جيت ابي انام ولاقبلني منامي=مانام من دكّه هواجيس وشطون
سمعت هرج مروجين الكلامي=اللي جداهم بالحمايل يحشون
وش لون ينسى جهد عالي المقامي=ماكنت اصدق ماسمعته يقولون
مايجحد المعروف غير الخمامي=والا حقودٍ طاع خايب وملعون
عبدالله العبار يبقى سنامي=مهما يقول اللي به الحقد مشحون
الحر مايخشى هديل الحمامي=يحوم فوق اللي تعلّوا يحومون
قظا حياته للقبيله محامي=يكوّي وجيه اللي للصيّاخ يحمون
النور عن وجهه يزيل الظلامي=والطبع محفوظٍ على الحق مضمون
من حط بلسان المسولف لجامي=من صد ثرثارٍ على الكذب ملسون
اشعارنا حطوا عليها الوسامي=وامجادنا لولا ابو مشعل يضيعون
ركبوا خيول اوراقهم والقلامي=ولهم من افعال القبايل يحطون
اللي حفظ تاريخنا بالتمامي=تنكر جهوده ليه يالربع وشلون
ولف تواريخٍ عليها البهامي=بصمات لمشاهد حضارات وضعون
تاريخ من ولف سعود الامامي= اللي ذكر تاريخ طامي وطوسون
ال السعود عنوز قبل الف عامي=ماولفه وليم قبل ترجمة جون
صار يتلاعب بالحقايق حرامي=يسرق على كيفه والاعلام يدرون