وفاة الشيخ النوري بن فواز الشعلان رحمه الله - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

04-30-2016, 07:09 AM

الشيخ النوري بن فواز الشعلان أبو دحام رحمه الله واسكنه فسيح جناته من أبرز مشايخ عنزة وله مواقف في السعي لمصلحة القبيلة والوجاهات لأعتاق الأرقاب وسبق وأن قلت به قصائد عندما وفق في السعي بأطلاق سجناء وقد ضمنت هذه القصائد كتابي ديوان الوائلي :
ومما قلت بالشيخ النوري بن فواز الشعلان هذه القصيدة :

زان المجـال وصـار للقـول ماجـوب *** ونويت اساهم في مجال اختصاصي
امدح جناب اللي مديحه على صوب *** ومدح الرجـال بدون فعـل انتقـاصي
النـوري الـفـواز بـالـفـعـل مـنجـوب *** زبـن الـدخـيـل وملـتجـأ كـل نـاصـي
عـوايـد الـنـوري إلـى جـاه مـنيـوب *** عـانـيه يـبشـر بـالـفـرج والخلاصي
من لاذبه لو هو على العمر مطلوب *** يطلق صراحـه لـو عـليه القصاصي
الوايلي مـن روس عـنـاز محسـوب *** عـلمـه يشـرف عـنـد دانـي وقاصي
ما هـو عشير لكـل من فيـه شاذوب *** ولا هـو لعـفـنيـن المشاور ايقاصي
حيثـه شجاع وجـانبـه دوم مرهـوب *** يرهب عدوه يوم ضرب الرصاصي
كل ما ينال مـن الفخـر يطلب النـوب *** مخلص وعـنـده للقـبـيـلـة اخلاصي
مثل الجبل يذري عن البرد والشوب *** وبـالـعـز ربـعـه رافعـيـن النـواصي
عذروب النوري كان به عد عذروب *** سـم عـلى كـبـد الـمعـادي ايماصـي
عـلى عـدوه كـنـه الـشـري بالـكـوب *** وللصاحب احلا من العسل بالقلاصي
الـوايـلي مـن صـلب فـواز منسـوب *** مـا داس عـيب ولا مشى بالمعاصي
امـجـاد جـده بـالـسـجـلات مـكـتـوب *** ما اظن يحصى سابق المجد حاصي
ودرب المفاخر لـه مسارات ودروب *** لا شك من دونه عراض الشواصي
رامـه ولـد فـواز لـو كـان مـهـيــوب *** ياخذ عـلى المجـد التليـد احتراصي
الـحـر وكـره بـالـعـلا دوم منـصـوب *** والكوخ مأوى حاضيات الصواصي
ومن يتـرك الماجـوب لا بـد مسبوب *** ولا تنفع الهقـوات هـي والخراصي

*وقلت أيضاًهذه القصيدة اثني على الشيخ النوري بن فواز وأنوه للمقصرين أن يحذون حذوه :
يا قـلم سجـل عـلى صفاح السجلـه *** اكـتـب المـكـتـوب وابـده بـالـتحـيـه
مـدح أبـو دحـام خـطـه بـالـمـجـلـه *** الـثـنـاء يـسـتـاهـلــه زبـن الـونـيـه
دون تـمـجـيـدي افـعـالـه يشـهـدلـه *** شيخ من صلـب الشيـوخ العدمليـه
يـا سمي الـلي يـروس رويـل كـلـه *** جـد أبـوك اللي أنت مثـله بالحميـه
مـن وكـر هـزاع مـنـزالـه بـتــلــــه *** راس عيطـا ما نـزل وسـط الهبيـه
جـدك الـشـغـمـوم للـعـدوان عــلـّـه *** يوم عصر السيف وعصر البندقيه
اشـهــد أنـك بـالـمـراجــل جــايـلــه *** طيـر شلـوى مـن مواكـر صيرميـه
الـفـخـر والـمـجـد طـاروقـه تـدلــه *** مجـدكـم مـوروث مـا اخـذتـه حذيـه
مـجــد جــده مـن قـديـم امـعـقـبـلـه *** عـقـبــه فــواز لـلـنــوري حــلــيــه
سـاطـي وبـاتع ولا اتعـرف المـذلـه *** مـا تهـاب الخصـم واسبـاب المنيـه
حـشـت كـل الـمـرجلـه دقـه وجـلـه *** ويـوم اشـيـد بفعـلكـم واجـب عليـه
وأنـت عـقـد المعـضله تنـدب لحلـه *** يـوم خطـو اللاش مـا ينفـع خـويـه
وأن سنح ظرف المراجل تستغـلـه *** بـالـجـهـد والـجـاه حـليـت القـضيـه
لا نصـاك الـلي اشتكى ظيم ومملـه *** مـا اعـتـذرت وقـلـت مالي مقدريـه
تحتفـي بـه والحـواجـب مسفـهـلـه *** وتبـدي الترحيـب فـي نفسٍ رضيـه
من شرح لك عن سجينه قـلت قلـه *** بـشـره يـطـلع ولـو جـرمـه خـطيـه
وأنـثـنـا يـدعـي الكـريـم ويـبـتهـلـه *** دعــوتـه يـحـفـظـك خـلاق الـبـريـه
كـم شـيـخٍ رام فـعـلـك مـا حـصـلــه *** اعـتـفـر يـبي الفخـر واخلـف نويـه
مـن تـكـاسـل عـن لـزومـه فـدوتلـه *** نشمـت الـلي شوفـته صارت دنيـه
مـا نـفـع منيـوب لـو جـاه بـمـحـلـه *** مسلـك الـطـولات مـالـه بـه دعـيـه
ساكـن ومـرتـاح فـي مشـراق فـلـه *** قـد حالـه عـاش فـي عيشـه هـنيـه
وأن نـخـيـتـه لـلـقـرابـة قـال خـلــه *** مـا لـنـا مـقـدور والـعــلـة خـفــيــه
مـا قـضى لا زم ولا يـنفعـك ل لـلـه *** ولا ايـحـامـي دون ربـعـه قـيـدنـيـه
مـن تـفـاخـر بالسنيـن المضمحـلـه *** مـا تــفــيـده كـان شـوفـاتــه رديــه
مـن تسـمـى شيـخ يـنـفـع لا بـتـلـه *** كـيـف شـيـخ ولا يـحـامـي للسـميـه
كـان مطـلـوب الرفـاقـة مـا وصـلـه *** شيخـتـه مـا غـيـر نبـقـه بـالهـويـه
جعـل قـصـرٍ مـا يـكـن الـربـع ظـلـه *** يا عـسى تـالـيـه سـهلـه جـرهـديـه
جـعــل مـا قـال السـديـري جـاريـلـه *** عـسى تـقضـه صـواعـق وبـرديـه
والـسـمـوحـة كـان بـالمنظـوم زلـه *** قـلـتهـا يـا شـيـخ واقـبـلـهـا هـديـه

* وقلت من قصيدة طويله :
الـلـي زعـل مـن مـدحنـا لـبـو دحـام *** يـفـعـل فعايـل طائـل الشـبر والبـوع
شـفع لـربعـه يـوم حكمـوا بـالإعـدام *** وافـرح عوائلهم عقب نوح ودموع
ابـي امـدح الـنـوري ولا اطـيع لـوام *** بـه نفتخر والقول بالصدق مشفوع
عـلم الـفخـر يسـتـاهـله كل ضرغـام *** سلايـل اللي لبسهـم طـوس ودروع
راس العرب بـالمعـضلة موقفـه هام *** ما يخـتفـي مقـدم طوابـيـر وجـموع
والـلي جـداه النوم عـن واجـبـه نـام *** خـلـه بـراحـة بـال ورقـود وهجـوع