ديوان خليف ابن سعيد العنزي - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

12-28-2012, 09:55 PM

فجاراه خليف بن سعيد

يالله ياعلام مغيث الملاهيــــــــــــف ***
توسع صدر من ضايقن فيه باله

جاني جواب ملطف الخط تلطيـــف ***
من شاعر ينهل شعرالجزالــه

لا هنت يابو سلطان يامقري الضيف ***
رجلن حليم وافيات خصالــــــــــــه

من ربعي اللي فعلهم لي تشريــــــف ***
أهل الوغا بالكون وأهل البسالــه
أولاد حسن فعلهم ماضين شيـــــــف ***
تاريخهم ماضي عريق الاصالــــه
وصل خطابك في بطون المضاريــف ***
ساعة قريته قلت يا طيب فالـــــه

الله يجيرك عن كبار الصواديـــــــــف ***
وعينك تنام بجاه رب نسالـــــــه

رب عطوف بالعباد المظاعيـــــــــــف ***
هو فزعه المظيوم واللي شكالــه
لا تشغل الافكار بكثرالتحاسيــــــــف ***
ولا تهمك الدنيا بشرق وشمالـــه
ذكرت دور فات غزاة ومناكيـــــــــــف ***
ماينبغي يالقرم صعب إحتمالـــــه
إن أقبلت خيل واقفت مراديــــــــــــف ***
الله حمانا من حروب الظلالـــــــه
وجدك على مقطانهم لمت الصيـــــف ***
أقفا كما برقن لمع مع خيالــــــه
أقفت أمورٍن ذكرها كنه الطيـــــــــف ***
راحت بشين وزين وفيها جهالــه
واليوم عصر العولمه وروحت جنيـف ***
كلن على مبداه يمدح ريالـــــــه

ذكرت لي بالقول كل التواصيــــــــــف ***

صعبن ارضاء الناس في كل حاله

اللي يبي بالمعتلى وقصرن منيــــــف ***

حلال للرجال يطول حبالـــــــــــــه
كم شيخ يطلع فيه حسن التصاريــــف ***
وكم شيخ ماضي صار لربعه حثاله
قصر النظر ما فاد ومشين على السيف ***
دش البحر والرزق ربك كفالـــــــه

لاتستفزك من الرجال الهفاهيــــــــــف ***
خلك كما حيد عسير منالـــــــــــــه

ولا يزعلونك ناس تمشي على السيـــف ***
هذي حضاره وافيه بالكمالـــــــــه
ملبوسهم شرتٍ جتك السواليـــــــــــــف ***
حلاقه اللحيه والاشناب مالــــــــه
ما أحدن موكل يصنف الناس تصنيــف ***
ترك البشر راحه كلن بحالــــــــه
بعض البشر عقولها سين تغليـــــــــف ***
وكلن على رايه يسير اجمالــــــــه
ربك يدير الكون بحكمه وتصريـــــــــف ***
مادمت الايام قصاراطوالـــــــــــه
ماهمنا عبيد ومزيد وعطيـــــــــــــــــف ***
والكل منا مشغلينه عيالــــــــــــــه
لاشك عصر اليوم وضعه مجانيــــــــف ***
بين البشر كثرت علوم الرزالــــــه
اكدت بقولك لي ناديت ياخليـــــــــــــف ***
وانا لعيونك كان وان جتك عالـــــه
ناسٍ على الطيب لسنه مجاريــــــــــف ***
لا تخدعك يالقرم شوفت ازوالــــــه
كلفت لك بعض الابيات تكليــــــــــــف ***
أترك هزيل القاف واخذ اجزالـــــــــه

وصلاه ربي عد ما بالوطا شيــــــــــف ***
على رسولٍ حافظٍ للرسالـــــــــــــــه