هذا القليب اللي وردناه ياحمود = وهذاك منزلنا ومنزل عربنــــــــــــــا

وهذا السماد وموقد النار موجود = وهذاك منزل بيتنا يوم يبنى

قدام بيض ايامنــــــــا تنقلب سود=وقبل خبيثات السنين تحربنا

يامسندي ماينفع اللوم ياحمود=على السنين الماضية لو عتبنا

والله يالولا هلة الدمع منقود=لاشكي زمانن طيب وقته عقبنا


وقت تخبره يوم انا وانت ياحمود=ياما ضحكنا به وياما طربنا

يوم الغنم تسرح بها نوف وعنود =مسـتانسينن مع طوارف عربنا

مكيفين بونستن مالهــا حدود= لأيام تالي وقتنـــا ما حســـبنا

ياما وردنا صبح الامطار ياحمود=وياما ملينا من الخباري قربنا

بالقيض مع صكات عمري ومحمود=نشره نجيب الكسب لو ما كســـــــبنا

واليوم ما يسرح لهم ناعم العود =وش عاد لو نرقى الرجوم وتعبنــا

رعيانهم صاروا باكستان وهنود =قلب علينــا وقتنا وانقلبنا

والشيب مايحتاج تثبيت وشهود =ياحمود عقب شبة العمر شبنـا

من كمل الستين لا يطلب الزود=غير السجود وقول يا رب تبنـــا ...


....


الشاعر المرحوم باذن الله عايد الضافي ابو عدوان ...........