القهوة هذا المشروب الذي اصبح رمزا من رموز العرب وجزأ لا يتجزأ من حياتهم اليومية ...

تطرق له الشعراء الكبار بين وصف وتقدير وصرفه لمن يستحقه وتوجد عليه ..

ابدأ معكم بقصيدة الشيخ مشعان بن هذال في قصته المعروفة مع الدويش :





قم سو فنجال ٍ ترى البال منـداش =يا شوق من قرنه على المتن مرجـود
في دلة ٍ مربوبـة ٍ كنهـا شـاش =وبهارها مقدار خمسـة عشـر عـود
والهيل حطه لا تداني ولـو جـاش =ومن الزباد اقنع على شـذرة العـود
أبيه رسم ٍ للنشامـا عـن الـلاش =الـلاش لا فاقـد ولا هـو بمفـقـود
تر لـذة الدنيـا معاميـل وفـراش =وصينية ٍ يركض بها العبـد مسعـود
والطيب سنة والردى كنه الطـاش =واللي يريد الجود ما هـوب مـردود
في ربعة ٍ يقعد بهـا كـل هتـاش =يفرح بها اللي مـن دنايـاه مضهـود
وصفرا تلوح بالضحى كل مهبـاش =يصطي على قلـب المناعيـر بالعـود
ربيع قلبي يوم زوعـات الادبـاش =صفر ومغاتير ٍ ويبـرا لهـن سـود
مرباعها الصمان تبعد عن الطـاش =ومقيضها دخنـة ليـا صـرّم العـود
أبي ليا جانا من المـال شوبـاش =وتطاوحت من بين الاسلاف جلحـود
من لا يروي شذرة السيف لا عاش =عسى عليـه مـورّد الجيـب مقـدود



والشيخ هايس بن مجلاد رحمه الله له هذه الرائعة :


قم سو ما يصبغ على الصيـن لذيـاب =بـدلال يـشـدن البـطـاط المحـاديـب
احمس ليـا مـن العـرق فوقهـا ذاب =واستدن مـا يجـذب عليـك الشراريـب
نجر يصيح من الطرب تقـل بحجـاب =يصبـر علـى طـول الدهـر للمواجيـب
وليا انطلق من مزلقـه كنـه خضـاب =ورس صبغ بكفـوف بيـض الرعابيـب
صبـه لمـن قـاد السرايـا للأجنـاب =اللـي بمحاسـه يشبـع النسـر والذيـب
والثاني اللي وان لفوا له على ركـاب =قـدام بيتـه تقـل مجـزر قصاصـيـب
والثالث اللي وان غشى الزمل ضبضاب =يرخـص بعمـره دون زمـل الرعابيـب
وباقي الملا يكفيهم التـول لـو شـاب =رصاصـة المجلـس حميـر المشاعيـب
اللي نهـار الكـون يفـزع بمصـلاب = كبـار الأنفـس ساهجيـن المواجـيـب





وهذه القصيدة للشيخ وارد بن نهار العواجي في وصف القهوة وبعض المعاني :


الكيف قبـل اليـوم حنـا شربنـاه = جدٍ على جـدٍ شربنـا الحشايـش
ياما شعمنـا النـار للـي تنصـاه = يغدي عماس اللي على الكيف دايش
إنجورنا بالليل تسري علـى غنـاه = صهيـل شقـرٍ ركـزٍ العـرايـش
فنجالنا يشـدا خضـاب الخونـداه = ما قيل ني ولالـه الجمـر نايـش
ردينا اللي تدفـق السمـن يمنـاه = لا صار تالي الزاد غـادي نوايـش
ابيوتنـا بالخـوف دايـم مبـنـاه = نرذ المعـادي يـوم دور الغبايـش
الـى تبيـن درب كـود ضربنـاه = الى انهضم راع الضلوع الهشايش
كم هجمـةٍ نجعـل عليهـا منـاداه = صملانها عقـب التملـي نشايـش
خيالنـا يبـرز نـهـار المـلاقـاه = يروي حـدود مصقـلاتٍ عطايـش
نصبر على زلـت رفيـق دمحنـاه = صبر الجمال اللي تشيـل البلايـش
الى من راعي البوق أظهر مخفـاه = على الرمك نقعد صغا كـل طايـش


وهذا الشيخ سعد بن قطنان السبيعي يعتبر من رموز الكرم والسخاء في قبيلة سبيع وأحد مشاهير كرماء العرب وهو القائل في القهوة :





جر الفراش النا وهات الدلالـي =أربع مغاتيـر علـى النـار تدنـا
ترى حلاة النار دوم إشتعالـي =وسوقة فناجيل عليهـم مـن أدنـا
فنجال أشقر مثـل دم الغزالـي =ليا نقص شيء من الكيـف زدنـا
أتعب لها بالسوم لو كان غالـي =لو كان زود بالثمـن مـا نشدنـا
نشري لها المثلوث هو شف بالي = لو كان سوقه نـازح عـن بلدنـا
ياما دفعنا بالثمن مـن ريالـي = غير القرا نسهر لهـم مـا رقدنـا



وله أيضا في القهوة:






قم يا رويشد شب ضو المنـاره =ثم هات من صوته يقود المساييـر
نجرٍ ليا حـرك تزايـد عبـاره =يا زين صوته بين عوج الدواويـر
يا مسوي الفنجال كثـر بهـاره =جلـفٍ ويتلنـه ثمـانٍ مغاتـيـر
حاذور يالصباب تثنـي مـداره =ألا على اللي ينطحـون المخاسيـر
أحد ليـا سيّـر عرفنـا وقـاره = واحد ليـا سيّـر يـدور التفاكيـر
كم واحدٍ ناشـي بليـا خسـاره =مصبرٍ نفسه على البخـل تصبيـر
هو يحسب إنّا ما نعرف الصقاره =يعد عمره من حسـاب المناعيـر
يا حبنـا والله لجمـع التجـاره =لولا الحياء حنا نعـرف المعاذيـر


ومن قصائد القهوة هذه الأبيات من ضمن القصيدة طويلة الشهيرة للشاعر المعروف محمد العبدالله القاضي وهي في وصف القهوة وطريقة اعدادها :



دنيت لي من غالي البـن مـا لاق =بالكف ناقيها عـن العـذف منسـوق
إحمس ثلاث ٍ يا نديمي على سـاق =ريحه على جمر الغضى يفضح السوق
واياك والنيـة وبالـك والاحـراق =واصحا تصير بحمسة البـن مطفـوق
ليا اصفرّ لونه ثم بشت بالاعـراق =صفرا كما الياقوت يطرب لها المـوق
وعطّت بريح ٍ فاخر ٍ فاضح ٍ فـاق =ريحه كما العنبر بالانفـاس منشـوق
دقه بنجر ٍ يسمعـه كـل مشتـاق =راعي الهوى يطرب الى دق بخفـوق
لقّـم بدلّـة مولـع ٍ كنهـا سـاق =منصوبة ٍ مربوبـة ٍ تقـل غرنـوق
خله يفوح وراعي الكيف يشتـاق =ليا طفح له جوهـر ٍ صـح لـه ذوق
أصفر قموره كالزمـرد بالاشعـاق =وكبارها الطافح مـا صافـي المـوق
زلّه على وضحا بها خمسة رنـاق =هيل ٍ ومسمار ٍ بالاسبـاب مسحـوق
مع زعفران ٍ والشمطري ليا انساق =والعنبر الغالي على الطـاق مطبـوق
فيلا اجتمـع هـذا وهـذا بتيفـاق =صبّه كفيت العوق عن كـل مخلـوق
بفنجال صين ٍ زاهي ٍ عند الارماق =يغضي بكرسيّه كما اغضاي غرنـوق
إليا انطلق من ثعبته تقل شبـراق =رنق ٍ تصوّر للحمامة علـى الطـوق
شكّل على الفنجال لونه إلـى راق =دم الغزال ليا انمـزع منـه معلـوق
خمر ٍ إلى منه تسلسـل بالاريـاق =وعليه من ما صافي الـورد مذلـوق
راعيه كنه شارب ٍ ريـق تريـاق =كاس الطرب وسرور من ذاق له ذوق




ومن أشهر ما قيل في القهوة هذه الأبيات للشاعر دغيم الظلماوي الشمري حيث قال ::





يا كليب شب النار يا كليـب شبـه =عليـك شبـه والحطـب لـك يجابـي
حنـا علينـا جيـب ماهـا وحبـه =وعليـك تقليـط الــدلال العـذابـي
ادغث لها يا كليب من سمـر جبـه =وشبـه ليامنـه غفـى كـل هـابـي
واحرص على جمره من احراق حبه =ياما العرق تشوف على الحـب ذابـي
ودق البهـار وبهـره ثـم صبـه =تصبغ على الفنجـال مثـل الخضابـي
ونجرٍ تـوال الليـل يدعيـك نبـه =لا طـق طـاره حـس ذيـبٍ بنابـي
الوالمه يـا كليـب عجّـل بصبـه =والرزق عند اللـي يجيـب السحابـي
ومن يوجعه راسه ترى الهيل طبـه =وليـا تقهـوا كيفـة الـراس طابـي
بـاغ ليـا شبيتهـا ثــم قـبـه =تجـذب لنـا ربـع سـراة غيـابـي
سـراة ليـل وناطحيـن مهـبـه =لا نسنست يـا كـن بـه سـم دابـي
بنسريةٍ يـا كليـب صلـفٍ مهبـه =متلطمـيـن وسوقـهـم بالعقـابـي
إن شابط المنـزوع خطـو الجلبـه =ياما حـلا يـا كليـب خبـط الركابـي
آقف لهم وأبـدي سـلام المحبـه =لا جنّـب الهيّـن عريـض العلابـي
بكلامٍ أحلـى مـن شخاليـل جبـه =وأحلى من السمـن الجديـد العرابـي
مع كبش مصـلاح لـك الله نجبـه =ومن مدفـق السكيـن حـن الركابـي
خطو الولـد فوقـه زبـونٍ وجبـه =ويجي عليهم مـن حسـاب الزهابـي
وأصبر وإن الصبر يا زيـن غبـه =يرقيـك روس مشمرخـات الهضابـي
ومن لا صبر يا كليب في حكم ربـه =هـذاك يـوم الحشـر مالـه ثوابـي



وهذه القصيدة الرائعة ذات الصيت الواسع للشيخ تركي بن حميد العتيبي :





يا ما حلا يا عبيد في وقت الاسفار =جر الفـراش وشـب ضـو المنـاره
مع دلة تجذا علـى واهـج النـار =ونجـر اليـا حـرك تزايـد عـبـاره
النجـر دق وجاوبـه كـل مـرار =ما لفـه الملفـوف مـن دون جـاره
في ربعة ماهيب تحجب عن الجـار =لامن ولـد الـلاش مـا شـب نـاره
وأخير منهـا ركعتيـن بالأسحـار =لا طاب نـوم اللـي حياتـه خسـاره
تلقاه فـي يـومٍ يضيعـن الأفكـار =يومٍ على المخلوق مـا أطـول نهـاره
وقم في قصير البيت حشمة ومقدار =لو جار فإدمح له ولـو بـه خسـاره
ترى النبي وصى على الجار لو جار = خذ الحذر يـا عبيـد عقـب النـذاره
رافق قوي الديـن حفّـاظ الأسـرار= ينفعك فـي يـومٍ يجـي بـه كـراره
ترى الهوى والغي هن شر الأشرار =ومن داس عار الناس داسـوا لعـاره
جنب ردي الكار مـا فيـه تعبـار =ما فيـه مـن فعـل المناعيـر شـاره
واسلم ودم بالخير يا طيـر غيمـار =وصلوا على المختار ما غـار غـاره



وهذه قصيدة للشيخ عجران بن شرفي السبيعي الذي اشتهر بأنه لا يثني الدلة ولا يذبح الماعز لضيوفه ::



يا فهيد صك النجر يوحيك بتـال =صكـه كفـاك الله جميـع الأذايــا
استدن نجر في الدهر يعول اعوال =اعـوال سبـع حاديتـه الضـرايـا
وعليه كيف لي من البن فنجـال =جعل الرخـوم ونسلهـا لـك فدايـا
وعده لحماي النوايـب والأثقـال =في الضيـق لامـن إلتقـن المنايـا
واللي يحزب زاد بيته ليا اكتـال =وحط المعانـي الطيبـة لـه شرايـا
واللي ليا رد البرا بين الأعمـال =لا رفـعـوا لقطيـهـن بالهـوايـا
واللي يروي حربتـه بالتجيـوال =له عادةٍ يرخـص سمـان العطايـا
وباقي العرب خله ولو كان زعال =هـذا وبالمجلـس كثيـر الحكـايـا



والشاعر محسن بن علي بن جغيثم السبيعي قال أيضاً في القهوة::





يا عيد شب النار قم سو قم سو = قـم سـو فنجـالٍ وزيـن قنـاده
هات الدلال ووسع بحفرة الضو = شب بحطب سمرٍ ولوعـه عـراده
خل النشاما لا تلافو لـك وجـو = يلقون من جـدك مراسيـم عـاده
إحمس من البن الخضر لا تلافوا = وللعود حـط شـداد وألا وسـاده
وبهارها هيلٍ من الباخـرة تـو = توه منـزّل مـن سنابيـك سـاده
مع البحر ملفاه وألا مـع الجـو= .مع زعفرانه كبر رجـل الجـراده
حتى يجي فنجالهـا لا تقهـووا = مثل صفار البيض في كأس سـاده
فإن كان هم عجلين قـل تغـدوا = وألا العشاء مضمون مثل العبـاده
حتى لا راحوا لأهلهـم وقفـوا = كلٍ يعـد الطيـب علـى إنفـراده





وأيضاً الشاعر عبدالهادي بن راجس السبيعي قال في القهوة::

أوي فنجـال يصبـه مسـويـه = وحنا سوالفنا علـى جـال ضـوه
في ربعة والبيت يرفـع بقاريـه = بيـت علـى ماقيـل يرفـع بقـوه
تالي نهاره وأولـه دايـج فيـه = قم سـو فنجـال المطاليـق سـوه
احذف لها رمـث كبـار مثانيـه = تـو الجماعـة نازلـيـن بـجـوه
والماء تخيّر من زلاله وصافيـه = من مزنـة ماخاشـر العـج جـوه
واحمس ولاتحرق وحاذر تنييـه = مـا بيـن فرغهـا ومابيـن تـوه
وإجغف لها من طيب الهيل غاليه = والزعفران بكثـرة الهيـل شـوه
صبه على اللي طيبـات معانيـه = واختص من هو بالمراجـل تفـوه
اللي يعّنز لك ليا رحـت ناصيـه = يسلـم ولا يسلـم ردي الـمـروه



والشاعر سلطان بن مبارك الأدغم السبيعي يقول أيضاً في القهوة ::






يا سليم شب الضو مالك مهانه =يجي لها ضوحٍ يقـود السراتـي
وأشغل بفنجال وزيّـن زيانـه =وإحذر من الإحراق وألا النياتـي
ريح وطعم راعيه ينشع لسانه = أطرف حمر لونه كمـا دم شاتـي
عده على اللي لا هرج لك تكانه = قليـل هـرج وبالملاقـا زناتـي
يفداك من هو عايش بالذهانـه = وإيديه لحبـال الـردى قاضباتـي
طاريٍ عليه الجود تالي زمانـه = زل الشباب وهو على ذا السواتي
عند الجماعة مهلقٍ في لسانـه = وهو لا يحذف ولا يجيب الحصاتي

الأمير / زيد بن سلامة الخوير الناصري التميمي ... توفي بحدود عام 1334هـ رحمه الله
يقول الخوير,,,,

قال الذي يبدع على كل قافي =من ضامرٍ ياتن رْيامٍ مواليف
بمنومسة لقم على بكر صافي =عليه من شغل ابن سكران توليف
خلّه ليا ماتونس النذل غافي = وقرب دلالٍ مثل بطٍّ مهاديف
بدلال ماعنهن سنا النار طافي =بوجار من لادونهن بابهم جيف
مبرهجٍ تسفي عليه السوافي = من خلْقته ماطق في ركزة السيف
واحمس ولقّم بالعجل يالسنافي =بشاميةٍ طرّف لها الجمر تطريف
حماسها قرمٍ من الغوش شافي = دايم يقلبها حريصٍ على الكيف
وزلَّه وصَفَّه عن سريب المصافي = من خوفة أحدٍ قال بالكيف ياحيف
كِنَّه ليا منه غشاها الرّعافي = نثر الذّهب من فوق لوح المشانيف
وبهارها من يمّة الهند لافي =في مركبٍ يقداه زجر العواصيف
وان كان تزمل من طيورٍ هوافي = بيضٍ فسدّ أفواهها باشقر الليف
فنجالها لاشف بين الأشافي =لاكن يجذب من شفا شاربه شيف
يبرالها من مير فِجّ الخوافي =بكايرٍ تِرْمَهْ سهيلٍ ليا شيف
صبه لمن يثني خلاف المقافي = يوم الفرنج يقذِّف الملح تقذيف
ونفَّل بها اللي للمروات وافي = مادوَّر التَّجْرات به والمصاريف
اللي لياغليت شراها جزافي = مارطّله عند الدلاليل بنصيـف
ياسامعٍ مني علومٍ تشافي = خذها من اللي نافلٍ كل عرِّيف
دنياك لو ضحكت تراها بخافي = يبرم دواليب الشِّقا والتكاليف
إنهب منه من قبل مالعمر يافي =صيٌّور ماتقفي ركابك مواجيف
صيُّور عمرك ناهجٍ للذلافي =سمر الليالي تكمله بالتتاليف
صيُّور مايمسي لظى الجمر طافي =دنيا تفرق كل ربعٍ مواليف
وليا حصل عزٍّ مع الكيف كافي = ماني على الدنيا كثير التحاسيف

الشاعر/ سلطان بن عبدالله الجلعود يرحمه الله ولد بسميراء حوالي عام1320هـ وتوفي بها عام1374ه




الله على الفنجال مع هجعة النــــــــــاس=بدلال نارٍ مايبطل سنــاهـــــــــــــــا
مع حمسة يملا بهــا كل محمـــــــــــاس=ويقلبــه قرم يعـرف استواهــــــــــــا
قم يافرج شبّه تر الكبد والـــــــــــــرأس =لعين اشوفه قازيه من خطاهـــــــــا
حط الجروم اللي من العام يبـــــــــــاس =ليـاما يطوح ضوها مع فضاهــــــــا
واحمس على جمـــر ترى ماله اجـناس=وكفـّه ليا منه عرقها غشــاهــــــــــا
واودع بهاره هيل ورهه بالاجـــــراس = ياخالط الفنجال تر هو حلآهـــــــــــا
ودقه بنجر يسمعه كل نعـــــــــــــــاس= ولاتغلق الضبة على من بغاهــــــــــا
وصفـه وصبه تر هو الصفى بقيــــاس=ماهو خطاة الخامل اللي طهاهـــــــا
اللي يحطه باوسط النار مرفــــــــــاس =لما يطير قبوها مع غماهــــــــــــــــا

وهذا محمد بن مديبغ الناصري التميمي


راع المستجدة رحمه الله

يادلتي لايجزعك واهج النار = ماجبتك إلا باغي تحْتضينه
أبي ليا جونا مشاكيل وخيار =اقلّطك والرزق ربي ضمينه
ياعنك ماغظلم حجاجي عن الجار =ولايوم ماعنا تقازى الظّغينه

كم هجمـةٍ نجعـل عليهـا منـاداه = صملانها عقـب التملـي نشايـش
خيالنـا يبـرز نـهـار المـلاقـاه = يروي حـدود مصقـلاتٍ عطايـش
القصائد كلها جميله وجزله
والمكان لا يتسع الاقتباس منها جميهالذا اقتبست هذه الابيات من القصيده الثالثه لابدأ بها تعليقي

كل ما قيل ويقال في القهوة لا يكفيها حقها
فهي المشروب الذي يجمع العرب والعجم
على أنها تعدل المزاج
وهي عنوان الكرم ولكل حركة من فنجانها معنى
وفيها من القصص مافيها
وهي الوحيدة اللتي تحل على فنجالها المعضلات
وتقدم للسادة والوجهاء احتراما وتقديرا
ولها عادات وحقوق بين العربان
الأنيق فرج البلاز
سلم بنانك على الاختيار الجميل
بانتظارك دوما وما تجود به
احترامي وتقديري للجميع