( مساجله بين رجاء بن سليمان الكره وعبدالله بن عبار )

وجه لي رجاء بن سليمان الكره الروسي الفدعاني هذه القصيده وهي تحتوي على بعض المعاني وقد تم حذف بعض الأبيات وهذا ملخّص ما قال :

سـر يـا قـلـم واكـتـب تحـيـه وتبجيـل *** أكـتـب لابـن عـبـار حـيـثـه سيـاسي
يا ابـو مشعـل الـوضع يحتاج تعـديـل *** ودق التنـك مـاهـو شبـيـه النحاسي
نـعـوذ بـالـلـه مـن زمـان الابـاطـيــل *** شفـت الشقـاء يا مسنـدي والمـآسي
الـيـوم صـرنـا بـالسـوالـف تـعـالـيـل *** وحـنـا قـبـل مـثـل الجـبـال الـرواسـي
واعروقنا أصبح بهـا الـدّم ما ايسيل *** من جـور وقـتي شاب يالقـرم راسي
مـمـا جـراى يا مسندي نسهـر الليـل *** والـقـلـب مـاهـو للهـواجـيس نـاسي
نصبر وكـنـا نحسب الصبر مـاعـيـل *** ومن طـال صبـره بالجواتي ايـداسي
مـن يـوم زاد الـكـيـل وازداد بـالكيـل *** والصبـر طعمه مـر والـوقـت قـاسي
الـصـبـر مـنـا بـاح وامـورنـا تـهـيـل *** والـيـوم نـمـشي والمسيـر انـتكاسي
بعض الرفاقه قام يسري على سهيل *** عـيـا عـن الـمـنـه وعـاف اللحـاسي
من جزم صار الموت مايجزعه حيل *** نـوى المسيـر وقـال شـوري براسي
واللي نصح بالقول جيـل بـعـد جـيـل *** حـقـي انـا مـا اشريـه ولا لان بـاسي
ولا نـنسى الـلي قـال حـنـا الرجاجيل *** وش عـاد لـو متنـا بروس الطعاسي
واللي يشيل من الغـضب قـدر ماشيل *** ويقول انـا مـن الموت عبيت كاسي
يا عـزوتي عـطـوا الرسالـه بتفصيل *** بـالـلـه عـلـيـكـم خـبـروا كـل نـاسـي
والـلي بسبب ربـعه جرالـه غـرابيـل *** ومـن هـولـهـا عـيـا يـجيـه النـعاسي
واللي يحسب النـاس عميان بالحيـل *** وطـرشان مـا يوحون رقع الجراسي
ليته يعـرف النـاس عـيـونـه درابيـل *** يشوف خلف السور وحدر اللباسي
لازم يـمـيّـز مـقـصـد الـقـال والـقـيـل *** ومن واجـبـه تنبيـه خمس الحواسي
والراس بليا الجسم ما طـالـه الطـيـل *** من حيـث الأعـضاء كلهـا بالتواسي
حـتى ضعـيـف القـوم يصيـر حلحـيـل *** ويبـقى عـزيـز ولا تهـينـه خساسي
ونرجع كـمـا كـنـا شخوص ومشاكيل *** ويطول راسك يا أبو مشعل وراسي

قال عبدالله بن دهيمش بن عبار هذه القصيده جواب لقصيدة رجاء بن سليمان الكره :

يا رجـاء بـن سليمان يـا بـادع القيـل *** يالقـرم مـن قـافـك تهيّض احساسي
الـهـرج واضـح مـا يـبـي لـه دواليـل *** مـن لـفـظ منطوقـك تـزاود حـماسي
مـا قـلـت فـي قـولـك تدلس وتضليـل *** عـبّـرت عـن مقصـد مـهـم وأساسي
وأن كان شفت الوقت يالكره بـه ميل *** الـوقـت بـظـروف اللـيـالـي ايقـاسي
اليـوم عـصـر الـدردشـه والكشاكـيـل *** وتـوازنـت لـدقـيـقـيـن الـحـسـاســي
نـاس تـجـر غـنـاه يـا عـيـن يـا لـيـل *** والكـل يـرقـص بالمـلاعـيب هـاسـي
ونـاس تجض مـن العـنـا والبهـاديـل *** يـعـوزهـم حـتـى أجـار الـتـكـاســــي
صاروا طمع لأهـل القـلـوب المغاليـل *** وفـات لـضـنـاهـم كـل عـام دراسـي
أن كـان مـا ربـك جـعـلـهـا تـساهـيـل *** قـام يـتـحـكّـم بـأمـرهـم كـل خـاسـي
عـنهم وقـف قطـر المزون المضاليل *** شـح السماء والغـيث جـاه احتباسي
هم بالمحل والـريف عنهم قـدر ميـل *** والكـل قـال مـن الـوهـق زاد يـاسـي
يرجون فـزعـة رب مـوسى وجبريل *** هـو الـذي لـلـخـلـق طـاعـم وكـاسـي
تـعـزز لـحـال الضعـوف الـمـهـازيـل *** ضاعوا مع الطوشه وفرق الجناسي
الحيـص يـوجـد فـي مـراحـه مخاليل *** والنمـر عـقّب في عـريـنـه ابساسي
والـذيـب قـدوتـه الـثعـل طـايل الذيـل *** آلـبـد وخـاف مـن الشيـاه العـواسي
والقصر الـلي فـيـه الـذرى والمقاييل *** لا هـبّـت الـنـكـبـا وهـزّت اضـراسي
مـع الأسف صـارت ركـونـه مساميل *** سوره درس واصبح نهـاره دماسي
دنياك مالـت في شخوص الرجاجيـل *** أهـل الكـرم والجـود حـمـر المواسي
ويـن الـذي يـكـرم الـيـا نـوشح الكيل *** يـوم الشفايا من الـوهـق بـه يباسي
لـه طـبـع تقـليـط الخـراف المهاجيـل *** فـوق الرغايـف بالصحون التبـاسي
بـيـتـه لـدسميـن الشـوارب مـداهـيـل *** وفي مجلسه فنجـال يجـلي عـماسي
مـا داج حـولـه لابـسـيـن الـبـنـاطـيـل *** ولا هـو عـشيـر لمخلـفيـن الكراسي
والعـز الأقعس من نصيـب الـزناقيـل *** ولا يـحـشـم الـلي قـال أعلن افلاسي

صح الله لسان الشاعر سليمان الكره

وصح الله لسانك يابومشعل

مساجلة جزله وابيات معبره من شعار كبار

دمتم بود....

صح الله لسان سليمان الكره

وصح الله لسانك يابومشعل