قصايد ومساجلات جديده من شعر عبدالله بن عبار - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

05-04-2018, 08:32 AM

قصايد ومساجلات جديده

قال عبدالله بن دهيمش بن عبار هذه الأبيات يثني على رجل الأعمال خليل بن عايد البري
والمهندس مشعل بن عبدالله العبار حيث لهم مواقف مشرفه :

هاضت شجـوني وسجـلـت القريض *** والـقـوافـي بالمـعـاني لـه عـروض
أمـتــدح خـلـيـل بـالـخـط الـعـريـض *** والـكـلام أوضّـحـه مـابـه غـمـوض
أبـن عـايـد قـرم لـه صفحات بـيـض *** دوم راسه مرتفع ما هـو مخفوض
مـن طهارت مهجتـه مـالـه بغـيـض *** أشـهـد أنـه دوم رابـح ومحـظـوض
مجهـد بـوقـت الشتاء وأيـام قـيـض *** مـا جـمع مـالـه عطايا ولا قـروض
يـوم خطـو الـلاّش ينـزل للحضيض *** عادته صوب العـلا ينهض نهـوض
أبـو عـبـدالـلـه فـخـرعـزوة فـريض *** طـيّـب وقـدره مـع الـرّبع محفوض
حـيـث نـبع الجـود من كـفّـه يفيـض *** بالكـرم مثـل الخمايـل وسـط روض
ومشعل الـلي شع نـوره لـه وميض *** بالدجّـا ضـّوه عـن المشعل يعـوض
باللـّزم يرسي ولا يعـرف الفضيض *** عنده الواجب مثـل خمس الفروض
وأن تـكـلّـم مـالـمـنـطـوقـه نـقـيـض *** وفي هـذاريـم السوالف ما يخـوض
حيص في شيل الثّقل ماله جضيض *** كـنّـه بـلـيهـان فـي حـمـلـه يـنـوض
مـن ورد هـدّاج جـمّــه مـا يـغـيـض *** يـروي الظـامي ويـمـلأ كـل حـوض
ومن يـلـم الشمل لا يصبح شضيض *** يا بعد من هـو عن الواجب ربوض
يـا عـسى يـفـداكـم الـفـض الغليض *** بـس يهـرف كنّـه الغلـث العضوض
الحـقـود وصاحب القـلـب المريـض *** مخبـث ويلسع مثـل لسـع البعـوض

قال الشاعر منصور بن نايف الرويلي شاعر العليا هذه القصيدة يثني على زميله عبدالله بن دهيمش بن عبار :

أيـه افتخـر كـلمة وفـاء مابهـا جـدال *** تكريمكم تـاج عـلى الصـدر اشيلـه
ربعي مادام الأرض ترسي بها جبال *** هـم المتـون الـلي تـشيـل الثـقـيـلـه
العـزوه الـلي مجـدهـا فـوقي ضـلال *** روس الـرجـال معـدلـت كـل مـيـلـه
العـزوه الـلي مجـدهـا فـوقي ضـلال *** اهـل المواقـف والفـعـول الجـزيـلـه
اليـا انتخـوا ربـعي صناديد الأبطـال *** ارقـابـهـم فـوق الجـبـال الـطـويـلـه
تـردي الـهـقـوات وحـبــالـي طــوال *** ولا اعـتـرف بالصعـب والمستحيله
والـلـه لـوردهـا مـن الـجـال لـلجـال *** واشـد مـن راس الـزنـاد الـفـتـيـلـه
يا تاج راس المجـد والعـز يا عـيـال *** يا عـيـال وايـل عـز مـن تحـتميـلـه
انـا عـلـى مـبـداي يـوم الـدهـر مـال *** لـو انـي اونـس مـثـل حـر المليـلـه
بـيـوت شعـري كـنها ضـرب زلـزال *** واشـد وقـع مـن السيوف الصقيلـه
كـن القـوافي بـرق والحـرف هـمّـال *** اليـا انهمـر يحيي الفياض المحيلـه
جـزل المعـاني يـوم بالفـكـر تـخـتـال *** تـارد عـلـى هـداج مـاهـو ثـمـيـلــه
يرسم لي الموقف عـلى كـل الأشكال *** صورة وفاء لأهـل الخصال النبيله
لـو الشعـر ينطـق عـلى لسان رجـال *** يـقـول لـك مـنصـور مافيـه حـيـلـه
نـعـم انـا شـاعـر عـلى راي من قـال *** لـكـن مـعـي راي ومـقـال ودلـيـلـه
عــبــدالـلـه الــعــبــــار اول ولا زال *** شاعـر تفاخـر بـه عـمـوم القبـيـلـه

قال عبدالله بن دهيمش بن عبار هذه القصيدة مجاراه لقصيدة الشاعر منصور بن نايف الرويلي شاعر العليا وشاعر الويلان :

تعـيش يـا منصـور يـا طـيّـب الـفـال *** قـافـك وصـل وأهديك مـني بـديـلـه
دايـم جـزل يالقـرم واهدافـك اجـزال *** والجـزل عـاداتـه يـحـوش النفـيلـه
تشكـر عـلى لفـظ المعاني والأرسال *** عـبـر الـلي أصبح للتواصل وسيله
مـجـدتـنـي يـاعـل تـفـداك الأنــــذال *** أهـل القـلـوب الـلي تـكـن الـدغـيلـه
يالشاعـر الـلي بالمواقف لك اعمال *** عـندك حضور وكـل محفل تجي لـه
تـبي الفخـر والعـز ما قصدك المـال *** وكـلـن نظـر لـك بالعـيـون الجـليلـه
شعرك بحـر غنّوبـه كهول واشبـال *** يامـا سمعـت مـن التـرانـيـم شـيـلـه
والشعر ديـوان العـرب مابها جـدال *** وهـبـه من الـلـه مـا خـذيتـه هميلـه
القـاف مبطي قيل بـه عـبـر وأمثـال *** هـو شـاهـد فعـول الـرجـال ودلـيلـه
يضهر ذكـر لبّاست الجـوخ والشال *** يـوم المجـالـد فـوق سـرج الكحـيلـه
أنـت الخطيب معـرّب الجـد والخـال *** سـلايـل الـلـي مـا يـبـوق بـعــمـيـلـه
خـلفـة نصيـر اليـا بـطـل كـل عـذّال *** مـا يقـبـلـون مـن المعـاديـن عـيـلـه
يوم الزمان اللي به حروب واقـتال *** من هـازهـم بالكـون شـقّـوا صميلـه
ياما حذفوا بالسيف من راس خيّـال *** ويـامـا ويـامـا رمـلـّوا مـن حـليـلـه
ولـو أبـي أعـدد ما لربعك من أفعال *** ما تنحصي لـو قـلـت تسعـيـن لـيلـه
وأطلـب لعلـك دوم في احسن الحـال *** وأقـبـل تـحـيـه مـن زميـل لـزمـيلـه