قصيده في حفل قبيلة البلاعيس بالقريات - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

06-28-2013, 11:14 PM

هذه القصيده القيتها في الأحتفال المقام في مدينة القريات في الخميس الثامن عشر من شهر شعبان الحالي حيث أحتفلت قبيلة البلاعيس من الأشاجعة
بحضور عدد كبير من مشائخ وأعيان قبائل شمّر وقبائل عنزه حيث وجهوا لنا الدعوة أنجال الشيخ حميّر البلعاسي وقلت :

يـوم جـمع مـابيـن شمّـر اويـلان *** يحسب من أيام الفرح والمسّرات
نخبه من رموز القبيله والأعيان *** بـوجـودهم نـوّر صعـيـد القـريات
واليوم طاب المحتفل واللقا حـان *** من حيث لبـوا للبلاعيس دعوات
هذا المجال اللي به الشعر يزدان *** لاقـام بـيـن الغـانميـن أحتـفـالات
عـلى شرف حضرة سلايل ثنيان *** فهـد ولـد شيخ خصالـه حميـدات
شيخ الزميل من الرجاجيل ديقان *** شهم وكريم وبالنقا سامي الـذات
وأبن رمال اللي له الطيب عنوان *** نعـم بحفيد أهـل الكرم والمروات
والنعـم بالكاسب اليـاقيـل شلقـان *** الكـل يذكـر فعلهم وقـت الأزمـات
ومن لا ذكرت من الأجاويدلاهان *** جملت كل شخوص شمّربالأبيات
ولو أبي أعدد من نوادر وفرسان *** هيهات ما يحصون بالعد هيهات
القابهم تشهـد عـلى كـل مـا كـان *** من مجد ورثهم مفاخـر وطولات
القـاب حـازوهـا بحـزّات الأكـوان *** نالـوا بهـا عنـد القبايـل كـرامات
غلبا وحلوين المحازم هل الشان *** وأهل اللحيسه بالسنين القديمات
واليا تناخوا بالسناعيس غـلمان *** غوش لهم في غالي العمرطنيات
واللي لقبهم قيل للـروس سودان *** لقب فخرحازوا عليه الخريصات
شمـر مـن بـلاد الحويقـه لـرمـان *** لهـم مـدالـي بالمنـاطـق بعـيـدات
منـذ القـدم شمـر وعـنّاز جيـران *** مثـل بعضهم في طبايـع وعـادات
والنعم في شمـر طويلين الأيمان *** والنعـم في عـنّـاز حي القـرابـات
الكـل منهـم دوم يـذكـر بالأحسان *** فازوا بها يوم المراجل صعيبات
قبـايـل تعـرف عـلى مـر الأزمان *** نالوا على فعـل المراجل شهادات
يوم الحرايب والمناويخ شجعان *** تشهد لهم حدب السيوف الرهيفات
وبيوتهـم يشبع بـهـا كـل جيعـان *** وقت القصا يوم المكايل شحيحات
ودخيلهم يلقـا عن الظيم مـزبـان *** ولا يدوّرون العـايـزه بالقصيرات
وأولاد وايـل بالفخـر علمهم بـان *** نالوا فخرهم يوم صعب المهمات
ياما بـوايـل من مـقـادم وشيخـان *** أمجـادهم ما تنحصي بالحسابات
تـاريخهـم مبـطي كتبتـه بـديـوان *** ودونت مجـد جدودهم بالسجلات
أذكـر مفاخرهـم ولا قـلت بهتـان *** وأدون الأمجاد بالعصر الـلي فات
بالمـدح والتمجيـد نظمّت قـيـفـان *** مـلاحـم تبلـغ من الشعـر مـيّـات
ومن لا يعد الصّدق لاشك غلطان *** أثبت عـلى الواقع ولا قـلت زلّات
قلت وعلى قولي دلايـل وبـرهـان *** ولا خير باللي حجته مالها أثبات
عناز مضراب المثل كـل الأحيـان *** يوم العرب لهم صوايل وجـولات
تشهـد بقـوتهـم سلاطين عـثمـان *** وتشهد لهـم مستشرقين الخواجات
قبايـل يعـزون من صلـب عـدنـان *** صفوة ربيعه ما بهم قـط شكّـات
يوم الفخر بالسيف ومذلّق الـزان *** كـل القبـايـل تعـتـزي بالـمـلـمات
واليوم من حمد الولي كلنا خوان *** نعيش في عصـر الهنا والملذات
صرنا بفضل الـلـه رفاقه وخـلّان *** السلم حل وزال عصر الحزازات
بجهود حكّام الوطن نسل مرخان *** عسى السعد يبرالهم كل الأوقات
حكامنا الـلي أمنـوا كـل الأوطـان *** والشرع يقضابه على هدي آيات
سور البلد وحماه من كل عدوان *** من عال ينطح في مدافع وقـوّات
وحنـا لهم حضّار في كـل ميـدان *** والمعتدي يسقأ من السم جرعات

وقد نقل الحفل على قناة صدى