الشاعر فيصل بن منصور الرياحي البقمي رحمه الله وجه لي قصيدتين مسجلات بشريط كاسيت ورديت عليه وضمنتها ديوان الوائلي وبناء على طلب بعض الأخوة يسرني أعادة نشر هذه القصائد التي مضى عليهن أكثر من ثلاثين سنة رحم الله زميلنا فيصل وأسكنه فسيح جناّته

*- قال الشاعر فيصل بن منصور الرياحي البقمي هذه القصيدة يسند على زميله عبدالله بن دهيمش بن عبار العنزي :
هات القلم واكتب على البوك يا خي *** بسـم الـلـه الرحـمـن سجـل تحـيـه
حضـرة جنـاب الـلي لـه العـز مبني *** الــوايــلـي مـن عــزوةٍ وايــلـيــــه
الإسـم عـبـدالـلـه وطـاريــه يـكـفـي *** رمـز الشهـامـة والشرف والحميه
أكـتــب لأبـن عــبـار قـّدام يــمـشـي *** جـمـسٍ مجـهـز لـلـديـار الـقـصيـه
جمسٍ جديـد مـن الوكـالات مشـري *** مـنـوة غـريـبٍ منـتـوي لـه بـنـيـه
قـم يالدريول عـايـر الـزيـت والمـي *** وهـاك الرسالة في يـدك من أيديـه
عـب الـتـوانـك فـل والجـيـك ممـلي *** تـحـتـاط بـه مـع خـبــةٍ جـرهــديــه
مـع خـبـةٍ صـوانـهـا يـقـدح الـضي *** جـلـد أكـفــراتـه تـقـل جـلـد بـرديـه
وإلـى زمالـك ظـلـم والخـط الأصلي *** أعــبـر مـعـه يـرعـاك رب الـبـريـه
خـط احلبـان ايميـن مكتـوب مقـري *** فـي لـوحـةٍ بـيـن المفـارق امضيـه
خـطٍ حـديـث ولـوحـتـه عـنـه تنـبي *** بــدايـتـه يـشـدا لـقـوس الـحـنـيـــه
كـن واثـقٍ بـالـلـه والأمـر مـقـضي *** تـاصـل بعـون الـلـه ونفسـك هـنيـه
الجمس يطوي بك فجوج الوطأطي *** الألـف كـيـلـوا يـقـطـعـه باضحويـه
مـر الرياض وشيّـك الجمس بـدري *** وتــفــقــده كـفـيـت شــر الــبـلــيـه
أركب خطوط مع كرى الحزم تبـدي *** مـثــل الـخـيـوط بـجـو دارٍ خـلـيــه
وقـبـل تـجـي خـط الأمارات وادبـي *** مـيّــل درقـسـونـه يـسـارك شـويـه
تـلقـا شغـاميـم الوغـى يـوم تضوي *** أولاد وايـــل حـي ذيــك الـسـمـيــه
مـن مـارثـة عــنــّاز مـا زيهــم زي *** أهـل الفـخـر مـن يـوم بقعـا صبيّـه
ملـفـاك أبـن عـبّـار مـن يـوم تـلـفي *** الـلي عـلى الشـدة عـزومـه قـويـه
تـبـشـر بـتـرحـيـبٍ مـربـّع ومـثــني *** ومـفطـح يـهـزع ركـون الصيـنـيـه
مـع دلـةٍ بـالـهــيــل والـبـن تـغــلـي *** بجـال المـنـاره كـل صـبح وعشيـه
عطه الكتاب وهو على طول يـدري *** الـذيـب مـا يـجـهــل روابـع خـويـه
أسند على الطيّب ولكن وش أشكي *** أشـكي الـزمـن ولا النفوس الدنيـه
الـنـاس ملـويـيـن والـوقـت مـلــوي *** وكيـف المقـارن بـيـن هـذي وذيـه
ناسٍ عـلى الهامش تلومك وتحـكي *** لـو مـالـهـم عـنـدك لـزوم ودعــيـه
وأن جبت علم قالوا العلم ما اقضي *** شـكـاكـةٍ بـنـفـوسـهـا مـروغــيــــه
وأن جيـت تبـغـي فيهـم مـالهـم فـي *** مـثــل الـعـرادة فـيـهـا دوب هـيـــه
وبعض العرب بالزود والكبـر مبلي *** يشيـل نـفسٍ كـبـر ضـلع الـطـمـيـه
تكرم يا أبن عبار عن طبعــه السي *** حـيثـك عـريـب الجـد مانتب حـليـه
خـل الـردي لاهـوب مـيـّت ولا حـي *** زولـه كـبـيـر وغـايـتـه خـربـشـيـه
مــن لا يــعــدك لا تــعــده ولا شــي *** صفـرٍ شمـالـي مـا يشـكـل قـضـيـه
كـانــه رفـيــقٍ لـك فـلا بــد تــبــدي *** عـلـيـه مـن غـبـر الـلـيـالـي زريـه
ماله سواك إلى أحتمى الشب والكي *** ولا لـك سـواه بـحـزة الـمكـرهـيـه
ورفـيـقـك الـلي بالمـواجـيب يـأتـي *** سـيـفٍ يـنـومـس نـاقـلـه كـل هـيـه
خـلـه عـلى جـنبـك عضيـدٍ مصافـي *** ذخـرٍ بـصـكـات الـسـنـيـن الـرديـه
ربعك غناك ولا أنت عنهـم غـناوي *** كانـون عينك ما أغـتـنا عن صبيـه
ذرا ســواهـم مـا يـكــنـك ويــــذري *** يــومـيـن ولا نـازحٍ عــنـك فــيــه
وعـدو جـدك لـو ركض عنـك مقفي *** لا تـأمـنـه يرجع عـلى شكـل حـيـه
هـذا كـلامي ولـلـذي مـثـلـك أشفـي *** عـلـى كـلامـه يـا زبــون الـونــيــه
عبّرت لك عن بعض ماكـن وأخـفي *** بـمـنـاسـبـة وقــتٍ تـصـافـق دلـيـه
أنت تعرف يالقرم في خاطري شـي *** والـرمـز يكـفـي عـن علـومٍ جـليـه
وأخـتـامـهـا عـلـى مـحـمـد نـصـلي *** وبـاقـات وردٍ لأبــن وايــل هــديــه

* وقال عبدالله بن دهيمش بن عبار هذه القصيدة رداً على الشاعر فيصل بن منصور الرياحي البقمي :
يا راكب اللي ما توصف عـلى البي *** ولا يـصـنع اليـابـان مـوتـر حـلـيـه
صالون جمس وهي مراد الفتى هي *** السـبـرمـان مـن المـواتـر شـفـيـه
إلى مشت تطـوي المسافـات بشوي *** وأن يسّـر المـولـى سـريـع مجـيـه
أركب عـلى الصالون لا شـرق الفي *** وأجعـل مسيرك بالضحى والمسيه
وأحـذر مسير القايلـة صكت أعـمي *** يلحـقـك من ممشى الظهيـرة أذيـه
دونــك جـواب لـجــابــةٍ ردهــا لـي *** فـيصـل بـداهـا وأرسـل الخـط لـيـه
جانا الشريط وقـلت يا خاطري حي *** بـالـخـط ومـن عــنـاه وأهـداه لـيـه
فيصل ولـد منصور بالطيب يسـمي *** نسـل الـريـاحي يعـتـزي بـابـقـميـه
قبـل تجي يا القـرم مع طلعـت كـدي *** أنـظـر حضن يزمي سـوات البنيـه
أن جيت في دار البقوم وهاك الحي *** بـيـن السـراة وبيـن رجـم الحـويـه
الشاهـد الـلـه كنهـم مـن عـرب طي *** كـلـن يـقـول أقـلــط دلالــه مـلـيـــه
شبيـه حاتـم بالصخـى وأبنـه عـدي *** تـلـقــاه فـي هـاك البـيـوت العـذيـه
أوصيك ثـم أوصيك يا مسنـدي عي *** حـذراك تـقـلـط عـنــدهـم قـيـدنـيـه
تاخـذ سنه واشهور ما عوقـك شي *** غـيـر الذبـايح بالصحـون الفـضيـه
وأن جيت فيصل وصلـه جابتي ذي *** وأرجـو السموحة كان فيها خطيـه
أن كان تشكي لي من الوقت ملـوي *** والنـاس بعـض أطباعهـا جاهـليـه
النـاس شتى ولا قــنـا يـشبـه اقـني *** مثـل الطيـور الـبـاز غـيـر الحـديـه
يا فيصـل النجضان مـا يشبـه النـي *** وبـعـض المسفـه للحماقـه ضحيـه
مـثـل الزمالـه ينقـل أسفـار وأروي *** لإبـليس أخـو مـره سـوات المطيـه
وكم راس لابه مات علمه وهوحـي *** حيـثـه دفـن مجـده بـقـعـر الهـبـيـه
وقــت الـرخـا يـا وي رجـال يــاوي *** صلـب السـواعـد والمـذارع قـويـه
عن لازمه في حزت الضيق يغضي *** غـمّض عـن الماجـوب كنـه هـفيـه
يغضي وعينه ما بهـا نـون وأصبي *** خـلـه عـسى يـمحـاه رب الـبـريــه
خـل الردي لو كان من ترثت أقصي *** مـا ينـتخي لـو عـزوتـه هـاشـميـه
أزبن عـلىالطيب وجنب هـل الغـي *** ولا تعـتـزي بـأهـل العـقـول الغبيـه
الـرس مـا يـورد عـلى جـالـه أدلـي *** نـبـعـه شحـيـح ولا يـفـيـد الظـميـه
ولا تنتصر قوات وأسلاحها أعصي *** لـكـود بـالـرشـاش والـبـنـدقــيـــــه
ماظن عود اللوز مثل أخمس الطي *** ولا ظـنـتي الخـيـال يـنـطـح سـريـه
ومن لا قصد مولاه يالقرم ما عطي *** نـال الـمـلامـة والحـيـاة الـشـقـيــه
ولا أنـت يالمـنعـور للطيـب تشـري *** مشتـاق لأصحـاب العلـوم الطـريـه
من ساس لابه يوم به تطحن أرحي *** والـكـل يـثـني دون رادع اشـفـيــه
هل الرماح اللي على القـلب تسطي *** نـطـيحـهـم بـالـكـون زار الـمـنـيــه
يـوم السنان اللي تزارق على قطي *** قـطـي الحصـان العـوبـلي والعبـيـه
واليوم دور الميق والهـوك والسي *** مـن حـمـد ربـي بـالحـيـاة الـمـريـه
محد عـلى أحد يا فـتى الجود يجني *** بجـهـود مـن ساوى جميع الرعيـه
الليث اللي خلا الصعب ليق وأهدي *** يـنصاع لـلـواقـع ونـفـسـه رضـيـه
صاروم نجـد وغيـث نجـد ولها ري *** حـرز الـبـلاد وعـزوتـه مـقـرنـيـه
يـمشي عـلى نـهـج الكتـاب الإلهـي *** والـنـاس كـلـه عـنـدهـم بالـسـويـه
كـلـن لهـم بـالعـز والنـصـر يـدعـي *** وأفـعـالهـم بالمجـد مـا هـي خـفـيـه
ولأفعالهـم مـاني بالأشعـار محصي *** تـوصيفهـم بالقيـل يـصعـب عـلـيـه
شاهـدهـم التـاريـخ والنـاس تـدري *** وأفعالهـم بالنـاس شمس ضحويـه
وصلوا على اللي يذكره كـل مقـري *** المصطـفـى هـادي العـبـاد ونـبـيـه

* وقال الشاعر فيصل بن منصور الرياحي البقمي هذه القصيدة يسند على عبدالله بن دهيمش بن عبار العنزي :
سـر يا نديبي فوق قـطاع الأرمـاس *** منـوة غـلامٍ في ضميره حواسيس
امصـفحـن يـنحـن مـن كـف لـمـّاس *** تـوه مـن المينـاء ورد بالقراطيس
عـلـّـق تماريـنه عـلى مهـل واقياس *** ماخذ به الورع المراهق مراويس
إلى وقف كنـه عـلى الوكـر قرنـاس *** تـقـطعـت عـنـده قـلـوب المفـاليس
عـزاه لـلـمـفـلـس يـمـره بـالإفـلاس *** يبغي شـراه وقيمته مـا لهـا قيـس
جمسٍ عـلى كيفك سليمٍ مـن البـاس *** جابـوه من عنـد البحـور البلاليس
ممنـوع مـا يستخدمه غيـر حّـراس *** خفـر السواحل للسواحل حراريس
شغـله عـلى المفتاح للمس حساس *** وأن سـار يسبق خافقات القرانيس
يقفـز مع فجوج الفيافي والأطعـاس *** ويرمي وراه الرمل مثل المتاريس
عـليـه قـرمٍ ما دخـل طـرفـه أنعـاس *** يـكـب نـومـات الضـحى للنعاعيس
يـدق بـه لا هـزه الشـوق هـوجـاس *** حـرٍ بعـينـه مـثـل قـدح المقـابـيس
ملفاه أبـن عـبـّار معـدوم الأجـنـاس *** عبدالله الـلي بالفخـر لـه نـواميس
قـرمٍ عريب الجد ساسٍ على سـاس *** ومسيسٍ فـي قـمة المجـد تسيـيس
مـن عـزوة يـوم البلاوي والأتعاس *** يـروون حـد مقـصمـات النسـانيس
أولاد وايـل بالفـخـر شـمعـة النـاس *** قـول عليه شهود مـا هـو تلاميس
قـوم عـزيزة والفخـر فوقهـا لبـاس *** حمول السبايا محرقيـن المحاميس
تبشر إلـى جيـتـه بتـرحيب وأينـاس *** وأيونسك عن كضمة البال تـأنيس
مـع دلـة تجلي غـثـا البال وأعماس *** الهيـل فيها كت من فرعـت الكيس
وأيقلط الـلي مـا وراء رأسهـا راس *** في سفرة ما حال من دونهاإبليس
عطه الجواب اللي مسجل بقرطـاس *** الـلي عـليه مليّس الضرف تلييس
قـول نقيتـه نـقـو عـن كـل الأدنـاس *** مـا عـوجـوه الخـايبـيـن الـدنانيس
بـيـن المجـالس كنـه الـدر والمـاس *** تجـلي معـانيـه الطلاس الطلاميس
ولا أن أبـن عـبـار سـابح وغطـّاس *** يسبق على الدرالثمين الغطاطيس
بقصد التعرف قلت نرسل ولا بـاس *** ونرسـل لـه المعـنـا بميـزٍ وتقييس
أشفق على المنعور لوهو ورا فاس *** لوحال من دونه بحور وتضاريس
ولا الردي لوكان مـن أقـرب النـاس *** أشـوم عـنـه ولا بـقـربـه تـوانيس
خبـلٍ مـن الكبـر أيتقـاعس تقيعـاس *** ومن الرخامة فوق رأسه هداريس
وأعـوذ بالمعـبـود مـن كـل هـلبـاس *** وش نستفيد من العفون الهلابيس
يامن سناء خـده كما ضـوح مقباس *** يـا أبـو نهـودٍ زامـيـات طـواحيس
مالـك مـع الأنـذال يـا بنـت مجـلاس *** لا تقـربين أهـل الوجيه المتاعيس
عـليـك بالـلي سمعـته تـرفع الـراس *** متنومس ولـه بالشكالـه نـواميس
يـنوس نوسات الفهـد كـل مـا نـاس *** ويزوم زومات الجمل كل ما جيس

وقال عبدالله بن دهيمش بن عبار رداً على الشاعر فيصل بن منصور الرياحي البقمي :
سميـت بسـم الـلـه خـلاق الأنـفـاس *** محـيي العظام الهامدة بالرواميس
الخـالـق الـلي يشحـذه كـل غـّراس *** مـوحي دبيب الذر فوق الطعاميس
عـلام مـا يـجـري بـغـبـات الأغلاس *** فـي غيهب وسط الدياجي دلاقيس
يرجونـه اللي طبعهم دق الأجـراس *** وسـط الكنايس مثل دق المهاريس
ويرجـيه من يتبع مسير أبن عبّاس *** وسـط المنابـر مـا يمـل المجـاليس
ومن بعـد ذكـر الله تناولت قـرطاس *** وكتبت مافـي خاطـري بالقراطيس
جاني جـواب الـلي معـانيـه نبـراس *** فيـه القـدا لمن تـاه مثـل الفوانيس
مـهـديـه قـرم لابـسٍ للـفـخـر طـاس *** فيصل فداه اللاش والنذل والهيس
الــنـادر الـلـي لـلـرذيــلات مـا داس *** شبحه بعـيـد ولا مشى بالدحاويس
من لابـةٍ فعـلـه عـلى قـب الأفـراس *** زبـن الـدخيـل وبالأكاويـن فـرّيـس
لهـم الفـخـر مـن دور تـبّع ونـواس *** الأزد لـهـم بسـاس كهـلان تأسيس
من ينتبه عرقٍ به الطيب ما خـاس *** يـوم المغازي تتعب الخيل والعيس
أن جتك دكلات السبايا لها احساس *** تنـاوخـوا يـوم والظعاين محابيس
والعـج ثـار وشبـك الجمع وأحتاس *** وتعـاقبـوا بالـلي يقـص الفواعيس
ما غير صليل الهنادي لها أضراس *** فـي هـام لباس الدروع المطاويس
اللي يناطحهم غدت خمسه أخماس *** أنكـف وعاف الفايده عقب ماديس
قـلتـه وأنا مـن لابـةٍ ما بهـا أدنـاس *** مـدحتهـم يا نسـل الأجـواد لابـيس
أولاد وايــل لا أنـعــقـد كـل لــولاس *** عـاداتـهـم حـل الـعـقـود للـوالـيس
واليوم سلم ومن عـدا الحق ينداس *** والـشـرع يقـضي بيننـا بالكواليس
سيف العدالة ساطي ويقطع الـراس *** يردع به اللي منهجه منهج غليس
من عال له عبره مصير أبن دواس *** خله مثل قول القضاعي على قيس
ولانـي عـلى الغـرات يالقـرم بـلاس *** لا شك يطري قول عدوان لجريس
حـنا بظل اللي على الشعب مرواس *** حكمـه بشرع الـلـه ولابـه تلابيس
مـثـل الـمـهـنـد للمنـاعـيـر طسـاس *** لا جـاء نـهـارٍ والـنـواظـر معابيس
من معـدن النيروز ما طبـه انحـاس *** عـرق الندى ما فيه ظنه وتوهيس
شاهـدهـم التاريخ مـن دور جساس *** أبـطال ولـدهـم العجاجـه مـدابـيس
نفخر بهم بعـزاز وشعور واحساس *** والشاهـد الـلـه ما بقولي حماليس
صورت لـك بالقاف تصويـر عكّاس *** وسطرت عـذب القافيه بالكراريس
يا مرسل القيفان باعجاب واحماس *** يا شـوق من يزها جديـد الملابيس
ريـم ربـا بالبيـد ما ايداني الأونـاس *** مفلاه قفـرٍ بالصحاصيح ما عـيس
والمعذرة يا شوق مدقوق الألعـاس *** يـعـل يفـداك الهـدوس الجـواسيس
وأشكـر جنابـك كـل ما هـب نسناس *** جـاني الجـواب ولا بقولك تناكيس