قصائد ثناء ومساجلات وأسناد - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

09-25-2020, 04:26 PM

قال عبدالله بن دهيمش بن عبار هذه القصيدة يسند على سعادة الشيخ الدكتور حسين بن علي الطويلعي :

أكـتـب رسـالــه بـالـوسـايـل تــودّى *** للفاضل الـلي بالفخر بان له صيـت
حـسـيـن أبـو عـلـي مـديـحـه يـبـدّى *** لا جيب علمه قيل يا نعم ما أطريت
مـن جـود كـفّـه بـالصخّـى دوم نـدّى *** عـلى الفضيله والكرم يشمخ البيت
يـا مـا تـعـشّـى مـن لـفــاه وتـغــدّى *** وياما قلّط ضيفه عـلى مفطّح العيت
مـا يـوم مـمـدوح الـسـجـايـا تــردّى *** ينفـق ولكـن مـا لفـظ كلمة اعطيت
كـم جـاه مـغـرم يـلـزمـه دفـع مــدّى *** مـن جـاه قـال ابشـر هلابك وحييت
حـيـث الشبيـه الـلي بوصفه يشـدّى *** حـيـد الجـبـال الـلي بضلعه تـذريـت
كـم مـرّه لـمـن غـّره إبلـيـس هــدّى *** وكم قيل لـه مشكور للخيـر سويـت
تـعـــيـش يـالـلـي لـلـمـواجـيـب أدى *** بي يحتفي وجه السعد كل ما جيـت
يالمنصف الـلي لكـل عـايـل تصـدّى *** وفـّيـت يـا فـخـر القـبـيلـه وكـفّـيـت
يفداك الـلي قـلبـه مـن الـرّان صدّى *** بالكـيـد بـاح وشتـت الشمـل تشتيت
مـن عـال واجـتـاز الحـدود وتـعـدّى *** ياجـب عـلـيـه يـثبـت القـول تثبيـت
وأن كـان مـا دل الـطـريـق وتـقـدّى *** غـرّه كـلام الـقـادحيـن الشـوامـيـت
أجـهـر بصـوتي وأعـتـزي واتحـدّى *** وأريـد تفنيـد الخـطأ كـاني اخطيـت
فـي ضـل عاهـلنا المـلـيـك المـفـدّى *** الـحـمـد لـلـه جـت عـلى مـا تمنيـت

ورد الشيخ حسين بن علي بهذه الأبيات :
يـا مــرحـبــا مـــنـي ســلام يــردّى *** عبر الوسايل كل مصبحت وامسيت
لـلـشـاعـر الـلـي وافـي ولا تـــردّى *** بـيته يـوازي عنـد غـيـره ميت بيت
عـسـاه يـسـلـم لـلـقـبـيــلــة مــردّى *** نطيـب مـن طيـب الرجـال العنـاتيت
قـلـيـل الـلي مـثـلـه لـفـعـلـه يـعـدّى *** يـفـرح الـيـا منـك عـلى بيتـه الفيـت
لـعـل بـيــتـه عــامــراً مــا يــهــدّى *** راعي الكرم والحود يفرح اليا جيت
مــا كــنّـــك الا وارد لــجــم عـــدّى *** هـــدّاج تـيــمــا لا وردتــه تـرويــت
وقال عبدالله بن عبار هذه الأبيات
مـا يـنـفـع الـنـادم تضـجّـر وحـسـره *** ولا يرجـع الماضي اليا فـات حتنـه
ومن خار عـزمـه كـل جهده يخسره *** والـلي عجـز مـا شال حملـه بمتنـه

والـلي صعيـبـات الـمـراجـل تعسـره *** يـطـيـر مـجـده مـثـل دخـان تـتـنــه

ولابـه نـجـاح ألا بـتـفـانـي وجسـره *** واليا عملت استنظـر الفـوز واتـنـه
بعـض الرجال الجمع يرغـب بكسره *** الخبث شين وريحـة الخبـث نـتـنـه
والـلـي يـفـرّق بـيـن أسـره وأســره *** مـغـتـاب ومـحـرّض وثــوار فـتـنـه

هذه الأبيات المتواضعة قالها عبدالله بن دهيمش بن عبار أهداء وثناء على الرجل الفاضل سميّر بن حاتم الرحيّل العواجي أبو جمال حفظه الله ورعاه حيث أنه سمع مقطع صوتي لرجل من الذين تنكروا لجهدي وقد تعرّض لي بكلام لا مبرر له فرد عليه سميّر مرد وافي وشافي وهو صاحب عدل وأنصاف وساقته الحميه ولا توفيه هذه الأبيات حقّه من الشكر والعرفان ونظراً لصعوبة القافية فأن هذه الأبيات قليله بحقّه فقلت :

يـكـرم جنـابـك سلمـت ودمـت يـا سميّـر *** مشكور يالمنصف الصادق يا أبن حاتم
يالباسل الـلي لـفـعـل الـطـيّـب مـتـهـيّــر *** يفـدونـك الـلي مع طريـق الـردى فاتـم

أبــو جـمــال الـيـا لـفـا بــيـتـه مـسـيّــر *** يـا مـا تـعــشـوا مـن قــرا زاده وبـاتــم

ماهي غـريـبـه وأنـت خـيّـر وأبن خـيّـر *** صـدحـت بالـحـق لا مـجـامـل ولا كـاتـم

جـدك يـحـيّـف عـلى العـدوان وايـجـيّـر *** بالساعه الـلي وقـتها أضيق من الخاتـم

يـا أبـن رحـيّـل أشـوف الـوقـت مـتغـيّـر *** بعض الرجـال الحقـد بصدورهـم راتـم

خـطـو الـرجـل مـن كلمة الحـق متـذيّـر *** ولأهـل الظـلايـم قـلـت لمحـاجـجي آتـم

بـهـم الـذي من الكـبـر منـفـوخ ومـزيّـر *** مـا قـال خـوذوا ولـكـن منطـقـه هـاتـم

ويـفـخـر بـفـعـل الـذي بالـبـرزخ مـتـيّـر *** طـمـن ودنّـق والـلي يـفخـر بهـم ماتـم

ولا خـيـر بالـلي يسـب النـاس وايـعـيّـر *** ومـن يشتم النـاس لا يأمـن من الشاتم

والـكـذب حـبـلـه مـثـل ما قالـوا قـصيّـر *** والظّلم وصفه مثـل غلس الدجا العاتـم

قال عبدالرحمن بن موسى المرتعد هذه القصيدة يثني على الشيخ سميّر بن حاتم بن رحيّل العواجي
ويذكر أبيات عبدالله بن دهيمش بن عبار بالشيخ سمّير :
يا أبـو جمـال الوقـت مافـيـه حـيلـه *** أصبر ومن يصبـر مجـمّل وماجـور
مـا تـبـذل مـن الخـيـر تلـقى بـديـلـه *** خـلّك قـدا وأهـل الفضايل لهـم نـور

الـعـز جـمـعـه والمساعـي جـمـيـلـه *** ولولا التكاتف ما ربـط بيننا جسور

ولا أنـت حـر ومـاكـره بـالـطـويـلـه *** ولاني عـلى مـدح المناعيـر مجبور

قـبـلي أبـن عـبـار جـاب الـجـزيــلـه *** مدح بـه اللي من المناعير مسطور

جـدك رحـيّـل عـز مـن يـلـتـجـي لـه *** ادخـل دخـيلـه وأنـثنـا كـل مضهـور

ضـد المعـادي يـوم قـبس الفـتـيـلـه *** والسيف جـرّد وأحـمـر الـدّم منثـور

وتاريـخ أبـن عـبـار رمـز القـبـيـلـه *** قبـل التواصل وقبل ما نسكن الدور

خمسين عـام وهـو بسـيـرة جـليـلـه *** يتعب عـلى الطولات ما قال معذور

ومن سـب أبن عـبـار مـالـه وسيلـه *** قصده جهل أو مقصده كبر وغرور

مـن يـبـهـت الأجـواد يـاعـزتـي لــه *** الناس مـا تصغي عـلى كـل معثـور

والـلي عـلى الغـرات يـومي شليلـه *** قـلّـه عـلى قـرنـك تـنـكّسـت يالـثـور

وقـت النخـاوي نـفـعـل المستحـيلـه *** عـنـد اللقـاء والـمـر بالكبد لـه فـور

ومـن يفعـل المعروف نـال الفضيله *** والمـرجـلـه مـا طـالـهـا كـل مثبـور

مـن يـكتـم الحسنى يـبـيّـن غـلـيـلـه *** والـلي شهد بالظلم هو شاهد الزور

ودنـيـا الفـنـا مامن وراهـا حصيلـه *** مـا دام تـالـيـهـا تـوابـيـت واقـبــور

راحـت بـقـومٍ يـنـطـحـون الـدبـيـلـه *** مـضـالـهـم أيــام بـالعــز وعـصـور

قـوم تـروم الـمـرجـلـه والـنـفـيـلــه *** لـو كـان مـا تملـك ملاييـن وقصـور

كان اعـتـلوا سرج الجـواد الأصيله *** يـوم السنين الـلي بها شر واشرور

بالكـون يروون السيـوف الصقيلـه *** العـزوه الـلـي بالحـرايـب لـهـم دور

والنعـم بالـلي حـمـل ربـعـه يشيـلـه *** عـون الرفيق اللي من الهم مكسور

والحـق يـظهـر شـاهـده مع دلـيـلـه *** والـلي تـنكرّ مابه احساس واشعور

والمجـتهـد مـا بـاد عـزمـه وحـيـلـه *** يبـقى عـزيـز وللمناعـيـر مسطـور