من عادات العرب منذ العصر الجاهلي يتسابقون على حماية الجار ويرون أن خذلان جار القوم عار ومن الأقوال الفخرية في صفاة الرجال يقال فلان عزيز الجار وهكذا فقد نزل عند المطارفة وهم عشيرة من السلقا من العمارات من عنزة نزل في جوارهم عقيل النفيشي الشمري وكانوا المطارفة أهل أبل بينما جارهم الشمري مواشيه غنم وفي أحد الأيام جاءهم علم نذر بأن قوم من أحد القبايل في طريقهم إلى المطارفة غزاه وكانوا المطارفة ناجعين وليس عندهم من السلقا أحد وهم في عدد قليل وليس بأستطاعتهم ملاقاة القوم القادمين لكثرتهم فتشاوروا وقرروا الرحيل ولكن كيف في شياه الجار فأنها لا تماشي الأبل فأقترحوا على الشمري أن يترك غنمه وله مقابل كل شاه ناقة فرفض الشمري هذا العرض المغري علماً أن الناقة تعادل عشر من الغنم ولكن أراد هذا الرجل أمتحان قدرة صبر وتحمل المطارفة ومدى حمايتهم للجار وقال أبيات يوضح أنه ليس بمقدوره أن يترك شياهه وهن في جوار المطارفة فثارت النخوة في رؤسهم وقرروا المسير على قدر ممشى غنم الشمري وعندما لحقوهم القوم انقسموا إلى قسمين قسم يشيلون الغنم فوق الخيل ويبعدونها عن ساحة المعركة والقسم الآخر يقاتلون دفاع عن محارمهم ومواشيهم وبقدرة الله سبحانه وتعالى كتب لهم النصر فدحروا القوم وفازوا بتخليص غنم جارهم وبعد هذه الواقعة أطلق على المطارفة لقب ( أهل الشويهات ) وقال جارهم عقيل النفيشي الشمري هذه الأبيات :

شياهي مزبنهن عن الـلي يريدهـن *** على الرجال أهـل الفعال المطارفه
يأتـون بالشـدات ويدمـون بالـرخـا *** يـوم أن بعض الناس ينكر معارفـه
يـا ويـل مـن هـو بالملاقـا يضدهـم *** ينهج كما اللي وادي السيل جارفه
حاموهل العشوى على حق جارهم *** في ساعـة بـه دمعت العين ذارفـه
مـا هـو كـلام يـقـال شوفي بعـينـي *** بالوقت الـلي فيـه المنايـا مشارفـه
كـل قـوم ولا عـنـاز يـا جاهـل بهـم *** أهـل ناقـة بالكـون تخـلي مواقـفـه
سكانت ديـار الخوف مرهبت العـدا *** كـل ديـرة لا جيـت تـلـقـا طـوارفـه
مـن لابـة يـوم اللـقـا يـنـدعي بـهـا *** هـنـي مـن هـو بالصداقـه يحـالـفـه
قبـيـلـة لا قـيـل يضـرب بهـا المثـل *** لـو ما نعرفه عرف نسمع سوالفـه

وهذه القصيدة سبق وأن كتبت بعض أبياتها في طبعات سابقة من هذا الكتاب ونسبتها لأبن غـزي من المطارفة ثم أفاد الراوي المعروف راضي البقيشي المطرفي رحمه الله بأن الأبيات ليس للغزي وأنما هي من قصيدة لجار المطارفة عقيل النفيشي الشمري صاحب الشياه قالها بعد أن عاد إلى جماعته وكان له ولد أسمه مناع ويقال أن مناع غزا مع جماعته على المطارفة وطلب منه والده أن يرفض الغزو على المطارفة ولكنه أصر فقال عقيل قصيدة يذكـّر أبنه مناع بفضل المطارفة ويحذرة من التعرض لفرسانهم خشية أن يقتلونه فقال عقيل :

أحــذرك يـا مـنـاع يـا كـاني الـثـنـا *** عن طاري العشوى ومن ينتخيبها
وأحذرك عـن صقـر وصقـر سميـه *** لهـم هنـادي مـا يـداوى صـويـبهـا
واليـا تضايقت الضعـن تـنخا غـزي *** هـذي يـمـرقـهـا وهـذي يـجـيـبهـا
وثعلي هـو اللي يثعـل الخيل بالقنـا *** بـادت جـواده بـيـّد الـلـه نـصيـبهـا
وسعـود يـا مـنـاع ذعـار الـسـبـايـا *** لـه صيحـة باللازمة يـنـدعي بـهـا
نـسـيـت يـا مـنـاع كـون عـلـيــنـــا *** من طلعـت البيضاء لحزت مغيبهـا
ولا قـلـت شـي غـيـر كـلـه تخـبـره *** طيـر الجـريعـا بشـر الصبح ذيبهـا
ولا قـلت شي غـيـر عـيني تشوفـه *** وكـم خـفـرة خـلـوه تـنعى حبيـبهـا
وأهـل قطاع عنهـا الأكـرام تـنتحي *** يفرح بهـا من كـان من هو قريبها
وأسألك عن حمراالسعيدي مودتي *** يسقون هـتـّاش الخـلا مـن حليبهـا
ابــداوتــك مـنـهـم اصـيـل اتـشـبـى *** سـعـود يـحـرمـهـا ولـيـه تجـيـبهـا
ونسيتهـم وش فيـك يا مالـح اللبـن *** يـوم يسـام الضـان فـي جـل نيبهـا
وتـبي نيـاق سعـود مـن كبـر قـلبـك *** كـم سـربـة يهفيه ما أحـدٍ دريبهـا
فـوق البريصا كـنـه البـرق خاطـف *** هملول صيف وفوق متـنه سبيبها
وشلك صبي الجود من فوق عنـدل *** سعـود ذعـار الخيـل وأبـوه ذيبهـا
كـم أبـلـج عـشّـاه سحـم الضـواري *** والضبعـة العـرجاء تعـلّم صحيبها
والـلـه يـلـولا طيـبهـم مـا نشـوفـك *** ما شفت ربعـك وين تـالي ذهيـبهـا
وزبنـت أنـا مـن جـوره أولاد وايـل *** قـبـيـلـة يـا عـز مـن يـلـتـجي بـهـا
وأنـا احمد الـلـه شاف فعـل ذكرتـه *** هـرجي عليـه شهـود والله رقيبهـا
بـمـصـقـلات الهـنـد ومـزرج القـنـا *** وشلف نهـار الكون تاكـل حريبهـا
يستاهـلون المـدح والشكـر والثـنـا *** رديـهـم بـالـكـون يلحـق عـطيـبهـا
ونعـم بهـم وأن قيـل هـل الضوايـن *** قـبـيـلـة مـا مـل مـنـهـا قـريـبـهـــا
شياهي شروهـن بالعمـار الغـوالي *** في ساعـة والروح ما ينصخي بها
رايتهم البيضاء عـلى شامخ العـلا *** كـل الـعـلـوم الطيـبـة تـنهـقـي بـهـا
نعم بهل العشوى هل الجود والنقـا *** كـم ذود قـوم شـلـوه مـن عـزيبهـا
هذا وصلى الـلـه عـلى سيـّد البشر *** اعـداد مـا قـيلـت هـروج حـكيـبهـا

* أما الفارس سعود بن ذيب المطرفي فهو من أشجع الرجال ويقال أن صوته يرعب الخيل عندما يزعق عليها يرعجها فتزعج عيالها ومن الروايات التي تنسب لسعود بن ذيب روى لنا الراوي المعروف راضي البقيشي المطرفي فقال أن سعود كان عند أحد القبائل ولا يعرفون عنه شي وغارت على أبل القوم غاره فلحقوا ولا حالفهم الحظ بأسترجاع الأبل فذهب سعود بن ذيب بمفرده ورد الأبل ورمى بعض الفرسان وأخذ خيلهم فأصبح معروف وصار له قدر ومن شعر سعود بن ذيب المطرفي هذه القصيدة يسند على الشيخ أبن عريعر ولها قصة ويقولون بعض الرواة أن الشيخ عبدالله بن حريميس له قصة مشابهة لقصة سعود بن ذيب وبرواية الراوي راضي البقيشي أورد لسعود بن ذيب هذه القصيدة يقول :

يا شيخ سامح زلـتي طلعـت سهيـل *** النجـر جض وصوب حسه مشينـا
ياللي عيون اعـداك مـا تمرح الليـل *** مـن جود جودك جاد عبدك علينـا
حميت بيض الخرش بـأم المحاحيل *** بـيـض النحـور وميتمـات الجنينـا
مـن الشـاوري والبـن حـنـا مقاليـل *** مـع الهوا يا شيخ ريحـه غـشيـنـا
من عقب مـز العظم ورقط الفناجيل *** عـطـيـتـنـا مـطـلـوبـنـا وأنـثـنـيـنـا
أقفيت عن هـرج القـلـوب المغاليـل *** أمـا بـلـونـا بـشـر ولا ابـتـلـيـنـــــا
وذكـرت أنـا ربعي فهود الرجاجيـل *** هـم أنـتـحـوا عـني وحـنـا انتحينـا
ربعي هـل العشوى إلى جدع الشيل *** هـذا نـجـي يـمـه وهـذا يـجـيـنــــا
قريبهـم يحشم عـن النقـص والميـل *** والـجـار عـده واحـدٍ مـن حـديـنـا
وهـرج بـلـيـا شـهـود مـالـه دواليـل *** والـيـا نـخـانـا الجـار دونـه ثـنينـا
جـانـا النفيشي نـايـر يزعـج الـويـل *** بـاقـه بـيـوق فـوق بـوقـه يـبـيـنـا
واشهـودهـا شمـر قـروم المشاكيـل *** هـل الـلحيسـة مـنـوة الجـايـعـيـنـا
وصاح الصياح بنابي يا أهل الخيـل *** غـز اللـوا مـن فـوق نـابي البطينا
ثم أعتـلوا قحص المهار المشاويـل *** وبأيمانهـم حـدب النمش والعرينا
وعدوانهـم عادوا بيـاس وغـرابيـل *** وخـيـل تـولـت خـيـلـهـم مدبـرينـا
نطحهـم الصـابـور عـوق المقـابيـل *** مـن لابـة بالكـون حـبس الكـميـنـا
ويـوم انـتـحـوا بمغـذيـات المخاليـل *** هـنـف الخشوم ودقهـن يـرتجـينـا
طلبت أنـا منشي المـزون الهماليـل *** يـا فـاتـح الـتـوبـات لـلـتـايـبـيـنـــا
والله نصـرني بالنمش شلتهم شيـل *** لعـيـون زرفـات الـبـكـار انـتخيـنـا
عنـدي شهود ولا بهـا قول مـا قيـل *** أرسان الخيـل الـلي لأهلهـا رمينـا

*ومن القصائد التي قيلت في مفاخر المطارفة هذه القصيدة للشاعر محمد الهايس المطرفي يذكر فعل المطارفة في حماية جارهم فيقول :

يـوم العـرب غايـر ونايـر بالأشوار *** وكـل عـلى فـعـلـه يسـوي تمـاثيـل
ربعي هـل العشوى بعيدين الأذكـار *** اللي يشيلون الضواين على الخيل
قصيرهـم ما يجدعونـه عـلى الـدار *** فـي راس عيطـا نايفات الشهاليـل
يوم السويطي صال بالقوم ثم غـار *** جتهـم سرايا الخيل مثـل الهماليـل
ساموا شياهه سومة الصدق ببكار *** وعيا يبيع وصاح ينخى هل الخيل
ردوهل العشوى سبب صيحة الجار *** نقـوة رجـال وكـل أبوهـم حلاحيل
عـنـد النـفـيشي هـيـة تـشتـعـل نـار *** في ساعة وقت الضحى كنه الليـل
صاحوا عليهم صيحة تجلي الأمرار *** يشبع بهـا ذيـب الخلا بالرجاجيـل
مركاضهـم ذل مـن العـيـب والـعـار *** يـبونهـا تـروى لجيـل بـأثـر جـيـل
يـم الجـريـبـا جـدعـوهـن بـالأذكـار *** بحسابهـم كـل المضـاريع والحيـل
يفلون نبت الروض لودونه اخطار *** مـن ضرب ربعي كاسبين التنافيـل
خيالـة العشوى عـلى الكـود صبّـار *** مـا يقبلـون لجـارهـم يلحـقـه ميـل
وشهودهـم شمّـر على كـل ما صار *** وهـرج بـلا فعــل يسـمى تهـاويـل

* ومن شعر قميعان المطرفي قال يجاري قيران بن هندي الجميشي رداً على قصيدته التي مطلعها :

راكب سبعه وسبعيني *** كلهـن مثـل الشياهيني *** مـا ركبهـن كـل مسكيـني
كود صافي الفكر يقداهن

وقال قميعان المطرفي يجاري قيران بن هندي فيقول :
راكب خمسه وتسعيني *** كلهن صنع المضاميني *** جنكـم مـن دار بـرلـيني
يـمـك قميعـان عنـاهـن
يوم مدن مني وزاعن *** من ورا غيم السما ضاعن * ** لولا حرالنارما طاعن
صنع هتـلـر يـوم سواهـن
كل أبوهن جنكم بمري*** فوقهن اللي ماشرب خمري*** يظنيني ضيعن عمري
طاري الخفرات ما انساهن
فرقوهن يم الجوادي*** أدفعواعشره على الوادي*** نبي ندور غض الأنهادي
وصفهن ثنتين بغطاهـن
عشرة قعدت القطهن * ** لامشن ما احدٍ يغالطهن *** أن ركب قيران يمعطهن
عـلـق مزاهبهن وماهـن
وعشرة لبليبص وجنه *** يـوم مـرن مـا تعدنـه *** قبـل يمسي الليـل ضافنـه
عـنـده قميعان ونـاهـن
وعشرةٍ راحن عـلى نيـه *** كلهن لديـار سوريـه *** دارن البـدوان وارعـيـه
وعازني بالشكل حلياهـن
عشرةٍ راحن على مصري *** يقفرن من يسكن القصري *** يوم ردن جنا بعصري
ما تريض خف ممشاهن
وعشرةٍ يـم العبـيداتي *** دورن يالقـرم مشهاتي *** وعـادن لـدار العـماراتي
ما تونن من ركبناهن
وعشرة راحن على شمر *** مناديب وكلهن ضمر *** زارن اللي قصره معمر
أخو جوزاء بساع لا قاهـن
وعشرة راحن لأبن شايع *** فوقهن اللي للعمر بايع*** قمت ادور خلي الضايع
من وراء الشطين جبناهن
كل أبوهن ما لقن ردن *** واعجبني خمسة مدن *** من ورا الشطين ما عدن
عند أبو سيباط ملفاهن
وشفت أنا المجمول بعيوني *** وبشرت قيران مظنوني *** ياربعنالا تلوموني
درنا الذهوب ولقيناهـن

وقال قميعان أبو خضير المطرفي يسند على مهلي بن عبيد المصلوخي :

أبـتـدي بـالـلـه خــلاق الــبــــــراق *** رحـمـتـك يـا رب نـطـلـب عـونـهـا
حـالـي الـلـي شـيـبـه بـعـد الـفـراق *** وعـيـني الـلي سهـرهـا بجـفـونهـا
راكـب الـلي حـركـه قـبـل الشـفـاق *** يـم الــزرقــاء لا تــوقــف دونـهــا
تـلفـي ربعـي ساسهم طيب العمـاق *** فـزعـت المـضيـوم حـزت كـونـهـا
قـل لمهـلي وأخبـره والقلـب ضـاق *** والـضـمـايــر زايـــدات كــونــهـــا
وأعلـم أبن الشرع وأنخـه باحتماق *** الـمـراجـل عـارفـيـن افـنــونـهــــا

*وهذه الهجينبة من شعر عويد المطرفي في أحد غزوات الملك عبدالعزيز

يـا الـلـه يا معتـني بالـقـوت *** يـا مـهـون كـل مــا كـادي
تامـر سعيّـد يشيـل الصـوت *** صكت عليه النضى عـادي
جيناك مثل الرشا المصلوت *** جـيـنـاك والـلـه لـنـا قـادي
مع أبو تركي ماهاب الموت *** ماهو عن الحرب صدادي
العسكـري حـاكـم بـالـكــوت *** متـورث عــقـب الأجـدادي
هو ما عرف فعلنا العكروت *** والـحــق يـقــفــاه طـرادي
قـبـلـه فجـع واحـدٍ مبخـوت *** عـقـب الطرب راح قعـادي
واتشوف فعله عليه اثبـوت *** جـدع الـرجاجيـل بالـوادي

يتبع