مقتطفات من الشعر قيلت في حمايل الهذال الكرام شيوخ مشايخ عنزة - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

07-09-2023, 06:56 PM

مقتطفات من الشعر قيلت في حمايل الهذال الكرام شيوخ مشايخ عنزة

بسم الله الرحمن الرحيم

هذه مقتطفات من قصائد لشعراء من الجيل الماضي لخصتها من كتابي قطوف الأزهار تحتوي
على اشادة ومدح وثناء لآل هذال شيخ مشايخ قبيلة عنزة اصحاب التاريخ المشرّف والصفات
الحميدة والمقام العالي الرفيع وكما يقال ( الناس السنت الحق وهم شهود الله في أرضه :

من قصيدة قالها الشيخ / خالد بن محمد آل خليفه رحمه الله مرحبا بالشيخ /
زبن بن محروت الهذال شيخ مشايخ قبيلة عنزة رحمه الله بمناسبة زيارته للبحرين
عام 1975 م والقصيدة تبلغ ( 44 ) بيت نقتطف منها هذه الأبيات :

يـا مـرحـبـا يـاشـيـخـنـا يـابـن هـذال *** يـا زبـن يـا زبـن الغـريـب الـمجـنّـا
يـا شـيـخ عـنـازن بـلا شــك وجـدال *** روس الشيـوخ قـبـال راسـك تحـنـا
ولـد محـروت هـديـب شيّـال الاثقـال *** ابــو زبـن شـوق الـغـزال الـمـحـنّـا
وجدّك فهد فرز الوغى واف الاسبال *** قـيـدوم عـيـرات النظــا وان سـرنّـا
والجـد الاخـر محسنن حسن الافعـال *** حسـن الـذكـر فـي يـوم باسن ومنّـا
والاّ الحـميـدي راقـين راس مـاطـال *** حـاش الـمـراجــل كـلّـهـا مـا تـونّــا
وعـبـدالله الـمـنعـور كسّـاب الانـفـال *** هـو سـتـر مـنهـن للـغـطـا يـذهـلـنّـا
ومشعان مـن مثلـه فـلا صـار خيّـال *** سـقـم الـرمـك وان كـظّـمـن الأعـنّـا
ومزيد صليب الراي في يوم الاهوال *** ونعـمن بـزيـد الـلي فــزع مـاتـونّـا
نـعـمن بـهـم جونـا حثيثيـن واعجـال *** فـي يـوم هـولـن قـرّب الضـد مـنّـا
ومـن قبلـهـم هــذّال نـعــمن بـهــذّال *** هــو فـخـرنـا ان قـيـل مـنّـا وعــنّـا
أنـتـم عمـود البـيـت وان حـل زلـزال *** يـا واسـطـن دب الـدهــر مـاتـثـنّــا
أهـــل شــدادن لا ارتـحـل شـد نــزّال *** والــيــا نـزل كـل الـعــرب نـزّلـنّــا
عيـد الهجافا اللي انتون عقب زرفال *** هـيـف الغـنم والـكـوم وان ربّـعـنّـا
وان حـل يومن بـه غـدا ذبح واقتـال *** وروس البلـنّـزا بالـنـحـر شـرّعـنّـا
والخيـل مـن ضـرب المزاريق جفّـال *** وفـرسـانـهـا مـن فـوقـهـا جـدّعـنّـا
عـاداتـكـم تـرسـون بـه مثـل الاجبـال *** لــو زحـزحـت اجـبـال ما زحـزحـنّا
هــذي تـحـيـتـنـا لـكــم يـابــن هـــذّال *** مبـدينهـا مـن خـالـص الـروح مـنّـا

من قصيدة قالها الشيخ عجلان بن رمال الشمري يمدح الهذال عندما جاورهم ولقى الحفاوة والتكريم :

أنـا عـنـد الـلي جـرد سمله جديـدي *** امكيّـف والـعـب عـلى أبـو عـتـابـه
شيخ الشيـوخ الـلي يضـد العنـيـدي *** شيخ الشيوخ الـلي عـزيـز جـنـابـه
الشيـخ أبـن هـذال نسـل الحـمـيـدي *** عـزان عـن قـرب الأهـل والقـرابـه

وقال الشاعر عشوي بن سعين الأديب الحسني من قصيدة يثني على الشيخ محروت بن فهد الهذال :

يـا راكـب مـن فـوق حـمـرا ضهيـره *** حمرا ما يفرق ضمرها من بدنهـا
وأن روحــت مــع الـخـلا مـسـذيــره *** الـدرب لـو هـو دفـعـة مـا محنهـا
تـلـفـي لـقـحـام الـدروب الـعـسـيــره *** عـنـد أبـو زبـن دنهـا وأرم عـنهـا
أذنـاب حـيـــل بـالـصـيـانـي يــديــره *** عجّـل عـليـهـا بـالغـدا مـا هـدنهـا
شـره عـلى الـعـدوان يـودع جـريـره *** خـلا حريـم القـوم تشعـط أوجنهـا
أخـوان بـتـلا مـدلـهـيـن الـقـصـيــره *** مـا دوروا الأطماع يا القـرم منهـا

وقال عشوي الأديب هذه الأبيات من أحد قصايدة يصف أحد أكوان الشيخ محروت :

عـيـّن يـبـركـن الـركايـب عـلى زور *** اليـاما رقع دمامهن حيـن الأفجـار
عـلى المعـادي صلهـن فجـة الـنـور *** عـلى المعـادي صلها طيـر غيمـار
غـدوا عليها أولاد وايـل تقـل سـور *** شعـل جوادا ما بهـن عـرق خـوار

وقال الشاعـر عشوي الأديب بالشيخ محروت بن هذال :

أنا أحمد الله يوم فـرخ الفهد صـاب *** أروى عـدوه مـن غـزيـر النكـادي
يا شيخ يا مكـدي غثيثين الأجـنـاب *** يـا حـاكـم البصـرة وبـاب الـرمادي

* ومن شعر الشاعر قطيفان بن سلامة أبو ثميل هذه الأبيات من قصيدة يمدح الشيخ محروت
أبن فهد الهذال شيخ مشائخ عنزة رحمه الله عندما زار الهذال وشاهد كرمهم يقول :

حيّك وعمارك عسى السيل يسقيك *** ديـم عـلـى ديـم تـسـاقـيـه الأمطـار
الـلي اليـا جـاء حـزت الكيل نـأتيـك *** كالن وحطن وادي نخيـب مصـدار
حيث أن فيك الشيخ حكمه محـليـك *** العدمل الـلي منـزله بأيسـر الطـار
عنـده عـزيـزه مثـل عينـه يداريـك *** والناس نوما بس يرعون الأشجار
مـن ماكـر دب الـزمن مـا يخـلـيـك *** عساه شيخـك ليـن يمحن الأحجـار
الـلي بسـط قاعـك وركـز عـواليـك *** عسى لهـم طالـع وبالمـدن حضّـار
يا مـا شبع برباعهـم مـن حواليـك *** ويـا مـا تلـذذ بالمـروة عـلى الجـار
ويا ما عطوا في ماجبه واحدٍ فيـك *** والـلي طلع منهم يتاقي عـن النـار
مـاكـر حـرار وبالمخالـب صواليـك *** أدنـا بـالأدنـى كـل مـن هـد مـا بـار

وقال قطيفان بن سلامه أبو ثميل هذه القصيدة يمدح الشيخ محروت بن فهد آل هذال شيخ مشايخ عنزة :

بـديـت بـالـلـه ذكــر ربــي بـــــادي *** خـلاقـنــا رزاقــنــا والــي الــقــدر
يا من عـزل شخـب الحليب وحلـلـه *** مـن مـثـمـل فـرثٍ ومـن دم حـمـر
طالبـك يـا رحـمـن يا قابـل الـدعى *** مضوي النهار بشمس والليل بقمر
طـالـبـك عـز الشيـخ وأرفـع قـدره *** ولـد فهـد وسعـد مـن هـو بـه صقر
مـضـيـفـتـه مـبـنـيــة لــلــعــانـــي *** وصـيـنـيـتـه مـجـرورة لـلـي يـمــر
وريف القصير أن كان طول وقـته *** حيص إلـى ثـقـّل على حملـه صبـر
والطيـب مـا يضهـر بـلـيـا خـسـاره *** وبـل الثـمـيـلـة مـا يـلاديـه الـنهـر
والـحـكي مـا يـنـفـع بـغـيـر الـلازم *** ولا تـنـفـع الحيلـة إلـى قـل الضفـر
ذكـره وصـل نجـدٍ واقصى الـوادي *** ويدرون فيه اللي ورا سود الحجر
قـال الأديـب أبـن الأديـب الـشـاعـر *** بالشيـخ ولـد الشيخ قيـل مختصـر
عـنـيـت لـه والـلـي عـنـالـه رابــح *** لو هـو كسير الساق لا جالـه جبـر
تقـلط عـلى الجـودا وتثـني وتنثـني *** حيثـك شبيـه سهيـل لامـنـه ظـهـر
غديت بالناموس والطيب والصخى *** مثل الشعيب اللي من الزهرخضر
أخـص حـاضـركـم وكـل غـيـابـكــم *** واللي أنجبه هذال من تاسع ضهر
بالعـز والناموس والمجـد والسعـد *** وانتم هـل الطولات والفعل والفخر
شيوخ الشيوخ من الشيوخ القدايم *** وأنتـم شيوخ اللي بنـا بيت الشعـر
عـاداتكـم لا جـاء الغـريـب بـداركـم *** يسلم من الزودة ومن ظيـم الدهـر
وديوانكـم يـغـدي العماس بمجلسه *** والـلي قدم فيكم عـن الدنسه طهـر
افـرح بـزودتـكـم وعــزي عـزكــم *** وأدعي لكم بالخير كل ابيض شهـر
الساس من وايـل مـن أصـل طيّـب *** كما العـد لا خاضوا بكوكبه انجهـر
يروي عـلى طـول الزمان وينسني *** مـن الـمـال مدهـال لزينـات الـوبـر
صدره عقب ورده ونزله حوضبت *** كمـا حـرةٍ سوداء مدورهـا انـدجـر
تـنـازا السـوانـي فـي دلـيــه عـبّــر *** كما النوح مطلوق عليه من النهر
تضحك لـك الدنيـا ويستـر خاطـرك *** وقـاعٍ تـقـّرب لـك يسقـيهـا المطـر

وهذا البيت من أبيات تنسب للشيخ ابن سويط قالها بالشيخ ابن هذال :
الشيخ قواد السلف والجهامه *** زيزوم ربعه بالنهار الكبيري
وهذا البيت من قصيدة لأحد شعراء العمارات قالها بالهذال :
اخوان بتلا دونها كنهم سور *** اللي يقودون الجموع المخيفه
ومن قصيدة للشاعر جدوع بن عثعث المسيكي السبيعي بالشيخ أبن هذال :
وزبنت أنا لشيخ الشيوخ أبن هـذال *** الشيخ أخـو بتلآ عـزيـز الجـنابي
زبن المطرود اللي على الروح ذلال *** والوجه أبيض من بياض الثيابي

ومن قصيدة للشاعر مشرف الذرب من قبيلة السلقا قال يمدح الشيخ محروت بن بن فهد الهذال :

مـن هـلي يا شيخ أنـا عـليـك بـادي *** والعـرب تأتيـك مـن كـل المشاحي
سامكين البيـت فـي حـزم السنـادي *** يجذب الطرشان من كـل النـواحي
الـكـرم والـطـيـب عـزالـلـه وكـادي *** تذبحون الحيـل واذنـابـه افطـاحـي
تـعـز الـمـعـتـاز يـا طـيـر الـهـدادي *** يا صبي الحـرب يا كبش النطاحي
يـا أخـو بـتـلا باللقـا مالـك مشـادي *** كـنـك أبـو زيـد مـن لـح الـحـاحـي
حـامي الونـدات بـخشـوم الهنـادي *** مشبعين الذيب مع ضافي الجناحي
مـقـدم الـويـلان بـأيـام الـجـهــادي *** ترهـج المخلوق بأكـوان الصباحي
حـزموا وقت المغـيـرب بالـبـرادي *** يتبعون اللي بحربـه مـا استـراحي
ينطح الـلي كثـرهـم كثـر الجـرادي *** يسقي العـدوان مـن بـيـر المـلاحي
ومن قصيدة للشاعر معيوف المطيري هذا البيت :
اخوان بتلا كنهم زمل الأدراس *** ثوب الدنس يوم اللقاء يفصخونه
وقال الشيخ الشاعر عبدالرحمن بن معيتق من قصيدة :
ولا أنحـر الهـذال مـن دور مـنـديـل *** عـنـد العـرب هـم الشيوخ الأوايـل
شيـوخ توكـل مـا تـدور الـمـواكيـل *** وتـذكـر عطاياهـم سمـان وجلايـل

ومن قصيدة للشاعر دبي بن عدوان المطوطح الدهمشي قال :

يلفن على بيت زمـا فـوق الأبـيـات *** راعيـه مـا نعتاض غيـره بالأبـدال
شيخ لنا هالحين والعصر اللي فات *** وعـزٍ لنـا هلحين كـان الدهـر مـال
وشيخ لـنـا مبطي ولا فـيـه شكـات *** امنجبينـه مـن اجـدوده إلـى الخـال
أذخـر بـني عـمـك لحـزات عـازات *** عـزك إلى حدوك ضدك على الجال
وقال دبي أيضاً من قصيدة طويله :
لا جـيـت بـديـار الشيـوخ القـديمـه *** يـزمـي لـكـم بـيـت يـشـادي الجـال
بـيـت لـه الطـولات والعـز والظـفـر *** وبـيــت انـحــازٍ لـلـعـــدا وسـّــلال
حـف الـمـسـوبـع لا تـنـوخ عـنـده *** أنـحـر مـضـيـف فـيـه روس رجـال
لا جيـتهـم مـثـل الأسـود بـوسـطـه *** وأعــرف تــراى قـدامــك الـهــذال
تلقا محروت الشيخ بصدرالمجلس *** شـبـل الـضـواري يـسـبـع الـعـيّـال
محروت سطام السرايا الياأوجهت *** لا جـت تـقـاضع تـقـل قضع جـمـال
شيخ وسلايـل شيخ زيـزوم سربـه *** الا ومـــع هـــــذا جــلــيــس ادوال

وقال مغثي بن سليمه الجلعودي من قصيدة يمدح الهذال :

لا روحت بعصير من قبـل الأغراب *** تـلـفـي مضيـف لـلهـواشـل يـنـادي
ملـفـاك شـيخ منـكـبـه يـدحـم البـاب *** الـلـي حـكـم بـالـبـر هـو والبـلادي
أبـوه قـبـلـه لـلـمـواجـيـب كـسّـــاب *** حامي ركونه عن دروب الفسـادي
يا شيخ يالـلي ماكرك حـر وعـقـاب *** عـطيـب كـف ومضربـك بالثـنـادي
يامن كسرت عيون صلفين الأجناب *** لـولاك مـا نـرعى ثـمـر كـل وادي
أخـوان بتلآ اللي يعـزون الأصحاب *** ضـد الـمـعـادي بـاللـقـا والطـرادي
يا شيخ أنت البيت وحنـا لـه أطنـاب *** لا حـرك المقهـور يـا شيخ عـادي
نرعاك رعي الذود بالقفر وأن ساب *** مـار المحـل فـّرق جـميع البـوادي
وإلـى وصـل يا شيخ بالحـرب نعـاب *** نمشي البياض وناصله بالسوادي
يجـونـك الـلي كـنهـم زمـل الأجـلاب *** رصاصهـم مـثـل البـرد بالشـدادي
أولاد عـلي إلـى حضـر حـزم كـلاب *** أنـجـر سـفينـه كـان حـل الجهـادي
يـا شيـخ مـا قـلـتـه منـافـق وكـّذاب *** وأنـت الـقمـر مالـه شـدي يشـادي

وقال الشاعر غانم بن علي اللميع الدهمشي هذه الأبيات من قصيدة يمدح الشيخ محروت بن فهد الهذال :

تلفي على بيت الصخى والمـروات *** بيـت عتيـق ومـن بعـيـد أعـني لـه
تقلط على فرش الشيوخ النظيفات *** وتـلـقـا عـليـهـن مقحميـن الدبـيلـه
ويجـيـك قـايـم باليديـن السريعـات *** بمبهـر يـقعـد خـوى الـراس هيـلـه
وقت العشا يقول يا خليف قم هات *** صـيـنـيـة يـنـخـون نـاس تـشـيـلــه
مـا تـنـقـل لـولا الـحـلاق القـويـات *** مـن قـرح الخـرفـان وذنـاب حيـلـه
قـلـطاتهـا مـا تـنحصي بالحسابـات *** وحطاطهـا عـده مـن طعس يهيلـه

* وهذه الأبيات من قصيدة للشاعر مليح بن مريبد الغضوري قالها يثني على مشايخ عنزة آل هذال ويقول :

يا راكب الـلي مـا ارزمت للمخاليـل *** مـن ساس شـوّل من قلايع ركابـه
سـربـه تـروّح بـك بيـوت الهـذاليـل *** أهــل ربــاع نـايــفــات اقــطــابــه
كنـك عـلى وادي عرابـه مـن الكيـل *** شـاف الخلاوي نارهـم واقـتـدابـه
برباعهـم تـلقـا مناسف شحـم حيـل *** بصحونهـم لا جـاء المسيّر لقـابـه
كـزه لمحسن ومشعـان ابـن منديـل *** وزيـد الـبـداح وشـافي والـقـرابـه
ودغـيـّم نـطـاح الـوجيـه المقـابـيـل *** لأدبـروا شفـقيـن الرجـال اتـقـابـه

وقال محمد بن منيزل اللولسي الخمشي هذه الأبيات من قصيدة يثني على الشيخ فهد بن عبدالمحسن بن هذال فيقول :

ونعـم بأخـو بتـلا إلـى قالـوا البيـق *** شيـخ الشيـوخ اليـا تـزاود عيـاهـا
كنـه هـديـب الشـام شـال المعاليـق *** وأن شـاف زلات الـرفـاقـه رفـاهـا
طيـر الجروم مشلق الخرب تشليق *** ولـولا فـعـالـه ديـرتـه مـا حـمـاهـا
وربعـه يخلطـون الحلل للمساويـق *** وعيـن المعـادي باللزم هـم دواهـا
ومن قصيدة للشاعر بنيدر بن منديل الرماحي قال :
بأيمننا الهذال كسّابت الثنا *** نافوا على العربان لو ايش طيبها

وقال حميّد العقاب هذه القصيدة يمدح الشيخ محروت بن فهد الهذال :

حـر شلع من ماكره وأدرج الحـوم *** جـذ السبوق وبرقعه وانتوى ويـن
تـتـليـه غـوش كـنهـم دولة الـروم *** أدلا مـن الـبـارق وضـم الجناحيـن
تتليه سـرد الخيـل والجيش ملموم *** مـدلاه شهب الريش وأم المعاطيـن
يـا شيـخ مـانـي بالتمـاثـيـل ملـزوم *** لكن افعالك تطـرب القـلـب والعيـن

وقال حميّد العقاب هذه القصيدة في أحد الوقعات يثني على الشيخ محروت :

يـا النـشـامـى حـولـوا بخـلافـهــنـه *** وأحتسـوا للمـرجلـة قبـل الغلايـب
أسـحـبـوا مـا عـلـقـن بـكـوارهـنــه *** أمهات الخمس عطبـات الضرايـب
بـالـلـزم عـمـارنـا نـرخـص بـهـنـه *** وأن نخانا الشيخ زيزوم الحرايـب
يـنـتـخي لعـيـون بـيـض يـبـخـنـنـه *** رشـن الريحان فـي شقـر الـذوايـب

* وهذه الأبيات من قصيدة من الشعر الشاعـر ميّاح اللوز السبيعي يثني على الشيخ فهد بن هذال شيخ مشايخ عنزة :

يا راكب الـلي لا مشى تـقـل بابـور *** يلفي لأبـن هـذال بيتـه تـقـل سـور
لـه ربعـة تزمي مثل حيد أبا القـور *** بالخـيـزرانـه صّـدع الحـر تصديـع
لا جيـت بـيـت الشيخ نـّوخ قعـودك *** تـراه يـفـرح يـوم هـبـت اسعــودك
لـه شـف أن عـز القـرايـب يسودك *** شيخ فهيـم ولا تخـفـاه المواضيـع
لا جيـت أبـو متعـب عنـان الكميني *** صينيـتـه تـلـقـا عـلـيـهـا السميـني
يـا شـايـل الـحـمـلات لـلعـاجـزينـي *** عـلى نظـرك تطوع العـوج تطـويع

ومن قصيدة للشاعر محمد الدسم يثني على الشيخ محروت بن هذال يقول :

بـيـت الـذي يـوم يــنـصـنــه *** أبـو زبـن هـو مـنـاصيـهـن
ريـحـت دلالـــه لـهــن بـنــه *** مـن الهيـل والبـن مالـيهـن
جــديــدهــن صـايــر شـنــه *** مـن حـمـو نـارٍ تصـالـيهـن
مـا حـط فـنـجـال بـالـهـنـــه *** ولا عـمر يـفتـر قهـوجيهـن
حـمـول الـبـعـاريـن يـأتـنــه *** مـن سـوق بغـداد يشريهـن
عقب أسود الحـرف والعنـه *** الـبـرد والـجـوع طـاويـهـن
تـبـاشـرن يــوم شـافــنـــــه *** أطيب وأخيـر مـن أهاليهـن
ومـن أقـبـلـن قـبـل يـلـفـنــه *** وخـليـف عـينـه تـراعيهـن
جـاب الـغـدا حـيـن مـاجـنـه *** قـبـل تـلاحـق تـوالـيـهــــن
ولا العـشـاء عـنـدهـم سنّـه *** الحـيـل بـالـبـيـت قـانـيهـن
أم الـحـلـق زايـــد فـــنـــــه *** من غيرها صحون ماليهن
هـو فـرحـت الـلـي تـحـرنـه *** عـجـايـز قـل والـيـهـــــــن
هــذي حـبـانـه غـدا ظـنـــه *** زيـرانـهــا مـا يـشـاديـهــن
ومـن قـال بالحـلـوا فـاتـنـه *** أربـع بـيـوت مـخـلـيـهــــن
غـيـر أربـعـه مـا يـشـادنــه *** أبـو زبـن مـن عـوانــيـهـن
عـسـى فـهـد يسكـن الجـنـه *** عـقـّب لهـن مـن يـكفيهـن

ومن قصيدة للشاعر فهد بن صليبيخ هذه الأبيات يثني على الشيخ محروت ويمدح الهذال :
كـان أنـتخـوا بـتـلا بـدلـو التـميّـاح *** راحـت عـلى ذولاك مع كـل ناحـي
جعـل المزون اللي بها البرق لمّاح *** تمطـر عليهم كـل عصـر وصباحي
تسـقي ديـار الـلـي للأجـنـاب زواح *** مكدي النحير وعـز من جاه ناحي
الـلـي لـجـزلات الـنسـانـيـس ذبـّاح *** لا عنكضت سمـر الليال الشحاحي ا
لـلي لـكسـر مسوبع البـيـت شبّـاح *** الشيـخ أخـو بتـلا سطيـم المنـاحي
وقال فهد بن صليبيخ هذه الأبيات من أحد قصايده :
الشيخ شبه الـلي تـلـيّـم وفـاضـي *** مـا خـبـثـوا مـيـه كـثـيـر العـوابيـر
يـا حـيـف جـابـنـه عـلـوم مواضي *** شيـال حـمـل المثـقـلات القـنـاطـيـر
والفـتـكـم ولـف الـدبش للحيـاضي *** بالقيض لا صار الرخيص بحوادير
أمشي بخـدمـتـكم سـريع وراضـي *** وتـل الرسن طـوع على جمـة البير
الـلـه يسـن وجـيـهكـم بـالبـيـاضي *** وحـنـا لـنـا يا أخـوان بتلآ مسافيـر

هذا ما تيسر ذكره وما قيل باسرة الهذال الكرام وقد قيل بهم الكثير من المدح والثناء قديماً وحديثاً نسأل الله لهم التوفيق .
مع تحيات عبدالله بن دهيمش بن عبار الفدعاني العنزي