قصيدة جديده نعبر عن فحواها - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

03-18-2022, 07:58 AM

قال عبدالله بن دهيمش بن عبار هذه القصيدة تحتوي على شرح ما حصل من تنكّر لجهودي وطعن وسب دون وجه حق وتشكيل مجموعة يحاولون الجحود والتنكّر لخدمتي لقبيلتي من خلال بحوث قمت بها لمدة خمس عقود من الزمن فقلت :

تـاه الـذي وهّـم الجاهـل يـبي قـمـره *** يـغـر مـن يصغي لقولـه وينصح له
الـلي من العـزوة بـدأ يجمع الـزمـره *** ويشيد بالجاهل ولـو خبرته ضحله
اللي ضمر لي شر ما فاد من ضمـره *** كانه تمادى بالخـطأ كيف نسمح له
اصبر على كيده مثل واطي الجمـره *** عسى يكـف وجانب الحق يجنح له
الـلي تنمّـر وش دواعي سبب نمـره *** وش المرام الـلي يـريده ويطمح له
اللي كشف ستر الحمايل يـبي شمره *** يا لـيـت لـو ينظـر لعيـبه ويشبح له
اللي من عيوب البشر صوّر بكمره *** لـو يترك الناس أفـود له وأربح له
من هد مبنى قصر الأجداد ما يعمـره *** الجـد فعـلـه راح مع خيلـه ورحـلـه
كانـه لبس بشته ولوّح عـلى هـمـره *** خيل له أنه مثـل مشعان أخو جحله
ما هو ولي أمري ولاني رهين أمره *** أذكّـره في واقـع الصّدق واشرح له
واللي تـذمّـر من نجاحي سبب ذمـره *** بالحسد امـلالـه ضميره وصرّح له
الـلي عـملـتـه للقـبـيـلـه يـبـي دمـره *** مضمون قصده بالـوسايـل يلمّح له
مجهد ومجهودي يبي دفنه وطمـره *** حاول يسوي لـه بقعـر الثرى دحلـه
يوم أن كلن يسرق الوقت من عمره *** في كل يوم أجوب الأقطار في رحله
مـا قلت شعـر بصابغ الخـد بالحمره *** الجـادل الـلي تـدعـج العيـن بالكحله
شعـري بتمجيـد القبيلـه طـلع ثـمـره *** أشيد بالعـزوة ومن عـال أوضح له
جميع منصف يـعـد الحق ما يغـمـره *** واللي فعل خير بوب الخير تفتح له
اتبع هدى اللي فرض الحج والعمره *** وامسك مناهج ملّـة الديـن والنحلـه
ولاني رفيق اللي قهوته من الخمره *** بيني وبينه بعـد نجـران عـن زحلـه
رفـيـقي الـلي قـلـط الهـيـل والتـمـره *** مـع البخـور وكـل من جـاه يذبح له
شروى الكريم الـلي بديوانه السمّره *** مـن كـان يـرغـب للتعاليل يصلح له

نحمد الله سبحانه وتعالى ونشكر حكومتنا الرشيدة على اصدار التعليمات بمعاقبة من يطعن بالأنساب ويشوه بعض الحمايل وينفى نسبهم في بيانات وكتابات وقد صبرت عشرون عام على السّب والطعن دون وجه حق وصدور الأمر سوف يكفيني شر الذين تعودوا على التعرّض لي حيث أن السجّن والغرامه رادع لهم وحسبي الله ونعم الوكيل