا اقـمـار ** كـنـك عـن الـويـلان كـاتـب وحـّريـف
أنسـاب وايـل دونـهـا سيـاج واسـوار ** حماهـا أبـن عـبـار عـن كـل تحـريـف
عـجـّز هـل التـأليف بجهـود واصخـار ** هـو الـذي عـّذاه عـن كـل تـزيـيــــف
الـزيـف يـبـقـا زيـف يـا مـيّـت الـنــار ** يالـلي تـبي التـأليـف مـن غيـر تكليف
مـالـك ومـال الـلـي حـمـاه أبـن عـبـار ** عـبـدالـلـه الـلي ألـف الصـدق تأليـف
قال محمد الجلعود يسند على عبدالله بن عباروبندر بن محمد بن سويلم
يـا راكـب الـلـي جـاهـز للمشاويـر ** يـبـي القـصيـم ولـلـقـرايـب تـعـنـا
بـنـدر دعـانـا وأنـتـويـنـا مسايـيـر ** أرسل لنا الدعوه وخذا الوعد منـا
أبـن سـويـلـم مـن طـوال الأشابيـر ** الغـضوري كـلـن لـشـوفـه تـمـنـا
فـي حـفلـة تجمع كبـار الشواعيـر ** وكـلن عـلى طـاروق فكـره تـغـنـا
خـاويـت رجـل لـه مـعـزه وتـقديـر ** عـبـدالـلـه الـعـبـار ولـد الـمـعـنــا
فـي خـوتـه تـجـمع رجال منـاعيـر ** فـي خـوتـه طـول الـلـيـالـي تهـنـا
أجهـد وسطـر مجـد عنـاز تسطيـر ** لأولاد وايــل مـا ذخــر ولا تـونــا
الـلي سهـر طـول الليـالي بتـفكـيـر ** في كتـب عـقـب التفـرقـه جمعـنـا

وقال عبدالله بن دهيمش بن عبار يسند على كاتب بن غبن الجفنان الرويلي بعد أن سمع شريط التصدي للحملة المغرضة وكان ممن يدافع عن الحق :
اشكـر جنـابـك عـلى حميـاك يا كاتـب ** الطيـب طبعـك يا أبن جفنان وأفعـالك
والـلـه مـالي عـلى مجهودي الـراتـب ** الا الحـمـيـه وأفـاخـر بـك وبـأمـثـالـك
نـويـت أوضح صحيح العـلم وأعاتـب ** الجـاهـل الـلي يلـوك الهـرج وايعالـك
الحملـة الـلي بحـرف اللنـت واللاتـب ** خـابـت وبـدد سـواد المـظـلـم الحـالـك
مـن ينتـبـه جـد يعـود لـجـده الـنـاتـب ** مـا نطـاوع الـلي يسب الفـاني الهالـك

تــــــــــم الحذف

يعطيك العافيه وما قصرت هذا القصيد

اشكرك يا بن عبار بيض الله وجهك يا رب يرحم شايبن عقبك وعجيز لك

لاهنت يابو مشعل ومن اسند عليك


حبك وسبك ومعنى



احترامي

قال عبدالله بن دهيمش بن عبار هذه الأبيات عندما توجه إلى رجل من الرجال أصحاب الوجاهه لقصد التوسط في موضوع معنوي ولم يتم ما أراد بحيث أن ذلك الرجل أخفق في تلبية الطلب وهو قادر فقال يتأسف على أنه تعنى هاقياً بهذا الرجل وقد خيّب ظنه :
يا حيـف وهمني مكـانـك وموقعـك *** قدرك وجاهك صوب بيتك دفعني
جيتـك وتجهلـني حقـايـق طبايعـك *** لامع سرابــك بالمظامي خـدعني
عنيت لـك ملـزوم نصيت أفـزعـك *** لاشك بيتك ضاق بـي ما وسعـني
أخطيت يـوم أني تعـنيـت أراجعـك *** ما فيه عاذل عـن وجاهك منعـني
تـقـول تلـقـا بـلابـتـك مـن يسنعـك *** رح للذي يقضي لـزومك ودعـني
أنا نويت أسمع كلامـك وأطاوعـك *** وقبلـت شورك عندما قـلت طعني
قنعت من عـذرك ونويـت أودعـك *** منطوق لفـظك عن مجيّك قـلعـني
شكواي ما ظـني تهمـك وتوجعـك *** مـا عودها لـو نـاب بقعـا لسعـني
قاطعتنـا وحنـا لـك الـلـه انقاطعـك *** اشتر صـداقـة مـن تـوده وبـعـني
لك جد بشخوص المناعير يجمعك *** بعدك عنه من دون داعي فجعني
ما دام من وايل جـذورك ومنبعـك *** من لا تعـزوى بعزوته كيف يعني
غدابك الـلي بمسلك الدرب لايعـك *** يـكـفـيـك قـولـه بالمسيـر اتـبعـني
اللي على تقطيع الأوشاج شجعـك *** عندك نصب حاله قـريب وخلعني
خلك مع اللي من المواكيل يبلعـك *** والحل عند الـلي صنعك وصنعني
أنعـم وعش عسى تهـنـا بمرتعـك *** ما فـاد نفعك كان مـا الـلـه نفعـني
أن كان ربك سامك العرش رفعـّك *** لا تحسب أن اللـه رفعك اوضعني
وكان الولي بالجاه والمـال متعـك *** الحـمـد لـلـه مـا وصلـك وقطعـني
وأن كان ربك وفرّ المال وأشبعك *** رزقي على اللي لا دعيته سمعني
ماني حراوي خاب ظنك ومرمعك *** ولانـي بهـفـوات الشواعيـر معـني
الـلي بلمـات المجالس لهم صعـك *** مـن فضل ربـي سلمهم ما وشعني
مقصود منظومي دواعي تسّرعك *** عاتب وتحشم عـن شتامي ولعـني

تم نقل المشاركة الى مكان اخر

شكرا اخينا فرج بن عوده الجعفري صح لسانك ويستاهل ابن عنزه البار ابو مشعل ليسى مجاملة والله اننا لانخاف في الحق لومة لائم . ولايقبل كل شهم ان تكون قبائل عنزه الذي لها شان في جزيرة العرب ان تشحذ نسبها اخر الزمن في القرن الحادي والعشرين . ولم تطلب قبائل وبطون عنزه من احد ان تنظم اليه
بل كل الاطراف الكبرى هي التي انظمت الى عنزه نسبا ومنذ مئات
السنين والمكتبات العربيه والغربيه وبمختلف اللغات تدون تاريخ
قبائل عنزه ولا نعرف لنا حدود سوى عنزه وعزوتها وائل ولا نقول
وائل بن قاسط ولا غيره سوى وائل تعتزي كل قبائل عنزه كنخوه متفق عليها منذ عرفت عنزه . ولا احد يقبل ان تكون عنزه تشحذ نسبها من احد او تلتصق بجد ليسى لها . ومن يثير ذلك هو معول هدم لكيان امة عرفها التاريخ منذ عرفت القبايل وهي مع قبايل معدوده معروفه با اسمها منذ بزوغ فجر الاسلام .
اما بخصوص وائل الاسماء كثيره لوائل ولنا وائل وتعتزي به قبائل
عنزه منذ ان عرفت عنزه . مثلا وليسى حصرا السبعه لها نخوه با العرفاء وقبيلة اخرى لها نخوه العرفاء . ومعلوم ان اعتزى عنزه بوائل واجزم ان لا احد يعلم منذ مئات السنين منهو ابو وائل .

وعنزه واعلام عنزه قديما وحديثا لم نسمع
انهم طلبوا من احد الانتساب لقبيلة عنزه بل الاطراف الاخرى هي
التي انتسبت وسجل التاريخ ذلك ان حكام او عوائل معروفه وكلا يعرف نسبه وقد تكون السياسة تلعب دورا في الابتعاد عن الخط ولكن المصب واحد حتى ولو افترقت الشعب

واخيرا ان كنت مخطىء المعذره

تــم النقل الى مكان اخر

يعطيك الـــــــــــــف عافية على هذه الابيات

مشكور الله يعطيك العافيه