الليالي بها عميا وفيها بصيرة = اغتنمها مطولك باول العمر ساير
وكم عقيدا يعزل باول الكون خيرة = يوم لحق الطلب صارت عليه الكساير
ياوجودي وجود اللي تصوب بعيرة = قام ينخى ربوعة والفشق فيه ثاير
ذبحوا اعيال عمه هم خيار العشيرة = ثم خلي منيعاً في يدين النحاير
عند قوماً خساس ولا لهم سلم جيرة = يقطعون الوجيه وياخذون القصاير
اسحب الرجل وامشي بالدروب الخطيرة = والقدر ما يعرفه كود رب السراير
البلاوي بلنا والرحى مستديرة = والجهد عقب طول العزم فاتر وخاير
واول الحب يوما شفت بنتا صغيرة = في وسط سوق عذرا لا سقته النثاير
بنت شاوي زرع بضمير حنطة وميرة = جوا يبيعون زيت ويشترون الزقاير
أسمعه يوم ناداها هنا ياسميرة = وجت تلفت تقل ظبيا من الرمي ذاير
لا بسه بنطلون وفي يديها سويرة = والقميص المورد فاتحا للزراير
وقفت ورمقتني بالعيون النظيرة = وضحكت لي بوجها كنه البدر داير
قالت انتا سعودي بأي وايات ديرة = يمكن انا نعرفكم لاذكرت العشاير
قلت انا جعفري وربوعنا بالجزيرة = اه ياويل قلبي ليت ربعي حظاير
والله اني عليكم غير اجر الجريرة = تحتميني هل الجدعا وما كان صاير
لاتعرف النفود ولا تعرف الحفيرة = ولا تعرف الكتيب ولا تعرف العماير
قال ابوها مشينا قلت ياعم غيرة = لا تروحون عني معكم القلب طاير
ثم قفوا وانا واقف وبالقلب حيرة = ألعن الحظ الاقشر والحياة العزاير
ليت من حاش مثله بالحياة القصيرة= يتهنا معاها لو تدور الدواير
حن قلبي كما حنة خلوجا مظيرة = تحسب انه ولدها شافت الدم فاير
يوم قامت ترزم شدها في جريرة = ابدويا عمى قلبة ولا له بصاير
كل من سمي ب محسن حياته جهيرة = يسهر الليل وعيونه تهل العباير


الشاعر / عبدالمحسن الجلوي