زيارتنا للشيخ عبدالله بن مبارك الدوسري بقرية الحيانية بمنطقة حوطة بني تميم

بسم الله الرحمن الرحيم
في يوم الأربعاء الموافق الثامن والعشرين من شهر صفر عام 1445 هـ قمنا بزيارة للشيخ عبدالله بن مبارك آل ثلاب المصارير الدوسري التغلبي في قرية الحيانية بمنطقة حوطة بني تميم تلبية لدعوته وكنت برفقة الشيخ الأديب الباحث عبدالله بن سليمان أبا الخيل المصلوخي وأخيه خالد من أهالي بريدة والشيخ علي بن سعد العشبان الهزاني من أهل الحريق وحضينا بالترحيب وحسن الاستقبال والاكرام من الشيخ عبدالله بن مبارك واخوانه وأبنائه وأفراد عشيرته وسررنا بوجود الشيخ فهد بن صقر الهلال الهزاني من أمراء بلدة نعام وقد اتحفنا الشاعر المعروف محمد بن برجس بن ضافي المصارير بقصائد ملاحم طوال تحتوي على الحكم والمواعظ والعبر والنصائح ورحّب بنا بهذه القصيدة يقول :

يا مـرحـبـا تـرحيـبتـن تشـرح البـال *** كـل الـرجـال الحاضـرة شـاملـتهـا
لنـا الفخـر لا جـاوا ذربـيـن الأفعـال *** يا مرحبا عـد الخطى الـلي مشتها
الـلي تعنـوا مـن بـعـيـدات الأمـيـال *** عـزومهـا لأجـل الـوفـاء دافـعـتـهـا
الطـيّـب مـا يـؤخـذ بـديـنـار وريـال *** تفخـر بـه الـلي كـل عـلـيـا رقـتـهـا
مثلـك يا أبن عـبـار يا طيّـب الفـال *** لـك سيـرتـن كـل الـقـبـائـل قـرتـهـا
شاعـر حكيـم وثـم نـاقـض وفـتّـال *** لا غـاص في غبّـه كسـب جوهرتها
يـا مـارثـة عـنـاز قـوم ابـن هـذال *** روس الرجـال الـلي كبـيـرن بختهـا
افعالكم عند العرب مضرب امثـال *** ولـكـم مـن جـزال الـعـلـوم ثـمـرتـهـا
والعـذر يالبـاقيـن شـيّـاب وعـيـال *** وصلّوا عـلى المختـار فـي خاتمتهـا

ورديت على الشاعر محمد بن برجس بن ضافي المصارير بهذه القصيدة
اثني على الشيخ عبدالله بن مبارك المصارير وحمايل المصارير فأقول :

القـرم محـمد ســرنـي كـل مـا قـال *** أبـيـات يـبـهـج خـاطـري قـافـيتهـا
ورد قـصائـد كـلهـن عـبـر واجـزال *** تـبـارك الـلـه ذاكـرتـه حـفـظـتـهــا
فـاهـم لبـيـب يفصّـل البيـت تفصـال *** مـنـظـوم مـن فـلهـام فكـره نحتهـا
رحّب بنا المنعور في مجلس رجال *** خـيـالـة الشـرفـا حـبـيـب نخـوتـهـا
واشكر أبـو جابـر بحسن الاستقبال *** يـمنـاه تقـليـط الشّحـم هـو صفتهـا
الـلي مضيفـه دوم للضيف مـدهـال *** مـع دلـةٍ يجـلي الـوخـام قـهـوتـهـا
فـنـجـالـهـا يعجـبـك يا وي فـنـجـال *** يشدا خضاب الـلي اليديـن صبغتها
من مـارثـة جعشان بالجـود بالـذّال *** من عزوةٍ ما حدنٍ شناها وشمتها
ونعم بهـل الشرفا صناديـد وأبطـال *** بالديـرة الـلي مـن المعادي حمتهـا
من تغـلـب الغـلبـا نزيهين الأعمـال *** الـعـزوة الـلـي كـل ديـره رعــتـهـا

وقد زودنا أحد أنجال الشيخ عبدالله بن مبارك في مصّور يتألف من ثلاثين صفحة ويحتوي على نبذة عن جدهم الشيخ جعشان المصروري وسلسلة نسبه وذريته وقصص وقصائد برواية والده الشيخ عبدالله بن مبارك كما تحتوي النبذة على مواقف بعض شجعان آل جعشان وقد استعرضت هذه النبذة في عجالة حيث أجاد وأفاد الكاتب والراوي وفق الله الجميع وسدد خطاهم وكذلك تحدّث الشيخ عبدالله عن تاريخ هذه الحمولة وتطرّق لأثبات نسب تغالبة الدواسر من تغلب بن وائل وهم يتوارثون هذا النسب أبٍ عن جد ونشر في موقع قبائل ربيعة عامة وقبيلة عنزة خاصة عدد من مقاطع من قصائد لرجال من التغالبة ورد بها ذكر تغلب وهم يعتّزون ويفخرون بنسبهم وبني تغلب بن وائل منذ العصر الجاهلي وهم قبائل كثيرة وبعد الإسلام تفرقت القبائل في الولايات الإسلامية ويوجد من تغلب قبائل وبطون في كل مكان وتغلب هم الذين قال عنهم زعيم تغلب عمرو بن كلثوم العتابي في معلقته :

ملئنا البـر حـتى ضاق عـنـا *** كـذاك البحـر نـمـلأه سفينـا
وهذا يدل على الكثرة وإذا هم في هذا العدد بالعصر الجاهلي فكيف هم اليوم وقد ذكر المؤرخين ونسابة العرب أن قبائل تغلب توزعت في بلاد الشام وفي العراق وفي جزيرة العرب وفي عمان واليمن وفي جميع الأقطار العربية وقبيلة بني تغلب الدواسر حافضت على نسبها وأسمها القديم وهذا يدل على الأصالة والاعتزاز بالمعدن الطيّب .

واقتطفت من بعض القصائد ما يخص انتسابهم لقبيلة تغلب وكنت قد اطلعت على عشرات القصائد سابقاً من شعراء التغالبة في الاعتزاز بنسبهم إلى تغلب بن وائل وهذه مقتطفات من قصائد مطولة ورد بها اسم تغلب بن وائل ومن أهم ما قيل قصيدة الشاعر الكبير / نابت بن حسن بن شجاع الحقباني رحمه الله من أهل الأفلاج وهي المسمّاة الملحمة التغلبية قالها مجاراة لمعلقة عمرو بن كلثوم وعلى قافيتها وبنا على مطلع قصيدة عمرو بن كلثوم المعلقة ه :

ألا هبـي بصحنـك واصبحينـا= ولا تبقـي خمـور الأندريـنـا
ثم قال الشاعر نابت :
بديت ببيت مـن أبيـات جـدي =وغيـري للجـدود مضيعيـنـا
أنـا البـارح قضيتـه بالتفكـر=بمجد فـات فـي غبـر السنينـا
ابمجـد فـي يديـن التغلبـيـه =وتشهـد بـه جمـوع العالمينـا
أراجع صفحة الماضي بقلبي =وأشـوف أفعالنـا كالفرقدينـا
فعـول مادخلهـا كـذب كـاذب= ولا جـاهـا لـفـاق مـلـفـقـيـنـا
ولا جاهـا مثـل هـذا وهـذا= وكـل خـابـر مـرسـى السفـيـنـا
فعول بيـض وقـت الجاهليـه= قـبـل بـعـث النبـي طـه نبينـا
قبل يبعث وبعـد البعـث حنـا =كتبنا العز فـي أعلـى الجبينـا
بخلي مجد مـا قبـل الرسالـه =لأنه فـي الكتـب ماهـو دفينـا
لأنه في الكتب واضـح مـؤرخ= سواليـف تغيـض الحاقديـنا
سواليف الأميـر كليـب وايـل= وأخوه الزيـر ذبـاح السمينـا
والأخطل وابن كلثوم المشبـب= وسيف الدوله الحمدان فينا
ابترك وقتهـم وابـدى بوقتـي= وأقول اللي بجوفي من سنينا
ألا يا نعـم يـا صبيـان تغلـب= وتغلب جمعهـا مـا لـه قـريـنـا
ملينـا نجـد والحـد الشمالـي= وحتى من ورا احـدوده ملينـا
جميعـاً نلتحـم فـي لاد تغلـب =جـمـوع لازهـمـنـاهـا تـجيـنـا
ولكن نجد واللـي عـاش فيهـا= غدوا بالدوسريه مـن سنينا
بحلف جابـه العرعيـر جـدي= بوقـت جـاه زايـد والضعـينـا
فقول الدوسريـه مـا وجدهـا =سوى العرعير جدي باليمينا
وكـل شاهـد بالقـول هــذا= ولا يـنـكـره رجــال فـطـيـنــــــا
ترى طول الشبب هو طولة لي= وقصدي واضح للسامعينا
وساس الدوسريه حول خمسـه= قـبـايـل تـغـلـبـيـه بـينـيـنـا
أبخذهم قصص ببـدي بروحـي=عسى الله يكتب الخيرة يعينا
نعـم يـا لابتـي لاد العـيـاضـي = ليا ادانـت تزيـد الديـن دينـا
ولنا أكبر عطيـه جـات تذكـر=عـطينـاها آل زايـد بـا لسنينـا
وهي ياسامعـي بيـض اللهايـد =ويـومنـا عطينـاهـا عطيـنـا
مـن العـرعيـر للملطـوم زايـد= فـزايـد عـقـبهـا مـنـا وفيـنـا
وفلقتنـا سـرت بيـن القبايـل= مثـل سايـد ومشهـور حسينـا
تسمـى فلقـة الحقبـان لامـن= قرن عازة وصـارت عازتينـا
ونعـم بالمصاريـر الضـواري= هـل عشـر خـذوهـا باليمينـا
اهـل عـشـر تـعـلاهــا ذيـابـه= بـكـون تـاه فـيـه المعـتـديـنـا
فـنـعـم وافــي لاد الحـبـيـبـي= فـهـم بـيـن التغالـب الأقربينـا
جميعاً في علـي يرجـع نسبنـا =فماجـد منهـم وعيـاض فينـا
وثـالـث لابـة فـي التـغـلـبـيـه= يـنـومـسنـا نـبـاهـا لاحـكـيـنـا
لهـا بالوقـت تاريـخ وفـعـايـل= لها السلطـان والعـز المكينـا
وهـي ياسامعـي لاد العميـري =عمـور مجدهـا مالـه ثميـنـا
لـهـا ديـره ألا يـاكـيـف ديـره= تضـم يسـود والديـره عرينـا
ولا رده يكـون عمـور تـمـره= وجه بوجـه ماحطـوا كمينـا
وكـل شـاهـد بـالـقـول هــــذا =كما الهذيه بروس الشاهدينا
فـنـعـمٍ يـاعـمـورالـتـغـلـبـيــه = بـنـي عـم يجيـهـا مايجيـنـا
تعز الجـار ماترضـى هوانـه= وكـل بالجعيـري خـابـيـريـنـا
ومنا الـذي راحوا وشاخـوا= بدار أجنـاب جـاوك شايخينـا
وهـم ياسامعـي لاد الخييلـي= ولا يـعـتـاز تـبـيـن الـمـبيـنـا
وهـم خيالـة الشرفـا وأهلهـا =ومدحتهـم تـرى حـق علينـا
فنعـم يامخـاريـز الرمـاحـي= أهل سيف وأهل حربـه سنينـا
وخامـس لابـة فـي التغلبيـه= مشاويـة لـهـا القـاسـي يليـنـا
قبيلـة أفتخـرلا قـلـت عـنـهـا= قـبـيلـة اصلـهـا مـنـا وفـيـنـا
ترى المشوي يعـود للعياضي= وذا قـول الرجال المقطبينا
فهـذا حـن ياصبـيـان تـغـلـب= سـوالـفـنـا تجـدد كــل حيـنـا
سوالفنا لهـا الشيخـان تطـرب= وتطربنا وتطرب سامعيـنا
تنومسنـي سوالـيـف قـدايـم =تنومسنـي سوالـف الأوليـنـا
ليا مـن آنتهـى جيـل بطيبـه =تجيـك أجيـال عقبـه مقتفينـا
تجيب الطيب الأول ثـم تزيـده =كـذا الطيـب يـورث طيبينـا
وقصير البيت ناسم له عصاته =ويمسي وامن مع وامنينا
بـدعـنـا السـلـم هـذا وانتبعـنـا =فمت بوعيـن ماحن تابعينا
تسلسل ساسنا من راس علطا=عرب وأصل العرب حناوأبينا

وللشاعر خريص بن مناع الحقباني قصيدة طويله منها قوله :
قلتـه وانـا مـن لابتـن تغلبـيـة = سـم الأعـادي لاتـبـيـن حـسـودهــا
تـغـالـبٍ غــلا بــةٍ تـغـلـبـيـــة = تبـرق بواريق السعد في حشودهـا
حنا هل العادا ت والطيب والثنا = حـنّـا مـراكـزهـا وحـنّـا نـرودهـا
أمجاد مـن الاجـداد جتنا وراثـه = حزنـا عليهـا والأعـادي نكودهـا
حنّـا الْـذي منّـا فـوارس ربيعـة = مـنّـا زعـامـتـهـا ومـنّـا أسـودهـا
من دونها تغلب ظنا وايل الفحل = بحد الرماح اللي صنعها يهودها
حنّـا بنـي تغلـب مضايـا فعولنـا = تشهد لنا نجد و ما حدَّت نفودها
مـنّـا عُــدي المُلـقّـــب مُـهـلـهِـل = وكليب وائـل مـن ركـائـز جدودهـا
وعلقمة بن سيف وعتاباً وغيرهم = ولُبيـد و الأخيـل ركائـز جـودهـا
وعمرو بن كلثوم أبـا عـن الـرْدَى = قائـد بنـي تغلـب وسيـد أسودهـا
ما طـاع عمـرو بـن هنـد وغيـره = شتّـت شمايلهـا وفـرّق جنـودهـا
عمرو بن هند طلـب بنـت شيخنـا = ليلـى يبيهـا تخـدم أمـه بجودهـا
ما يدري أنهـا مـن سلالـة تغلـب = طيْب الثرى منها وإليهـا يعودها
واليـوم يبغيهـا مـع جُملة الخَدم = وينقض مع بكـر وتغلـب عهودها
وصاحـوا عليهـم صيحـةٍ تغلبـيـة = خيالـة الهَيْجـا زحازيـح قـودهـا
فرسان فـي الميدان لاكتّـم الرمك = زحول وزحازيح عما من يكودها
غَاراتُهم يشبَـع بهـا طايـر الخـلاء = ياكل مـن شيوخ القبايل ثنودهـا
وتشابـك الفرسـان مـنّـا ومنـهـم = كـل أبلـج أدى مـوادي جـهـودهـا
وتلاقـت الشيخـان مـنّـا ومنـهـم = مثل الرعـد فـي مدلهمات سودها
مثـل الرعـد فـي مزنـةٍ هرمزيـه = تلعـب رفاياهـا وتـرزم رعـودهـا
قلته وأنا ترثـة عيـاض بـن تغلـب = لعـل عـود خلفـه فـي خلـودهـا
هو الاميـر عيـاض ترثـت ربيعـة = طلعت زعامتها وسيّـد أسودهـا
وادي العقيق حماه مـن كل غاير = مسيـر يـوم مـا يقـرَّب حدودهـا
حفَّـر بَهـا القلبـان جـمٍ عـلاقـم = وشيَّد بهـا القلعـة ورسَّـى حدودهـا
خيَّال لا من غارت الخيل فالوَغى = يروي سنا سيفه ثنَادي فهودها
هـذي مفاخرنـا وهــذي أفعالـنـا = أمجـاد فزنَاهـا والاعَـادي نكودهـا

ومن قصيدة للشاعر علي بن رميزان الحقباني يقول :
قـال العيـاضي والـذي مـن قبيلـة = طـوال الـقـنـا فـكـاكـة لـلـدبـايــــل
مامنهم الـلي زارع فـوق عـيـلـم = سوانيه تشكي مرجفـات المحـايـل
حـنـا بني تغلب ومن نسـل وايـل = حـريـبـنـا تـكـثـر عـليـه الـهـوايـل
حنا نصقل الحرب الضرير بفعلنا = كما يصقل الصايغ رهاف السلايل

ومن قصيدة للشاعر صالح القديمي الحقباني مرسله الى الامام عبدالله ال فيصل آل سعود سنة 1286هـ يقول فيها :
يا نـديبـي عـلـى سـت أصايـل = فوقهـا لابـة تقضـي اللـزوم
نصها شيخنـا ماضـي الفعايـل = لايطـاوع بـنـا كثـر العـلـوم
غرسنا راسخ وسـط المسايـل = بين فردة مع ذيك الخشوم
محتمينـه بسلـعـات الفتـايـل = ماخذتـه الجحـادر والسـلـوم
حن بني تغلب من نسـل وايل = نحمي الغرس من حر السموم
وقال من قصيدة أخرى :
لا ولع الحرب حنا اللي نصاليه = حـنـا بني تغلب من نسل وايـل
ومن قصيدة شلعان بن ظافر الودعاني مادحا فروع الدواسر :
ومـا فشل جـمع فيه لاد الحبيبـي = يجيك من كل حر طيب مجنـاه
وعمور لامن صك حاجب حاجب = اروا حمهـم يـوم اللقـا مهـداه
من كان في تغلب الى سمع الندا = جانـا وسيف الزيـر فـي يمنـاه

ومن قصيدة للشاعر : محمد بن عبدالله الودعاني مادحا جذم الدواسر التغالبة:
الاد تغلب هم هل العز والوفا = وصغارهـم مـا تتقـي بكبـار
خوالنا الوافين لطامـة العـدا = وافعالهم شاعت بها الاخبار

وقال شاعر من العمور الدواسر التغالبة :
وحن بني تغلب ٍ من نسل عدنانـي = جـدنـا الــي بـنـى الكعـبـة

ومن قصيدة طويله للشاعر ابن حشيفان العمور القها أمام الملك سعود :

حن هل الشيمة ولا احد شحذ منا الامام *** حن عيال كليب من نسل وايل ياسعـود
حن بــني عمـك وحـنـا لعـدوانـك خـزام *** جمع تغلب لا مشى على الحرب هدود

وقال الشاعر : حمود بن شيبان الحقباني :
رفعت بعالي الصوت يـا لاد تغلـب = هداليج باعـوا بيعـت ينهيـا لهـا

وقال الشاعر عبيد بن حويل الخييلي
يقـول وطـنكـم نـازحٍ عـن وطـنـا = رحتوا مع العجمان يا نسـل وايـل
حنـا لنا من قبـل الإسـلام تاريـخ = وفعـل جميـل بـعـد الإسـلام هـايـل
سدنا وحكمنا في العراق وغيـره = شرق وشمال بالسيوف الصقايـل
والشـام مشينـا عليـه الطوابيـر = حـنـا محـينـا الـروم مـن دار وايـل

وقال الشيخ : محمد بن زيد بن جريس الخييلي :

ما علينا من هـرج ما شحنـا = مـا درينـا بـه ولا منـه سائـل
انشد التاريـخ يخبـرك عـنـا = حنا بني تغـلب من نسل وايـل
نفتخر بكليـب والزيـر منـا = وعمر بن كلثوم ماضي الفعايل
من قديم الوقـت لليـوم حنـا = بالقا نروي السيوف الصقايـل
الـدلـيـل حـكـامـنـا هـم مـنـا = حـن بني تغلب عمى كل عايل
عد واغلط مكثر اللـي قتلنـا = لعـتلـينـا فـوق قـب الاصـايـل
مثل بن هندٍ زبـون المجنـا = مـن بـني تغـلب بكته الحلايـل
ومـن تبـع اليمانـي مـكـنـا = اقـتـلـه كـليـب واف الخصايـل
في بلاد الشام ونجـد سكنـا = واحتمينـاهـا بـحـد السـلايـل
ومن قوله ايضا :
لاد الخيـيلي لابـتي مـا بـهـم عـيـب = إلا الظـفـر وذبـح حـيـلٍ سـمـانـي
ترتـيبهـم الأول عـلـى كـل تـرتـيـب = وخذت بحد السيف ماهـي تمانـي
مركاضهم يشبع به الضبع والذيب = كـسـارة الجـمـع الـزريـن بـثـوانـي
حمايـة التـالـي إلـى كلـح الـنيـب = هـاذي عـوايـد كـامـلـيـن الـمــعـانـي
ربعي مرويت السيوف المحاديب = عـنـد اللقـاء يـروون حـد السـنـانـي
ربعي هل الطالات والمدح والطيب = مـهـوب تـوه مـن قـديـم الـزمـانـي
ربعي هل الشرفاء رجال المواجيب = عـوق الخصيـم وطـيبهـم للعواني
ربـعي سلالة سالـم الزيـر وكليـب = وحـفـاد أبـن كلثـوم عـالـى المكانـي
ربعي كعام الشره تقـدم ولاتهيـب = يردون حوض الموت ورد الضماني
مدحي لربعي لا حـرام ٍ ولاعيـب = هـم عـزوتـي لـمـنـه مـس البطـانـي
والمدح أبخص به عطيب المضاريب = وكل أبلج ٍ فعله مـن الربـع بانـي

وقال محمد بن برجس المصارير :
حنـا هـل الطولات حـنـا القديـميـن = في راس تغلب من سلاطين وايل
حنا الدواسر الأصل منـاب وازيـن = يـازون مـعـنـا طـيـيـن الحـمـايـل
خمس الفروع اللي بتغلب مسمين = ثـبت لهم في نجد صيت وفعايـل
وخـذوا لقـب دوسر بقوة وتمكيـن = من قـو سطوتهم عـلى كل طايـل
أقـول قـول لـه ثـبـوت وبـراهيـن = ولا خـيـر فـي قـول بـلـيـا دلايــل
وقال : محمد بن ضافي المصارير :
لاد الحـبـيـبـي مـرويـة كـل مسـنـون = أمـيـرهـم فخـر لهـم واعـتـزوا بـه
من صلب اهل عشرٍعلى الموت يردون = تغالـب يـا كــود شــيء هقـوبـه
ومنا عمرو وكليـب والزيـر مرسـون = مـن مارثة عدنان ساس العروبـه
يسقون حلـو ومـر لا جـاوا يسقـون = وكل عطوه مـن المشارب شروبـه
احد عسل واحـد مـن السـم يعطـون = سـم تـلـف روحـه لنفـسـه جـذوبـه
بمـورد مـاوه علـى النـار مـوزون = وفي حشـرة المجـرى تزايـد شبوبـه

وقال : حسن بن مهدي العمور :
يا نديبي وارتحل فوق نابيـة الظهـر = حايـل ومحيلـه ليـن جـا لزومهـا
نصها ربعي وخبـر بمـردود الخبـر = قل لهم فردة تراهـا بيـان رسومهـا
غرس ياللي بالقرارة تمايـل بالحثـر = كـل شيـخٍ وقاضـيٍ اختبربعلومهـا
واالله لا حنا بنخطي ولا نبغـى قشـر = دارنا مـن دونهـا روحنـا نسومهـا
دونها ربعي وقوفٍ بسبـرات النظـر = كل غمـر يشتريهـا ويغلـي سومهـا
لابتي من نسل تغلب وهم ترثة عمـر = فـايتيـنٍ للقبايـل بـزيـن سلـومـهـا
كم حفيف مـن قديـم سقينـاه الكـدر = وكم طموح من سببنا رمت بهدومها
من حظـر منـا كفا الـلي مـا حـظـر = وأنتٍ ياللي نـازحٍ بيتجيـك اعلومهـا
هو لاعانا اللي خدوده كما لون القمر = بنت شيخٍ نقطوها بزيـن رقومها

وقال سحيم المصروري :
حنـا بـني تغلب ومن نسل وايـل *** من قديم شبوب الحرب حنا
أن ركـبـنـا الأصـايـل بـالـدبـايـل *** نعجـب الـلي غـطاريفـه تثنا
حنا هل الفزعه بعصر الصوايل *** عمرو أبن كلثوم وكليب منا

ومن قصيدة للشاعر عبدالله بن خفران آل فويز يمدح آل جعشان :
بوقت الكرم كرمان وبالمعركه فرسان
أولاد الحبيبي فعلهـم صعـب مـن قـده
مصارير لامن عدّوا الروس والشيخان
كواسـر دواسر بـأول الوقـت والجـدّه
دواسر من اعلا روس تغلب ومن عدنان
سوات الجبـل صعبن على من بغـا هـدّه
دواسـر لنـا فـي قـمـة المرجـلـه عنـوان
يـسـجّـل لـنـا الـتـاريـخ والـعـالـم تـعـدّه

وقلت هذه القصيدة أثني على الشيخ الفاضل عبدالله بن مبارك آل ثلاّب المصارير ابو جابر الدوسري بمناسبة
زيارتنا له في منزله بالحيانية في منطقة حوطة بني تميم وإلى قبيلة بني تغلب بن وايل من الدواسر :

طـاب الشعـر بمقلـط الهـيـل والـبـن *** عـبـدالله الـلي دوم ضيـفـه يحفـلـه
فـي ربـعـتـه يجذبـك نجـره اليـا دن *** والبـاب فـاتـح دوم مـا صـك قـفلـه
أبن مبـارك عـرف بالطيب وأبـخـن *** وكل الرجال أهـل الوفاء تعترف له
القـرم الـلي عـن المواجيب مـا كـن *** الطيـب سلمه والفخـر والشرف له
مشى عـلى منهج بسلم العرب سن *** من لـه وجب لـزّم عليه وحلف لـه
شهـم وكـريـم ومنسبـه ينتسب مـن *** العـزوة الـلي عـلومهـم دوم نـفـلـه
من ساس تغلب عـزوته ما بها لـن *** تاريخهم رمـز الشجاعـة اضـف لـه
التـغـلـبـي ضـد المـعـادي الـيـا شـن *** عوق الخصيم الـلي يباغـت بغـفلـه
يهـج عنهـم مـثـل الـلي لايـعـه جـن *** عـدوهـم يسـرع هجـيـجـه وجـفـلـه
لأصحابهم أحـلا مـن الشهـد والمـن *** لكـن عـلى اعـداهـم حناضل ودفلـه
خـيـالـهـم خـيـل الـعــدو فـنـهـا فـن *** خصمه مـن السّم الذحاحي غـرفله
صغيـرهـم مـا يـرقـد اللـيـل بـخـفـن *** ابـوه مـن قـب الأصايـل عسـف لـه
يـوم الصويتي كـان ملجـوم وامعـن *** رجالهـم مـن سـاق ذوده وقـف لـه
نطيحـهـم بالكـون مـن طـعـنهـم ون *** سـو البـلا من شين حظّه صدف له
يـثـنـون دون أم الـحـويّـر اليـا حـن *** عـلى أمـه الـلي بالعتيم اتعطف لـه
قالـوا لـراعـي الـذود دوه لـه وغـن *** مـعـهـا جـنبهـا مـد للـريـف وافـلـه
مـن يقترب للنوق في جوفه اطعـن *** عـاد بهـزيمـه والنـدم والحسف لـه
ستـر الهنوف اليا بـدت تلطم وجـن *** بالكـون من بـاد الخصيـم تهنـف له
تقـدم مع الفرسان في هـودج وقـن *** والخايـف الرعديـد مـا تحتـرف لـه
انساب تغلب ما تـبي فحص دي أن *** الـكـل جــدّه بـالـتـوارث وصـف لـه
تغلب نسبهم ورث من راوي مسن *** رجـالهـم يخـبـر بالإقصـاص طفـلـه
من تغـلـب الغـلباء ولا باصلهم مـن *** ولا صـح قـول الـلي كلامـه يعـفلـه
ما أحـد يطيع الـلي يطبّل عـلى شن *** شيطـان غـيـه بالمزامـر عـزف لـه
مـا يرعـوي ولداعي الحـق ما صن *** كـلـن يصفّـق لـه وكـلـن هـتـف لـه
من أجـل ما يسبب حـزازت وافـتـن *** جـاه الـذي مـع كـل خايـع لقـف لـه
قـال أنتبه من سـب الأجواد يا هـن *** الـلي ظـلـم رب الـمـلأ ينـتصـف لـه
انشـد شخوص رجالهم تخبرك عـن *** كـل مـن يـريـد اخباهـم تنكشف لـه
خذ الخبر من مصدره واترك الظـن *** ولا تصدّق الـلي لـه مرام يهدف له
من لا يعد الصّدق يعرض له امحن *** لابـد عواصيف الهجيـر اتعصف له
حكي الخطـأ يجلـب لواليـس واشبن *** ولا نستمـع لـلي مهـاجـيـه سـفـلـه
الشين صر له شين والزين لـه زن *** واللي تعدى من التصاريف شف له
من عال ودع عنبر الحبس واسجن *** ما نال خير ولا وجـد من وسف له
والظـالـم الجـاني الـيـا مـات وادفـن *** يلقى جـزاه أن كان ما الله لطف له


وختاماً تقبلوا تحيات عبدالله بن دهيمش بن عبار العنزي

اسوق هذه المقاطع من شعر لشعراء من تغالبة الدواسر للذين ابتلوا بالطعن في أنساب القبائل والذين ينشرون أشاعات كاذبه أن حطهم أبن عبار من تغلب بن وائل وهم من تغلب قضاعة حسب زعمهم وقد طلبت منهم أن يقابلون الرجال ويفيدونهم إذا عندهم معلومة ليس عندهم وهو يريدونني اكّذب خمس قبائل متوارثين نسبهم والذين يطعنون وهم بعيد لأنهم يعرفون أن الرجال ما يقبلون بالطعن في نسبهم ولم يعجزهم الذي يطعن في نسبهم ولكنهم يترفعون عنهم تقدير لقبيلة عنزة والشرع والدولة ما تقبل الطعّن بالأنساب وعنزة لها الشرف أن يكونون من تغلب من ربيعة .