( قصيدة مسنده على حسين بن على من شعر التصدي للحمله المغرضه )

هذه القصيده من شعر عبدالله بن دهيمش بن عبار العنزي مسنده على الرجل الفاضل صاحب الحميه والغيره الوايليه الشيخ الدكتور حسين بن علي بن عطالله الطويلعي من رجال عنزة الذين على مستوي القبيله في كل المقاييس وهذه القصيدة تدور حول أهم موضوع يهم قبيلة عنزه في هذا العصر وهو تزوير نسبها والحاقها بجد ليس جدها ونفي وجود وائل من ذرية عنزة وتلفيق أباطيل تزوّر لها جد بالأعارة ولكي تبرأ الذّمه ويفهم كل من انزلق مع دعاة تزوير النسب قلت :

مبـداي في عـالـم خـفي السرايـر *** الواحـد الـلي ارزاق خلقه كتبها
مـولاي غـفّـار الـذنـوب الكـبـايـر *** فـراج كـربـات العـبـاد ونصبهـا
نعـوذ بالـلـه مـن لهيـب السعـايـر *** نـار الجحيم الـلي تـوقّـد لهـبهـا
ومن بعد ذكر الـلي يسن الشعاير *** قـلـت لنديبي عـدّة السفـر جبهـا
أبـي إندب الـلي للسفـر دوم هاير *** قـرم الـيـا لاح النجـيبـه صلـبهـا
البـنـز جـهـزهـا ولـلـزيـت عـايـر *** تبهـج صـدر سـواقـها لا ركبهـا
ما تغـرس برمل الطعوس التواير *** وقاع المواحل ماتغوص بخلبها
خذ قاف قلته من صميم الضماير *** لـلي سلـوم الطيب فـكـره رغبها
أبـو عـلـي يـفـرح اليا جـاه زايـر *** ويدي لدسمين الشوارب وجبهـا
يحجي ويـذري بالسنين العسايـر *** منصى الرجال اللي زمنها نكبها
كم جاه من يشكي به الوقت جاير *** هـواشله عـلـم الفضيله جـذبهـا
فرحت ضمير الـلي جراله جراير *** عقب الكدر نفسه تزاود طـربهـا
يستـاهـل التمجـيـد عـز القصايـر *** نفسه عن الطرق الرديه حجبها
مـا سار بدروب الغـوى والنكايـر *** وكـل العلـوم العايـزه مـا قـربها
أعـمـال عـظمى يعتبرهـا صغايـر *** يرفض ينوه عن مواهب وهبها
بالجود مـا تشكل عـليه الخساير *** فضايله تصعب عـلى من حسبها
يا مكثر اللي منك يا حسين غاير *** لك سمعه الحسّاد تحرق عصبها
تعيش يالـلي بنهج الأجواد ساير *** نلت الفخر والحقت نفسك طلبها
مـن طـاب مثـلـك للقبيلـه ذخـايـر *** هـم الكنوز وهـم خـزاين ذهبهـا
وأن جـاك من لـه لازمه بالدواير *** المعـضلـه تسعى لحـلّـت نشبهـا
يـفـدا جنـابـك كـل مسرف وبـايـر *** الـلي على الكوبه عباته سحبها
ويفداك من يصغي على كل شاير *** الـلي الكـرامـه بالدراهـم جلبهـا
يا أبو عـلي محتار فكـري وحايـر *** مـن واقـع راع القلوب ورعبها
كسـر الـقـزازه مـا تـفـيـده جبايـر *** أمثال يفهـم قصدها من ضربهـا
الخـيـل مـا تـرهـم عليها الوثايـر *** والكدش يفشل باللزز من هذبها
أن صارت العـزوه خبّـر وحضاير *** من عقب جمعاها تفرّق شعبهـا
يا أبـو عـلي مـاريد حـل الصراير *** لوكان بعض القوم جروا سببها
الـلي عـن جـدود القبيلـه مخايـر *** خالـف نـبـيـه والـذنوب ارتكبهـا
جـد عـنـزه مافيـه عيـب ومعايـر *** بـان الدليل وصارت القـوم نبهـا
عزوة ضنا عـناز يا أهل البصاير *** عشريـن قـرن ولا تغـيّـر لقـبهـا
أنـشـد مـن بـلاد اليـمـن للجزايـر *** وأنشد عواين تركها مع عـربها
بشر وضنا مسلم فخوذ وعشايـر *** من سجّل الأنساب وضح نسبها
تـعـرف بـدايدها بطـون وعمايـر *** عـرق الحمايل من ربيعـه نـتبها
يـوم الحـرايب بين نصـر وكساير *** من فـاز بالهيـه خصومه سلبها
يـوم الفشق بـيـن القبيليـن ثـايـر *** والـكـل نـادى للجـمـوع ونـدبهـا
الـلي يـلاقـي جـمعهـم هـج نـايـر *** يلقا الهزيمه بالوغى من حربها
كم راس فارس من علابيه طايـر *** عـنـد البكـار اليـا تناخـوا جنبها
لا طـار ستـر مجـدلات الضـفـايـر *** عدوانها تخشى عواقب غضبها
عـزوة ضنا عـنـاز ستـر الحراير *** مـا تاجـد الـلي بالفعـايـل هـزبها
وصلوا على الـلي كل دينه بشاير *** أهـل البدع وأهل الخرافه غلبها

صح لسانك و صحت أناملك

الأخ العسيري شكراً لك على المرور والرجل الذي مدحته في هذه القصيدة وقصائد غيرها من الرجال الذين تشّرف سمعتهم وأفعالهم عند القاصي والداني وهو يعمل بصمت ولا يرغب الظهور على الشاشات وله ديوان في الدمام يظم أعيان البلد وكل من جاه وكل من يعرفه يدرك أنه يستاهل لذلك مدحته

عشت يابو مشعل وصح لسانك ويستاهل الشيخ حسين الطويلعي ...