عندما كنت احرر صفحة في جريدة اليوم التي تصدر بالمنطقة الشرقية قبل ثلاثين سنة كانت ترد قصائد من شعراء ومن ضمنهم الشاعر ابراهيم بن حمد البحراني ومن جوابي لأحد قصائده ورد بيت نشر حالياً في توتر ورئيت أن له متابعين وحبيت أنشر القصائد كامله وقد نشرت تلك القصائد بالمجموعة الكاملة لديوان الوائلي وهو المطبوع من شعري والبيت هو :

لابـد تجبرك المجالس عـلى الـردي *** جـامـل وحـاذر لا تـنوشـك رزايلـه

*- وهذه القصيدة قالها الشاعرإبراهيم بن حمد البحراني من أهالي العيون بالأحساء يسند على
عبدالله بن دهيمش بن عبار العنزي وتحتوي على بعض المعاني حيث يقول :
أجهشت بالـدمع الغـزيـر وهمـايلـه *** وسالـت على وجاني تقاطر مخايله
شلـت الحمـول الكايـده مـا قـدرتهـا *** مـن جـور ميلات الزمان وهـوايلـه
يكتض خافوقي من الغيض والقهـر *** والبـال خان الفكـر وأنكـر جمايلـه
تعكـّر صفاها في ضميري ولجلجت *** عـافـور هـم وضـيـعـه فـي دلايـلـه
أنـا بـلايـه عـرف نـاسٍ مـن الـمـلأ *** في وقت عز الناس زخرف ظلايله
فـي وقـت يا سبحان خلاق هالبشـر *** تغـيّـر وغـيـّر لـه صـفـوف تمايلـه
هـذا صديـقٍ لي مـن العـام منصـح *** واليوم أبغضني وأنا أزريت أصايله
تعجبـت مـن فعـله ومـن شين نيتـه *** يا أبو مشعل ما أظن هذي عمايلـه
لـكـن تـأكــد لـي وبـانـت مــروتـــه *** هيهـات مـا تـخـفـا عـلينـا فـعـايـلـه
لـّوام سـبـابٍ دنــي مــخـــــــــادع *** هـمـّاز لـمـاز وخـبـيـثـه مـسـايـلـــه
لا صرت عنده لـك معـزة ومسهـلا *** ويقطـر لسانـه بالعسل مـن نحايلـه
ولا أقفيت من عـنده تغشّاك بالخنـا *** ثـم قـال هـذا بـه وهـذا بـحـلايـلـــه
تعبـت لا الـقـا لـي صديـقٍ مصافـي *** شهم وعلى الشدات تظهـر جلايلـه
قـالـوا علامـك مـن معـارفـك ميـّس *** هـو ما خلق بالكون من لـه مثايلـه
قلت أفهموني وأدركوا كل مقصدي *** تـعـالــوا ودلـوني تـراني بسـايـلـه
أن كـان في ذالوقـت موجـود حاتـم *** هـيا مـعـي يا قـوم نعـرف شمـايلـه
وأن كان في ذا الوقت موجود عنتر *** قولوا ولو مرة تـرى ذي صوايلـه
وأن كـان موجـود السمؤل وطـارق *** بـالـلـه هـاتـولـي مـواري دلايـلـــه
لـكـن خـسـاره راح دور الـمـراجـل *** وبـقـي لـكـم دوراً كـثـيـرة رذايـلــه
هـاتـوا بـوحـدة يالشبـاب الخنـافس *** وقـولـوا لـنـا فعـل جميلـه فضايلـه
لا شـك عـزي للـذي عـاش وقـتكـم *** عـز الله أن المـرجـلة عـنـه حايـلـه
البعـد عـنكم هـو شفـاتـي ومطـلبـي *** ولا خير بالـلي ما بـه أدراك طايله
دنياك هذي يا أبن الأجواد في خطر *** ولا بـد مـا شـنـعـات الأيـام زايـلــه
أنا زاهـدٍ بالوقـت والنـاس والعـمـر *** أنـا زاهــداً فـي كــل شـي أخـايـلـه
ملـيـت مـا صبـرٍ أطيـقـه ولا رجـاء *** عــزاه كـم هـمٍ بـالأضـلاع شـايـلـه
يا خوي عبدالله تـرى الظيم لاعـني *** ولامن فرج يا خوك أرجـي منايلـه
فـي كـل يـوم لـي بـعــد يـوم عــلــه *** والنفس صارت للهواجيس عايلـه
أن قـلت لهـا يا نـفس كـفي وأكتـفي *** تصعـبـت مـا هـي للأشـوار مايـلـه
وعـزيتهـا بالـيـأس حسرة ولـوعـة *** والـواحـد المعـبود نرجي جـزايلـه

* وقال عبدالله بن دهيمش بن عبار هذه القصيدة رداً على الشاعر إبراهيم بن حمد البحراني :

بـديـت فـي قـافـي مـن الفكـر قايلـه *** أترك سماج الهرج وآخـذ صمايلـه
من خاطري عذب القوافي نظمتهـا *** رد الصديق الـلي وردنـي رسـايلـه
جاني جـوابك يابـن حمـد وسـرنـي *** حيـيت يـا إبـراهـيـم مكـرم نـزايـلـه
يا مشتكي جـور اللـيـالي وكـيـدهـا *** أعـرف سنع عصرك وحاذر ختايله
دنـيـاك غـدارة كـفـا الـلـه شــرهــا *** نـدمـان مـن يـبـدي عـليـها غلايلـه
وتـرى عـبـاد الله تـنـوع صنـوفهـا *** خـل الـخـلايـق لا تـفـتـش دغـايـلـه
مـن راقـب المخـلـوق يـزداد هـمّـه *** بـشـار قـبـلـي قـالـهـا فـي مـثـايـلـه
أن طعـتـني خـل الخـلايـق بشـانهـا *** ولا تكـتـرث بالـلي يـربـي جـدايـلـه
الناس لو هي في مشافة أجسامهـا *** مـا يفـرقـون أنـذالهـا مـن حمـايلـه
وعيب الفتى ما هـو بتطويل قذلتـه *** عيـب الفـتى لا صـار سـودٍ فـوايلـه
والـناس غـرس وفيـه مـرٍ وحـالـي *** والغـرس تجـنا العيـنه من شتايلـه
ولا خليت الدنيا مـن أهـل الفضيلـة *** والطيـب بـاقـي بالحمـايـل عـقايلـه
وكـم واحـدٍ بالنـاس سـودٍ ملامحـه *** لا شك ترضى حين تبخـن خصايلـه
خـذ العبر يالقرم من صاحب المثـل *** اليـا بان لك وجـه الفـتى لا تسايلـه
غلطان من يحكم بشـوف المضاهـر *** يصعـب تميـّز كـدشها من أصايلـه
أوصيـك لا ترافـق خبيـث الطبـايـع *** رافـق خيـار القـوم وأتـرك هـزايلـه
أبـعـد عـن الفاسـد وجنب طرايـقـه *** وأبـعـد ظعـونـك لا تخـالـط رحـايلـه
لا تصاحـب الخايـن يـلغـنـك بالـردا *** أحـذر وحـاذر لا تـصـيـدك حبـايـلـه
مـن رافـق الطيـّب يعـزه بـرفـقـتـه *** ذخر الرفيق أن كان ضاقت محايلـه
رفـقـت حليف الجـود عـز وكرامـه *** وأن شـاف خملاتـك يسـدد خلايـلـه
الأجـواد وصّـفـهـا المهـادي محمـد *** والنـاس حاضـرها يشـابـه أوايـلـه
والأنـذال وصـّف المهـادي أفعالهـا *** خسران اللي باللاش يزرع جمايلـه
تـلـقـا المـروة والكـرم والشجـاعـه *** عـنـد الـرجـال الـلـي كـرامٍ سبـايلـه
وتلقـا الخلاعـة والدناعـات والـردا *** عـنـد الرخـوم الـلي كثيـرة سفايلـه
وإلـى جـلست بمجلسٍ فـيـه فـاسـد *** جنـب مسيـره وأخصـره لا تهـايلـه
لابـد تجبرك المجالس عـلى الـردي *** جـامـل وحـاذر لا تـنوشـك رزايلـه
ولا كـل طـيـّب جـاب مـثـله سـلالـه *** ولا كـل نـذلٍ صـار مـثـلـه سـلايـلـه
وأشـبـاه حـاتـم يالسنافي بعصـرنـا *** وعـنتـر ولـد شـداد يـوجـد عـدايلـه
أنـظـر سنام المجـد سـور الجزيـرة *** مـلـوكٍ عـسـانـا مـا نـدور بـدايـلــه
لـيـوث المعامع ماكـر العـز والفخـر *** وهـم ظلنـا عـن حـر حامي قوايلـه
سـور البـلاد وحرزها عـن عدوهـا *** وذخرهـا كـان الحـرب شبت فتايلـه
أفـعـالـهـم فـاقـت تـواصيـف قـولنـا *** ويكفيـك عـن كثـر المفاخـر قلايلـه