قصيدة جديدة موججة للمنصفين من رجال قبيلة عنزة - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

02-20-2021, 08:27 AM

قال عبدالله بن دهيمش بن عبار هذه القصيدة تحكي الواقع الذي حصل من جحود بعض الجاحدين والذين يشيعون إشاعات كاذبة تحتوي على ظلم وأفتراء :

قال الـذي صاغ القوافي عـلى النون *** قـرايـضٍ مـن فــن بـدعــه بــداهــا
أهـديـه لـلـي بـالـعـهـد مـا يـبـوقـون *** أعـنـي نـوادر عــزوتـي وافهمـاهـا
جميع الـلي من ساس عـنّـاز يعزون *** قـولي يـعـم شخوصها واوجهـاهـا
الـلابـة الـلـي بـالـفـعــال يـتـبـاهـون *** بـهـم اتـفـاخـر وأعـتـزي واتـبـاهـا
وأنـا مـن الـلي عن حماهـا يذودون *** أذكـر مفـاخـر عـزوتي مـن غـلاهـا
أذود عـنـهـا كـل هـاجـي ومـلسـون *** وأكبـح جمـاح الـلي القبيله هجاهـا
ولا أسب غيـر الـلي لـربعي يسبّـون *** ومن يشمـت الويـلان جـعـله فـداهـا
الـعـزوه الـلـي بالـلـّزوم يـتـحـامـون *** تـربي عـلى علـوم المراجل ضناها
الـلي عـلى الفعـل الجميـل يتواصون *** رجـالـهـم روس الـمـعـالـي رقـاهـا
رجالهـم باللّطـف والطـيـب مبـخـون *** نـزيـه عن طـرق الـردى ما مشاها
الـلي بـوقـت الـلّازمـه مـا يـتخـفـون *** أهـل السلـوم الـلي تـعـز اقصراهـا
أهـل النفـوس الـزاكيـه مـا ايتعالون *** أجـواد يـعـرف بـالعـرب مستـواهـا
عـن الظـروف الطاريـة مـا يغيبـون *** الـلي نـهـار الكـون تـقهـر اعـداهـا
زبن الـذي من جايـر الوقت يشكون *** ومـلاذ الـلي جـور الليـالـي حـداهـا
عـصر النقاء يـوم الرجال يتناخـون *** فرسان كـان الحـرب دارت رحـاهـا
يـوم الدبش يحجـر معـقّـل ومرجون *** أذوادهـم مـا يـربـح الـلـي غـزاهــا
أفعالهم شاعت لهـا عصور وقـرون *** أمجـاد لـو طـال الـزمـن مـا محاهـا
العـزوه الـلي بغيـرهـم مـا ايتسمّون *** الاسـم والـفـعـل الـمشـرّف كـفـاهـا
العـزوه الـلي بالـهـواشــل يـهـلّـون *** مـع الكـرم للضـيف حـلـٍو نــبـاهــا
عزوه على علوم الفضيله يحرصون *** يصعب عـلى جـمع المعادي لقاهـا
عـن الـلـوازم طـبعـهـم مـا يصـدّون *** ولهـم ضمايـر ناصعـه مـن صفاهـا
العـزوه الـلي في جهـودي يشيدون *** وراعي الوفاء يجهـر بها ما كماها
شاكر من اصحاب العـدالـه وممنون *** ومن كـل منصف وقفتي مـا نساها
بـيـض الضمـايـر للحقـيقـه يـعـدّون *** حصـن الـرجـال الـلي بـعيـٍد مـداهـا
المنصفين الـلي عـلى الجهد يثنـون *** ومن يعـمل المعروف يلقى جـزاهـا
الـلي اليـا شـافـوا خـمـال يتغاضون *** ومن شاف غرّه ما جلع عن غطاها
أهل القـلـوب الطاهـره مـا يغـدرون *** ولابهـم الـلي فعـل الخيانه نـواهـا
أهـل التـقى الوافين بالخيـر يدعـون *** دعـواتهـم بالنـاس يـدوي صداهـا
كـل الـرجـال المنـصـفـه يستـعـزون *** بالـلي أجتهد وأمجاد ربعـه حصاها
لاشـك قيـل النـاس هيهـات يرضون *** مهما بذلـت الجهـد يصعب رضاهـا
عـنـدي يـقـيـن الـلـي لكتبي يـذمّـون *** أكـثـرهـم الـلـي تـجهلـه مـا قـراهـا
عـلى الـدعـايـة يشمتـون ويلومـون *** ولا منهم اللي شاف وش محتواها
ولا اطاوع اللي دون خبره يقصّـون *** وأعارض الـلي أمجـاد وايـل نفاهـا
بعض الرجال الـلي بالأنساب يفتون *** بهـم الـذي من دون مصـدر رواهـا
قلت الصحيح وكـل الأجـواد يـدرون *** ضـنـا عـنـاز أفـرادهـا وأزعـمـاهـا
قلته وأنا لساني عن السب مسجون *** وانصح الـلي شين المهاجي حكاها
والـلي يـبـون لـمـا بـنـيـتـه يـهـدون *** مـثـل الـشـوامـخ مـا تـهـدّم بـنـاهـا
والـلي بـلمـات المجالـس يهـرجـون *** تقليـد قـول الـلي العـلـوم افـتـراهـا
لومي عـلى الـلي للدعايات يصغون *** من هرج اللي شمل القبيله شظاهـا
خاب اللي خـلاّ عـزوتـه مـا يتدانـون *** تبـاغضت عـقـب الغـلا مـا تـشـاهـا
نحتـاج الـلي لجمع الجماعه يلمـون *** جـمـع الـرفـاقـه مـا نـدوّر سـواهــا
والـلي جـداهـم للمـكـايـد يـحـوكـون *** من فضل ربـي خيّـب الـلـه رجاهـا
والـلـه ما أعلم قصدهم وش يريدون *** أطـلـب عـسى رب العبـاد يـهـداهـا
الـلـي بـغـيـبـة كـل غـايـب يـنـمــوّن *** مـا دريـوا أن الـلـه رقـيـب يـراهــا
الـلي يـدورون القشـر مـا يحـوزون *** عـلـى مـقـاصـدهـا وغـايـة مـنـاهـا
يبطون عـن نيـل الهـدف ثـم يبطون *** عـوج المقاصـد مـا تـصـل مبتغاهـا
والـلي بـوجـود الخـطـأ يستـشكّـون *** تـدور نقـص بمنهـجي مـن عـنـاهـا
الحـمـد لـلـه كـامـل الحـق مصـيـون *** حـكـم الـعـدل كـل الحقوق يحمـاهـا
نمشي عـلى منهج شريعـه وقانـون *** ومـن لـه قضيـه توصلـه منتـهـاهـا
يـالـيـتـهـم عـن الـظـلايــم يـتـوبـون *** وأهـل الخطـأ ياليـت تمنـع خطـاهـا
ياجـب عـلى الـلي للحقايق يعرفـون *** عـقـالـهـا تـمـنـع هـيـاط اسفـهـاهـا
كـل الـعـبـاد مـفـتحـيـن ويـشـوفــون *** ألا الـلي عـيـونـه غشاهـا عـمـاهـا
الـنـاس فـي شبح النواظـر يراعـون *** ولا يشجعون الـلي الخلايق شناهـا
بعـض الـرجـال لكـل ناجح يحسدون *** أهـل القـلوب الحـاقـده وش بـلاهـا
والـلي بجـوفـه أسـود الـرّان مكنون *** نفسه عن دروب الغـوا مـا نهـاهـا
حسيبـهـم رب الـمـلأ مـبـدع الـكـون *** الـلي جـميـع الخـلـق يعـلـم خـفـاهـا
ماجـيـت ناصيـهـم أبـيـهـم يـقـطـون *** ولا يـوم مـديـت الـيـديـن لـعـطـاهـا
الحـمـد لـلـه مقتـنع واطـلـب العـون *** مـن بـاسـط البـيـدا ورافـع سمـاهـا
ومـن صـدّق بهقوات نـاسٍ يـظنـون *** فـشـل وخـابـت كـل هـقـوه هـقـاهـا
ومن فوهوا بالكذب ما حصّلوا لـون *** أبـقـى عـزيـز وهـم عليهـم خـزاهـا