قصائد جديده

قال عبدالله بن دهيمش بن عبار العنزي هذه القصيده يبارك للشيخ عوده بن حييان
الجبوري بمناسبة افتتاح قصره العامر في قليب الترمس بمنطقة القصيم :

يقـول من صاغ المعاني ضميـره *** عـن الـقـدا مـا عـال مثقـال ذرّه
نفخر بعـز أهـل الوجيه السفيـره *** وجينـا نـبـارك للجبوري مـبّـره
جـينا نبارك لـه عسى الله يجيـره *** يسعد بقصره مـا تجيه المضّره
قصره ياعـل الـرب يعطيه خيـره *** وعسى ولي الكون يكفيه شـرّه
الصـافي الـوافي نـقـي السريـره *** عـسـاه يـنعـم بالهـنـا والمسـرّه
الشيخ عوده من كـرام العشيـره *** طبع الكرم والجـود عوده مقـرّه
بـه عيب تقليط الجفان الغـزيـره *** مـا يـذخــر الـمـاجــود لـلـه درّه
درب المكـارم دوم يسلك مسيـره *** ما بان لـه مع سكّة البخل جـرّه
اليا كـرم مـا طاع شور المشيـره *** تـنـدا من شحوم الهرافي سفّره
زيـن النبا مـا قـيـل نفسه كبـيـره *** سهل الجناب ولا ذكر به مغـرّه
من ساس لابه ينطحون المغيره *** ضـد الـعـدا لا صـار للخيـل كـرّه
سلقا سقام الضـد يـوم الجـريـره *** يـوم المهنّـد لـه بالأرقاب صـرّه
سلقا حمول الخيل عـز القصيره *** زمان عصر اللي الجحافل يجرّه
من خيبـر الحـرّه لحـد الجـزيـره *** داجوبها السلقا على اكوار حرّه
صالوا على الزرفات في كل ديره *** بالجمع الـلي دار المخافه يمرّه
لـهـم مـفـاخـر لـو نـعـدّه كـثـيـره *** والمرجله مـا تنحصي فرد مـرّه

قال عبدالله بن دهيمش بن عبار هذه الأبيات يسند على الرجل الفاضل نهار بن
عبيد الخلاصي أبو خلف حيث أنه يشب كل عصر ويدعي الأصدقاء لمجلسه :

في كـل عصر عنـد أبـو خلف شبّـه *** النـادر الـلي مـن رجـال الخلاصات
الــبــن بـالـفـنـجـال دايــم يــصـبّــه *** وبـعـده لذيذ الشاي يسكب بكاسات
سـلـم الحـمـايـل مـاسـكـه مـا يـكبّـه *** مـيـراث جـدّه بالسنـيـن الـقـديمـات
أبـو خـلـف عـنـد الـلّـزوم اعـتصبّـه *** محـزمك كانـه صـار بالوقت ميلات
عسى يحفـظه سـامـك العـرش ربّـه *** ويكـفيـه شـر وكـيـد حاسد وشمّات
نـهــار الـلـي كـل الـرفـاقـه تـحـبّــه *** نزه الشوارب سامي الأصل والذات
شـهـم وكـريـم ولا تـجـد مـن يسبّـه *** فـهـيـم وأهـدافـه ابـعـاد ورفـيـعـات
مـا فـيـه عـلـم ألا ضـمـيـره يـضبّـه *** مـن صغـر سنّـه محتفظ بالروايـات
لــو تـنـشـده عـن كــل وادي وتـبّـه *** يعـطيـك شـرح ابعـادهـا والمسافات
ولـو تنشده عن شخص باسمه ينبّه *** ويشـرح لـنـا عـلـوم عـلينـا خفيات
حـيـثـه صـمـال العـلـم يعـطيـك لـبّـه *** ولا قال كـلمه مالها شهود واثبـات
جـميـع مـن يسـمـع كـلامـه عـجـبـّه *** واليـا تكـلّـم تصغي الـربـع باسكات
أبـو خـلـف لـه مجـلسٍ مـا يـطـبّـه *** راعـي النقـيـلي والعـلـوم الـرديـات
المجلس اللي من جلس بـه رغـبـّه *** كل يـوم نقضيبه من الوقت ساعات
مجلس شرف في كل عصر نحضبّه *** يبهج ضمير الـلي يـدور الـوناسات
يجمع من شخوص الرجاجيل صبّه *** نخبه من أهـل المـرجـله والشكالات
مـا بهـم الـلي بأهـل المهايط تشبّـه *** دايـم سـوالـفـهـم سمـان وجـزيـلات
واخـتـام مجـلسهم بـه الشيـخ نـبّـه *** عـلى هـدى الهادي وتفسير الآيـات

قال عبدالله بن دهيمش بن عبار هذه الأبيات يثني على قبيلة الحازم عيال العود ويشكرهم
على موقفهم المشرّف في مساهمتهم بدفع دية محمد بن أحمد بن بشير الفدعاني :

نـعـوذ بـالـمـولـى عـزيـز الـجـلالــه *** رب العبـاد مكـوّن الخـلق من طيـن
الـلـه يـجـنـبـنـا الـغـوى والـضـلالـه *** نـدرى المـلام ونتـقي قـول مخطين
مـا نشمت الصاحب ونـذكـر خمالـه *** حـقـّه حـماه العـرف والسّلم والدين
مـن طـاب مـنـا نفـتخـر فـي فـعـالـه *** الـزيـن نصدح بـه ولا نذكـر الشين
والـعـلـم نـذكـر بالحـقايـق صـمـالـه *** ونمشي عـلى منهاج سلـم وقوانين
نظهر ثناء الـلي جاد مـن حـر مالـه *** لأجـل السجين الـلي عـليه الملايين
الـلـي فــزع لأبـن بـشـيـر وعـنـالـه *** يستـاهـل التمجـيـد وسـط الدياويـن
ماجـوا لـنـا الحـازم يـبـون الدّخـالـه *** مـاهـم ضعـوف ولا الحـازم ذليليـن
أحـرار مـا أحـد لـه عـلـيهـم وكـالـه *** في عـز من ساد الجـزيره عزيزين
جـابـتهـم الـنخـوه وسـووا جـمـالـه *** مبـطي عـيـال العـود مـاهـم رديـيـن
فـيهـم مـن خـصال الكـرم والبسالـه *** وبـهـم الـرجـولـه والحـميه للأدنين
وأن جـاهم الرجلي وراعي الزمالـه *** يلـقى الكـرم في شامخات الدياويـن
وأن انتخـوا بالعـود وقـت الصيـالـه *** عـدوهم عـنـد اللـقـاء لاعـه البـيـن
يعزون من ساس الفـخـر والجزالـه *** عـزوة فـريـض الـلي تكيد المعادين
ربـعي هـل الطـولات مـاهـم حـثـالـه *** ضد المعـادي كان صار اللّغى شين

وهذه الأبيات قلتها بالصديق الوفي الشيخ سعد بن محمد العبيدان الجلعودي
صاحب المواقف المشرفه :

يـا أبـو محمـد يـوم نـذكـر مـواقـفـك *** أحتـار مـدري كيـف يا شيخ اكافيك
مهما بديت المدح مـا ظـني انصفـك *** كثـر الثناء يا شيخ هيهات يـوفـيـك
لا جـيتـك اشعـر فـي حـرارة تلطّفـك *** تـروف بـي كـني من أدنـى بنيخيـك
أنـت النبيـل الـلي غـريبـه وصايفـك *** لـك الشكـر يا عـز من كـان ناصيك
أفـعـال طـيـبـك يالسنـافـي تـشـرّفـك *** عسى الولي من كـل مكروه يحميك
يا سعـد يا بعـدك عن الـزور والأفك *** تـقـل خـمـلاتـك وتـكـثـر حـسـانـيـك
قـلتـه وأنا يا نسل الأجـواد عـارفـك *** الطـيـب سلـمك والفضيله مـبـاديـك
رب الخلايـق ضمن الأبـرار صنّفـك *** والشاهـد الله دوم بالخيـر نـطـريـك
طيبـك عـلى فـعـل الجـمايـل مكلّفـك *** ومولاك للمعروف والخيـر مهـديـك
مـرحـوم عـود مـن العبيدان خـلّفـك *** أبـوك اللي لعـلـم الـفضيله موصيك

وهذه الأبيات نشرها عبر تويتر الأخ الذي رمز لاسمه م العنزي يقول :

يا حـبني للشعـر لا صـار محبوك *** مـن شاعـر دايـم يجيـب الجميله
يروم صعبه والهـزل دوم متروك *** هـذاك ابـن عـبـار رمـز القبـيلـه
شعره جميل ولابها ريب وشكوك *** يارد عـلى الشّرد ولا احـد مثيله
يطرب مسامعنا ويطرب له ملوك *** قولـه صمال ولا يقـول الهـزيلـه
يحـوز الأفضل كنه مختم صكـوك *** فـوق الجـزايـل مـا نـدور بـديلـه
لوينصرف شعره من بنوك بشيوك *** شعـره كثيـر ونقـدته مستحيله
وهو الذي دربه على العز محيوك *** يفدونه الهلباج وأهـل الفشيلـه
جـاتـك قـويـه وقـافيتها عـلـى أوك *** واشوفها في حق وجهك قليله

وقد جاريت الأخ م العنزي بهذه الأبيات :

حي الجواب وحي ما يلفظه فـوك *** حي الصديق الـلي اتشرّف بقيله
الله يعـز الـلي عـلى الطيب ربـوك *** الـوالدين أهـل التـقّى والفضيلـه
أبشر ترى قافي منـزه وأنا أخوك *** ما يـوم حطيته لك الـلـه وسيـلـه
أكتب عذيات القوافي عـلى البوك *** أتـرك ضعيف القاف وآخذ جليله
نختار جزل القاف والهزل متروك *** ولا خيـر باللي ما علومه جزيله
بيت القبيله يا بن الأجواد مسموك *** ورمز القبيله من يحوش النفيله
يفداك يا طيـر السعد كـل صعـلـوك *** سود القلوب أهل النفوس العليله
بعض العفون اللي اليا طبت سبوك *** من حسدهم لأهـل الخلاقه نبيلـه

واضاف احد الأخوه يقول :
عبدالله العبار يا كثر ما اطروك *** وقافك يا ابو مشعل بعز القبيله
قبيلة مـا بعـزهـا ريـب وشكوك *** رديـهـم بالطيـب حـاز النفـيـلـه

وهذه الأبيات من شعر محمد بن عايد بن دوهان عبر التويتر :

مـرحبـا يالـلي بالفخـر صيتـك بـيـن العـرب شـاع
يا سيف عنزة الصمصام وقت اللقاء وأنت الّدرع

يا مـؤرخ بـكـر وتـغـلـب وعـنـزة بـكـل الأصـقـاع
تـفـتـخـر بـك ربـيـعـه ومـن سـاد الحكم وبالشرع

وقد جاريته بهذه الأبيات :

يا محـمـد يابـن دوهـان عـشـت يالـقـرم الشجـاع
أفـتخـر بـك يالصنـديـد حـيـث أنـك يا محـمد بـرع

يا محـمـد عسى يـفـداك خـطـو الهـبـيـل الـرعـاع
دايـم بالصاحـب يـخون خبيث وبـه قـلـب الصرع

وهذين البيتين ارسلهن الزميل الشاعر حميد الملفي عبر الوات سب :

عـساك دايـم بالفـرح يا أبـن عـبـار *** عـبـدالله الـلي طـاب حظّه وفعـلـه
القرم أبـو مشعل كما ضلـع سنجـار *** نـور الـقبـيـلـه للعـنـزتـيـن شعـلـه

ورديت عليه :
يا حمـيّـد المنعور يا نسل الأخـيـار *** منطوق لفـظـك بالفخـر نستمع لـه
يا حميد الملفي ترى الوقـت غـدّار *** وأن كان ما طاوع لك الوقت طع له

قال خلف بن ظاهر الحازمي هذه القصيدة يسند على زميله عبدالله بن دهيمش بن عبار :
نطلب اللي بالفزع عبـده يجيـره *** الـلـه الـلي عـالـم بـكـل العقايـد
عسى يثـبت عـز قـيّـاد المسيره *** الملوك الغـر بهـم المدح شايـد
قـادت الإسلام يـأبـون الكسيـره *** بالـجـزيـره وحـّدوا كـل البـدايـد
أسـرة آل سعود للمجرم نـحيـره *** من عاداهم خلوا عظامه رمايـد
هم حماة الدين هم ضد الشريره *** الفخر والمجد ما يحصى بعدايد
هل العوجا هم سندنا بكل حـيره *** ما يذودون الخصيم بسيف بايـد
حبهـم وسط الضمايـر نستنيـره *** وبأمرهم نخوض نيـران الوقايد
مقدمنـا سلمان زيزوم المغـيـره *** هـو ذرانـا لـو جليد البـرد زايـد
هو سلمان الحزم ومحمد وزيره *** عاش ولي العهد رجـل الشدايد
ومحـمد السلمان دفاعـه يـديـره *** عن حـدود بلادنا للخصم صايـد
محتمين الدين والعـزوه شهيره *** أهـل العوجاء للعدا قهـر ونكايد
الدستور الشرع والسنّه منيـره *** نسل حاكم بالمراجل لـه عـوايـد
كـل مـنـا محبتكـم فـي ضمـيـره *** ولا نـطيـع بحكمكـم نـاس بـلايـد
ما تناسى فضلكم من له بصيره *** وأحمد الـلـه عصركم كلّه فوايد
قالها محسن وأبو مشعل ظهيره *** الأديـب الشهـم للعـزوه سنـايـد
هـذا أبـن عـبـار نـقـي السـريـره *** سجـل التاريخ بصفاح الجرايـد
وضّـح الأنـساب تـمـلأ بتعـبـيـره *** الولي يحميه من شـر الحسايد
الـذي سـوّاه مـا سـواه غــيــــره *** من يقول الحق عنده له شهايد
انـتـم الشجعان لـعـداكـم عـثيـره *** يـوم شـر الـنـاس تبيـد البـوايـد

قال عبدالله بن دهيمش بن عبار هذه الأبيات يوضح نسب قبيلة الحازم :
حـنـا الـحـازم مـا نـشـك بـنسـبـهـــم *** سـلايـل الـلي عـقّـر الخـيـل تعـقيـر
وحنـا غـضبنـا مـن دواعي غضبهم *** ولا نخـبـر بالأجـواد عـيب ومعايير
وحـنـا لـك الـلـه مـا كـنينـا حـسبهـم *** ننصف ونذكـر فاعل الخيـر بالخيـر
من دور عصر جـدودنـا مـا هـزبهـم *** الـلي عـلى العـزوه يـدور المحاقير
والكـاتـب الـلي فـي كـتـابـه كـتـبهـم *** يسند عـلى الـلي يحملون البواكيـر
الـعـود الأول فـي عـروقـه جـذبـهـم *** مبطي لـهـم مـنـا حشيمـه وتـقـديـر
يـامـا انتصـرنـا بالحـروب بسبـبهـم *** وياما فـزع منهـم جموع وطـوابيـر
عـقـاقـرة معـروف عـصبة عـربهـم *** الجـمـع واحـد يـوم شـل المنـاسيـر
من ساس عزوه خصمهم ما غلبهم *** عـزوة عـيال العـود صيد المناعيـر
كان أنتخوا بالعـود مـا احدن قربهم *** بالمعتـرك يـروون حـدب البـواتـيـر
يا سعـد يـوم المعـضلـه مـن نجبهـم *** ارداهـم الـلي مـا يجي مـنـه تقصير
قال ملفي العامر هذه القصيدة مجاوباً زميله عبدالله بن عبار :
جـتـك القـوافي تعـتـزي من جـنبهـم *** تلـفـي لأبـن عـبـار راس المشاهيـر
لـو تـكـثـر الـعـدوان لا مـا حـسبـهـم *** قـولـه صمـال ولا هـروجـه اساطيـر
يـنـدب ويـلـقى عـز مـن هـو نـدبهـم *** حـمـايـة الساقـات وأم المصـاغـيـر
ربـعـي وربـعـك روس قـوم حطبهـم *** يـوم الـنـشـامـا لـلـمـنـايـا مــداويــر
مـا كـنـت الخطـوه بهـم من طـربهـم *** يـوم المنـاطـح كالأسـود المـغـاويـر
يأمـن بـهـم أقصى طـوارف عـربهم *** ودخـيـلـنـا يامـن شـرور المحـاذيـر
والجـرب حـنـا الـلي نـداوي جـربهم *** ونركي على العايل شطير المناشير
نفتق بـهـم خـلـه ونـعـرف اسربـهـم *** ونسوقهـم بالفعـل سـوق المظاهيـر
والـعـود مـن طـاريـه زادت اكـربـهـم *** ثابـت وساسه حـي من دون تزوير
ينشد عن الجـلفـه ومن هـو سربهـم *** ويلـقى العـلـوم الـلي تـدق الأزاوير
حـازم من الفدعان مـا أحـدن شذبهم *** عـقـاقـره يـمـنـاك بالشـر والخـيـر

صح الساااااااااانك ابومشعل