( أهداء إلى الأستاذ سلطان بن مرشد الجلعود صاحب قناة الشامخ مع التحية) - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

03-29-2020, 05:11 PM

( أهداء إلى الأستاذ سلطان بن مرشد الجلعود صاحب قناة الشامخ مع التحية)

هذه القصيدة شكر وثناء أقدّمه للرجل الفاضل سلطان بن جلعود أبو مرشد صاحب قناة الشامخ بعد أن تكرّم بتصوير وتسجيل ونقل عدد من مناسبات زواجات بعض الأبناء مشكور وفي هذه القصيدة تطرقت لبعض نوادر قبيلة الدهامشة ومن ضمنهم الشيخ سعود بن جلعود رحمه الله راعي سميراء الرجل الذي يضرب به المثل بالكرم وقد لمحت عن سبب اللقب الذي اكتسبه حيث أن سميراء على طريق القادمين من المدينة المنورة وحايل والقصيم وهي ملتقى طرق الركبان وكان سعود رحمه الله منصى وقد تعبن نسائه من تجهيز الطعام للضيوف وفي أحد الأيام سمع بكاء فسأل عن الخبر فقيل له أن نسائك يبكن من التعب من كثر سوات الطعام للضيوف فأعتزى وقال ( أنا مبكي المسويات وأنا أبن جلعود ) فلقب في مبكي المسويات ومدحه الكثير من الشعراء وهذه القصيدة أهديها للأستاذ سلطان بن مرشد الجلعود أبو مرشد صاحب قناة الشامخ وفقه الله :

مبـداي بالـلـه خالـق الأنس والجـان *** الـواحـد الـلي للمـخـالـيـق مـعـبـود
واعـوذ بالـرحـمن مـن كـل شيـطـان *** وألـوذ بـه مـن شـر مـارد ونمرود
باسمه بديت انظم من الشعر ما زان *** يهدى لأبو مرشد فزع كل مضهود
راعـي القـنـاه الـلي تصوّر بالألـوان *** قـنـاة عــز وفـلـمهـا عـنـه منشـود
قـنـاة الشامخ شامخـه مـثـل سلطان *** الدهمشي قـرم العـيـال ابن جـلعـود
سجّـل محـافـل طـيّـب الفعـل مـجّـان *** لـو ما جبـر بالحلف ما ياخـذ نـقـود
كـانـه سـمع بمنـاسبـه عـنـد ويـلان *** يـأتـي حـميه دون غـايـه ومقصـود
شارك جميع الربع في كـل الأحيـان *** عـنـد الـرفـاقـه دايـم الـدوم موجود
قـولـوا مـعـي لاهـان لاهـان لا هـان *** حيث أبو مرشد طيب الذكر محمود
فاز وكسب علم الفضيله والأحسان *** وعلم الفخر هوغاية الكسب والفود
نفخـر بعـلمه صاحب القـدر والشان *** قلتـه ودرب المرجلـه ليس مسدود
من طاب علمه في علوم الفخر بان *** مجهد ومع طول المدا يطلب الـزود
يجهد لخدمة عـزوته قـدر الأمكـان *** بـه طبع ما يذخـر عن الربع مجهود
ولاهـي غـريبـه منـه حيثـه كحيلان *** من ساس لابه مامشوا درب منقود
من علي الأول يجذبه عرق شجعان *** أولاد دهمـش مجـدهـم دوم مشيود
دهامشـه يـوم المـغـازي والأكـوان *** والهـرش حـد ابـيشة الخيـل مقيـود
عـوق الضديـد اليـا تلاقـوا بميـدان *** صابورهـم ينطـح طـوابـيـر وحشود
نـطـيـحـهـم يـعــود نـادم وخـسـران *** يرجـع معـيف ولا قـدر ياخـذ الـذود
منهم غريب الدار من عقب حمـدان *** ومنهـم بـواسل كنهـم شامخ الطـود
زعـيـمهـم مجـلاد مـن نسل فـوزان *** قـاعـد وجبـر جـدودهم منقع الجـود
منهم غـديـر المـوت والـد رهيمـان *** بـرجـس يخـلي سربـة الخيـل يـبّـود
ومنهم مشايخ خلفـة الشيخ راكـان *** الكـل فعـلـه مـاضـي العـهـد مـاكـود
ومحمد التركي حـمل لـقـب سعـران *** حـيثـه شجاع وباللقاء ينطح الكـود
ومـن كثـر مـا فيهم نـوادر وفرسان *** يصعب عـلي العـد والعـرف محدود
من عـلي الأول من سويلم وسلطان *** تاريخهـم ثـابـت وبالصّـدق مسنـود
ماضي فخرهـم مـا حصيتـه بقيفـان *** لهـم الفخـر من ورث والـد لمولـود
والـلي لهم في منتجع طـي مسكـان *** شادوا بلـدهـم بـيـن وديـان وحيـود
لهم بسميراء غرس مشتل وبستان *** غــيـدٍ ثـمـرهـا لـلمسايـيـر مـجـدود
عـسى يـعـل ديـارهـم غـر الأمـزان *** تلـك الديـار الـلي تـربّـى بهـا سعـود
يـامـا لفـالـه مـن تـحـاويـل ركـبـان *** وياما ذبـح للضيف حـايـل ومـفـرود
ولأجل الكرم لقب على نوح نسوان *** من كثر ما يلفي عـلى قصره وفـود
سعود أبن جلعود يـوم الـزمن شـان *** يجـود يـوم الـزاد فـي نـجـد مفقـود
اعـتـز فـي مـدحـه ولا قـلـت بهتـان *** أهـل القصيم وأهـل حايل لـه شهود
وأهل سميراء طيبهم عـبـر الأزمان *** قبل الزمان الـلي بـه سهود ومهود
ومـن يمـدح الأجـواد ماقيـل غلطـان *** قـلته يا أبـو مرشد ولا يـلـزم ردود
والهـرج الـلي ماله دلايـل وبـرهـان *** معـناه زيـف ويعتبـر هيـف وربـود
والخـاتمه أهـدي مع الشكر عـرفان *** عسى الـولي يحميك مـن كـل لادود
وصلّـوا عـلى اللي جـاه بالوحي قـرآن *** جاب الحديث اللي رواه أبن مسعود

مع تحيات أخيك عبدالله بن دهيمش بن عبار العنزي