قصيدة جديده من شعر عبدالله بن دهيمش بن عبار

تذكرت بيت من أحد قصايدي أقول :

إذا ظهر علمك ترى الناس توذيك *** احفظ كرامة سمعتك قدر الأمكان

وعلى مقصد هذا لبيت قلت هذه القصيدة توضّح بعض المعاني :

يـا مستمع أفـهـم كـلامـي ومشكـور *** أخـبـرك والمكنون نكشف اسراره
الـلي برز علمه ولـه صيت مشهور *** مـا شهرتـه منصب ولاهي تجـاره
شعـر وأدب وتـراث بالكتب منشور *** هـذي سبـايـب سمعتـه واشتـهـاره
روابـعـه فاضـت أحاسيس وشعـور *** ولفظ العلوم الصادقه هي اشعـاره
يعجب بنظمه صايب الراي والشور *** حـكـر المعـاني صنعتـه وابـتـكـاره
وأن كان علمه فـاه مع كـل جمهور *** الـنـاس تـدرك قـيـمتـه واعـتـبـاره
مجهد ومع جمع القبيله لـه حضور *** وحافظ عـلى علمه وسلمه وكـاره
ومن يفعـل الأحسان والخير ماجور *** ومن حصّل الطوله يجوز افتخاره
لاشك الـلي ماله عـلى البـذل مقدور *** كـان أعتـذر ياجـب قبول اعتـذاره
ومن لا تمكن يلـزم الصمت مجبـور *** محـرج وتفويـت الجـماله خسـاره
عـن لازمـه مابـه تهاون ولا قصور *** يـدري بـه الـلي يـفتهـم بالأشـاره
الحـر الـلي معطب جناحه ومكسور *** يفـتـر نشاطـه مـا يجـيـد الصقـاره
أطلب عساني عند الأجـواد مستور *** والمـرجلـه تحتـاج صبـر وجساره
والحـمـد لـلـه تـابـع الحـق منصور *** ومن سـار بالباطـل تعـرقـل مساره
من خـاف ربّـه جنّب الكيد والجـور *** ولا ينجح الـلي فيـه خبـث وقشاره
من يشمت المخلوق خايب ومثبور *** والـلي يحقر الناس جـاز احتقـاره
مـا دام جهدي شاد بـه كـل منعـور *** الـلي انكـره ما اشكل عليـه انكـاره
أهـل القلـوب الطـاهـرة تطلع النـور *** ومن لـه فضايل تحتفظ فـي وقاره
نعوذ بالـلـه من هـل الظلـم والـزور *** أهـل الضغـايـن والحسـد والنغـاره
والعـبـد مـهـمـا عـاش لابـد مقبـور *** وخسران من شـال الكتاب بيساره

وقد تفاعل مع هذه القصيدة بعض الأخوة

قال سعادة الدكتور حسين بن علي العطالله الطويلعي صاحب مضيف الوائلية هذه الأبيات مجاراة لقصيدة عبدالله بن دهيمش بن عبار :

أنـا أشهد أنـك يا ابـن عـبـار دكتور *** أخـذت فـي كـل المعـانـي شـطـاره
اللي تقوله يا أبيض الوجه مخبـور *** حيثك عـلـم مـركـوز فـوق المنـاره
مالك ومـال الصّـم والعـرج والعـور *** خـل الضعيف الـلي عـماره دمـاره
الـلي وراك مـن الجمـاهـيـر طابـور *** والجاهـل المغـرور يخطي عـيـاره
عـزالـلـه نـك صـار لك فـالبلـد دور *** وجمعـت بيـن الباديـه والحضـاره
وأنـا تـراني منـك معجـب ومسـرور *** اقـولـهـا مـنـي صـريـح الـعـبــاره

قال عبدالله بن دهيمش بن عبار هذه الأبيات جواب لأبيات الدكتور حسين بن علي
بن عطالله الطويلعي :
جتـني معـاني كـنّهـا الـورد منـثـور *** عـطـره مـركّـز من محـل العطـاره
صاغ القوافي مابهـا شطـر مكسور *** مـعـه عـلى صوغ القـوافي جـداره
أبـو على ريـف الـذي جـاه مضرور *** طالت عـلى فعـل المـراجل اشباره
شهـم وكريـم وللـرفاقـه تـقـل سـور *** دكتور عـلـم ومـن يـتيـه استشاره
وأن صار بأيام الزمن قحط ودهـور *** شــرواه بـالـلاّزم نـحـطّـه ذخــاره
بـنـا مـضـايـف كـنهـا نـايـف الـقـور *** الـوايـلـيـه مـن حـديـث الـعـمــاره

وقال الشاعر احمد الصمعي الخريصي هذين البيتين مجاراة لقصيدة عبدالله بن دهيمش بن عبار :

انـت الهـرم والـلي يعاديـك مذعـور *** صنعـت مجـدك بالكتـاب بجـسـاره
ملكـت الأدب وثـم سويـت لـه سـور *** وبنيـت بحـروف الـبـداوه حـضاره

وقلت هذه الأبيات رد الأخ رد على الأخ أحمد الصمعي :

يا أحمد الصمعي ترى الضد مدحور *** أقــولـهـا لـكـل الـرفـاقــه بـشـاره
حـاول يـبيـن الـلي مهمّش ومغمور *** حيثه على الباطل يحرّض انصاره
يعـوث بأعراض البشر تقـل مخمور *** ولّـع شـراره واحـرقـتـه الشـراره

وقال أحمد الصمعي هذه الأبيات أبو زياد :
رجل على الجزلات يتعب على الصيد *** ورجـل يهيم ويصنع المجد بيـده
في معجم التاريخ أبـي اعطيك نحديـد *** شف برج ابن عبار عالي مديده
قال عبدالله بن عبار جواب للأخ أحمد الصمعي :
تعـيش يامـن تـبـدي المـدح وتـشيـد *** عـسـاك تـرفـل بالـحـيـاه السعيـده
تسلم يا أبن صمعي سليل الأجاويـد *** تـنسب لعـزوة مـن خـيـار البديده

وقال الشاعر الشيخ صفوق بن شامان بن معجل هذه الأبيات أشادة بجهد عبدالله بن دهيمش بن عبار :

هـذا هـو الـلي صـح لا قـال يـفـعـل *** وشعـره قـبـل لا ينطقـه يسمعـونـه
مشعل شعـر بعيوننا يا أبـو مشعـل *** مبطي كتبت الـلي عجـزوا يكتبونه
حصـان شعـرك بينـن لـونـه اشعـل *** وحـنـا بعـد نعشق صهيلـه ولـونـه
دونـك نحـامـي ونتضايـق ونـزعـل *** ونـجـيــك سـيـل هـادرات مـزونــه
والخايب الملسون والخبل الأرعـل *** نـغـول حـلقـه ليـن تطـلـع عـيـونـه

قال عبدالله بن دهيمش بن عبار هذه الأبيات جواب لأبيات الرجل الفاضل صفوق بن شامان المعجل :

يا صفوق ربـك والي العرش يجعـل *** يـمـدّك بـقـــوة ونـصـر ومـعــونـه
يا خلفـة الـلي يخـلي الـذيـب يـمعـل *** هـبـر الثنادي من مضارب طعونه
يا صفوق لا تشره على شبه الأثعل *** تـجـاهـل الخـايـب ولالـك مهـونـه
الـلـي بـمـنـطـوقـه لـلأجـواد يـزعـل *** ذاك الجحـود الـلي رفيقـه يخـونـه
اليـوم الـلي نسمع قـحيحـه ويسعـل *** قـالـوا بــه الـكـوفـيـد لا تـقربـونـه
قال الشاعر علي بن مريبد بن عبدالدايم المسيكي هذه الأبيات يسند على زميله عبدالله بن دهيمش بن عبار :

ماهـي غـريبه عـلى العبار بابداعه *** شاعر كبير وجزيل الشعر بحروفه
الـيـا تـكـلّـم لـه الآذان سـمّـاعــــــه *** بحـر شعر تتعب الشّعار ما تطوفه
مـا اتـمـل شعـره ولـو اتابعه ساعه *** آداب واشعار في فكره وفي جوفه
هامة شعر دوم للجزله يصل باعـه *** مـواقـفـه بيـن كـل النـاس معروفه

قال عبدالله بن دهيمش بن عبار هذه الأبيات جواب لأبيات الشاعر علي بن مريبد بن عبدالدايم المسيكي :

حيالله الـلي يجيـد الشعـر بأنواعـه *** ينظم قوافي جزيل القاف واصنوفه
عـلي المريبد براس الحيد مطلاعه *** برض الطمانه رفيع القدر ماتشوفه
الـقـرم جـدّه في مقيضه ومـربـاعه *** طبعـه يـعـز الجـار ويـكـرّم ضيوفه
ربعه نحو عن ذوهم قـوم طمّـاعـه *** يـوم الـوغى صدّوا ثمانين مردوفه

قال منصور الهايل :

سيف عنزة بالشعر وألا بالأفعال *** عبدالله زلات العدو ما تطوفه
وثـق تواريخ آل سـعود الأبـطـال *** كل قوم ولا عنزة بقافه تشوفه
جواب عبدالله بن عبار رد على منصور الهايل :
تعـيش يا منصـور يا طيّـب الفـال *** جاني جوابك واضحات حـروفـه
منطوق لفظك يشرح الصدر والبال *** مثل النفل ريح الشذا من قطوفه


قال محمد بن عايد الدوهان هذين البيتين يسند على عبدالله بن دهيمش بن عبار :

هلا يا أديب عنزة يامدون مجد الأوايل *** يافخرعزوة ربيعة للنسب والمجد ضابط
لاغرابه لانتخو لك يامؤرخ أولاد وايل *** حنا عنزة يابو مشعل يجمعنا دم وروابط

قال عبدالله بن دهيمش بن عبار هذين البيتين جواب للأخ محمد بن عايد الدوهان:

مرحبابك يامحمد عشت يانسل الحمايل *** نفخر بدوهان جدك للعدو بالسيف خابط
دوم بجهودي تشيد يـوم دوّنت القبـايـل *** من تجوّد بالحقايق ما يهمه كـل هـابـط