قصائد جديده - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

06-26-2024, 09:21 AM

مساجله جديده
قال : الشاعر صالح بن عبدالله بن دهيمش العبار هذه القصيدة يسند على والده عبدالله بن دهيمش العبار :
راكب الـلي لا سرى في طريـقٍ جـرهـدي *** تقصر دروب المسافه وحيله مـا يبيـد
كـل ما شديـت عـزمـه مـع الـدرب يغـدي *** يقطع الفرجه وعزمه مع البيدا عنيـد
في ظـلام الليـل لا صـار خشمـه مـبتـدي *** مثل نجم سهيل لا شفت نوره من بعيد
اذكر الـلـه لا نظرته تعجب بشكل البـدي *** تحسب انه عقد لؤلؤ مـا هـو من حديد
جيـب تويوتا مـن الشرق دوب مـوردي *** لا درج بيـن المواتر هـو الجيب الفريـد
ينحـر ديـارً حـدتـني لهـا الضيقـه حـدي *** فيها شاعر باللوازم عن لزومه مايحيد
والدي ليـه معين وهـو ذراي ومسنـدي *** النشاما يمدحونه صاحب الـراي السديد
والدي هو تاج راسي افخر وفيه اقتدي *** فاهم وعاقل حكيم عارف ونهجه رشيد
ذاك ابن عبار أبوي عسى يفداه الردي *** وايـلي ما بـاد عـزمه دوم بالشده عتيـد

قال : عبدالله بن دهيمش بن عبار هذه القصيدة جواب لقصيدة الشاعر صالح بن عبدالله بن عبار :
وصل منظـوم القوافي من نقاريح ولدي *** شاعر جاد المعاني بارع بجزل القصيد
ارسل جيب اليا تحرك يشبه لذيب يعدي *** النديب الـلي بعثتـه بالعجل جاب البريد
بالعجل خطك وصلني واستلمته في يدي *** ياعسى يسلم جنابك يجعل يومك سعيد
صالح حليم وكريم وطيّب اخلاق وهدي *** فاهم وعقله رصين ليس خمل ولا بليد
شاعر يتبع طريقي يمسك الدرب بعـدي *** والشعر ورث الجدود عندنا ماهو جديد
كل ساري يقتدي بسهيل أو نجم الجدي *** في ظلام الليل عتمه تاه في دجى شديد
صيرم الحرالقطامي اشهد انه له شدي *** شف بال اللي قنص به كل ماهده يصيد
ذاك صالح لا نخيته بالعجل جاك يحدي *** صالح وجملة اخوانه الردى عنهم بعيد
كانهم طابوا عيالي طاب حظي وسعدي *** اعتبرهـم رصيدي غيرهـم مالي رصيـد
كنت اكدح حتى شبت وباد حيلي جهدي *** كنت أربي كل منهم من بدأ عمره وليـد
وآخـر القول اطلب كل يومي مع غـدي *** الولي رب الخلايق موهب الرزق العبيد