(هذه القصيدة أهداء إلى الأبن مشعل بن عبدالله العبار )

هذه القصيدة قلتها اشكر الأبن مشعل أبو مشاري حيث اشترى لي جيب مديل 2019م رغم أن عندي جيب قد شراه مديل 2015م وهذا ثالث جيب يهديه لي دون طلب ودون حاجه وهو رابع سيارة يشريها لي فقلت هذه القصيدة وأطلب من اٍالله أن يوفقه وأن يعود لبلاده سالماً وغانماً حيث أنه منتدب إلى أمريكا لمدّة سنه :

ادعـو الـرحـمـن بـاصـلاح الـذراري *** العـيـال الـلي مـن المولـى عـطـيـه
عسى منهجهم عـلى قـول البخـاري *** فـي شريعـة سامك العـرش ونبـيـه
اعـتـزي بالـلي مـثـل ذيـب الغـداري *** مـن يطيـب اعتـز بـه وسط السميه
وأطـلـب أن الـلـه يـعـز أبـو مشاري *** مشعـل عسى يحفظـه رب الـبـريـه
مـن بـدايـة طـلعـتـه للطّيـب ضـاري *** مـا مشى ولا سـار بالطـرق الرديـه
لـه طبـيعـه فـي مسيـره مـا يـبـاري *** كـود طـيّـب والـردي مـاهـو خـويـه
الـنـبـيـل مـن الـمـكـارم بـه مــواري *** يـصنـع المـعـروف وكفـوفـه نـديـه
أمدحـه بالقـاف وافخـر بـه جهـاري *** حيـث مشعل فيه عـرف وبـه حميه
مـطـّـلـع فـاهــم ومـتـعــلّــم وقــاري *** عـالـي الـهـمّـه ولا نـفـسـه دنـيـــه
أطـلـب المـولى يـقـاه مـن الخطاري *** وعسى يحماه الـولي من كـل سيـه
حـيثـه للجيـب الجـديـد القـرم شاري *** مـن وفـاه آخــر مـديـل اهـداه لـيـه
نـوعـه الجكسار مـا نـوعـه سفاري *** هـذا ثـالـث جيـب من مشعل هـديـه
يصلـح لـبـوج الفيـافي والصحـاري *** ويقـطـع فـجـوج الخـلا بالمهمـهيـه
حين يطري لـي من السجّات طـاري *** انـهـمـه وأدوج فـي نـجـد الـعـذيـه
هـو شـفـات الـلي تـعـوّد للـمسـاري *** منـوة الـلي منتـوي لـه صـوب نيـه
رام بـيــداء لا حـبـوس ولا كـبـاري *** مـا يشاهـد غـيـر فيضـه أو شـغـيـه
مـا يـطـالـع كـود غـدران وخـبــاري *** والـروابـي والصحـاصيح الفـضيـه
منظـر الشعـبـان فيها السيـل جـاري *** والفـيـاض المـريـفـه تـقـل محميـه
والـزبـيـدي والكـمـا بـتلـك البـراري *** بـارزه فـوق الثـرى مـاهـي خـفيـه
يشبح رفوف القطا وفـرق الحبـاري *** وفـي مـراتعـهـا الأرانـب والظبـيـه
والكهوف الـلي بهـا سحم الضواري *** مـستـكـنّـه عـن ضبـيـح البـنـدقـيـه
طلعـتن تـبعـد عـن السوق التجـاري *** فـي خـمايـل نـفحـهـا مـا فـيـه زيـه
تروي من النقع صافي ليس صاري *** وبـعـدهـا الـوقـده وحـكـر الشاذليه
تطـري الذّكرى عـلى فكرك جـبـاري *** وعـنـدك رجـال ضمـايـرهـم نـقـيـه
مـع نشامى طبعهـم نـزه وحضـاري *** لـلـرفـيـق نـفـوسـهـم دايـم رضـيـه
رفـقـت الـلي ما يعـرفـون المـزاري *** صحبهم يشعـرك في عـيشه هـنـيـه

صح لسانك يابومشعل ويستاهل أبومشاري كل ماقلت الله يخليه لك ويخليه لعياله ويخليك للجميع

صح بدنك يا أبو مشاري الله يصلح لنا ولك النيه والذريه عندما تخرّج مشعل من جامعة البترول كتب أبيات منها قوله :

بكت في خافقي لوعة وداع وهاجت العبرات
تمنيت الهوى يرحل وأنا ببكي على فراقـه

الا يا نجـم خبـرني تكـلم وارسـل النـظـرات
ترى في هاجسي حسره وداع وروح مشتاقه

تذكرت الأسى وهاجت شجوني والهوى غلطات
ألا يا صوت يا صرخت سجين حن لعتاقـه

سحرني بسمت الدمعـه سحرني نورها بآيات
سحرت بواحت احلامي وطبع النفس عشاقه

ذكرت أيامها الحلوة ذكرت سنينها المـرات
ذكرت الفجر والغربة ذكرت البيت ورواقه

نويت أنقش حروف أسمك على صدري تكون أثبات
كما ينقش حروف الوسم جداني على الناقة

أبي أكتب لك كفاح أجيال وأبي أشرح لك عن اللوعات
وأبي أرسم نظرة عيونك على صفحات براقة

* فوجهت له هذه القصيدة نصيحه مجاراه لأبياته :

بديت القاف بسم الله عليم بخافـي الغايـــات
عظيـم الشـان مولانـا ولـي الكـون خلاقـه

تهيّض خاطري يبدع قصيد وينظم الجزلات
قرايض شهد من فكري تقاطر ذوب ترياقه

كتبت أشعـار ناقيها عـن التحوير والـهزلات
أعذي منطقي وأفهم جليل الهرج ودقاقـــه

نصيحه قلتها مخلص ولاني للعرب شمــّات
أخص الفاهـم المدرك عساها تبلغ أعماقه

أنا أبي أوصيك يالعاقل بتقوى الله والطاعـات
ترى نفس التقي دايم لفعـل الخيـر سبّاقـه

تحكـم وأحتكـم بـاللي نـزل في محكم الآيات
تـمش بنصـه وحافظ على عهده وميثاقـه

ترى من خان عهد الله مصيره ياقع بنكبات
ولـو شفتـه نجح مـره تعيّن ويـن مطباقـه

تجنب مذهب الفاسد تواضع وأخلص النيات
ولا ترافق حليف الشر ترى الأشرار بواقه

تجنب صحبت الغادر تجنب رفقت الشّلات
ترى من رافق الخايب لدرب العايزة ساقه

تجنب مجلس الكوبة تجنب شلـة الحارات
تراها تجمع السافل مع السربوت والعاقه

الولدين اللي ربوك لهم فـي ذمتـك ديـنـات
ترى لو غبت يرجونك عليهم شوفك شفاقه

ترى من عق به شاره تبين من أوضح الشارات
مقام أبوه في صدره مثل تقدير سواقـه

يقول لصاحبه حاضر تبشّر وأبرك الساعات
ولو نادى له الوالد تزرى وهـدل اشداقه

عدوك يفرح بسّـوك يدور العيب والخملات
نكور ولو تصل حبله يموق ويفصم حلاقه

ترى مهما عن الأحمق تعف وتسمح الزلات
خبيث النفس لو تخطي عليك يحملق أحداقه

توقع وأحفظ لسانك ولا تبحث عـن الغـرات
حذورك غـرة الغافـل سهـوم العين رماقـه

توقع وأبعد النظره ترى من يكشف العورات
يبي يفتح خلول الناس وعنده تنفتح طاقه

عن الهزلة عن الرزلة ترفع يا رفيع الـــذات
مقام الحر ما يطمن مقره راس شوهاقه

ترى من عادت الصيرم يهوم ويبعد النوهات
يروم النايفـه نفسـه لرقي الحيـد عشاقـه

وصاتي لك وصاتي لك تجلد وأنطح الشدات
ترى لابد ما تجرب عذاب الوقت وأرهاقـه

لفعل المرجلة حاول لـو أن دروبها صعبـات
ردي العزم والخامل بلوغ المجد ما شاقه

أبي ترسم حروف العـز وتسطرها على الصفحات
تـرى من شـام للعليا يشـوم بنفس تواقـه

حصيل العلم به تسلك طريق الفـوز والطولات
ترى من كان متعلم يطول وتسمو أخلاقـه

تعلّم وأجتهد وأكدح عساك من التعب تقتات
ترى من لا عمل خيّم عليه الفقر والفاقه

ولا تكسل سوات اللي يدور الهون والراحات
ولا تقنط ترى المولى يقيت العبد بأرزاقه

دني النفس ما يقنع يحوش الرزق بالحيلات
يغـش الناس وأيخـادع ونفسه دوم ملاقه

تبصّر وأفتهم وأعرف تنبه وأحذر الغفـلات
ثمين الوقت لا يمضي ترى الأيام سراقــه

ترى من فرط بوقته ندم بالماضي اللي فات
يفـر الوقـت دولابـه يسيـر ويوصـل قناقـه

تغانم وقتك وبادر ترى من طال عمره مات
رميم الجسم بالبرزخ يعـوث الدود بشناقه

خـذ العبـرة ولا تنسى تذكّـر هــادم الـلــذات
جديد العمـر صيوره سمايـل جـرد خماقـه

ولا تغـتـر بـالدنـيـا تـرى الدنيـا لهـا ميلات
ولا تخـدعـك لـو تقبـل تراهـا دوم صفاقـه

فلا تأمن غوايلها لـو أنت بمنصب الباشات
ترى كف الزمن لازم يلوح الخـد بطراقـه

وصلى الله على الهادي بذكره نختم الآيات
عدد ماهل من هاشل تلاعج ضوح براقـه

(وعندما اشترى لي الجيب الأول لاندكروز مديل 1012م قلت هذه الأبيات :

يا مشعل الـلي اشتهر بـبـروز *** شبهتـه الحيـص مـن زمـلي
يا ابـو مشاري كـفيـت الـعـوز *** نـقـلـت عـن كاهـلي حـمـلي
يا ليـت عـنـدك ذهـب وكـنـوز *** تـكـرم لـغـيـري وتـكـرم لــي
لـك الـشـكـر يـا ثـقـيـل الـروز *** عـلـيـك طـبـع الـكـرم يـمـلي
جـتـنـي هـديـتـك لانــد كــروز *** عـسـاك يـالـقـرم تـسلـم لـي
مـن طـوكيـو جـالـنـا مـكـزوز *** شــراه مـشـعــل وقــدّم لـــي
مـن شركتـه مـا نـفـخ بقـزوز *** مـن مصنع الجـيـب صمملي
عـز السفـر فـي شهـر تـمـوز *** الجـيـب بالقيـض يـرهـم لـي
الجـيـب متـعـود (ن ) لـلـنـّوز *** بـالـدرب لـو مسلكـه رمـلـي
على الجكسار أبي أزورعنوز *** مـن ديـرة طـريـف لـلشمـلي

صح لسانك طال عمرك ونسأل الله العظيم أن يبارك لك فيما أعطاك ولا نستغرب البر من نجل إبن عنزة البآر فذلك الغصن من تلك الشجرة المباركة وذاك الشبل من هذا الأسد حفظكم الله ورعاكم ومن الحاسد والحاقد حماكم..

قال الشاعر ندى بن خساف الرودسي هذه القصيدة مجاراه لقصيدة
عبدالله بن دهيمش بن عبار الذي يثني بها على أبنه مشعل :
مـوتـرك مبـروك طبلونـه اصفـاري *** وارد الـيـابــان شــركـه عـالــمـيــه
جـابـه الـلي ما كنـز عنك المصاري *** مـن طـراز الجيـب واشكالـه عـذيـه
أركـب الـمـوتـر ودوّج بـالـبـــراري *** من مطايا العصر هـو أفضل مطـيـه
يسلم اللي اهداه لك صقر الحـراري *** مشعل جابـه وأرسله أحسن هـديـه
مـن بـره لأبـوه طـاعـه واخـتيـاري *** يـمـشـي الـمـنعـور بـأوامـر ولـيــه
ويـوم طـاع أبـوه يـطيـعـه مـشـاري *** الـولـد يـرضيـه بالنـفس الـرضيـه
مشعـل الشغـموم دواس الخـطـاري *** مشعل يزها النعم في صبح ومسيه
مـشـعـل مـهـنـدس ومـديــر أداري *** يحفظـه الرحـمن في روحـه وجـيـه
وفقه الـلـه عنده خبره واستشاري *** نـفـخـر بـعـلمـه ونـفـرح بـه سـويـه
هـذا الـذي قـلـت من منبع افكـاري *** لأبـو مشعـل قـلتهـا راعـي الحـمـيـه

وقد تفاعل الشاعر مبارك بن إبراهيم العليان مع قصيدتي التي اشكر بها الأبن مشعل على أهداء الجيب فقال هذه القصيدة مجاراة للقصيدة السابقه :
قال من هو في ظروف الشعـر داري *** ساعـدن فـي بـدعـهـا رب الـبـريـه
مـن يـكـّون لـيـلـهـا هـو والـنـهـاري *** عـالــمٍ بـالـكـون وأســرار خــفـيـه
مـا يـكـن الـعـبـد يـعـلـم بـه جـهـاري *** عـنـده الـظـاهـر وخـافـيـهـا سويـه
مخـرج الأرزاق من بطـن الصحاري *** وآمـر عـبـاده بـحـجـه والـضـحـيـه
وانـزل المصحف لبـدوه والحضاري *** مـن تـمـسـك بـه حـيـاتــه وهـنـيــه
وانـت بـحـر ولا يـقـارن بالـخـبـاري *** تـبـدع الـقـيـفـان بـبـيـوت مـلــيــــه
يـعـلـم الـلـه مـا لـقـيـنـا لـك مـبـاري *** مثـل نجـم سهيل أو شمس ضحويه
يا أبـو مشعـل في غـلاك الكـل داري *** مـن قـروم مـا تـقـارن فـي حـلـيــه
مـن قـروم عـادتـه قـطـع الـعـتــاري *** حـافـظيـن حقـوقهـم فـي كـل هـيـه
يـوم دور الـرمـح وسـلاح السواري *** يلحـقـون الـلي قـعـد بـالـمـهـمهيـه
قـبـل لا نـدخـل بالأسلـوب الحضاري *** ذاك تـاريـخ الـجـهــل والـجـاهـلـيه
نـحـمـد الـلـه بـدلــه عــز وعـمـاري *** نـشـكـر الـلـه ربـنـا جـزل العـطـيـه
وفـي كـرام الضيف تذبـح بالحجاري *** مـن سمـان الحيـل مـا تـذبح رديـه
تسكـن العـالـي ولا تـعـرف الـنـداري *** لابـةٍ عـاشـت عـلـى عـز وحـمـيـه
ثـم مـشعـل نـشـكـره سـر وجـهـاري *** يـوم اهـداك الجـيـب والـنيـه مطيـه
نـيــة الـوالــد تـخــلــف لــلـــــذراري *** اشـهـد أن عـلـومـكـم مـثـل طميـه
طـيـر حـر مـا يـصـيـد الا الـحـبــاري *** نـطـلـب المولـى يـعجـل فـي مجيـه
نـعـم والـلـه شبـل من ذيك الضواري *** مـن رجـالٍ عـلـمـهـا والـنـار حـيـه
خـيـر مـن عـنـاه لـعـب بـالأثــــــاري *** عـن دروب الـمـرجـلـه مالـه كنيـه
يطعـمـك خـيـره ويكفـيـك الخـطـاري *** يـا ولـي الـكـون يـا مـرسـل نـبـيـه
مطـور بشاشاتها وحـيـاي الحـراري *** مصنعـه بالتـقـنيـه مـا شـفـت زيـه
مجـهـزيـنـه للسفـّر يطـوي البـراري *** مـا يـرده لا جـروف ولا نـزيـــــــه
واسـالـك يـارب تـكـفـيـه الأشــراري *** يـا إلاه الـكـون مـا خـيـب رجـيــــه
ارسـلـه مـع كـل ودي واعـتـــــذاري *** نـرسـلـه لـلـي عـبـاراتـه قــويــــه
واسـال الـلـه يحفظك لـيـل ونـهـاري *** نـسـال الـلـه يحفـظـك رب البـريـه